Нарада аб развіцці Гродзенскай вобласці

Гродзенская вобласць развіваецца дастойна, па асобных напрамках лепш за іншых, але ёсць і недахопы. Аб гэтым Прэзідэнт Беларусі Аляксандр Лукашэнка заявіў 24 красавіка на нарадзе ў Гродне па развіцці рэгіёна.

Кіраўнік дзяржавы адзначыў неабходнасць абмеркаваць шэраг найбольш важных пытанняў у развіцці рэгіёна. "Свята завяршылася. Акрамя свят і будні ў нас як заўсёды", - заўважыў ён.

Асабліва варта адзначыць, што Аляксандр Лукашэнка прыехаў на нараду больш чым падрыхтаваным. Яшчэ днём адбыўся аблёт Гродзенскай і Брэсцкай абласцей. З борта верталёта беларускі лідар падрабязна азнаёміўся з работай на зямлі.

"Шчыра кажучы, вобласць развіваецца дастойна. Па асобных напрамках лепш за іншых. Па многіх напрамках задае тэмп развіццю ў нашай краіне. Больш за ўсё радуюць поспехі працаўнікоў вёскі. На працягу апошніх гадоў вы сярод лідараў у краіне. Аднак, як мне дакладваюць (Камітэт дзяржаўнага кантролю, якому было даручана вывучыць сітуацыю), ёсць і ў вас слабыя месцы", - сказаў Прэзідэнт.

Гаворачы пра недахопы, Аляксандр Лукашэнка звярнуў увагу на сферу жывёлагадоўлі ў рэгіёне. Да гэтага часу не выканана даручэнне Кіраўніка дзяржавы па ўкамплектаванні малочнатаварных комплексаў пад поўную загрузку. "Паўстае пытанне: мужыкі, мы навошта іх будавалі? Ну калі Гродзенская вобласць не можа гэта зрабіць, тады на якую вобласць будзем абапірацца..." - звярнуў увагу Прэзідэнт.

На палове пабудаваных і рэканструяваных комплексаў не забяспечваецца нават сярэднеабласны ўзровень прадукцыйнасці жывёлы. Напрыклад, у Астравецкім раёне.

Ёсць недагляд у пытаннях узнаўлення статка. Гэта характэрна для Лідскага, Мастоўскага, Іўеўскага раёнаў. "Дарэчы, тут адпаведна адзначаецца зніжэнне і валавой вытворчасці малака па 2022 годзе", - сказаў Аляксандр Лукашэнка.

У ходзе праверачных мерапрыемстваў у 80% абследаваных гаспадарак выяўлены парушэнні тэхналагічных рэгламентаў утрымання і кармлення жывёлы. "І, што дзіўна, ва ўрача-губернатара, - ветэрынарна-санітарных правіл, - заўважыў Кіраўнік дзяржавы. - У выніку па-ранейшаму застаецца падзеж жывёлы. А гэта ўжо недапушчальна. Толькі за 2022 год ён склаў 15 тыс. галоў. Рост падзяжу дапушчаны практычна ў кожным раёне вобласці (у 16 з 17)".

Ёсць таксама праблемы ў вытворчасці свініны і мяса птушкі. "У той час, калі попыт на прадукцыю сельскай гаспадаркі вялізны, рынак адкрыты", - падкрэсліў беларускі лідар.

Прэзідэнт звярнуў увагу, што трэба сур'ёзна заняцца выпраўленнем сітуацыі на Скідзельскай птушкафабрыцы і Смаргонскім камбінаце хлебапрадуктаў.

Аляксандр Лукашэнка на нарадзе нагадаў кіраўніку рэгіёна Уладзіміру Караніку пра даручэнне адносна стабфондаў і забеспячэнне насельніцтва айчыннай агароднінай і садавінай.

"Мы з губернатарам неаднаразова дыскутавалі аб сітуацыі са стабфондамі. Дарэчы, з вашай вобласці ўсё і пачалося, калі я строга запатрабаваў, каб былі створаны гэтыя стабілізацыйныя фонды і каб гандаль выбіраў тую прадукцыю. Вы мяне запэўнівалі, што ўсё ў парадку. А на справе кантралёрамі адзначаюцца праблемы і тут. Хацелася б ведаць, якія. Асабліва па выбарцы бульбы, капусты, буракоў. Пры гэтым вашы гандлёвыя сеткі завалены егіпецкай бульбай і расійскімі яблыкамі, цана на якія ў разы вышэйшая", - сказаў Кіраўнік дзяржавы.

