Урачысты рытуал ушаноўвання дзяржаўных сімвалаў Рэспублікі Беларусь

Традыцыя ўшаноўвання важнейшых сімвалаў суверэннай Беларусі стала сапраўды ўсенароднай. Аб гэтым Прэзідэнт Беларусі Аляксандр Лукашэнка заявіў 12 мая ў Мінску на ўрачыстай цырымоніі ўшаноўвання дзяржаўных сімвалаў у Дзень Дзяржаўнага сцяга, Дзяржаўнага герба і Дзяржаўнага гімна.

"На благадатнай глебе любові да Радзімы гэта традыцыя прарасла ў нашы сэрцы, стаўшы сапраўды ўсенароднай", - падкрэсліў беларускі лідар.

У гэты дзень па ўсёй краіне тысячы юнакоў і дзяўчат прыносяць клятву вернасці дзяржаўным сімвалам. "Гэта знак глыбокай павагі да мінулага - духоўных і маральных каштоўнасцей, завешчаных нам продкамі. Гэта шчырая ўдзячнасць за мірнае і шчаслівае сучаснае, якое забяспечана старэйшым пакаленнем сучаснікаў, - сказаў Аляксандр Лукашэнка. - Але самае галоўнае - гэта дэманстрацыя гатоўнасці ўзяць на сябе адказнасць за лёс сваёй краіны".

Звяртаючыся да прадстаўнікоў моладзі, Прэзідэнт адзначыў, што яны, абапіраючыся на ўсе здзяйсненні, як на моцныя плечы папярэднікаў, прымаюць эстафету ў справе захавання і ўмацавання беларускай дзяржаўнасці, абавязуюцца свята берагчы сімвалы незалежнай краіны.

"Асабіста для мяне гэты дзень напоўнены асаблівым сімвалізмам. Амаль 30 гадоў таму, 14 мая 1995 года, прайшоў першы ў гісторыі суверэннай Беларусі рэферэндум. Тады наш народ вызначыў свой шлях развіцця і залажыў асновы палітыкі беларускай дзяржавы. Гэта моцная прэзідэнцкая ўлада, стратэгічны саюз з Расіяй, аднолькавы дзяржаўны статус беларускай і рускай моў", - сказаў Кіраўнік дзяржавы.

"Не паддаўшыся на пагрозы сучасных калабарантаў, а дакладней сказаць здраднікаў ад палітыкі, захаваўшы вернасць сабе, сваім прынцыпам і ідэалам, сваёй гісторыі, мы разам адстаялі нашы сапраўдныя дзяржаўныя сімвалы. Разам сказалі "не" сімволіцы, якая стала для нас сапраўдным знакам бяды. Наследнікі народа, які перажыў генацыд, уцалеў у канцлагерах і гета, устаў на барацьбу з ворагам у шматлікіх партызанскіх атрадах і падполлі, інакш зрабіць не маглі", - падкрэсліў Аляксандр Лукашэнка.

Такім чынам у 1995-м пераважнай большасцю галасоў беларусы выказаліся за пераемнасць гераічнай сімволікі.

Прэзідэнт Беларусі звярнуў увагу, што ў пераходныя эпохі людзі часта адмаўляюцца ад сімвалаў, якія выказвалі ідэі і каштоўнасці ранейшага сацыяльна-палітычнага ладу. "Але гэта быў не наш шлях. Мы беражліва захоўваем сувязь пакаленняў, прадаўжаем традыцыі нашых продкаў, ганарымся сваёй гісторыяй. У ёй нямала гераічных старонак. Мы ніколі не вілялі, не змянялі той лініі, якую праводзім сёння. Мы і тады, і цяпер верныя традыцыям мінулага. Асабліва ганарымся тым, што дзяржаўныя сімвалы Беларусі ўвасабляюць бяспрыкладную сілу духу і ўклад нашага народа ў Вялікую Перамогу над карычневай чумой. Таксама ў іх - працоўны подзвіг нашых бацькаў і дзядоў, якія нанова адбудавалі рэспубліку на прынцыпах сацыяльнай роўнасці і справядлівасці", - сказаў Аляксандр Лукашэнка.

