Урачыстая цырымонія ўшаноўвання аграрыяў фестывалю-кірмашу "Дажынкі-2024" у Мікашэвічах

Менавіта селянін выратаваў краіну ў складаныя 90-я гады ХХ стагоддзя. Аб гэтым Прэзідэнт Беларусі Аляксандр Лукашэнка заявіў 5 кастрычніка ў Мікашэвічах на ўрачыстай цырымоніі ўшаноўвання аграрыяў фестывалю-кірмашу "Дажынкі-2024".

Кіраўнік дзяржавы нагадаў, што больш за чвэрць стагоддзя таму менавіта на Палессі прайшло першае ў гісторыі суверэннай Беларусі рэспубліканскае свята "Дажынкі-1996".

"Час быў вельмі складаны. Абвал эканомікі, пра вёску гаварыць няма чаго наогул - поўнае збядненне, спад вытворчасці, і перш за ўсё сельгаспрадукцыі. Але самае страшнае ў той час быў не спад, а ліхалецце. Мы не ведалі, што рабіць, куды ісці, якім шляхам. Словам, разброд і хістанне. Хто старэйшы павінен памятаць, што мы тады літаральна стаялі на краі прорвы, а нехта ўжо быў там. І ў нас было два варыянты. Або змагацца за права свабодна і дастойна жыць на сваёй зямлі, захаваўшы яе. Або ўсім апынуцца ў гэтай прорве і загінуць, - успомніў Аляксандр Лукашэнка тыя часы. - Было вельмі цяжка. Тады, актыўна, не гледзячы ні на што, вы дапамагалі мне, зусім яшчэ зялёнаму Прэзідэнту. І вашы падтрымка і вера заўсёды мяне натхнялі. І мы не сагнуліся, мы выстаялі".

Прэзідэнт нагадаў, як даводзілася літаральна ў ручным рэжыме, па крошках збіраць грошы на паліва, насенне і ўгнаенні, каб гаспадаркі змаглі пасеяць і сабраць хоць нейкі ўраджай.

"Як бы пафасна гэта ні гучала, менавіта селянін тады выратаваў краіну. І на славу чалавека працы мы правялі першыя "Дажынкі". Фестываль стаў гімнам працаўнікам вёскі, цяжкай і высакароднай сялянскай працы. І гэтай традыцыі мы прытрымліваемся да гэтага часу, крыху відазмяніўшы яе, - сказаў беларускі лідар. - Нядзіўна, што нашы "Дажынкі" за гэтыя гады ператварыліся ў свята ўсёй краіны. Сапраўды народнае свята. Таму што без хлеба не будзе ніякіх песень, нічога не будзе".

"Жыццё паказала, што мы абсалютна правільна выбралі стратэгію - вызначылі харчовую бяспеку адным з прыярытэтаў дзяржаўнай палітыкі. Асноўны прыярытэт. Я планую пабываць ва ўсіх абласцях, каб нізка пакланяцца вам і падзякаваць вам, дарагія нашы працаўнікі вёскі. Вы - не проста харчовая бяспека. Вы - апора нашай краіны. Вы выратавалі гэту краіну і трымаеце яе ў самыя складаныя часы на сваіх плячах", - падкрэсліў Кіраўнік дзяржавы.

Аляксандр Лукашэнка адзначыў, што дзякуючы рашэнню аб развіцці сельскай гаспадаркі краіна накарміла спачатку сябе, а цяпер выйшла на перадавыя пазіцыі ў свеце па экспарце прадуктаў харчавання.

"Нашы прадукты добра ведаюць і любяць далёка за межамі нашай Беларусі. Скажу больш. Ва ўмовах незаконных фашысцкіх беспрэцэдэнтных санкцый, якія ў апошнія гады ўводзяцца супраць нашай дзяржавы, менавіта экспарт сельгаспрадукцыі даў астатнім галінам магчымасць адаптавацца да новай сітуацыі і пераарыентавацца на іншыя рынкі збыту", - заявіў Прэзідэнт.

