Пасяджэнне Савета Бяспекі

Прэзідэнт Беларусі Аляксандр Лукашэнка 18 чэрвеня сабраў пасяджэнне Савета Бяспекі ў развіццё прынятай нядаўна на Усебеларускім народным сходзе новай Канцэпцыі нацыянальнай бяспекі. На разгляд членаў Савета Бяспекі быў вынесены праект нарматыўнага прававога акта, звязанага з пытаннямі ацэнкі стану нацыянальнай бяспекі.

"Гэта значыць, у той ці іншы перыяд часу нам трэба выпрацаваць крытэрый ацэнкі стану нацыянальнай бяспекі. Улічваючы значнасць гэтага дакумента, прынята рашэнне правесці пасяджэнне Савета Бяспекі і ў такім фармаце яго разгледзець. Як вы памятаеце, на сёмым Усебеларускім народным сходзе гаварылася аб неабходнасці перапрацоўкі адпаведных нарматыўных прававых актаў у развіццё новай Канцэпцыі нацыянальнай бяспекі, - сказаў Прэзідэнт. - Мы гаварылі аб тым, што Канцэпцыя нацыянальнай бяспекі - гэта публічны дакумент. Мы салідна вывучылі яго, на дыялогавых пляцоўках разгледзелі, а потым зацвердзілі на УНС. Але ў развіццё гэтай Канцэпцыі (гэта ў асноўным агульныя напрамкі, тэорыя) патрэбны нарматыўныя прававыя акты, якія будуць яе канкрэтызаваць і прызямляць".

Фактычна гэтыя дакументы з'яўляюцца неад'емнай часткай Канцэпцыі, але па існуючай практыцы носяць закрыты характар.

"Канцэпцыя зацверджана. Нашы нацыянальныя стратэгічныя інтарэсы, пагрозы, прыярытэтныя напрамкі іх нейтралізацыі, агульнае бачанне далейшага развіцця ў сферы бяспекі вызначаны. Тут усё ясна. Рэспубліка Беларусь - мірная краіна, заўсёды адкрытая для раўнапраўнага дыялогу і ўзаемавыгаднага супрацоўніцтва. Мы нікому ніколі не пагражалі. Больш таго, адкрыта (у адрозненне ад іншых краін) даводзім нашы падыходы ўсім. Хто хоча гэта пачуць - той пачуе", - падкрэсліў Аляксандр Лукашэнка.

Што датычыцца актуальнасці тэматыкі цяперашняга пасяджэння Савета Бяспекі, Прэзідэнт растлумачыў яе наступным чынам: "Мы гаварылі аб тым, што толькі замацаваць асобныя палажэнні ў нарматыўных прававых актах недастаткова. Настаў час укараніць гэтыя падыходы ў практыку. Гэта значыць, мы павінны мець дакладнае ўяўленне аб тым, што рэальна адбываецца ўнутры краіны і вакол яе. Ваенная бяспека, эканоміка, сацыяльная, палітычная сферы і іншыя. Без прыкрас, максімальна выверана і аб'ектыўна".

У сувязі з гэтым Аляксандр Лукашэнка паставіў перад дакладчыкамі шэраг пытанняў аб тым, якая работа праведзена па ўдасканаленні дзеючай сістэмы ацэнкі стану нацыянальнай бяспекі; якім чынам прапанаваныя змяненні адпавядаюць новай Канцэпцыі нацыянальнай бяспекі. І галоўнае - ці адлюстроўвае прапанаваная сістэма ацэнкі рэальны стан спраў у кожнай сферы нацыянальнай бяспекі.

"Вы ведаеце нашы патрабаванні - фармалізму і спрашчэнства тут быць не павінна", - акцэнтаваў увагу Кіраўнік дзяржавы.

У ліку дакладчыкаў на пасяджэнні - Дзяржаўны сакратар Савета Бяспекі Аляксандр Вальфовіч, Міністр эканомікі Юрый Чабатар і Міністр абароны Віктар Хрэнін.

Дзяржсакратарыятам распрацаваны праект Указа Прэзідэнта аб зацвярджэнні дакументаў па рэалізацыі Канцэпцыі нацыянальнай бяспекі Рэспублікі Беларусь. Пасля зацвярджэння Канцэпцыі на пасяджэнні УНС, гэта наступны важны этап удасканалення заканадаўства ў гэтай сферы. "Мэта названага дакумента - з улікам новых змяненняў удакладніць парадак ацэнкі стану нацыянальнай бяспекі на аснове сістэмы індыкатараў, распрацаваных для кожнай з дзевяці сфер нацыянальнай бяспекі, - адзначыў Аляксандр Вальфовіч. - Работа над праектам Указа будавалася па аналогіі з падрыхтоўкай Канцэпцыі нацыянальнай бяспекі. Мы захавалі у дакуменце ўсё лепшае, што станоўча зарэкамендавала сябе на практыцы, і тое, што сёння яшчэ не адпрацавала сябе. Пры гэтым улічылі новыя прапановы, ішлі ад рэальнай абстаноўкі".

