Рабочая паездка ў Смалявіцкі раён Мінскай вобласці

Прэзідэнт Беларусі Аляксандр Лукашэнка 6 жніўня падчас рабочай паездкі ў Смалявіцкі раён Мінскай вобласці азнаёміўся з рэканструкцыяй мемарыяльнага комплексу "Курган Славы".

У гэтыя дні па ўсёй краіне праходзяць маштабныя мерапрыемствы да 80-годдзя вызвалення Беларусі і 80-годдзя аперацыі "Баграціён". Наведваючы мемарыяльны комплекс, Аляксандр Лукашэнка ў першую чаргу ўсклаў кветкі да падножжа "Кургана Славы". Потым Прэзідэнт азнаёміўся з рэканструкцыяй верхняй пляцоўкі мемарыяльнага комплексу.

Старшыня Мінскага аблвыканкама Аляксандр Турчын далажыў Прэзідэнту аб этапах фінансавання будаўніча-мантажных работ і планах па іх завяршэнні. Так, паводле яго слоў, адно з рашэнняў, якое абмяркоўвалася, - устаноўка поручняў уздоўж лесвіцы, якая вядзе да вяршыні кургана. З аднаго боку, іх наяўнасць засцерагла б ад небяспекі пры пад'ёме наверх, але з іншага - можа пацярпець архітэктура манумента. Такім чынам, гэта пытанне трэба будзе яшчэ дэталёва прапрацаваць.

"Справа нават не ў грашах. Нельга сапсаваць першапачатковы выгляд, - падкрэсліў Аляксандр Лукашэнка. - Празмернасцей тут абсалютна не трэба".

Акрамя работ па добраўпарадкаванні, ёсць яшчэ адна прапанова - пашырыць экспазіцыю тэхнікі часоў Вялікай Айчыннай вайны. Таксама Прэзідэнту агучылі прапанову пабудаваць на тэрыторыі мемарыяльнага комплексу музей гісторыі Узброеных Сіл Беларусі.

У 2023 годзе мемарыяльны комплекс наведалі каля 105 тыс. чалавек. "Мы ставім для сябе мэту як мінімум у два разы павялічыць наведвальнасць Кургана Славы", - заявіў Аляксандр Турчын.

З мінулага года на мемарыяльным комплексе праходзіць чарговая рэканструкцыя. Будаўніча-мантажныя работы праведзены на цэнтральнай лесвіцы і месцы ўскладання кветак, праведзена рэканструкцыя фантана, рэзервуараў для захоўвання вады, аўтаматычнага паліву, інжынерных сетак, паркоўкі, будынка адміністрацыі, сеткі знадворнага асвятлення. Таксама ў парку ўстаноўлены мультымедыйныя экраны, папоўнена экспазіцыя ваеннай тэхнікі.

Рэканструкцыя лесвіцы для пад'ёму на Курган Славы і яе рэстаўрацыя запланаваны на другую палову 2024 года.

Яшчэ адной тэмай рабочай паездкі Прэзідэнта стала ўборачная кампанія. Як далажыў Кіраўніку дзяржавы старшыня Мінскага аблвыканкама Аляксандр Турчын, масавую ўборку ў рэгіёне завершаць на працягу тыдня. Чакаецца намалот 2,1 млн т збожжа з улікам рапсу. Яшчэ разлічваюць атрымаць каля 600 тыс. т зерня кукурузы.

"На сённяшні дзень 80% убралі збожжавых - 1,408 млн т - гэта без рапсу. Плюс 315 тыс. т на раніцу рапсу намалацілі. У выніку ў нас ёсць 1,7 млн т. Масавую ўборку мы закончым да канца бягучага тыдня. З улікам рапсу, я думаю, у нас будзе 2,100 млн т. Гэта без кукурузы. Дзесьці 1,8 млн т збожжавых і 320 тыс. т рапсу. З кукурузай таксама, дай бог, пакуль усё выдатна. Думаю, тысяч 600 т зерня кукурузы мы ў гэтым годзе атрымаем", - расказаў Аляксандр Турчын.

Ён заявіў, што вобласць нават гатова пры неабходнасці на ўмовах аплаты камусьці падставіць плячо ў пытанні здачы збожжа ў лік дзяржзаказу. Рэгіён у тым ліку выконвае дзяржзаказ па піваварным ячмені. Гэта нараўне з рапсам дае выдатны фінансавы вынік для гаспадарак.

Кіраўнік дзяржавы таксама пацікавіўся ходам будаўніцтва і рэканструкцыі жывёлагадоўчых комплексаў. Гэту работу ў Мінскай вобласці разлічваюць завяршыць на працягу трох гадоў. "Дай бог, каб за тры", - адрэагаваў Прэзідэнт.

Аляксандр Лукашэнка падкрэсліў, што ва ўсім важна дысцыпліна, і ў Мінскай вобласці ёсць яшчэ дастатковая колькасць гаспадарак, якія трэба падцягваць да пэўнага ўзроўню. "Пакуль у Мінскай вобласці цераспалосіца. Ёсць добрыя гаспадаркі - люба-дорага паглядзець", - сказаў Прэзідэнт.

Коратка абмеркавалі і ліквідацыю наступстваў стыхіі ў Мінскай вобласці. Сталічны рэгіён у гэтым плане пацярпеў менш, чым больш паўднёвыя рэгіёны. Парадак у цэлым ужо наведзены, усё робіцца ва ўстаноўленыя тэрміны, аператыўна аказана дапамога людзям, у якіх на дамах былі пашкоджаны дахі.