Акрамя таго, праца аднаго работніка аграпрамысловага комплексу стварае да дзясятка рабочых месцаў у сумежных галінах.

Кіраўнік дзяржавы адзначыў яшчэ адну вельмі важную ролю "Дажынак". "Крок за крокам, як бы ні было складана, мы кожны год мянялі сталіцу свята, ператвараючы раённыя і абласныя цэнтры. Фестываль стаў нацыянальным праектам", - сказаў ён.

Потым гэта трансфармавалася ў маштабную дзяржаўную праграму. Былі пабудаваны аграгарадкі і сучасныя малочнатаварныя комплексы. "Але, па сутнасці, адраджэнне вёскі пачыналася з нашых "Дажынак", - падкрэсліў беларускі лідар. - Так, мы шмат самі сябе крытыкуем, і правільна. Аднак, калі паглядзець праўдзе ў вочы, у нас ёсць чым ганарыцца".

Аляксандр Лукашэнка нагадаў, што ў Беларусі пачыналі з ураджаю 5-6 млн т збожжа і лічылі, што гэта нядрэнна, а 7 мільёнаў успрымаліся як недасягальны вынік.

"Сёння мы прыйшлі да таго, што 10 млн т - норма. Але вы мой падыход ведаеце, нам трэба ўсяго толькі 11-12 млн т збожжа. І ўсё, больш і не трэба, - сказаў Кіраўнік дзяржавы. - Будзем вырошчваць іншыя прадукты, якія мы закупляем. Вы бачыце, як мяняецца клімат".

"30 гадоў таму мы маглі толькі марыць пра сённяшні ўзровень нашага аграрнага сектара і дастойныя ўмовы жыцця ў вёсцы. Але мы гэта зрабілі. Не скажу, што ўжо ўсё зрабілі. Пытанні ёсць. Але ў нас велізарны патэнцыял. У нас ёсць на чым далей узводзіць наш будынак жыцця", - падкрэсліў беларускі лідар.

Паводле слоў Кіраўніка дзяржавы, вялікія надзеі краіна звязвае з Брэстчынай - адным з флагманаў беларускага АПК.

У пацвярджэнне гэтага тэзіса ён прывёў даныя аб тым, што за чвэрць стагоддзя вытворчасць сельгаспрадукцыі ў рэгіёне вырасла больш як у 2 разы. "Толькі Брэстчына магла б год карміць усю Беларусь хлебам. Намалочанага збожжа, паводле самых сціплых падлікаў, хапіла б на паўмільярда буханак. І засталося б яшчэ на кашу, спірт, піва і камбікармы", - адзначыў Кіраўнік дзяржавы.

У гэтым годзе вобласць першай у рэспубліцы пачала і завяршыла жніво, ужо завяршыла сяўбу азімых. "Зладжана, дысцыплінавана, арганізавана засыпаўшы ў засекі амаль 2 млн т збожжавых і зернебабовых і выйшаўшы на ўраджайнасць звыш 38 цэнтнераў на круг", - сказаў Аляксандр Лукашэнка.

У дасягненні гэтага высокага выніку ёсць і свае героі. Гэта гаспадаркі-перадавікі, якія сабралі з гектара больш за 70 цэнтнераў, а таксама механізатары-рэкардсмены.

Аляксандр Лукашэнка звярнуў увагу, што вёска - гэта не толькі збожжавыя. Менавіта Брэстчына зрабіла сапраўдны прарыў у садоўніцтве, прычым з акцэнтам на імпартазамяшчэнні. Цяпер 60% айчынных яблыкаў паступаюць менавіта з Брэсцкай вобласці. Не менш вядомы і запатрабаваны пакупнікамі раннія агуркі з Пінска і Століна. Ягады - клубніцы, маліны, буякі, журавіны - першымі ў краіне ў прамысловых маштабах таксама сталі вырошчваць менавіта на Брэстчыне. "Усёй Беларусі прыклад паказалі. Вопытам і саджанцамі падзяліліся. Цяпер вось узяліся за цюльпаны. Справа добрая", - адзначыў беларускі лідар.