Нягледзячы на шэраг дапаўненняў, у цэлым структура дакумента і агульны алгарытм работы засталіся без кардынальных змяненняў. Як і раней, за кожнай сферай замацаваны адказны орган-каардынатар і органы-выканаўцы, якія ў адпаведнасці з устаноўленымі індыкатарамі і іх парогавымі значэннямі праводзяць аналіз і прапануюць адпаведную ацэнку. Стан нацыянальнай бяспекі ў кожнай сферы, як і раней, ацэньваецца па трох крытэрыях: стабільны, няўстойлівы і які патрабуе прыняцця неадкладных мер. Гэта адпавядае замацаваным у Канцэпцыі паняццям рызыкі, выкліку і пагрозы нацыянальнай бяспецы.

Кіраўнік дзяржавы ў цэлым адобрыў праект Указа. У дакумент унясуць некаторыя карэкціроўкі з улікам праведзеных абмеркаванняў.

Перад пасяджэннем у Палацы Незалежнасці Аляксандр Лукашэнка азнаёміўся з перспектыўнымі ўзорамі новых прадметаў формы адзення для ваеннаслужачых.

Узоры новай формы былі падрыхтаваны Міністэрствам абароны па даручэнні Кіраўніка дзяржавы. У ведамстве растлумачылі, што змяненні абумоўлены сусветнымі тэндэнцыямі, трансфармацыяй вучэбна-баявых задач, якія выконваюцца ваеннаслужачымі, а таксама неабходнасцю ўніфікацыі асобных прадметаў форменнага адзення для розных катэгорый ваеннаслужачых.

"Што новага? Чым не задавольвае тое адзенне, якое ёсць?" - спытаў Аляксандр Лукашэнка.

Як далажыў Прэзідэнту намеснік Міністра абароны па тыле - начальнік тылу Узброеных Сіл Андрэй Бурдыка, прапанаваныя змяненні дадуць магчымасць пашырыць функцыянальнасць ваеннай формы, забяспечыць зручнасць пры яе нашэнні з улікам спецыфікі задач, якія выконваюцца ваеннаслужачымі.

Некаторыя элементы адзення былі ўдасканалены канструктыўна, каб форма не скоўвала ваеннаслужачых пры выкананні пастаўленых задач. У баявым адзенні ўзмацнілі ахову каленных і локцевых суставаў.

Усе новаўвядзенні - пералік і назва прадметаў ваеннага адзення, іх колеравая гама - замацаваны ў праекце Указа Прэзідэнта. Да выпуску плануецца тактычная кашуля, флісавая куртка, кашнэ летняе і зімовае для баявой формы адзення. Футравыя каўняры ў зімовых куртках заменяць на тэкстыльныя, а кант на форме ўнутраных войскаў МУС будзе выконвацца ў крапавым колеры - гэта даніна традыцыям.

Для жанчын у дапаўненне да штодзённай формы вырашана пашыць сукенкі. Вобраз дапоўняць капялюш і гальштук-бант. Восенню жанчынам стануць выдаваць дэмісезонныя чаравікі. У курсантаў з'явіцца так званы офісны камплект з курткі і штаноў (цяперашняя штодзённая форма з кіцелем будзе апранацца на ўрачыстыя мерапрыемствы), на лета ім, як і салдатам, будуць выдаваць футболкі пола.

У ваенным ведамстве лічаць, што таксама неабходна перагледзець форму сувораўцаў: існуючая зацверджана ў 1996 годзе. Яна будзе падобная да формы курсантаў, але выканана ў прывычных цёмных адценнях. Змяненні будуць замацаваны ў асобным Указе.

"Цана пытання?" - удакладніў Кіраўнік дзяржавы.

"Цана пытання застаецца ранейшай за кошт павелічэння тэрмінаў нашэння, замены іншых прадметаў адзення", - сказаў Андрэй Бурдыка.

Ён дадаў, што распрацаваныя мадэлі былі перададзены ў войскі для пробнага нашэння. Пры вытворчасці формы ўлічваліся пажаданні і прапановы ваеннаслужачых.

"Вас задавольвае - добра. Грошай лішніх не прасіце. Так таму і быць", - рэзюмаваў Прэзідэнт.

Разам з тым Аляксандр Лукашэнка заўважыў, што, калі ўзнікае неабходнасць удасканаліць форму, не трэба чакаць некалькіх гадоў. Гэтыя пытанні павінны вырашацца аператыўна, падкрэсліў ён.

Чакаецца, што новая форма стане паступаць у войскі ў трэцім-чацвёртым квартале гэтага года - пасля прыняцця неабходных нарматыўных прававых актаў і ўнутрыведамасных дакументаў.

Што важна, уся форма выраблена на беларускіх прадпрыемствах і з айчынных тканін. У вытворчасці ўдзельнічалі флагманы тэкстыльнай прамысловасці - магілёўскі "Магатэкс" і мінскі "Камволь".