Сустрэча з перадавікамі ўборачнай кампаніі ў Мінскім раёне

Прэзідэнт Беларусі Аляксандр Лукашэнка 13 жніўня ў Мінскім раёне сустрэўся з перадавікамі жніва, якія дасягнулі высокіх паказчыкаў у час уборачнай кампаніі.

Поле, на якім пабываў Кіраўнік дзяржавы, належыць агракамбінату "Ждановічы" Мінскага раёна. Аляксандр Лукашэнка дэталёва пацікавіўся станам спраў у кіраўніка прадпрыемства Рыгора Чуйко. Паводле яго слоў, зямель у гаспадарцы хапае, але "горад усё роўна падступае". У сувязі з гэтым Прэзідэнт зноў закрануў пытанне аб недапушчальнасці жылой забудовы на землях сельгаспрызначэння. "Трэба нам ушчыльняцца і ісці з будоўлямі ў пустыя месцы, пятачкі. Унутры Мінска - калі ласка, шмат месцаў, дзе будуем", - падкрэсліў ён.

Прэзідэнт адзначыў, што дзяржава шырока падтрымлівае аграпрамысловы комплекс, прадастаўляючы розныя льготы і аказваючы дапамогу з закупкай мінеральных угнаенняў, паліва, тэхнікі і іншых неабходных сродкаў. Разам з тым ён прапанаваў сур'ёзна падумаць над тым, калі сапраўды трэба выдзяляць сродкі з бюджэту, а калі ў гэтым няма неабходнасці. "Усё даціруем і даціруем з бюджэту. Нам трэба сур'ёзна падумаць у сельскай гаспадарцы, каб за кожны віск і піск парасяці мы грошы не плацілі. Гэта бізнес", - падкрэсліў Аляксандр Лукашэнка.

Кіраўнік дзяржавы прапанаваў знайсці больш выбіральны падыход у прадастаўленні датацый сельскай гаспадарцы: укладзеныя грошы павінны даваць адпаведную аддачу. Пры гэтым размовы аб тым, што трэба поўнасцю адмовіцца ад датацый, не ідзе. "Недзе трэба дапамагаць, а то будзе, як у Заходняй Еўропе: перасталі дапамагаць - і сельская гаспадарка абвалілася", - дадаў ён.

На полі агракамбіната "Ждановічы" Прэзідэнту ўручылі падарунак - сімвалічны сноп з нагоды намалоту 2 млн т збожжа ў Мінскай вобласці. Аднак Аляксандр Лукашэнка падкрэсліў, што спыняцца на гэтым ні ў якім разе не трэба.

"З прыцэлам на тры мільёны", - сказаў ён, прымаючы падарунак.

Размаўляючы з перадавікамі, Прэзідэнт выказаў ім падзяку за выдатную работу ў час жніва. Пры гэтым ён адзначыў: такіх людзей павінна быць значна больш. У сувязі з гэтым Кіраўнік дзяржавы звярнуўся з просьбай да перадавікоў: дзяліцца вопытам і рыхтаваць не менш дастойную змену.

"Падумайце, як дапамагчы. Будзе ў нас дзясятак чатырохтысячнікаў і адзін васьмітысячнік, але гэтага мала. Трэба, каб такіх сотня была, дзве сотні, каб ірваліся ў бой, - падкрэсліў Прэзідэнт. - Дапамажыце нам стварыць рэзерв маладых людзей. З боку дзяржавы будзе падтрымка і дапамога ў гэтым плане".

Як далажыў Кіраўніку дзяржавы старшыня Мінскага аблвыканкама Аляксей Кушнарэнка, у цэнтральным рэгіёне ствараецца клуб перадавікоў жніва "Залаты колас", куды ўвойдуць механізатары, якія намалацілі больш за 4 тыс. т. Пры ім будзе дзейнічаць школа маладых камбайнераў "Каласок".

У ліку перадавікоў - Павел Шуціла, які працуе ў ААТ "Кухчыцы" Клецкага раёна. У пачатку жніўня ён першым у Беларусі намалаціў 4 тыс. т збожжа, а на сёння пераадолеў адзнаку 5 тыс. т. Высокі паказчык дасягнуты на айчынным камбайне вытворчасці "Гомсельмаша".