Прэзідэнт таксама адзначыў, што да канца года Брэсцкая вобласць упершыню ў сваёй аграрнай гісторыі перасягне планку па надоях малака 7,5 тыс. кг ад каровы. Гэта прыкладна на 20% больш, чым у сярэднім па краіне. "Раней думалі, што такое немагчыма. А цяпер гэта рэальнасць, - канстатаваў беларускі лідар. - Адштурхоўваючыся ад дасягнутага, можна будаваць новыя планы. Усе мы ведаем, што малако ў каровы на языку. Нарыхтоўка кармоў не менш важная, чым уборка ўраджаю. Чатыры ўкосы для вас - прывычная практыка. Галоўнае - ні ў якім разе не спыняцца, не зніжаць тэмпы і скакаць заўсёды вышэй за планку".

Кіраўнік дзяржавы напярэдадні пабываў у адной з лепшых гаспадарак Брэсцкай вобласці - "Парахонскім", дзе ўжо надой ад каровы звыш 10 тыс. кг. "Назіраю за гэтай гаспадаркай ужо больш за 20 гадоў. З таго часу, як упершыню пабываў там у 2004 годзе. З радасцю бачу, што год за годам у іх стабільна растуць надоі, прыбаўленні ў вазе, ураджайнасць збожжавых, кукурузы і рапсу, рэнтабельнасць і прыбытак. Заўсёды - лідары раёна. Але самае галоўнае - яны пастаянна прыдумваюць нешта новае. І ў нашай краіне яны ў тройку лепшых уваходзяць. Але самае каштоўнае для мяне - сістэма выбудавана, якая працуе больш як на 20 тыс. га грамадскіх зямель, - сказаў Аляксандр Лукашэнка. - Спачатку зрабілі цэх па выпуску брыкетаў, потым лінію алею. Потым сталі вырабляць камбікорм. А ўчора мне з гордасцю дэманстравалі мінеральна-вітамінныя травяныя гранулы".

Важна, што кармавая база - збожжа і травы - у сельгаспрадпрыемства свае. Работа арганізавана па поўным цыкле, аж да насенняводства. Ёсць нават пчаліныя вуллі, каб было апыленне.

"Што радуе мяне, у краіне пачынаюць капіраваць вопыт "Парахонскага". З такіх - прадпрымальных, настойлівых, якія з розумам выкарыстоўваюць кожны кавалачак зямлі, - трэба браць прыклад", - падкрэсліў беларускі лідар.

"Мы дамовіліся ўчора - мы вяртаемся да праграмы адраджэння нашага Палесся", - сказаў Прэзідэнт. Гэтыя яго словы сустрэлі апладысментамі.

Кіраўнік дзяржавы ўдакладніў, што не патрабуе нічога звышнатуральнага, але "трэба прадоўжыць тую вялікую справу, якую пачалі больш за дзясятак гадоў таму". "Я, можа, вельмі рэзка сказаў, што Палессе можа накарміць краіну, а ўсё астатняе мы можам прадаць за межы Беларусі. Попыт на прадукты харчавання будзе толькі расці", - упэўнены беларускі лідар.

"Палессе - гэта найпрыгажэйшы край Беларусі. Не ў крыўду іншым, як я кажу, гэта тут нарадзіўся сапраўдны беларус. Са сваёй ментальнасцю, характарам, мэтанакіраванасцю, нейкай хітрынкай. Гэта сапраўдныя працавікі. Мы павінны адрадзіць Палессе на працягу наступнай пяцігодкі. Гэта яшчэ важна таму, каб паказаць прыклад нашым дзецям, унукам, моладзі, як трэба працаваць. Як бы мы ні хвалілі моладзь (яна добрая, цудоўная, лепшая за нас), але яна іншая. Трэба ім пакінуць той шлях, па якім яны хоць бы спачатку 10-20 гадоў павінны ісці, каб самім вызначыцца, як рухацца далей. Таму трэба цяпер, нашаму пакаленню, пакінуць тое, што будзе патрэбна нашым дзецям", - сказаў Кіраўнік дзяржавы.

