Сустрэча з сакратаром партыйнага камітэта Пекінскага ўніверсітэта Хаа Пінам і прадстаўнікамі кітайскіх універсітэтаў

Прэзідэнт Беларусі Аляксандр Лукашэнка 25 чэрвеня сустрэўся з сакратаром партыйнага камітэта Пекінскага ўніверсітэта Хаа Пінам і прадстаўнікамі кітайскіх універсітэтаў.

У сустрэчы ўдзельнічалі кіраўнікі 15 кітайскіх ВНУ, Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Се Сяаюн, а таксама Міністр адукацыі Беларусі Андрэй Іванец і рэктары дзевяці беларускіх ВНУ, у тым ліку рэгіянальных. У ліку ўдзельнікаў - прадстаўнікі Пекінскага, Нанькайскага, Паўднёва-Усходняга, Уханьскага, Цзіліньскага і іншых кітайскіх ВНУ.

Прадстаўнічая кітайская дэлегацыя рэктараў шэрага кітайскіх ВНУ прыбыла ў Мінск для ўдзелу ў Форуме рэктараў устаноў вышэйшай адукацыі Беларусі і Кітая. У праграме - пленарнае пасяджэнне і тэматычныя секцыі, сумесны канцэрт творчых калектываў БДУ і Пекінскага ўніверсітэта, правядзенне двухбаковых перагавораў паміж установамі адукацыі дзвюх краін, наведванне Кітайска-беларускага індустрыяльнага парка "Вялікі камень".

"Падтрымліваю ініцыятыву (ВНУ Беларусі і КНР. - Заўвага) аб стварэнні Цэнтра фундаментальных даследаванняў. Упэўнены, што яго дзейнасць стане новым вітком навукова-тэхнічнага развіцця. І ўлічваючы, што ў нас абсалютна няма закрытых тэм ад нашых сяброў у Кітаі, мы гатовы дзяліцца ў тым ліку і тымі тэхналогіямі, якімі Кітай сёння не валодае. Вы - нашы сябры, вы - нашы браты, вы на нас можаце разлічваць", - адзначыў Прэзідэнт.

Кіраўнік дзяржавы таксама прапанаваў разгледзець магчымасць правядзення ў будучым 2025 годзе ў рамках Дзён дружбы і адзінства БДУ і Пекінскага ўніверсітэта сумеснага маладзёжнага форуму.

"Трэба зрабіць такія форумы штогадовымі з запрашэннем да ўдзелу ў іх студэнтаў з універсітэтаў-партнёраў", - лічыць Аляксандр Лукашэнка.

Ён таксама падзякаваў кітайскаму боку і асабіста Хаа Піну за ўвагу і падтрымку ў рэалізацыі сумеснай адукацыйнай праграмы па спецыяльнасці "біятэхналогія". "Нашы хлопцы і дзяўчаты вельмі задаволены навучаннем па гэтай праграме. Хацелася б, каб такіх праграм было больш. Гэты напрамак для нас вельмі важны, і беларускі бок зацікаўлены распаўсюдзіць гэту праграму на ўзровень магістратуры", - адзначыў Прэзідэнт.

Ён таксама адзначыў важнасць правядзення ў ходзе Форуму рэктараў ВНУ Беларусі і КНР аналізу ўсіх дамоўленасцей па сумесных адукацыйных праграмах. Аляксандр Лукашэнка лічыць важным вызначыць найбольш прыярытэтныя праграмы і пачаць іх рэалізацыю, у тым ліку з прыцягненнем патэнцыялу запланаванага да адкрыцця Цэнтра фундаментальных даследаванняў.

Прэзідэнт выказаў упэўненасць: "Форум рэктараў стане паслядоўным і лагічным працягам актыўнага дыялогу паміж установамі вышэйшай адукацыі дзвюх краін".

"Усе дасягнутыя дамоўленасці ўмацуюць наша супрацоўніцтва і паслужаць агульнай справе ў інтэграцыі з Вялікім Кітаем", - заявіў Кіраўнік дзяржавы.

