Урачысты сход, прысвечаны 30-годдзю з дня ўтварэння Службы бяспекі Прэзідэнта

Кіраўнік дзяржавы Аляксандр Лукашэнка 25 кастрычніка прыняў удзел ва ўрачыстым сходзе, прысвечаным 30-годдзю з дня ўтварэння Службы бяспекі Прэзідэнта Беларусі.

Вітаючы ўдзельнікаў мерапрыемства, Аляксандр Лукашэнка заўважыў, што гэта той вельмі рэдкі выпадак, калі пераважная большасць супрацоўнікаў Службы бяспекі Прэзідэнта Беларусь сабралася ў якасці гасцей, а не знаходзіцца на баявым дзяжурстве.

Кіраўнік дзяржавы нагадаў, што Служба бяспекі, як і многія дзяржструктуры, створана 30 гадоў таму. Прэзідэнт падкрэсліў, што гэта быў вельмі складаны перыяд ліхіх дзевяностых. А ў цяжкія часы, як вядома, патрэбны былі моцныя людзі, бо іншыя проста не справіліся б з задачамі, якія стаялі перад краінай.

"Пасля першых прэзідэнцкіх выбараў перада мной рубам паўстала пытанне аб тым, як павінен быў выглядаць сілавы блок краіны, - прадоўжыў Аляксандр Лукашэнка. - І каму даверыць бяспеку вышэйшых службовых асоб Беларусі, спецыяльных аб'ектаў і высокіх замежных гасцей на тэрыторыі Беларусі".

"Таму ў першы склад Службы бяспекі Прэзідэнта адбіралі лепшых з сілавых структур, - прадоўжыў Кіраўнік дзяржавы. - Патрэбны былі не проста прафесіяналы ў пагонах. А, па-першае, беззапаветна адданыя сваёй краіне афіцэры, разумныя і адказныя патрыёты, якія выконваюць воінскі абавязак і не здрадзяць за 30 срэбранікаў. Прыйшлі лепшыя з лепшых. Такая практыка захоўваецца да гэтага часу".

І камандзірам, і радавым супрацоўнікам тады давялося адразу ж уключыцца ў работу, а паралельна шмат і многаму вучыцца.

Прэзідэнт звярнуў увагу, што Служба бяспекі цяпер аснашчана самымі сучаснымі тэхнікай, зброяй, сродкамі абароны і з'яўляецца адным з найбольш баяздольных і падрыхтаваных воінскіх фарміраванняў. "Я хацеў бы, каб самыя былі баяздольныя і падрыхтаваныя", - заўважыў Кіраўнік дзяржавы.

"Вы вельмі важнае, надзейнае звяно ў сістэме нацыянальнай бяспекі, - заявіў беларускі лідар. - Нездарма ваш дэвіз - "Служба без права на памылку" (сапраўды, права на памылку ў вас няма). Так, вашы поспехі часцей за ўсё так і застаюцца пад грыфам "сакрэтна". Вы павінны быць эфектыўныя і непрыкметныя".

Такое служэнне Радзіме не кожнаму пад сілу, заўважыў Прэзідэнт. Не многія рызыкнуць выбраць такі прафесійны шлях, дзе трэба быць пастаянна ў гатоўнасці, пастаянна гатовымі да дзеяння. "Любы з вас у выпадку надзвычайных абставін закрые сабой не толькі асобу, якую ахоўвае, але і мірных грамадзян, жанчын, старых, дзяцей, у рэшце рэшт, - сваю краіну. Гэта і ёсць найвышэйшая духоўна-маральная місія сапраўднага абаронцы".

"Цяпер, калі ў свеце поўна гарачых канфліктаў, калі мяняецца архітэктура бяспекі, а рызыкі і пагрозы толькі ўзрастаюць, добра відаць крызіс і ў рабоце спецслужбаў многіх дзяржаў", - адзначыў Аляксандр Лукашэнка.

Кіраўнік дзяржавы нагадаў, што толькі за гэты год у ЗША неаднаразова рабілі замах на экс-прэзідэнта і ўдзельніка цяперашняй электаральнай гонкі Дональда Трампа, а ў прэм'ер-міністра Славакіі Роберта Фіца ўсадзілі некалькі куль на мітынгу, прычым у прысутнасці асабістай службы аховы.

