Цырымонія ўзнагароджання выпускнікоў і выкладчыкаў устаноў вышэйшай адукацыі

Прэзідэнт Беларусі Аляксандр Лукашэнка 28 чэрвеня, напярэдадні Дня Незалежнасці і 80-годдзя вызвалення краіны ад нямецка-фашысцкіх захопнікаў, правёў цырымонію ўзнагароджання выпускнікоў і выкладчыкаў устаноў вышэйшай адукацыі.

"Сёння лёс цалкам заслужана прывёў вас у святую святых палітычнага жыцця краіны - у Палац Незалежнасці, - адзначыў Кіраўнік дзяржавы. - Тут бываюць розныя людзі: высокія замежныя госці, вышэйшыя службовыя асобы, людзі, якія атрымліваюць дзяржаўныя ўзнагароды і навуковыя ступені".

Аляксандр Лукашэнка звярнуў увагу: "Але менавіта ваша прысутнасць прыўносіць у гэтыя палітычныя будні і ўрачыстыя падзеі вельмі асаблівы сэнс. Вы - сімвал будучыні, будучыні роднай Беларусі. Літаральна ўчора вы абаранілі дыпломныя працы і вытрымалі сур'ёзны дзяржаўны экзамен. Бачу па абсалютна ўпэўненых поглядах, што гатовы пацвердзіць прысвоеную вам прафесійную кваліфікацыю. За плячамі вялікая праца, бяссонныя ночы, хваляванне родных і блізкіх".

"А наперадзе не менш складанае, але цікавае жыццё. Складанасць у яго імклівасці. Таму, сустракаючыся з моладдзю, я заўсёды гавару: рабіце ўсё своечасова. Своечасова атрымлівайце адукацыю, удасканальвайце веды, своечасова стварайце сем'і, нараджайце дзяцей. Гэта базавыя складнікі поспеху любога чалавека ", - выказаў меркаванне Аляксандр Лукашэнка.

"Не прыміце за павучанне, ваша права - прыслухацца ці знайсці свой сакрэт поспеху. Абсалютна ўпэўнены, што жыццёвыя прыярытэты вы расстаўляеце правільна. Таму вы тут, дзе не бывае выпадковых людзей", - адзначыў Кіраўнік дзяржавы.

"Бачу ваш патэнцыял, - прадоўжыў Аляксандр Лукашэнка. - Вы ж ужо дасягнулі вялікіх поспехаў і ў вучобе, і ў грамадскім жыцці. Веру, што не за гарамі і новыя дасягненні. Але ўпэўнены, што самы цяжкі шлях вы прайшлі ўжо".

Прэзідэнт пажадаў: "Шчыра жадаю заставацца сабой, кім бы вы ні сталі, якіх кар'ерных вышынь ні дасягнулі б у будучым".

Ён таксама адзначыў: "Настаў ваш час. А ён у прынцыпе не бывае простым. У гэтым сэнс жыцця - не пераадолеўшы цяжкасцей, не спазнаеш і смак гэтага жыцця".

Аляксандр Лукашэнка таксама пажадаў усім дасягнення пастаўленых мэт і рэалізацыі намечаных планаў на карысць роднай Беларусі.

Кіраўнік дзяржавы выказаў удзячнасць выкладчыкам: "Дзякуй вам за працу. Найвялікшая праца. Перш чым увайсці ў аўдыторыю і ўзначаліць навучальны працэс, вы прайшлі каласальны, велізарны шлях. Вы шмат вучыліся, працавалі і прадаўжаеце ўдасканальваць свае кампетэнцыі".

"Таму што ў вашай прафесіі трэба ісці ў нагу з часам і весці за сабой вучняў. Інакш нельга", - адзначыў Прэзідэнт.

Ён пажадаў выкладчыкам сіл, цярпення і гонару за кожнага выхаванца, у якога яны ўклалі сваю душу.

Аляксандр Лукашэнка звярнуў увагу на важнасць таго, што цырымонія ўзнагароджання праходзіць напярэдадні галоўнага дзяржаўнага свята - Дня Незалежнасці, а таксама 80-годдзя вызвалення Беларусі ад нямецка-фашысцкіх захопнікаў.

"Сённяшняя цырымонія ўшаноўвання лепшых выпускнікоў і лепшых выкладчыкаў і ёсць наша з вамі даніна памяці пакаленню пераможцаў, - упэўнены Кіраўнік дзяржавы. - Кожны поспех - гэта ўдзячнасць героям, якія змагаліся і паміралі за мірную будучыню. Мы яе пабудавалі, і мы абавязаны зберагчы гэту будучыню. Мы абавязкова яе зберажом".

Кіраўнік дзяржавы сказаў, што заўсёды хвалюецца, калі сустракаецца з моладдзю. "Заўсёды думаю пра тое, як вы ўспрымаеце нашу палітыку. Ёсць розныя меркаванні, розныя разуменні жыцця, але мая мара ў тым, каб вы правільна ацанілі і правільна ўспрынялі тое, што цяпер адбываецца", - адзначыў беларускі лідар.

"Таму што аснова любога жыцця - не ў разбурэнні, а ў стварэнні. А стварэнне - гэта выкарыстанне ўсяго таго вопыту і дасягненняў, якія выпрацавала чалавецтва да вас, - падкрэсліў Прэзідэнт. - Мы гаварылі сёння шмат пра Беларусь, што многае зрабілі. Мы нешта зрабілі. Зусім няшмат - у параўнанні з тым, што было зроблена да нас".

"Але калі б мы не стаялі на плячах гігантаў, як гаварылі вялікія, калі б не выкарыстоўвалі тое, што да нас было створана, мы сёння і не сустракаліся б з вамі", - заўважыў Аляксандр Лукашэнка.

"Таму шануйце тое, што было створана да вас. Выкарыстоўвайце гэта. Выкарыстоўвайце як фундамент для будаўніцтва не толькі свайго асабістага жыцця, але і дзяржавы ў цэлым. Хоць лёс любой дзяржавы, жыццё любой дзяржавы - гэта жыццё асабіста кожнага з вас", - рэзюмаваў Прэзідэнт.

Аляксандру Лукашэнку на цырымоніі ўзнагароджвання ўручылі падарунак ад выпускнікоў устаноў вышэйшай адукацыі 2024 года - выкананы з нержавеючай сталі і дрэва шматграннік. 

Кожная грань увасабляе гісторыю перамогі нашай дзяржавы ў розных галінах дзейнасці, якія адлюстраваны ў адным шматгранніку, што сімвалізуе адзінства беларускага народа.

Першая шасцівугольная грань сімвалізуе якасць беларускай адукацыі і цягу беларусаў да навукі, другая - дасягненні краіны ў цяжкай і лёгкай прамысловасці, трэцяя - укараненне інавацыйных тэхналогій у сферы сельскай гаспадаркі, чацвёртая - высокія дасягненні беларускіх спартсменаў на міжнародных і сусветных спаборніцтвах, пятая - веды, працэс навучання, стварэнне новага на аснове мудрасці мінулых пакаленняў, шостая - прыродныя сімвалы Беларусі, сёмая - працавітасць беларускіх грамадзян, пераемнасць пакаленняў, восьмая - адзінства людзей розных прафесій.

На пяці чатырохвугольных гранях адлюстраваны дзяржаўны герб і лагатыпы знакавых падзей 2024 года.

Падарункам жа для студэнтаў і выкладчыкаў стала экскурсія па Палацы Незалежнасці, якая адбылася напярэдадні цырымоніі ўзнагароджання.