Аляксандр Лукашэнка звярнуў увагу, што ў Беларусі ёсць значны вопыт і кампетэнцыі ў многіх сферах.

Прэзідэнт выказаў упэўненасць: "Сёння нам трэба паскорыць такое супрацоўніцтва. У гэтым залог нашага навуковага суверэнітэту і забеспячэння паспяховага імпартазамяшчэння".

Аляксандр Лукашэнка адзначыў, што такой прадстаўнічай дэлегацыі рэктараў топавых устаноў вышэйшай адукацыі Кітайскай Народнай Рэспублікі ў Беларусі яшчэ не было. "Гэта наглядны прыклад высокага ўзроўню адносін паміж Беларуссю і Кітаем, індыкатар набіраючага абароты супрацоўніцтва не толькі ў эканоміцы, але і ў навуцы, адукацыі, культуры і іншых напрамках", - адзначыў Кіраўнік дзяржавы.

Прэзідэнт таксама падкрэсліў: "Наколькі я інфармаваны, праграма закранае пытанні пашырэння студэнцкіх абменаў, камунікацыі моладзі і развіцця ўзаемадзеяння паміж універсітэтамі. Плануецца таксама падпісанне пагаднення аб абмене навучэнцамі і ініцыятывы аб супрацоўніцтве ў галіне фундаментальных навуковых даследаванняў".

Аляксандр Лукашэнка лічыць, што гэта стане добрым дапаўненнем да дамоўленасцей, якія дасягнуты і дзейнічаюць паміж ВНУ дзвюх краін.

Прэзідэнт заявіў: "Рэспубліка Беларусь зацікаўлена ў далейшым развіцці партнёрскіх адносін з Кітаем па ўсіх напрамках адукацыйнай сферы".

Кіраўнік дзяржавы таксама падкрэсліў, што равіццё супрацоўніцтва асабліва важна сёння, калі Беларусь рэалізуе сумесна з кітайскімі сябрамі суперсучасныя праекты ў галіне біятэхналогій, хімічнай і перапрацоўчай прамысловасці, вытворчасці беспілотных лятальных апаратаў і электрамабіляў.

Аляксандр Лукашэнка пажадаў кітайскім гасцям: "Няхай ваша знаходжанне ў Беларусі будзе напоўнена яркімі ўражаннямі і незабыўнымі эмоцыямі ад сустрэч з нашымі людзьмі, знаёмства з багатай гістарычнай спадчынай і самабытнай культурай беларускага народа. Упэўнены, што тут вы знойдзеце шчырых сяброў і з задавальненнем у далейшым будзеце наведваць нашу прыгожую і ўтульную краіну. Я абавязкова прашу вас прыязджаць у Беларусь. Вы пазнаёміліся з Беларуссю, калі будзеце прыязджаць часцей да нас, я буду лічыць, што вам спадабалася. Мы заўсёды гатовы з вамі сустракацца на любым узроўні".

Прэзідэнт запрасіў усіх удзельнікаў гэтай сустрэчы пачаць абмеркаванне найбольш важных праблем і пытанняў, якія ёсць сёння паміж Кітаем і Беларуссю. "Калі ў вас будуць да мяне нейкія пытанні - эканамічнага, палітычнага характару, я вам абяцаю, што адкрыта і ўсёабдымна пастараюся адказаць на іх", - падкрэсліў Аляксандр Лукашэнка.

Звяртаючыся да Хаа Піна, Кіраўнік дзяржавы адзначыў: "Прайшло нямала часу, як мы сустракаліся ў Кітаі. У нас ёсць шмат добрых гуманітарных праектаў, у тым ліку і ў спорце, якія мы рэалізуем і ў сферы культуры, можа, пачынаючы з Пекінскага ўніверсітэта, а потым мы практыку гэту распаўсюдзім на вашых калег, якія тут прысутнічаюць".

