Вытворчасць прадуктаў харчавання і напіткаў, тытунёвых вырабаў

Забеспячэнне харчовай бяспекі краіны і экспарт высакаякаснай прадукцыі пад маркай "Зроблена ў Беларусі". Гэтыя дзве важнейшыя задачы, якія пастаўлены Кіраўніком дзяржавы літаральна з першых дзён прэзідэнцтва і пастаянна знаходзяцца на яго кантролі, далі магутны штуршок развіццю харчовай прамысловасці краіны.

Рэспубліка Беларусь - адзін з вядучых сусветных экспарцёраў прадуктаў харчавання. Займае самыя высокія месцы па пастаўках асобных іх відаў. Па выніках 2022 года: сёмае месца - па экспарце масла сметанковага, дзясятае месца ў свеце - па экспарце сухога абястлушчанага малака, восьмае месца - па экспарце сыроў і тварагу, дванаццатае - па экспарце сухога натуральнага малака.

За 2021 год экспарт сельскагаспадарчай прадукцыі і прадуктаў харчавання склаў $6,7 млрд, а доля гэтай прадукцыі ў агульным аб'ёме экспарту Беларусі склала 16,7%.

Безумоўна, у поўнай меры забяспечваюцца і патрэбнасці ўнутранага рынку. Найбольш шырока прадстаўлена прадукцыя з малака і мяса. Асартымент мясной прамысловасці - каля 1000 найменняў, малочнай - больш за 1500 найменняў прадукцыі. З улікам кан'юнктуры рынку, запатрабаванняў спажыўцоў, эканамічнай сітуацыі асартымент пастаянна абнаўляецца і пашыраецца.

Флагманамі ў вытворчасці прадуктаў харчавання і напіткаў, тытунёвых вырабаў з'яўляюцца арганізацыі Мінсельгасхарча і канцэрна "Белдзяржхарчпрам". У іх склад уваходзяць буйнейшыя прадпрыемствы мясной і малочнай, кандытарскай, цукровай, кансервавай, алкагольнай, алейнатлушчавай і іншых галін краіны.

Прадукцыя, якую атрымлівае беларускі спажывец, вызначаецца шырокім асартыментам і самай высокай якасцю. Менавіта гэтыя арыенціры адкрываюць айчыннаму вытворцу новыя магчымасці ва ўсё больш моцным канкурэнтным акружэнні.

Не раз прадукцыя айчынных арганізацый харчовай прамысловасці адзначалася ўзнагародамі на нацыянальных і міжнародных выстаўках.