Рабочая паездка ў Мінскі раён

Прэзідэнт Беларусі Аляксандр Лукашэнка 24 ліпеня праінспектаваў ход уборачнай кампаніі. Кіраўнік дзяржавы наведаў сельгаспрадпрыемства "Усход", размешчанае ў прыгарадзе Мінска.

У развіццё нядаўняй селектарнай нарады, дзе дэталёва абмяркоўваліся пытанні ўборачнай кампаніі, Прэзідэнт знаёміцца з сітуацыяй на месцах.

Кіраўнік дзяржавы сарыентаваў аграрыяў на тое, што ў ходзе цяперашняй уборачнай кампаніі трэба звярнуць увагу ў тым ліку на тактыку, улічваючы ўмовы надвор'я.

"Трэба паглядзець з тактыкай, цяпер ужо не па стратэгіі пытанне. Да нас набліжаецца значны фронт", - заўважыў беларускі лідар.

Таму цяпер трэба вызначыцца, на што ў першую чаргу кінуць асноўныя сілы ў ходзе ўборачнай, каб не дапусціць або мінімізаваць магчымыя страты.

Аляксандр Лукашэнка растлумачыў, што пасля непагоды, якая бушавала, ёсць шмат участкаў з палеглым збожжам на палях. Яго трэба ўбраць, паколькі, калі зноў пойдуць дажджы, яно канчаткова прападзе. З іншага боку, трэба дзейнічаць разумна, каб, уцягнуўшыся ва ўборку на палях з палегліцай, потым не страціць больш на добрых палях у выпадку чарговай непагоды.

Кіраўнік дзяржавы даручыў з улікам гэтых акалічнасцей прымаць аператыўныя рашэнні.

"Усё паспела адначасова. І рапс яшчэ не ўбралі", - сказаў Аляксандр Лукашэнка аб напружаным графіку работ.

У гаспадарцы "Усход" пад Мінскам Аляксандр Лукашэнка ў першую чаргу агледзеў поле з рапсам. Вынік вельмі нядрэнны. "Я такога рапсу не бачыў, шчыра кажучы", - адзначыў ён.

Са спецыялістамі падрабязна абмеркавалі, як удалося гэтага дасягнуць. Далажылі Кіраўніку дзяржавы і аб рабоце прадпрыемства ў цэлым.

А вось убачаным у Мінскім раёне з верталёта Аляксандр Лукашэнка застаўся задаволены далёка не ўсюды, асабліва паблізу прампрадпрыемстваў. "У яго палі не пераараны. У Ждановічах, пасёлках па 2-3-5 гектараў наогул кінутыя землі. І гэта пад Мінскам. Страшэннае ўражанне. Я не скажу, што катастрофа. Але гэта не Мінскага раёна землі (размова аб патрэбным узроўні гаспадарання. - Заўвага). Дрэнна", - сказаў Кіраўнік дзяржавы.

Пасля агляду рапсавага поля Аляксандр Лукашэнка прыехаў на збожжаток прадпрыемства. Знамянальна, што беларускі лідар адразу звярнуўся за інфармацыяй аб ходзе спраў не да прадстаўнікоў начальства, а да радавых работнікаў.

Затым Аляксандр Лукашэнка заехаў на жывёлагадоўчы комплекс прадпрыемства. Вынікі ў гэтай частцы таксама нядрэнныя, умовы ўтрымання жывёлы і ўзровень гаспадарання ў цэлым трэба павышаць. Як далажылі Кіраўніку дзяржавы, трэба вырашыць пытанне аб мэтазгоднасці рэканструкцыі гэтага комплексу або ўсё ж выбраць варыянт будаўніцтва новага. Але сітуацыю ўскладняе тое, што цяперашні комплекс знаходзіцца непасрэдна ў межах населенага пункта, таму з улікам усіх норм асабліва не разгорнешся.

"Доіш добра, малайчына. Але трэба будаваць сучасны комплекс. Трэба кудысьці выносіць", - сказаў Прэзідэнт.

У цэлым жа, канстатаваў ён, стан цяперашняга комплексу ніжэйшы за сярэдні. "Добра, што ён тут мае тое, што не маюць іншыя. Па ўраджайнасці, па ўдоях", - адзначыў і станоўчы бок Кіраўнік дзяржавы.

Ён даручыў прапрацаваць рашэнне па гэтым комплексе ў Атоліне. Пры гэтым вельмі пажадана не займаць землі сельгаспрызначэння, папярэдзіў Аляксандр Лукашэнка. "Займаць землі сельгаспрызначэння - гэта нядобра", - сказаў ён.

"Трэба вызначыцца. Або аднаўляць і рэканструяваць, або будаваць штосьці новае. Хаосу і неразбярыхі тут шмат. Тут трэба проста навесці парадак", - падкрэсліў беларускі лідар.

"Кожны кавалачак тут павінен быць апрацаваны і да восені павінен быць наведзены ідэальны парадак. Трэба даводзіць да розуму гаспадарку. Паглядзець, што тут неабходна, што патрэбна", - даручыў Аляксандр Лукашэнка.

Кіраўнік дзяржавы перад ад'ездам паведаміў аб намеры дадаткова азнаёміцца з сітуацыяй з паветра ў Мінскім, Дзяржынскім і шэрагу іншых раёнаў. У цэлым жа цяперашняя інспекцыя мела пазапланавы характар, а наведванне канкрэтных аб'ектаў не было прадугледжана прэзідэнцкім графікам. Аляксандр Лукашэнка ўжо на месцы вырашаў, што менавіта паглядзець і куды заехаць. Чакаецца, што такая практыка будзе прадоўжана.