"Мы будзем рады, калі будзем запатрабаваны ў гэтай гіганцкай, перспектыўнай дзяржаве, якая хутка развіваецца. Мы радуемся вашым поспехам як самыя добрыя і блізкія вам людзі. Таму я гатовы да размовы на любую тэму і да прыняцця н?абходных рашэнняў", - рэзюмаваў Прэзідэнт.

Аляксандр Лукашэнка адзначыў актыўнае супрацоўніцтва краін у палітыцы і эканоміцы. "Думаю, настаў час падцягнуць і адукацыю, і навуку", - сказаў ён.

Кіраўнік дзяржавы прапанаваў падняць гэта супрацоўніцтва на новы ўзровень, развіваючы кантакты не проста паміж ВНУ.

"Давайце падумаем не проста аб супрацоўніцтве "ўніверсітэт з універсітэтам", але давайце падумаем аб стварэнні глабальнай пляцоўкі - адукацыйнай і навуковай - у Беларусі ў мэтах распаўсюджвання адукацыі, навукі, культуры на Еўрапейскі кантынент. Мы гатовы адыграць тут сур'ёзную ролю. Так, мы ідзём крок за крокам, рэалізуючы тыя ці іншыя праекты, але цяпер вельмі вялікую ролю адыгрывае час. Трэба рабіць усё хутка для таго, каб быць лідарам, дабіцца рэзультатаў", - сказаў ён.

Аляксандр Лукашэнка запэўніў, што кітайскі бок можа поўнасцю разлічваць на Беларусь у развіцці супрацоўніцтва, уключаючы сферы адукацыі і навукі. Ён дадаў, што ў час яго візіту ў Кітай у снежні 2023 года гэта тэма вельмі сур'ёзна абмяркоўвалася на перагаворах са Старшынёй КНР Сі Цзіньпінам.

"І мы дамовіліся са спадаром Сі Цзіньпінам, што калі Кітаю трэба, выкарыстоўвайце Беларусь у пашырэнні сваіх інтарэсаў у Еўропе, - прапанаваў беларускі лідар. - Без Еўропы Кітай існаваць не можа. Кітай - гіганцкая краіна, вызначае пагоду ў свеце. Таму яна павінна супрацоўнічаць з асноўнымі цэнтрамі апоры нашай планеты - ЗША, Еўрасаюзам, Расіяй, Індыяй, іншымі краінамі. Таму мы гатовы аказваць вам усялякую падтрымку ў вашых інтарэсах пры пашырэнні іх у Еўрапейскім саюзе. Нямала ў гэтым напрамку зроблена".

Аляксандр Лукашэнка падкрэсліў, што даўно знаёмы з Сі Цзіньпінам, яшчэ да таго, як ён стаў на чале краіны. "Ён прыязджаў у Мінск. Мы з ім доўга і шмат абмяркоўвалі міжнародныя праблемы, становішча нашых краін у сістэме каардынат. І тады я яму сказаў, што Кітай хутка стане дзяржавай, якая будзе вызначаць пагоду ў свеце. Сёння ўжо ніхто ў гэтым не сумняваецца", - адзначыў Прэзідэнт.

Кіраўнік дзяржавы нагадаў, што, яшчэ з'яўляючыся дэпутатам, наведваў Кітай і гаварыў аб вялікай будучыні для гэтай краіны. Тады ў гэта практычна ніхто не верыў, але час паказаў, што Аляксандр Лукашэнка меў рацыю.

"З тых часоў, калі я стаў Прэзідэнтам, ужо тры дзясяткі гадоў, мы старанна, акуратна, цаглінка за цаглінкай выбудоўваем будынак нашай сумеснай дружбы. Падтрымліваем добрыя адносіны з кіраўніцтвам КНР. Вы вельмі шмат інвесціруеце ў Беларусь па тых напрамках, дзе ў нас няма тэхналогіі, ствараеце ў нас прадпрыемствы, якіх усяго ў свеце 4-5. Накшталт Беларускай нацыянальнай біятэхналагічнай карпарацыі (БНБК) - гэта адно з вядучых прадпрыемстваў. Мы пастаянна пашыраем дзейнасць гэтай кампаніі. Вельмі шмат Кітай нам дапамагае ў галіне абароны і бяспекі. Гэта не сакрэт. Мы па многіх пытаннях працуем разам", - дадаў беларускі лідар.

