Сустрэча з Прэм'ер-міністрам Азербайджана Алі Асадавым

Прэзідэнт Беларусі Аляксандр Лукашэнка 3 кастрычніка правёў сустрэчу з Прэм'ер-міністрам Азербайджана Алі Асадавым.

"Нягледзячы на розныя перыпетыі на міжнароднай арэне, па нашых адносінах, Беларусі і Азербайджана, Вы і мой сябар, мой вельмі блізкі сябар і брат Ільхам Гейдаравіч (Аліеў, Прэзідэнт Азербайджана. - Заўвага) павінны ведаць, што закрытых тэм у адносінах паміж Беларуссю і Азербайджанам няма, - падкрэсліў Кіраўнік дзяржавы. - Пры гэтым мы не парушаем ніякія нормы міжнароднага права, мы не дружым супраць трэціх краін, мы робім сваю справу ў імя нашых народаў".

Прэзідэнт адзначыў, што цёплыя адносіны паміж дзвюма краінамі склаліся яшчэ з часоў кіраўніцтва Азербайджанам Гейдара Аліева: "Мы былі вельмі дружныя, мы заўсёды знаходзілі паразуменне і падтрымку. І я часта Ільхаму Гейдаравічу, цяперашняму Прэзідэнту, гавару: дзякуй Богу, што нам удалося захаваць той узровень адносін, які быў у нас з яго бацькам".

"Таму калі ласка ў Беларусь. Вы для нас блізкі чалавек, Вы прадстаўляеце вельмі блізкую краіну", - дадаў Аляксандр Лукашэнка. Прэзідэнт звярнуў увагу, што Азербайджан адносіцца да ліку найбольш блізкіх для Беларусі краін разам з Расіяй.

Кіраўнік дзяржавы адзначыў неабходнасць рэалізацыі дамоўленасцей, дасягнутых паміж бакамі ў час дзяржаўнага візіту Аляксандра Лукашэнкі ў Азербайджан у маі 2024 года. Гэта тэма, як расказаў Прэзідэнт, абмяркоўвалася ім напярэдадні з Прэм'ер-міністрам Беларусі Раманам Галоўчанкам з акцэнтам на эканамічных аспектах двухбаковых адносін: "Ніякіх праблем няма. Адзінае, што ён сказаў: "Пажадана, каб хутчэй". Гэта добра, што ва Урадзе Прэм'ер-міністр разумее, што трэба сёння як мага хутчэй, таму што час такі".

"Калі ў выніку сённяшняга візіту і вашага знаходжання ў Беларусі мы знойдзем магчымасць паскорыцца, мы абавязкова паскорымся. Мы як прэзідэнты перашкаджаць гэтаму не будзем", - запэўніў беларускі лідар.

Аляксандр Лукашэнка таксама звярнуў увагу на наяўнасць узаемнай падтрымкі Беларусі і Азербайджана на міжнародных пляцоўках. "У нас праблем няма, мы падтрымліваем адзін аднаго, падтрымлівалі і будзем падтрымліваць. Я вельмі ўдзячны Ураду Азербайджана і Прэзідэнту за тую каласальную падтрымку, якую яны нам аказваюць", - сказаў Кіраўнік дзяржавы.

"Нашы адносіны - гэта добрае перапляценне міждзяржаўных і асабістых адносін. Нашы асабістыя адносіны ўплецены ў тканіну міждзяржаўных адносін, і гэта садзейнічае таму ўзроўню, які мы маем па ўзаемаадносінах, - падкрэсліў Аляксандр Лукашэнка. - Скажыце, што мы можам зрабіць для Азербайджана, мы ўсё зробім. Так было да гэтага часу, так будзе і далей. Упэўнены, што і Азербайджан зробіць для нас усё, на што ён здольны. Таму што так было заўсёды".

У сваю чаргу Алі Асадаў падзякаваў за магчымасць сустрэчы. "Для мяне і для нашай дэлегацыі гэта вялікі гонар", - сказаў ён.

Прэм'ер-міністр перадаў Аляксандру Лукашэнку прывітанне і найлепшыя пажаданні ад Прэзідэнта Азербайджана Ільхама Аліева: "Ён даручыў мне перадаць сяброўскае і брацкае прывітанне".

Алі Асадаў падкрэсліў, што паміж Беларуссю і Азербайджанам гістарычна склаліся дружалюбныя адносіны, і Прэзідэнт Азербайджана надае ім асаблівае значэнне. Важна таксама, што добрыя адносіны склаліся і на ўзроўні лідараў краін.

"Мы, члены ўрадаў, абавязаны і з вялікім задавальненнем выконваем тое даручэнне, якое паставілі перад намі нашы кіраўнікі", - заявіў Прэм'ер-міністр.

Ён нагадаў, што па выніках дзяржаўнага візіту Прэзідэнта Беларусі ў Азербайджан у маі бягучага года кіраўнікамі дзяржаў перад урадамі быў пастаўлены шэраг задач, якія цяпер з'яўляюцца дарожнай картай для сумеснай работы. "Мы прыехалі ў Беларусь з вялікай дэлегацыяй", - адзначыў Алі Асадаў.

Прэм'ер-міністр ад імя Прэзідэнта Азербайджана таксама аднавіў запрашэнне Аляксандру Лукашэнку наведаць Канферэнцыю бакоў Рамачнай канвенцыі ААН аб змяненні клімату (COP29), якая адбудзецца ў лістападзе бягучага года ў Баку.

"Калі Ільхам гаворыць, значыць, будзем", - сказаў Прэзідэнт Беларусі.

"Мы вялікае значэннем надаём Вашаму асабістаму ўдзелу, які гэтай канферэнцыі надасць асаблівы статус", - падкрэсліў Алі Асадаў.