Даклад Намесніка Прэм'ер-міністра Анатоля Сівака і Міністра транспарту і камунікацый Аляксея Аўраменкі

Прэзідэнт Беларусі Аляксандр Лукашэнка патрабуе забяспечыць нармальнае функцыянаванне транспартнай галіны, нягледзячы на санкцыі. Аб гэтым Кіраўнік дзяржавы заявіў 16 жніўня, прымаючы з дакладам Намесніка Прэм'ер-міністра Анатоля Сівака і Міністра транспарту і камунікацый Аляксея Аўраменкі.

"З'яўляючыся транзітнай краінай, вы проста абавязаны забяспечыць нармальнае функцыянаванне гэтага транспарту", - падкрэсліў беларускі лідар.

"Я рэальна гляджу на рэчы. Зразумела, можа быць нейкі збой. Але ён павінен быць кароткачасовым. І, напэўна, павінен ужо скончыцца. Таму што ўсе мы разумелі, што яны нас у спакоі не пакінуць і будуць увесь час гэтымі санкцыямі падсілкоўваць, вобразна кажучы. Як складваецца цяпер сітуацыя? І калі ёсць нейкія праблемы, якія шляхі выхаду вы бачыце з гэтага становішча?" - пацікавіўся Кіраўнік дзяржавы.

У самым пачатку сустрэчы Аляксандр Лукашэнка адзначыў, што першым пытаннем у час даклада яму было прапанавана паслухаць "Аб значнасці транспартнага комплексу ў сацыяльна-эканамічным развіцці краіны". "Калі ласка, не трэба аб значнасці. Я не першы год працую Прэзідэнтам і ведаю, што такое транспартны комплекс і яго значэнне ў сацыяльна-эканамічным развіцці краіны. Гэта вунь прэс-сакратару і Адміністрацыі Прэзідэнта раскажаце, калі яны не валодаюць гэтым пытаннем", - зрабіў рэмарку беларускі лідар.

Звяртаючыся да дакладчыкаў, Прэзідэнт падкрэсліў, што яго сёння хвалююць і непакояць пытанні, якія хвалююць іх саміх. "Пачынаючы ад "Белавія", калі гэтыя вар'яты (за мяжой. - Заўвага) пачалі душыць нашу кампанію. Цяпер ужо зразумела, чаму", - сказаў Кіраўнік дзяржавы. Ён пацікавіўся, як складваюцца справы непасрэдна ў авікампаніі і ў цэлым, як жыве транспартны комплекс краіны.

У гэтым плане Аляксандр Лукашэнка заўважыў, што экспарт транспартных паслуг за паўгоддзе перасягае $2 млрд, а гэта ў сваю чаргу амаль палавіна ад агульнага аб'ёму знешняга гандлю паслугамі. "Гэта велізарныя маштабы, велізарная сума. Мы - транзітная краіна", - падкрэсліў Прэзідэнт.

Кіраўнік дзяржавы запатрабаваў далажыць яму аб стане спраў у пытанні дарожнага будаўніцтва. Ён адзначыў, што адпаведныя задачы для краіны ў свой час былі цалкам сфармуляваны - пачынаючы ад мясцовых дарог і заканчваючы будаўніцтвам новых аўтамагістралей.

"Якія будуем, як будзем будаваць далей, як ідуць справы з мясцовымі дарогамі? Так у нас атрымаецца, што Мінск злучылі сёння з усімі абласнымі цэнтрамі. Сёння: едзь - не хачу. А там, на месцах, нам трэба ў больш-менш нармальным стане падтрымліваць дарожна-транспартную сетку. Прынамсі, да аграгарадкоў мы павінны даязджаць свабодна на аўтамабілі", - акцэнтаваў увагу Прэзідэнт.

Кіраўнік дзяржавы пацікавіўся альтэрнатыўнымі схемамі паставак беларускай прадукцыі за мяжу: "Пра што я хацеў бы пачуць - альтэрнатыўныя схемы паставак нашай прадукцыі".