Наведванне гандлёвага цэнтра "Першы нацыянальны гандлёвы дом" у Мінску

Прэзідэнт Беларусі Аляксандр Лукашэнка 29 снежня наведаў у Мінску гандлёвы цэнтр "Першы нацыянальны гандлёвы дом".

Пасля прыбыцця ў гандлёвы цэнтр Прэзідэнта сустракалі не толькі чыноўнікі і журналісты, але і Дзед Мароз са Снягурачкай - усё ж такі мерапрыемства пераднавагодняе.

Тым не менш, Аляксандр Лукашэнка ўсіх настроіў на рабочы лад, заслухаўшы даклад аб будаўніцтве аб'екта, які гадамі лічыўся ў пераліку даўгабудаў. Першапачаткова на гэтым месцы, яшчэ больш за 10 гадоў таму, павінен быў быць пабудаваны гандлёва-забаўляльны цэнтр, чым займалася іранская кампанія. "Фактычна быў закінуты аб'ект. Было даручана пабудаваць і гандлёвы цэнтр, і арэнднае жыллё для ваенных (на паверхах, якія знаходзяцца вышэй гандлёвага цэнтра. - Заўвага). Зроблена ўсё, як задумана", - сказаў беларускі лідар.

Завяршэнне будаўніцтва аб'екта ішло ў сціслыя тэрміны, і Аляксандр Лукашэнка звярнуў увагу на некаторыя недапрацоўкі ў інтэр'еры. Ён даручыў падысці па-гаспадарску да гэтага пытання, не трацячы "шалёныя грошы". "Глядзіце, як лепш. Самае галоўнае - не траціць дурныя грошы. Каб людзям было зручна", - сказаў ён.

"Мяне менш за ўсё хваляваў гандаль. Мяне хвалявала тое, каб нашы рэгіёны былі тут прадстаўлены. Каб яны не плакалі, што іх у Мінск не пускаюць, гандляваць немагчыма, тавар прадаваць немагчыма... Прадавайце. Але хацелася б, каб гэта быў пачатак. У гэтых адносінах нам трэба з такім будаўніцтвам ісці не толькі па Беларусі, але і ў Расіі пачынаць.У Піцеры чаму б не пабудаваць такі будынак і завезці тавар. У Маскве, Смаленску, Бранску, Пскове... Побач зусім. І мы маглі б "размяшчаць там свае тавары і прадаваць. Прытым расіяне ж не супраць. Асабліва ў Пецярбургу - людзі ідуць насустрач. Вывозь свой тавар і прадавай. І людзі на беларускае добра рэагуюць, - сказаў Аляксандр Лукашэнка. - Хацелася б, каб мы над гэтым падумалі. А не тое, што мы за паўцаны аддаём нейкім жулікам (пасрэднікам. - Заўвага) і яны наш тавар прадаюць у Расіі. А потым мы іх саджаем пачкамі ў Беларусі ў турму за хабары".

"Таму павінен быць дом (гандлёвы. - Заўвага). Губернатары там скінуліся, мы нечым дапаможам. Просты, зручны дом. Пабудавалі - вазіце тавар, прадавайце. Асабліва ў Беларусі. Калі вы хочаце заваяваць свой рынак і нікому не аддаваць, то, зразумела, трэба, каб у Беларусі былі свае магазіны. Да гэтага мы яшчэ вернемся. Мы аб гэтым ужо гаварылі на прыкладзе нашай лёгкай прамысловасці", - дадаў беларускі лідар.

Заслухоўваючы даклад старшыні Мінгарвыканкама Уладзіміра Кухарава наконт гатоўнасці чаргі будаўніцтва з кватэрамі, Аляксандр Лукашэнка сказаў: "Спяшацца не трэба. Трэба зрабіць па-чалавечы. Дарэчы, пайшлі скаргі на "Дана Астра". Вы разбярыцеся, чаму людзі скардзяцца".

Кіраўніку дзяржавы далажылі, што з кампаніяй працуюць наконт гэтага, каб выяўленыя недахопы былі ліквідаваны.

