Беларускі рэспубліканскі саюз моладзі

ГА "БРСМ"

Беларусь - адна з нямногіх краін на постсавецкай прасторы, у якой па асабістай ініцыятыве і пад патранажам Прэзідэнта сістэмна рэалізуецца дзяржаўная маладзёжная палітыка. Яе станаўленне адбывалася з першых дзён незалежнасці краіны, і сёння створаны ўсе неабходныя ўмовы для ўсебаковага развіцця маладых людзей, раскрыцця іх творчага патэнцыялу і падтрымкі маладзёжных ініцыятыў.

У 2002 годзе ў жыцці беларускай моладзі адбылася важная падзея: дзве магутныя арганізацыі - Беларускі саюз моладзі (БСМ) і Беларускі патрыятычны саюз моладзі (БПСМ) аб'ядналіся ў Беларускі рэспубліканскі саюз моладзі (БРСМ).

Ля вытокаў стварэння БРСМ стаяў Прэзідэнт Рэспублікі Беларусь Аляксандр Лукашэнка. Выступаючы перад дэлегатамі 38-га аб'яднальнага з'езда БСМ і БПСМ, Кіраўнік дзяржавы падкрэсліў, што магутная аб'яднаная маладзёжная арганізацыя павінна стаць адной з апор нашага грамадства.

Галоўная мэта Саюза моладзі - стварэнне ўмоў для эфектыўнага ўдзелу маладых людзей у грамадска-палітычным і культурным жыцці грамадства, фарміраванне ў моладзі актыўнай жыццёвай пазіцыі і падрыхтоўка кадраў для ўсёй дзяржаўнай сістэмы.

Новы імпульс маладзёжны рух незалежнай краіны атрымаў у 2015 годзе, які па ініцыятыве БРСМ быў аб'яўлены ў Беларусі Годам моладзі.

Сёння арганізацыя аб'ядноўвае найбольш актыўных прадстаўнікоў новага пакалення, тых, хто імкнецца прыкласці свае сілы і здольнасці, каб зрабіць больш цікавым, яркім, асэнсаваным уласнае жыццё і жыццё равеснікаў, будаваць працвітаючую Беларусь.

БРСМ стымулюе маладых людзей займаць актыўную жыццёвую пазіцыю, і, ствараючы сацыяльныя ліфты, прадастаўляе юнакам і дзяўчатам шырокі спектр магчымасцей.

Асноўнымі напрамкамі дзейнасці БРСМ з'яўляюцца:

  • грамадзянска-патрыятычнае выхаванне (у тым ліку рух маладзёжных атрадаў правапарадку);
  • працаўладкаванне моладзі (студатрадаўскі рух); 
  • прапаганда здаровага ладу жыцця; 
  • падтрымка адоранай і таленавітай моладзі; 
  • міжнароднае супрацоўніцтва; 
  • развіццё валанцёрскага руху;
  • работа з моладдзю ў інфармацыйнай прасторы;
  • прававое выхаванне моладзі;
  • падтрымка маладзёжных ініцыятыў.
Яскравымі прыкладамі маладзёжнай ініцыятывы сталі Усебеларуская акцыя "Мы - грамадзяне Беларусі!", прысвечаная Дню Канстытуцыі Рэспублікі Беларусь; нацыянальны патрыятычны праект "Кветкі Вялікай Перамогі", сімвалам якога з'яўляецца кветка яблыні ў спалучэнні з чырвона-зялёнай стужачкай, электронны альбом памяці "Беларусь памятае. Родныя твары Перамогі", праекты "Сям'я Пераможца" і "Лічбавая зорка", фестываль-конкурс "Салдацкі канверт", прызначаныя захаваць для нашчадкаў памяць аб кожным удзельніку вызвалення Беларусі ад нямецка-фашысцкіх захопнікаў і Вялікай Перамозе.

На фарміраванне грамадзянскай пазіцыі маладых людзей, папулярызацыю дасягненняў дзяржавы ў перыяд незалежнасці і суверэнітэту краіны, інстытута Прэзідэнцтва накіраваны цэлы комплекс мерапрыемстваў. У іх ліку адкрытыя дыялогі з моладдзю, рэспубліканскія патрыятычныя праекты "Канстытуцыя - Сіла Асноўнага Закона", прававы турнір "Сіла Закона", інтэлектуальна-прававая гульня "Сіла Закона: мы і права".

Прававому суправаджэнню - умацаванню прававых навыкаў юнакоў і дзяўчат, фарміраванню прававой культуры юных грамадзян, устойлівых грамадскіх каштоўнасцей і прававых арыенціраў моладзі - садзейнічае супрацоўніцтва БРСМ з Нацыянальным цэнтрам заканадаўства і прававой інфармацыі Рэспублікі Беларусь, Інстытутам павышэння кваліфікацыі і перападрыхтоўкі Следчага камітэта, Беларускім рэспубліканскім саюзам юрыстаў, Беларускай рэспубліканскай калегіяй адвакатаў.