Яшчэ адна тэма - работа прамысловага сектара рэгіёна. "Вы істотна праселі ў мінулым годзе ў дрэваапрацоўцы, тэкстыльнай прамысловасці, нафтахіміі і шэрагу іншых галін. Наогул для Гродзеншчыны гэта недапушчальна. Ды і першы квартал бягучага года вы спрацавалі на ўзроўні мінулага года, а значыць, пакуль не кампенсавалі страты. Аднаўляцца трэба хутчэй. Як я казаў, бегчы, бегчы, бегчы. Галоўнае цяпер - паскарэнне", - падкрэсліў беларускі лідар.

Ён заўважыў, што арыентавацца толькі на "Гродна Азот" і атамную станцыю нельга. "Я неаднаразова гаварыў пра неабходнасць рэалізацыі ў кожным раёне як мінімум па адным сур'ёзным інвестыцыйным праекце. Пры назначэнні губернатара ставілася задача ўзяць на асабісты кантроль рэалізацыю аднаго значнага для вобласці маштабнага праекта. І не на базе рэспубліканскага прадпрыемства. Дарэчы, як тут у вас ідуць справы? І ў прыватнасці на "Гродна Азоце" як у нас сітуацыя? - спытаў Прэзідэнт. - Ды і ў цэлым як вобласць працуе ў гэтых санкцыйных умовах? Што зроблена ў частцы імпартазамяшчэння, у прамысловай кааперацыі з нашымі ўсходнімі партнёрамі? Ці ўсюды выбудаваны ланцуг дастаўкі камплектуючых і тавараў?"

Па-ранейшаму застаюцца актуальнымі праблемы, звязаныя з рамонтам і ўтрыманнем мясцовых аўтамабільных дарог. "Хоць губернатар па дарозе дакладваў, што вельмі шмат зроблена. А як на месцы там: аграгарадок - раённы цэнтр? Гэтыя дарогі як? Мне нядаўна пашанцавала праехаць па асобных дарогах ад аграгарадкоў да раённага цэнтра. Ну, ведалі, што я буду ехаць, дык хоць ямкі закапалі. А наогул сітуацыя не радасная. Гэта непакоіць грамадзян", - звярнуў увагу Кіраўнік дзяржавы.

Пастаўлена задача ў самы кароткі тэрмін выправіць сітуацыю. І гэта датычыцца не толькі і не столькі Гродзенскай вобласці, але і краіны ў цэлым. "Тут яшчэ больш-менш на Гродзеншчыне. Але ў цэлым па краіне сітуацыя няпростая. Нядаўна віцэ-прэм'еру профільнаму пастаўлена задача на працягу бягучага года ўсе дарогі адрамантаваць, чаго б нам гэта ні каштавала. А, паверце, каштаваць будзе заўтра даражэй. Сёння нафта, нафтапрадукты, той жа бітум для асфальту таннейшыя, чым калі-небудзь", - сказаў Кіраўнік дзяржавы.

Ёсць нараканні і на работу грамадскага транспарту, што здзівіла Прэзідэнта. "Дзіўна! Можа, гэта памыліліся, дакладваючы мне", - сказаў ён.

Фактычна аператыўная нарада ў Гродне стала справаздачай губернатара і абласной вертыкалі ўлады аб выкананні сацыяльна-эканамічных паказчыкаў.

"Як бачыце, пытанняў нямала. І ўсе яны ў першую чаргу знаходзяцца ў кампетэнцыі мясцовай улады раённага і абласнога ўзроўню. Майце на ўвазе, што мы прааналізавалі заявы і скаргі нашых людзей з Гродзенскай вобласці ў Адміністрацыі Прэзідэнта і на імя Прэзідэнта. Таму я папрасіў, каб сёння на гэтай аператыўнай нарадзе разам з губернатарам далажылі і яго профільныя намеснікі, а таксама пры неабходнасці прысутныя віцэ-прэм'еры", - сказаў Прэзідэнт.

Ён папрасіў далажыць у першую чаргу аб праблемных пытаннях, а таксама нейкіх цікавых тэмах у разрэзе ўсёй краіны, улічваючы, што ў Гродзенскай вобласці, як раней, так і цяпер, ёсць вопыт, які можна пераймаць у іншых рэгіёнах.