Ён назваў зямлю галоўным рэсурсам аграрыяў, згадаўшы і аб тэме меліярацыі. На Брэстчыне звыш палавіны ўсіх сельгасугоддзяў атрыманы дзякуючы меліярацыі, а ў "Парахонскім" - 80%. Яшчэ ў савецкія часы для рэгіёна была распрацавана спецыяльная праграма. "Выдумляць не трэба. Трэба паўтарыць тое, што зрабілі ў "Парахонскім". Для пачатку першае распараджэнне ўчора вечарам я ўжо аддаў. Не буду называць тую гаспадарку, якая ў будучым годзе паўторыць гэты поспех, - расказаў беларускі лідар. - Адказны непасрэдна перад Прэзідэнтам за рэалізацыю гэтай праграмы - Міхаіл Іванавіч Русы, які нарадзіўся на Палессі побач з Жыткавічамі і кіраўнік з "Парахонскага", які будзе глядзець за тэхналогіямі. Мы сканцэнтруем грашовыя рэсурсы на асноўных праграмах, не распыляючы па краіне, і будзем рэалізоўваць такія праграмы, як тут на Палессі".

Кіраўнік дзяржавы запэўніў, што маштабная работа ў сферы меліярацыі будзе прадоўжана: "Наша агульная задача - захаваць адваяванае ў прыроды. Як толькі спыніліся, як толькі па-сапраўднаму перасталі працаваць, прырода імгненна ўсё пачала забіраць назад. Ідзе вось гэта філасофская бітва паміж чалавекам і прыродай. Чалавек змагаецца для таго, каб выжыць і жыць дастойна. Але мы павінны гэта рабіць акуратна, не парушаючы асноўныя прынцыпы і законы светабудовы, з прыродай трэба быць на "Вы". Мы гэта ўмеем рабіць, асабліва на Палессі".

Ён падкрэсліў, што ўсё гэта абавязкова трэба зрабіць для дзяцей і ўнукаў, каб яны таксама працавалі на роднай зямлі. "І праз 10, 20, 50 гадоў гэтак жа, як і мы сёння, выходзілі б на сцэну "Дажынак". Ганарыліся б сваёй краінай, успамінаючы нас добрым словам", - адзначыў Аляксандр Лукашэнка.

На фестывалі-кірмашы "Дажынкі-2024" Прэзідэнт уручыў узнагароды работнікам прадпрыемстваў АПК, якія найбольш вызначыліся.

Кіраўнік дзяржавы падзякаваў усім кіраўнікам, камбайнерам, аграномам, механізатарам, вадзіцелям за хлеб і гераічную працу. Ён пажадаў усім здароўя, мірнага неба, шчасця, сямейнага дабрабыту і вялікіх поспехаў у нялёгкай, але вельмі патрэбнай рабоце. "Вы сапраўды сёння героі нашага дня. Вы - героі. Усё проста: час выбраў вас!" - сказаў ён.

Ордэна Працоўнай Славы ўдастоена адкрытае акцыянернае таварыства "Парахонскае". Аляксандр Лукашэнка ўручыў узнагароду дырэктару прадпрыемства Уладзіміру Храленку і спецыялісту па ідэалагічнай рабоце Людміле Малышчыцкай.

Ордэна Пашаны ўдастоены галоўны аграном ААТ "Агра-Кобрынскае" Іван Гусак і трактарыст-машыніст ААТ "Косава" Уладзімір Харужы.

Медалём "За працоўныя заслугі" ўзнагароджаны трактарыст-машыніст ААТ "Жураўлінае" Аляксандр Баран, вадзіцель ААТ "Дварэцкі" Уладзімір Кіндрук, дырэктар ААТ "Узнясенскі" Надзея Кандрацюк, аператар машыннага даення УП "Моладава-Агра" Валянціна Мокіч, трактарыст-машыніст ААТ "Жарабковічы" Анатоль Петух.