Цікавасць юнакоў і дзяўчат да захавання традыцый беларускага народа, атрыбутаў дзяржаўнай сімволікі, выкарыстання нацыянальнага беларускага арнаменту знайшла адлюстраванне ў праектах "Роднае-народнае" і "Народная зарадка".

Пры падтрымцы дзяржавы БРСМ змог адрадзіць знакаміты камсамольскі брэнд - студатрадаўскі рух. Яго папулярнасць пацвярджаюць дзясяткі тысяч штогод працаўладкаваных юнакоў і дзяўчат. Толькі ў перыяд 2021–2024 гг. Саюз моладзі аказаў дапамогу ў працаўладкаванні ў складзе студэнцкіх атрадаў больш як 175 тыс. юнакоў і дзяўчат.

Валанцёры руху БРСМ "Добрае Сэрца" клапоцяцца аб канкрэтных маладых людзях і дзецях, якія трапілі ў складаную жыццёвую сітуацыю.

Добраахвотнікі Саюза моладзі аказваюць дапамогу ветэранам вайны і адзінокім пажылым людзям, сваім аднагодкам з абмежаванымі магчымасцямі, наводзяць парадак на зямлі, высаджваюць кветкі і дрэвы, добраўпарадкоўваюць берагі рэк, азёр, аднаўляюць храмы, гістарычныя помнікі.

Візітныя карткі БРСМ

  • дабрачынны марафон "Усе фарбы жыцця для цябе"; 
  • Дзень моладзі на Міжнародным фестывалі мастацтваў "Славянскі базар у Віцебску";
  • міжканфесійны праект "Аднаўленне святынь Беларусі";
  • фестываль здаровага ладу жыцця "Алімпія";
  • рэспубліканскія конкурсы і праекты: "Студэнт года", "Міс і Містар Студэнцтва Беларусі", "Моладзь за ўраджай!", "Уладар вёскі", "Курсант года" і многія іншыя.

На фоне росту ўвагі да інавацыйнай творчасці маладзёжны праект "100 ідэй для Беларусі" на лепшую інавацыйную ідэю ў розных сферах сацыяльнага і эканамічнага развіцця краіны, цікавую для практычнай рэалізацыі, а таксама "Конкурс маладзёжных ініцыятыў" з'яўляюцца адной з тых форм работы, якая дае магчымасць маладым людзям праявіць сябе абсалютна ў любой сферы на карысць краіны.

Саюз моладзі знаходзіцца ў пастаянным пошуку новых форм і ідэй і адкрыты для ўсіх, хто настроены на супрацоўніцтва і гатовы рэалізоўваць сумесныя праекты. 

Будучыня Беларусі залежыць непасрэдна ад ініцыятыўных, здольных крэатыўна мысліць, знаходзіць дастойныя адказы на выклікі часу маладых людзей. За гады сваёй дзейнасці БРСМ стаў сур'ёзнай школай асобаснага і грамадзянскага станаўлення, асноўная задача якой - фарміраванне ў моладзі актыўнай жыццёвай пазіцыі і падрыхтоўка кадраў для ўсёй дзяржаўнай сістэмы.

БРСМ плённа супрацоўнічае з БРПА ва ўсіх сферах грамадскага жыцця. Піянерскія дружыны разам з пярвічнымі арганізацыямі БРСМ школ прымаюць актыўны ўдзел у праектах і акцыях Саюза моладзі і піянерскай арганізацыі. Піянеры, якія становяцца больш дарослымі, робяць свядомы выбар і ўступаюць у рады БРСМ.

Заслугі БРСМ адзначаны Кіраўніком дзяржавы. Прэзідэнт уручыў Беларускаму рэспубліканскаму саюзу моладзі Ганаровы дзяржаўны сцяг Рэспублікі Беларусь у гонар 85-годдзя УЛКСМ.

За значны ўклад у грамадзянскае выхаванне і фарміраванне патрыятычнай самасвядомасці моладзі ў 2015 годзе Цэнтральны камітэт ГА "БРСМ" адзначаны прэміяй Прэзідэнта "За духоўнае адраджэнне".

У 2024 годзе названай узнагароды за рэалізацыю міжнароднага маладзёжнага патрыятычнага праекта "Дарогамі памяці і славы" ўдастоены Магілёўскі абласны камітэт ГА "БРСМ" сумесна з тэлерадыёкампаніяй "Магілёў" і Магілёўскім абласным краязнаўчым музеем імя Я.Р.Раманава.