"Няхай перарабляюць усё. Інакш адкажуць так, як адказваюць усе ў Беларусі. Прыйшлі працаваць у Беларусь - няхай працуюць, як трэба. Каб на іх людзі не крыўдзіліся. Трэба ўважліва паглядзець за гэтымі будаўнікамі", - падкрэсліў беларускі лідар.

Аляксандр Лукашэнка даручыў распаўсюдзіць на ўсю Беларусь перадавы вопыт Мінска па будаўніцтве падземнага перахода спосабам, які быў выкарыстаны пры стварэнні такога аб'екта каля гандлёвага цэнтра.

Як далажыў Уладзімір Кухараў, побач з гандлёвым цэнтрам пабудаваны падземны пешаходны пераход. "Мы ўпершыню ў краіне пабудавалі не адкрытым спосабам (не раскопвалі праспект). Мы зрабілі метадам тунэля. Метрабуд зрабіў гэты тунэль. Цяпер у нас ужо адпрацаваны тэхналогіі. Мы можам будаваць далей без спынення руху", - сказаў ён.

Аляксандр Лукашэнка пазітыўна ацаніў такі падыход, даручыўшы ў далейшым па ўсёй краіне так рабіць падземныя пераходы. "Губернатараў датычыцца", - адзначыў Кіраўнік дзяржавы.

У час наведвання гандлёвага цэнтра Аляксандр Лукашэнка азнаёміўся з фірменнымі магазінамі і аб’ектамі грамадскага харчавання вядучых беларускіх вытворцаў.

“Гэта аб’яднальная ідэя. Трэба ісці гэтым шляхам”, - даў першую ацэнку ўбачанаму Кіраўнік дзяржавы.

Брэсцкая вобласць

Самы паўднёвы рэгіён у гандлёвым цэнтры прадстаўлены прадпрыемствамі лёгкай і мэблевай прамысловасці. Як растлумачыў губернатар Брэсцкай вобласці Юрый Шулейка, мясцовымі прадуктамі харчавання сталічныя магазіны ўжо насычаны.

Першым магазінам, у які зазірнуў Прэзідэнт, стаў мэблевы шоурум "Пінскдрэва". Дарэчы, у прадпрыемства амаль паўтары сотні магазінаў па ўсёй рэспубліцы і яшчэ каля 100 - у Расіі. Прычым там "Пінскдрэў" выбудаваў уласную тавараправодную сетку: усімі працэсамі кіруе беларуская юрыдычная асоба - галаўное прадпрыемства. Такі фармат работы Аляксандр Лукашэнка ставіць у прыклад і іншым вытворцам.

Гаворачы аб вытворчасці мэблі, кіраўнік дзяржавы падкрэсліў: тканіны і фурнітура павінны быць беларускімі. "Мяне цікавіць, каб было сваё. Тканіны, скура, дрэва - гэта наша. Мы можам гэта рабіць, - сказаў ён. - Калі мы можам, чаму не вырабляць?"

У магазіне пасцельнай бялізны "Блакiт" Прэзідэнту прадэманстравалі новыя калекцыі з нядаўна распрацаваных баваўняна-ільняных тканін. “10 тысяч камплектаў мы прадалі за тры месяцы. Але ёсць лён трэцяга нумару,  інакш кажучы вельмі кароткі”, - расказалі ў магазіне.

“Гэтага лёну ўжо не было б, калі б не герб і калі б у свой час не прымусіў займацца лёнам. Нам трэба разумець, што мы сялян не прымусім рабіць адно доўгае валакно, таму трэба старацца выкарыстоўваць усё, што ёсць. Аказваецца, можна”, - заўважыў Аляксандр Лукашэнка.

Баранавіцкае вытворчае баваўнянае аб’яднанне цяпер сканцэнтравана на ўкараненні новых тэхналогій. Хутка на прадпрыемстве зманціруюць лініі, якія дадуць магчымасць знізіць сабекошт прадукцыі.

Гомельская вобласць

Затрымаўся Аляксандр Лукашэнка і ў магазіне беларускага фарфору. У пачатку 2020 года, наведваючы Добрушскі фарфоравы завод, Прэзідэнт заявіў, што прадукцыя гэтага прадпрыемства будзе запатрабавана заўсёды, таму важна захаваць вытворчасць і не страціць рынкі.

