Інтэрв'ю прадстаўнікам вядучых расійскіх СМІ

Прэзідэнт Беларусі Аляксандр Лукашэнка 8 верасня даў інтэрв'ю прадстаўнікам вядучых расійскіх СМІ.

Мерапрыемства праходзіла ў Мінску ў Палацы Незалежнасці. На інтэрв'ю да Кіраўніка беларускай дзяржавы прыехалі галоўны рэдактар міжнароднага тэлеканала Russia Today Маргарыта Сіманьян, карэспандэнт "Першага канала" Антон Вярніцкі, вядучы праграмы "Весці" на тэлеканале "Расія 1" Яўген Ражкоў, галоўны рэдактар радыёстанцыі "Гаворыць Масква" Раман Бабаян.

Аляксандр Лукашэнка традыцыйна падрабязна і шчыра адказаў на многія, у тым ліку даволі вострыя пытанні. Узнімаліся тэмы грамадска-палітычнай абстаноўкі і падзей у Беларусі ў паслявыбарны перыяд, знешняга ўмяшання ў адпаведныя працэсы, перспектыў у развіцці адносін і інтэграцыі з Расіяй. Прэзідэнт таксама расказаў аб рабоце, якая вядзецца па абнаўленні Канстытуцыі, адказаў на пытанне аб магчымасці датэрміновых выбараў, раскрыў падрабязнасці гісторыі з затрыманнем у Беларусі прадстаўнікоў прыватнай ваеннай кампаніі Вагнера.

У прыватнасці, Аляксандр Лукашэнка пракаменціраваў здарэнне на беларуска-ўкраінскай граніцы з удзелам Марыі Калеснікавай. "Падрабязней я, напэўна, не магу расказаць з прычыны таго, што мне толькі што далажылі. Яна і двое яе сяброў (не то вадзіцеляў, не то блізкіх, не то далёкіх) сёння беглі ва Украіну. У іх усё было аформлена загадзя. Яны прад'явілі пашпарт на нашым участку - пагранічнікі і мытнікі прапусцілі іх", - расказаў Кіраўнік дзяржавы.

Прэзідэнт звярнуў увагу, што ад беларускага пункта пропуску да ўкраінскага прыкладна 8 км. На сваёй частцы тэрыторыі Беларусь узмацніла ахову дзяржграніцы. "Зразумела, іх спынілі. Яны на сваім аўтамабілі па газах, яе - ці то выкінулі з машыны на хаду... Нашы пагранічнікі, зразумела, яе затрымалі, як належыць, - адзначыў Кіраўнік дзяржавы. - А гэтыя (спадарожнікі Марыі Калеснікавай. - Заўвага) - праз граніцу, праз пост украінскі. Украінцы, наколькі я цяпер інфармаваны, іх затрымалі. Мы з імі вядзём перагаворы, каб яны нам іх вярнулі".

Аляксандр Лукашэнка дадаў, што падстаў не выпускаць Марыю Калеснікаву і грамадзян, якія суправаджалі яе, з краіны ў асноўным пункце пропуску не было: усе неабходныя дакументы ў кампаніі былі ў парадку. Аднак яны зрабілі спробу прарвацца праз дадатковы пост, а значыць, парушылі парадак перасячэння дзяржаўнай граніцы.

"Я гавару: а чаму ва Украіну, не ў Літву, не ў Польшчу, як яны звычайна едуць? Кажуць, там нехта са сваякоў. Не сцвярджаю, - дадаў Прэзідэнт. - Таму я не ўсё яшчэ ведаю. Будзем разбірацца, што адбылося".

Аляксандр Лукашэнка звярнуў увагу на ролю інтэрнэту і Telegram-каналаў у сучасным грамадстве і іх часта негатыўны ўплыў на аўдыторыю. Разам з тым спосабы процістаяць такому ўздзеянню пакуль практычна адсутнічаюць.