Сучасныя дзяржаўныя сцяг, герб і гімн таксама ўжо з'яўляюцца сімваламі спартыўных, творчых і працоўных перамог у гісторыі суверэннай Беларусі.

Сцяг Беларусі паднімаўся вучонымі-палярнікамі ў Антарктыдзе, дэсантнікамі - на Паўночным полюсе, альпіністамі - на Эверэсце.

"Тройчы гэты сцяг пабываў у космасе. Спачатку з нашым земляком Алегам Навіцкім. І зусім нядаўна - з першым беларускім касманаўтам - Героем Беларусі Марынай Васілеўскай", - адзначыў Прэзідэнт.

"Сёння сімволіка не толькі аб'ядноўвае, але і выступае крыніцай упэўненасці і ўнутранай сілы. Нашы герб, сцяг і гімн, як і ўся палітыка, натхнёны ідэямі нацыянальнай годнасці і сапраўднага народаўладдзя", - заявіў беларускі лідар.

Аляксандр Лукашэнка адзначыў, што ў розных сферах дзяржаўныя сімвалы сталі часткай жыцця і здзяйсненняў беларускага народа. Напрыклад, хутка ў школах пройдуць урачыстыя лінейкі - пад гукі гімна дзясяткі тысяч выпускнікоў зробяць першыя крокі ў самастойнае жыццё. У аграрыяў завяршылася пасяўная, а наперадзе - уборачная кампанія, у час якой на палі выйдуць тысячы беларускіх камбайнаў. Пад родным сцягам аграрыі здзейсняць свой працоўны подзвіг. Сотні пар рыхтуюцца ўзяць законны шлюб - гербавая пячаць змацуе клятвы любові і вернасці новых сем'яў.

Усё часцей беларускія герб і сцяг можна ўбачыць у вокнах жылых дамоў і аўтамабіляў. А 3 ліпеня ў Дзень Незалежнасці, у які ў бягучым годзе таксама будзе адзначацца 80-годдзе вызвалення Беларусі, мільёны суайчыннікаў напоўняць плошчы гарадоў і вёсак, каб праспяваць гімн разам.

"Людзі ганарацца тым, што яны сапраўдныя беларусы. Гэта і ёсць народнае адзінства. Адзінства, якое змацавана трывалай памяццю аб гераічным подзвігу нашых дзядоў і прадзедаў у Вялікай Айчыннай вайне, патрыятызмам, стваральнай працай і імкненнем да міру. Адзінства, якое сімвалізуюць Дзяржаўны сцяг, Дзяржаўны герб і Дзяржаўны гімн Рэспублікі Беларусь. Адзінства, якое мы абавязаны захаваць, каб зберагчы сваю краіну. Таму што час выбраў нас!" - падкрэсліў Прэзідэнт.

На ўрачыстым мерапрыемстве ў сталіцы ў гэтым годзе сабралася больш за 5,3 тыс. чалавек з усёй краіны. 

Пад гукі Дзяржаўнага гімна ваеннаслужачыя роты ганаровай варты ўнеслі на плошчу Дзяржаўны сцяг (полотнішча памерам 10х5 метраў), які аказаўся ўнутры жывога контуру краіны - сярод артыстаў, якія выстраіліся так, каб паўтарыць абрысы граніцы Беларусі. 

Клятву вернасці дзяржаўным сімвалам на плошчы Дзяржаўнага сцяга вымавілі сямёра хлопцаў і дзяўчат (прадстаўнікі ад кожнай з абласцей і Мінска), а таксама Герой Беларусі Марына Васілеўская.

Ва ўрачыстай абстаноўцы першая беларуская жанчына-касманаўт перадала Прэзідэнту Дзяржаўны сцяг - той самы, які ў 2024 годзе пабываў на МКС, замацаваўшы статус Беларусі як касмічнай дзяржавы. Цяпер гэты дзяржаўны сімвал зойме пачэснае месца ў Палацы Незалежнасці.