"Таму самая вялікая каштоўнасць Службы бяспекі - воінскі калектыў", - падкрэсліў Прэзідэнт.

Аляксандр Лукашэнка адзначыў, што супрацоўнікі Службы бяспекі Прэзідэнта - гэта не проста прафесіяналы, як паказалі мінулыя 30 гадоў. "Вы павінны быць рэзервам для любых галін, не толькі ваенных. І прадаўжаеце служыць краіне і народу нават пасля звальнення ў запас. У розных арганізацыях. Выдатна зарэкамендавалі сябе на адказных дзяржаўных пасадах, у тым ліку высокіх. Так будзе і далей", - заявіў беларускі лідар.

"Ды і ў цэлым, мне здаецца, няма такой работы, з якой не справіўся б наш супрацоўнік, былы або дзеючы. Праўда, кажуць, былых жа не бывае. Я ўсім вам за гэта ўдзячны. Як Прэзідэнт і як чалавек, - сказаў Кіраўнік дзяржавы. - Я абсалютна перакананы, вы і далей з гонарам будзеце несці высокае званне супрацоўніка Службы бяспекі і што Беларусь заўсёды будзе пад вашай надзейнай абаронай. Час выбраў нас не выпадкова".

Прэзідэнт падзякаваў за службу ўсім ветэранам і цяперашнім ваеннаслужачым, уручыўшы супрацоўнікам, якія найбольш вызначыліся, дзяржаўныя ўзнагароды. Аляксандр Лукашэнка пажадаў ім моцнага здароўя і новых прафесійных поспехаў. А іх родным - шчасця, невычэрпных душэўных сіл і цярпення, бо многія перамогі куюцца ў тым ліку і ў тыле, заўважыў Кіраўнік дзяржавы.

Павіншаваўшы ваеннаслужачых, Прэзідэнт звярнуўся да іх з наказам: "У вас павінна быць дакладная арганізацыя, дысцыпліна і сістэма. Калі ў нечым у вас няма сістэмы, вы яе стварыце. Але сістэма павінна быць заўсёды. Каб было відаць, што гэта афіцэры самага элітнага падраздзялення ў нашай краіне. Дакладнасць і сістэмнасць, прадуманасць - гэта галоўнае ў вашай службе".

Аляксандр Лукашэнка адзначыў, што супрацоўнікі Службы бяспекі - самыя падрыхтаваныя байцы з выдатнай фізічнай падрыхтоўкай і дасканалым валоданнем зброяй. "Але перш, чым ісці, бегчы, страляць, вы павінны думаць. Вы павінны думаць і выбудоўваць дакладную сістэму. У гэтым адрозненне вас ад звычайных ваенных", - яшчэ раз звярнуў увагу Кіраўнік дзяржавы.

"Час складаны. Я ўсё раблю для таго, каб нам не давялося браць у рукі зброю, каб страляць. Толькі ў вучэбных мэтах. Але калі будзе складана, вы павінны ведаць, што мы пойдзем наперадзе. Вы пойдзеце наперадзе, у тым ліку і Прэзідэнт. Такое наша жыццё. Але давайце будзем рабіць усё, каб гэтага не здарылася", - сказаў беларускі лідар.

"Я нездарма сказаў, што былых супрацоўнікаў Службы бяспекі, спецпадраздзяленняў не бывае. Вы да канца свайго жыцця, як і Прэзідэнт, павінны быць у страі. Таму тыя, хто завяршае або завершыць у будучым сваю частку жыцця ў ваенных адносінах, лепшыя з лепшых з вас будуць накіраваны на працоўны грамадзянскі фронт, дзе вы будзеце выконваць сваю місію. Заўсёды да гэтага сябе рыхтуйце, - дадаў Прэзідэнт. - А калі нехта вырашыць застацца ваенным, я буду гэта толькі вітаць".

Начальнік Службы бяспекі Прэзідэнта Дзмітрый Шахраеў у сваю чаргу падзякаваў Аляксандру Лукашэнку за падтрымку, якая аказваецца падраздзяленню, і ўручыў кіраўніку дзяржавы юбілейны медаль у гонар 30-годдзя Службы бяспекі.