"У вас ёсць магчымасць блакіраваць Telegram-каналы? Ні ў каго няма, нават у тых, хто ўсю гэту павуціну прыдумаў, - амерыканцы. Вы ж бачыце, што там робіцца. І Telegram-каналы там адыгрываюць вядучую ролю, - адзначыў Кіраўнік дзяржавы. - Гэта яны задумалі, яны гэта пачыналі, і прытым даўно. Не Расія, не Беларусь гэта задумала - гэта яны заўсёды гэтым займаліся і атрымалі. Гасподзь з імі. А мы пажынаем плады ўсяго гэтага. Нават калі інтэрнэт сёння ліквідаваць, Telegram-каналы гэтыя з Польшчы будуць працаваць".

Аляксандр Лукашэнка лічыць, што Расія таксама можа сутыкнуцца з праблемай негатыўнага ўплыву на грамадства з боку Telegram-каналаў. "Усё гэта глабалізавана і інтэрнацыяналізавана. Калі вы думаеце, што багатая Расія з гэтым справіцца, памыляецеся. Я размаўляў з многімі прэзідэнтамі, са сваім старэйшым сябрам (старэйшым братам, як я яго называю) Пуціным, я яго папярэдзіў: гэтаму процістаяць нельга", - расказаў беларускі лідар.

"Таму вы не расслабляйцеся. У вас таксама хутка пэўныя палітычныя падзеі. А можа быць і на роўным месцы. Ведаеце, мы да чаго прыйшлі разам з расійскім істэблішментам і кіраўніцтвам? Калі сёння Беларусь рухне, наступнай будзе Расія", - адзначыў Аляксандр Лукашэнка.

Кіраўнік беларускай дзяржавы ў інтэрв'ю расійскім СМІ таксама заявіў, што не дазволіць разбурыць тое, што стваралася ў краіне пакаленнямі людзей.

"Калі б у мяне ў кішэні было некалькі мільярдаў, можа, я зрабіў бы, як Парашэнка. Наўрад ці, безумоўна. Але я так часам думаю. Але калі ў мяне гэтых мільярдаў няма... Таму я не баюся, - сказаў Аляксандр Лукашэнка. - Я нават дома гавару: слухайце, дзеці, ну не сёння - заўтра. Хто ведае, калі я пайду да Яго, калі Ён мяне пакліча (калі яны мяне спрабуюць стрымаць ад чагосьці). Некалі я пайду, але я ім (апанентам улады. - Заўвага) не дазволю тое, што мы стваралі з людзьмі, з гэтымі пакаленнямі, разбурыць. Вось чым я жыву".

"Ці крыўдна проста па-чалавечы? Таму што ёсць людзі, якія не помняць з прычыны ўзросту, а тыя, хто помніць, не цэняць, як было і як стала", - удакладніў адзін з журналістаў.

"Вельмі крыўдна, - адказаў Прэзідэнт. - Зразумела, для мяне гэта вельмі крыўдна і трагічна, калі хочаце. Але гэта не значыць, што я апусціў рукі, таму што я па-філасофску на гэта гляджу. Некалі Ён мяне туды пакліча, але я павінен абараніць тое, што створана нашымі рукамі, абараніць тых людзей, якія гэта стваралі, і вось гэтых - пераважную большасць, якія за мяне прагаласавалі, хоць бачаць мяне кожны дзень у тэлевізары і ў "халадзільніку". Можа, недзе і надаела, але яны мяне падтрымалі. Гэтым я цяпер і жыву".

У Кіраўніка дзяржавы таксама пацікавіліся, што пасля ўсіх бягучых падзей у Беларусі для яго цяпер самае галоўнае ў жыцці.

"Калі шчыра, я нават не ведаю. Цяжка сказаць. Мае дзеці і дзеці тых людзей, якія са мной побач, - заявіў Аляксандр Лукашэнка. - Што мяне вельмі трымае ў гэтай сітуацыі (ды і вы, напэўна, ведаеце): калі б цяпер рухнуў Лукашэнка, рухнула б уся сістэма і ўслед пакацілася б і Беларусь. Я думаю, што далёка адкацілася б. Можа, нехта падставіў бы сваё магутнае плячо. Але цяпер было б вельмі цяжка. І вось гэтыя хлопцы - амапаўцы і іншыя - тыя, хто са мной побач, яны ў чым вінаваты? А іх будуць рэзаць, іх будуць рваць".