Ганаровае званне "Заслужаны работнік сельскай гаспадаркі Рэспублікі Беларусь" прысвоена старшыні СВК "Дарапеевічы" Васілю Юхімуку.

Шэрагу работнікаў сельгасарганізацый аб'яўлена Падзяка Прэзідэнта. У іх ліку старшыня СВК "Фядорскі" Мікалай Агафонаў, кіраўнік аддзялення "Зводы" ААТ "Астрамечава" Фёдар Вабішчэвіч, трактарыст-машыніст ААТ "Агра-Моталь" Руслан Супрун, вадзіцель аўтамабіля аддзялення "Расна" ААТ "Белавежскі" Сцяпан Царук.

Падзяка Прэзідэнта аб'яўлена калектыву работнікаў ААТ "Агра-Калядзічы". Да Падзякі прыкладаўся таксама падарачны сертыфікат на трактар "Беларус 1221.3". Узнагароду Аляксандр Лукашэнка ўручыў дырэктару прадпрыемства Сяргею Субоце, а таксама галоўнаму інжынеру Аляксандру Кадуку.

Пасля цырымоніі ўзнагароджання Кіраўнік дзяржавы зноў звярнуўся да ўдзельнікаў свята.

"Вы не горш, чым я, а многія лепш, чым я, адчуваеце і разумееце, што лепш працаваць на роднай мірнай зямлі. Нам патрэбны мір. Нам больш нічога не трэба. Усё астатняе мы зробім, як заўсёды было, сваімі рукамі. Але нам трэба выстаяць, каб чарговы раз наша Беларусь не стала полем бітвы ўладных людзей. На гэта мы будзем нацэлены. Гэтага вы хочаце, яшчэ больш гэтага хачу я", - заявіў беларускі лідар.

"Жывіце дружна, мірна. Не крыўдзіце ні ўкраінцаў, ні расіян, якія прыязджаюць да нас з дабром. Беражыце гэты мір. Міжрэлігійны, міжнацыянальны. Ён нам дорага дастаўся. Зямлі для ўсіх хопіць. Прыезджыя да нас не просяць кавалак хлеба. А калі просяць, то толькі ўпачатку. Потым яны працуюць і зарабляюць самі. Нам патрэбны на гэтай зямлі рабочыя рукі", - дадаў Аляксандр Лукашэнка.

"Час вельмі няпросты. Я звяртаюся да вас з адной вельмі вялікай просьбай, вялікай задачай, якую мы павінны вырашыць усе разам. Мы ўсе працаўнікі тут, тут не трэба нікога агітаваць. Але давайце сумленна прызнаем: усе такія ў Беларусі? Не. Тысячы і тысячы лодарнічаюць. Вядома, я зраблю са свайго боку ўсё для таго, каб іх прыцягнуць да высакароднай працы, не толькі сялянскай. Але вы павінны мне ў гэтым дапамагчы. Мы ж працаўнікі. Беларусы заўсёды былі працаўнікамі. І нядобра, калі мільёны людзей працуюць, а недзе тысячы сланяюцца без справы. Нам трэба вырашыць гэту праблему", - сказаў Кіраўнік дзяржавы.

Ён запэўніў, што дзяржава і ў далейшым будзе падтрымліваць людзей працы. Так, праграма жыллёвага будаўніцтва пераарыентуецца на патрэбы вытворчасці. "Там, дзе будзем ствараць вытворчыя магутнасці, у сельскай гаспадарцы, мы перш за ўсё будзем будаваць дамы, сацыяльныя аб'екты і жыллё", - адзначыў Аляксандр Лукашэнка.

Прэзідэнт падкрэсліў, што трэба ўсім беларусам даць месца для жылля. "Мы гэта зробім. З вашай дапамогай", - упэўнены Аляксандр Лукашэнка.