Аляксандр Лукашэнка анансаваў значныя праекты па супрацоўніцтве з КНР у сферах культуры і спорту. 

"Мы вельмі цэнім гэты візіт яшчэ і таму, што ён праходзіць напярэдадні 80-годдзя вызвалення Беларусі ад фашыстаў. Заўсёды ў ваенным парадзе ў нас прымалі ўдзел ваенныя прадстаўнікі КНР. Мы вельмі ўдзячныя вам за тое, што вы заўсёды адклікаецеся на нашы просьбы і прымаеце ўдзел у розных культурных мерапрыемствах. Мы ў даўгу не застанёмся. Мы рыхтуем вельмі сур'ёзную праграму, з якой наша моладзь прыедзе ў Кітай і прадставіць не толькі беларускую, але і ўсю славянскую культуру ў Кітайскай Народнай Рэспубліцы. Думаю, ужо ў бліжэйшы час мы гэта зробім", - сказаў беларускі лідар.

Што датычыцца спорту, Аляксандр Лукашэнка заявіў аб імкненні як мага хутчэй рэалізаваць праект, аб якім бакі дамовіліся ў час яго наведвання Пекінскага ўніверсітэта ў снежні 2023 года.

"Мы дамаўляліся пабудаваць спартыўны цэнтр пры Пекінскім універсітэце з дапамогай Беларусі. Я перакананы, што знайду час, каб яшчэ раз прыехаць да вас і прадставіць беларускі спорт, у тым ліку і хакей, на больш высокім узроўні. Мы хочам з вамі супрацоўнічаць. Мы хочам, каб кітайцы гулялі ў хакей на ўзроўні сусветных каманд, хоць вы пачалі ўжо гэтым займацца вельмі сур'ёзна, удзельнічаеце ў КХЛ. Мы разам гуляем з вамі ў гэтай лізе", - адзначыў Прэзідэнт.

"Мы хацелі б пакінуць свой больш сур'ёзны след у развіцці і культуры, і спорту ў КНР", - дадаў Аляксандр Лукашэнка.

Прэзідэнт нагадаў, што бакі ўжо рэалізавалі многія праекты ў сферы архітэктуры і горадабудаўніцтва: "Гаворачы пра Мінск, вы павінны ведаць, што ў свой час мы дамовіліся з Сі Цзіньпінам (Старшынёй КНР. - Заўвага) аб тым, што кітайцы пабудуюць у нас добрую гасцініцу і кітайскі квартал. Яны гэта рэалізавалі. У нас зусім недалёка ад Палаца Незалежнасці ёсць кітайскі квартал, пабудаваны вашымі будаўнікамі. І гасцініца "Пекін".

Цяпер у Мінску кітайскім бокам вядзецца будаўніцтва двух вялікіх спартыўных збудаванняў. "Па гуманітарнай лініі вы ў нас будуеце стадыён і басейн. У бягучым годзе мы завершым гэта будаўніцтва", - адзначыў Аляксандр Лукашэнка.

Ён таксама расказаў аб прапанове пабудаваць з удзелам кітайскіх спецыялістаў яшчэ адзін знакавы для сталіцы і ўсёй Беларусі аб'ект: "Мы з вамі хочам дамовіцца аб тым, каб вы нам дапамаглі, асабліва пры планаванні архітэктуры, пабудаваць падобны на кітайскі музей гісторыі Беларусі. Мы ўжо з вашымі спецыялістамі супрацоўнічаем. Гэта будзе зусім побач. Ён упрыгожыць наш Мінск".

"Гэта значыць, задумы ў нас вялікія. І ў эканоміцы, і ў палітыцы. Мы заўсёды будзем для вас надзейнымі сябрамі", - рэзюмаваў беларускі лідар.