Камбайнер з Клецкага раёна рэгулярна дабіваецца высокіх вынікаў ва ўборцы ўраджаю на тэхніцы беларускай вытворчасці. У 2024 годзе Павел Шуціла намалаціў 3,2 тыс. т збожжа, а ў 2025-м увогуле пераадолеў адзнаку 8,4 тыс. т, стаўшы адным з галоўных герояў жніва.

Звяртаючыся да механізатара, Кіраўнік дзяржавы падзяліўся гісторыяй з вопыту работы кіраўніком у сельскай гаспадарцы. На прадпрыемстве працавалі каля 20 камбайнераў, іх сумарны намалот складаў каля 4 тыс. т збожжа ў год. У той жа час Павел Шуціла ў мінулым годзе намалаціў больш за 8 тыс. т у адзіночку. Але і тэхніка ў дзевяностыя гады была іншай па якасці і магутнасці.

У сувязі з гэтым Прэзідэнт удакладніў у Паўла Шуцілы, што трэба дапрацаваць у айчынным камбайне. Паводле слоў механізатара, машына добрая і абсталявана ўсімі неабходнымі выгодамі. "Вы заўсёды павінны мне гаварыць праўду пра аўтамабілі і камбайны: што трэба дапрацаваць? Машыны добрыя, знешне падобныя да лепшых сусветных узораў, - сказаў Аляксандр Лукашэнка. - Але цяпер нам трэба дапрацаваць якасць, каб ідэальна было і мне не гаварылі, што трэба купіць CLAAS або John Deer, таму што "Гомсельмаш" недацягвае. А я цяпер прывожу прыклад: вось Павел працуе, дацягвае. Ні CLAAS, ні John Deere не спраўляюцца".

Раней Кіраўнік дзяржавы ўжо адзначаў поспехі камбайнера. На другім пасяджэнні VII Усебеларускага народнага сходу Аляксандр Лукашэнка назваў Паўла Шуцілу героем. "Тут хлопец - герой - сядзіць. Восем з лішнім тысяч тон намалаціў!" - сказаў тады Прэзідэнт. Заслугам механізатара, які быў у ліку ўдзельнікаў УНС, апладзіравала ўся зала.

Высокіх паказчыкаў дасягнуў і Віталь Кішко, які працуе ў гэтай жа гаспадарцы - на адвозе ўраджаю. За бягучую ўборачную кампанію ён перавёз ужо больш за 6,1 тыс. т збожжавых, зернебабовых і рапсу, пабіўшы свае ранейшыя рэкорды. У мінулым годзе Віталь Кішко перавёз больш за 4,6 тыс. т ураджаю, у 2024-м - больш за 4,2 тыс. т. 

Яшчэ адзін работнік ААТ "Кухчыцы" Андрэй Аляксейчык у мінулым годзе перавёз 7,7 тыс. т збожжа. У гэтым годзе ён удзельнічае ў жніве як адказны спецыяліст за арганізацыю ўборачнай.

Прэзідэнт таксама падзякаваў дырэктару ААТ "Кухчыцы" Сяргею Здроку, пад кіраўніцтвам якога працуюць перадавікі ўборачнай. Кіраўнік сельгаспрадпрыемства запэўніў Кіраўніка дзяржавы, што вопытныя камбайнеры і вадзіцелі перадаюць вопыт маладым аграрыям.

У знак удзячнасці за высокія паказчыкі Аляксандр Лукашэнка падарыў перадавікам жніва аўтамабілі Belgee. "Мужыкі, я вам вельмі ўдзячны за тое, што вы робіце. Як гэта: Прэзідэнт сустрэнецца з лепшымі людзьмі аграрнага сектара і не падзякуе ім за работу? - задаў рытарычнае пытанне Аляксандр Лукашэнка. - Вы заслужылі гэта".

На заканчэнне перадавікі жніва зрабілі агульнае фота з Кіраўніком дзяржавы.