"Усюды за мяжой прапагандую ваш тавар. Помню, вы мне на фабрыцы паказалі вырабы - да гэтага часу перад вачыма стаіць", - заявіў Кіраўнік дзяржавы.

У лістападзе Аляксандр Лукашэнка наведаў гомельскі ювелірны завод "Крышталь". Праўда, тады Прэзідэнт не паспеў пабываць у фірменным магазіне прадпрыемства. Цяпер Кіраўнік дзяржавы нагнаў упушчанае. У ювелірным салоне яму далажылі аб выніках работы прадпрыемства ў бягучым годзе і планах на бліжэйшую перспектыву.

"Гэта адзіны магазін, дзе толькі прадукцыя "Крышталя", - адзначыў генеральны дырэктар прадпрыемства Руслан Саракавой.

"Толькі не спыняйся. Ты павінен кожны год па некалькі экзэмпляраў вырабаў (выпускаць. - Заўвага)", - падкрэсліў Прэзідэнт.

А ў прадуктовым магазіне Гомельскай вобласці Аляксандр Лукашэнка прадэгуставаў мяса-малочную прадукцыю абласных прадпрыемстваў. Магазін асаблівы, паколькі свае тавары прадставілі лепшыя прадпрыемствы рэгіёна. Гомельская вобласць разглядае магчымасць адкрыцця падобных магазінаў у Расіі і нават Кітаі.

Прадстаўлены ў гандлёвым цэнтры і гомельскі тэкстыль.

"Паколькі ўсё прадставіць немагчыма, мы зрабілі павільён, дзе расказваем пра ўсе прадпрыемствы, магчымасці і паслугі - і турыстычныя, і медыцынскія", - расказаў старшыня Гомельскага аблвыканкама Іван Крупко.

Гродзенская вобласць

У магазіне шклозавода "Нёман" Прэзідэнта таксама праінфармавалі аб рабоце прадпрыемства. Паводле слоў кіраўніцтва, заказаў цяпер шмат, на складзе прадукцыя не затрымліваецца. "Усе тры мільёны вырабаў, выпушчаных у бягучым годзе, мы сёлета і рэалізавалі", - заявілі ў магазіне. "Калі ў вас на вытворчасці так, як гаворыце, то дзякуй вам, што захавалі завод", - сказаў Кіраўнік дзяржавы.

Ён нагадаў, што ў свой час завод давялося ратаваць, каб захаваць вытворчасць і кампетэнцыі. У падобнай сітуацыі некалі знаходзіўся і гомельскі "Крышталь".

Асаблівую ўвагу губернатар Гродзенскай вобласці Уладзімір Каранік акцэнтаваў на прадпрыемстве "Белкрэда", якое займаецца пашывам мужчынскіх касцюмаў.

"А губернатар ваша носіць?" - удакладніў Аляксандр Лукашэнка ў магазіне.

"Я ў іх касцюме!" - заявіў губернатар.

У гандлёвым цэнтры Прэзідэнту таксама далажылі аб рэалізацыі галоўнага інвестыцыйнага праекта Лідскага раёна - вытворчасці мяса індычкі. "Мы аднавілі гэты праект", - сказаў Уладзімір Каранік.

Віцебская вобласць

Экскурсія па паўночным рэгіёне Беларусі пачалася з магазіна аднаго са старэйшых прадпрыемстваў вобласці - "Віцебскія дываны".

"Як вы працуеце цяпер, ці ўсё вы прадаяце?" - перш за ўсё спытаў Аляксандр Лукашэнка.

"У гэтым годзе экспарт складзе каля $41 млн. Прадалі нават больш, чым вырабілі. Зменшылі складскія астаткі на 23%", - далажыў генеральны дырэктар прадпрыемства Арцём Лаханкін.

У магазіне Кіраўніку дзяржавы паказалі новую прадукцыю - дываны з поліэстэравай ніткі. Знешне яны падобныя да шаўковых, у той час як поліпрапіленавыя дываны нагадваюць шарсцяныя вырабы. Дарэчы, шарсцяныя дываны таксама карыстаюцца папулярнасцю ў пакупнікоў.