"На працягу наступнай пяцігодкі мадэрнізуем і адновім усе дарогі да аграгарадкоў. Не будзе ні адной дрэннай дарогі, - заявіў Кіраўнік дзяржавы. - Збяром грошы і ўсё гэта зробім. Мы пачалі ўжо гэту праграму".

Аляксандр Лукашэнка таксама пажадаў працаўнікам здароўя для іх і, асабліва важна, дзяцей, заклікаўшы трымацца сваіх каранёў.

Ён пахваліў аграрыяў Брэсцкай вобласці за поспехі па розных напрамках і паставіў для рэгіёна яшчэ больш высокую задачу.

"Упэўнены, і вам, і новаму кіраўніку вобласці (Пётр Пархомчык. - Заўвага) не займаць ведаў, вопыту і амбіцый. Рэгіён павінен у бліжэйшыя гады ўстойліва выйсці на 2,5 млн т збожжавых і зернебабовых. Я ўпершыню ў сваім жыцці прамыслоўца накіраваў у ваш, можна сказаць, аграрна-прамысловы край. Гэта адзін з лепшых кіраўнікоў нашага БЕЛАЗа, які павінен даць дыханне не толькі сельскай гаспадарцы, але перш за ўсё - прамысловасці, якая ў нас крыху адстае на Брэстчыне. Праграму ён гэту падрыхтаваў, у бліжэйшы час разгледзім. Таму што без прамысловасці не будзе і сельскай гаспадаркі", - заявіў беларускі лідар.

"Я вельмі веру і вельмі спадзяюся на вас, заўсёды рады вашым поспехам, гатовы і ў далейшым ісці разам з вамі да новых вышынь і ў эканоміцы, і ў сацыяльным жыцці", - заявіў беларускі лідар.

Старшыня Брэсцкага аблвыканкама Пётр Пархомчык у сваім выступленні далажыў, што ўборачная па ўсіх культурах у рэгіёне выходзіць на фініш.

"У Брэсцкай вобласці асабліва ставяцца да даручэнняў Прэзідэнта нашай краіны. І пастаўленая задача дасягнуць выніку 2,5 млн т прымаецца да выканання. Вы часта гаворыце, што час выбраў нас. Узмацню гэта пытанне: хто, акрамя нас?" - сказаў кіраўнік рэгіёна.

Пётр Пархомчык падзякаваў Аляксандру Лукашэнку за цяпло і клопат аб аграрыях. Ён паднёс Кіраўніку дзяржавы ў падарунак каравай новага ўраджаю.

Паводле слоў старшыні аблвыканкама, у 2014 годзе Аляксандр Лукашэнка стаў ганаровым палешуком. У сувязі з гэтым яму зрабілі яшчэ адзін сімвалічны падарунак - два кані палескай пароды. "Гэта працавітая парода - тая, якая дапамагала людзям у розныя цяжкія моманты. Два кані ў бліжэйшы час будуць у вашым распараджэнні", - сказаў Пётр Пархомчык.

У дадатак да коней Аляксандру Лукашэнку падарылі кнігу пра гэту пароду.

"Дзякуй вялікі! Не паспеў назначыць губернатарам - перасадзіў мяне на каня, - пажартаваў Кіраўнік дзяржавы. - Ён ведае, што да жывёл у мяне асаблівыя адносіны. Але я думаў карову падораць. Падарыў каня. Таксама нядрэнна. Ёсць у мяне коні. Усе коні, якіх мне падарылі. І з-за мяжы, і іншыя. Я іх берагу. Таму гэтыя два кані (я ведаю, што гэта за парода) знойдуць добрае месца ў маёй прэзідэнцкай гаспадарцы".

Аляксандр Лукашэнка яшчэ раз усім падзякаваў, асабліва за больш як 2 млн т збожжа. "Трэба два з палавінай і трэба квітнеючае Палессе", - рэзюмаваў Кіраўнік дзяржавы.

На завяршэнне свайго ўдзелу ў свяце ён пакінуў аўтограф на планшэце, прысвечаным візіту ў Мікашэвічы. Гэты планшэт стане часткай рэгіянальнай выставы.