Аляксандр Лукашэнка ў некаторых момантах выказаў крытыку ў адрас Мінскай вобласці на фоне сітуацыі на Гродзеншчыне. "Пасяўная кампанія пачалася. Я праехаў увесь ваш усход, цэнтр, захад паглядзеў. Павінен сказаць, Леанід Канстанцінавіч (віцэ-прэм'ер Леанід Заяц, які адказвае за сельскую гаспадарку. - Заўвага), вельмі дрэнная работа ў Мінскай вобласці. Я баюся, каб там не правалілі гэту гіганцкую вобласць", - сказаў Кіраўнік дзяржавы.

Ён растлумачыў, што на мяжы Мінскай і Гродзенскай абласцей відаць істотная розніца ва ўзроўні гаспадарання на зямлі. У той час як у Гродзенскай вобласці ў гаспадарках практычна ідэальны парадак, іх суседзі на Міншчыне не могуць пахваліцца такім жа станам. "Разумееце, як знарок Каранік (старшыня Гродзенскага аблвыканкама Уладзімір Каранік. - Заўвага) зрабіў. Я так у верталёце ляцеў і кажу: ну, знарок зрабіў, - адзначыў Прэзідэнт. - Люба-дорага паглядзець! Адтуль заязджаеш (з Мінскай вобласці.- Заўвага) - як быццам са стратных дрымучых калгасаў".

"Я не разумею. Вы, напэўна, самазаспакоіліся, вы проста мяне не чуеце. Я ж вам казаў: лепш ваяваць у полі, чым там (размова пра пагрозу рэальнай гарачай вайны, калі не забяспечыць устойлівае сацыяльна-эканамічнае развіццё краіны. - Заўвага)", - акцэнтаваў увагу беларускі лідар.

Пасля завяршэння нарады Аляксандр Лукашэнка некалькі хвілін душэўна паразмаўляў з гродзенскай моладдзю.

Аблвыканкам у Гродне, дзе праходзіла нарада, знаходзіцца ў цэнтры, якраз каля пешаходнай вуліцы, вельмі папулярнай сярод мясцовых жыхароў. Там заўсёды шмат моладзі і да позняга вечара кіпіць жыццё.

"Ну што, дзяўчаты, на дыскатэку? - сказаў жартаўлівым тонам Кіраўнік дзяржавы, убачыўшы маладых жыхарак Гродна, якія чакалі яго каля выхада з аблвыканкама. - Запрашаеце?"

Маладыя людзі радасна прывіталі Кіраўніка дзяржавы. Разам з тым мясцовыя балельшчыкі былі крыху засмучаны паражэннем у чэмпіянаце Беларусі па хакеі мясцовай каманды "Нёман". Вырашальны матч супраць жлобінскага "Металурга" праходзіў днём на лядовай арэне Гродна. На матчы прысутнічаў і Аляксандр Лукашэнка.

"Вы што, засмуціліся, што прайграла каманда?" - спытаў ён у маладых людзей.

"Вельмі!" - адказалі яны.

У той жа час адна з дзяўчат выказала меркаванне, што гродзенская каманда паказала вельмі нядрэнны вынік. "Ніхто не чакаў, што "Нёман" будзе ў фінале. Гэта вельмі добры вынік", - лічыць балельшчыца.

"Вось бачыш. Не робіцца каманда за адзін год. Яны ж падхапілі гэту каманду літаральна год таму. Гэта будучыня, гэта ж моладзь адна. Гэтыя ўжо аксакалы - жлобінцы", - адзначыў Кіраўнік дзяржавы, маючы на ўвазе розніцу ва ўзросце і вопыце хакеістаў, якія гулялі ў фінале каманд.

Аляксандр Лукашэнка ўпэўнены, што ў гродзенскага "Нёмана" вялікі патэнцыял. "Добрыя хлопцы. У наступным годзе выйграеце, калі, вядома, будзеце працаваць, як у гэтым хаця б", - сказаў ён.

У цэлым Прэзідэнт падкрэсліў, што абедзве каманды гулялі дастойна: "Хлопцы гулялі вельмі добра. Я нават не памятаю такога фіналу. Асаблівай і грубасці не было. Дастойна гулялі. Малайцы!"

"Таму не хвалюйцеся, усё будзе нармальна. Усё ў вас наогул нармальна", - супакоіў ён.

Па просьбе мясцовых жыхароў Аляксандр Лукашэнка зрабіў з імі некалькі фатаграфій на памяць.

"Поспехаў! Дзякуй вам! Усяго добрага, жывіце мірна. Да пабачэння!" - сказаў на развітанне Кіраўнік дзяржавы.