Віцебская вобласць таксама славіцца сваёй мясной прадукцыяй. Адзін з лідараў тут - Віцебская бройлерная птушкафабрыка, таму абмінуць фірменны магазін "Ганна" Прэзідэнт не мог.

На прадпрыемстве памятаюць, як у 2006 годзе Аляксандр Лукашэнка прыехаў да іх з візітам. Тады гэта была маленькая фабрыка, а сёння - найбуйнейшая вытворчасць у рэгіёне дзякуючы падтрымцы з боку дзяржавы. "З 2021 года мы інвесціравалі Br350 млн у асноўны капітал. Чатыры буйныя аб'екты адкрылі і два сёння на стадыі рэалізацыі", - расказала генеральны дырэктар Ганна Норкус.

"А яйкі ёсць?" - удакладніў Прэзідэнт.

"Таксама ёсць", - адказала Ганна Норкус.

"Дык трэба Пуціну перакінуць", - прапанаваў Аляксандр Лукашэнка.

"Мы ім прапануем, але ім усё мала. 70% у нас - гэта ўнутраны рынак і 30% - экспарт. З гэтых 30% Расійская Федэрацыя – 16%, 10% - Кітай, 4% - постсавецкія краіны. Але свой рынак – перш за ўсё", - прывяла некалькі лічбаў генеральны дырэктар.

Магілёўская вобласць

Губернатар Магілёўскай вобласці Анатоль Ісачанка перш за ўсё вырашыў прадэманстраваць Кіраўніку дзяржавы павільён Бялыніцкага лясгаса, дзе можна азнаёміцца з тыпавымі домакамплектамі. Работнікі прадпрыемства гатовы падрабязна праінфармаваць пакупнікоў аб цане і асаблівасцях такога жылля.

Сваю прадукцыю тут прапанавалі і мясцовыя рамеснікі - атрымалася добрая калабарацыя.

Запрасілі ў госці Прэзідэнта бабруйская "Славянка", прадэманстраваўшы апошнія калекцыі верхняга адзення, а таксама булачна-кандытарская кампанія "Дамачай". Хлеб гэтага вытворцы - адзін з любімых у Кіраўніка дзяржавы.

Мінская вобласць і Мінск

Вытворца жаночых сумак і аксесуараў са скуры "Матыёлі" таксама адкрыў свой магазін у гандлёвым цэнтры. Аляксандр Лукашэнка зазірнуў і да яго.

Ну і як жа прайсці міма легендарнай кандытарскай фабрыкі "Камунарка"! У фірменным магазіне Кіраўнік дзяржавы пакінуў свой ядомы (у прамым сэнсе слова) аўтограф на размаляваным шакаладзе - такія вырабы вагой некалькі кілаграмаў сталі брэндам прадпрыемства. А гэты экзэмпляр упрыгожыць музей фабрыкі.

Цікава, што наведванне кожнага магазіна абарочвалася невялікай вытворчай нарадай: Прэзідэнт цікавіўся фінансавым становішчам на прадпрыемствах, вынікамі экспартнай дзейнасці і існуючымі праблемамі. Ці то выкарыстанне ў вытворчасці айчынных матэрыялаў, ці пастаўка какава-бабоў - усе пытанні трымаюцца на кантролі.

Гандлёвы цэнтр "Першы нацыянальны гандлёвы дом" мае ўнікальны фармат. Такі аб'ект, у якім прадстаўлена прадукцыя айчынных вытворцаў з кожнага рэгіёна краіны, адкрываецца ўпершыню. Гандлёвая прастора прадстаўлена фірменнымі магазінамі і аб'ектамі грамадскага харчавання вядучых беларускіх вытворцаў. Плануецца, што наведванне гандлёвага цэнтра будзе ўключана ў турыстычныя маршруты па горадзе Мінску, каб госці сталіцы змаглі азнаёміцца з прадукцыяй айчынных вытворцаў і набыць яе ў адным месцы.