Сустрэча з рабочай групай па дапрацоўцы праекта Канстытуцыі

Прэзідэнт Беларусі Аляксандр Лукашэнка правёў 15 лістапада сустрэчу з рабочай групай па дапрацоўцы праекта Канстытуцыі.

"Я спадзяюся, што наша сённяшняя сустрэча напярэдадні нарады Канстытуцыйнай камісіі будзе падагульняючай. Мэта сённяшняга мерапрыемства - звесці разам усе выпрацаваныя прапановы, стварыць канчатковую канфігурацыю абноўленага Асноўнага закона. Зрабіць гэта так, каб яго палажэнні ўяўлялі сабой адзіную і стройную сістэму", - сказаў Аляксандр Лукашэнка. 

Пры гэтым Прэзідэнт звярнуў увагу членаў рабочай групы на тое, што любыя палітычныя навацыі павінны ў канчатковым выніку ствараць умовы для развіцця суверэннай Беларусі і дабрабыту грамадзян.

"Усе прапановы па тых ключавых пытаннях, якія мы неаднаразова абмяркоўвалі раней і прадоўжым абмяркоўваць сёння, вам трэба данесці да членаў Канстытуцыйнай камісіі. І падрыхтавацца да гэтага мерапрыемства трэба будзе грунтоўна", - падкрэсліў Кіраўнік дзяржавы.

"Думаю, трэба таксама правесці маштабнае сацыялагічнае даследаванне на гэту тэму, ахапіўшы розныя рэгіёны і слаі насельніцтва. Як мы рабілі напярэдадні Усебеларускага народнага сходу", - адзначыў Аляксандр Лукашэнка.
 
Прэзідэнт падкрэсліў, што органам улады важна ведаць меркаванне грамадзян, прычым не толькі па тэме канстытуцыйнай рэформы, але і па іншых актуальных для развіцця краіны пытаннях.

Аляксандр Лукашэнка на нарадзе таксама закрануў тэму міграцыйнага крызісу, які прадаўжаецца на граніцы Беларусі з Еўрасаюзам. Дапамога людзям, якія трапілі ў цяжкую сітуацыю, у апошнія дні знаходзіцца на асабістым кантролі Кіраўніка дзяржавы. Прэзідэнт абвергнуў некаторыя з распаўсюджаных фэйкаў наконт гэтай тэмы і падкрэсліў, што Беларусь не хоча ніякага канфлікту на дзяржаўнай граніцы.

"Хачу папярэдзіць, што Адміністрацыя Прэзідэнта павінна больш эфектыўна рэагаваць на тыя падзеі, якія адбываюцца ў Беларусі, каб нашы людзі разумелі, што там адбываецца. А то, я гляджу, нас ужо абвінавачваюць (асабліва палякі), што мы блакіруем гуманітарную дапамогу і не аказваем яе бежанцам, якія сканцэнтраваны на дзяржаўнай граніцы", - адзначыў Аляксандр Лукашэнка.

Паводле слоў Прэзідэнта, такія абвінавачанні ў адрас беларускага боку выглядаюць больш чым дзіўна. Асабліва, калі ўлічыць, што Кіраўнік дзяржавы даручыў упарадкаваць і арганізаваць дастаўку і размеркаванне гуманітарнай дапамогі бежанцам на граніцы. "Я займаўся гэтым пытаннем усе выхадныя. І ўсе пытанні, якія мною былі даручаны, вырашаны, - заявіў ён. - Мы і дзетак кормім, і цяжарных жанчын. І дровы падвозім, усё, што ім неабходна".

Аляксандр Лукашэнка падкрэсліў, што беларускі бок робіць усё для таго, каб бежанцы не збіраліся на дзяржаўнай граніцы. Больш таго, заявіў Прэзідэнт, Беларусь гатова адправіць бежанцаў, якія перадумалі ехаць у Еўрасаюз, назад на радзіму.

"Мы гатовы, як гэта звычайна рабілі, пасадзіць усіх у самалёты, у тым ліку і "Белавія", якія адвязуць іх назад дамоў. Але гэта людзі, трэба сказаць, вельмі ўпартыя: ніхто вяртацца не хоча. І зразумела: ім няма куды вяртацца. У іх няма там жылля, яны разумеюць, што там няма чым накарміць дзяцей. Больш таго, некаторыя проста баяцца за сваё жыццё, вяртаючыся назад, - канстатаваў Кіраўнік дзяржавы. - Я хачу, каб і вы разумелі: ідзе вельмі актыўная работа ў тым напрамку, каб угаварыць людзей - калі ласка, вярніцеся дадому. Але ніхто вяртацца не хоча".

Прэзідэнт згадаў і аб нядаўняй прапанове мюнхенскіх улад прыняць бежанцаў, якія знаходзяцца на беларуска-польскай граніцы. Аляксандр Лукашэнка звярнуў увагу, што дзве-тры тысячы мігрантаў - гэта не праблема для Еўрасаюза. "Калі палякі не даюць гуманітарнага калідора, перашкаджаюць гэтаму, мы можам "Белавія" вывезці іх у Мюнхен. Што за праблема? Што гэта за прапанова: "Вы дайце нам, калі ласка, гуманітарны калідор праз Польшчу, мы іх забяром". Ды мы вывезем іх сваімі самалётамі і ў Мюнхен накіруем, калі гэта патрэбна", - сказаў Кіраўнік дзяржавы.

Аляксандр Лукашэнка падкрэсліў, што папрокі ў адрас Беларусі ў патуранні нелегальнай міграцыі - поўнае глупства.

Прэзідэнт адзначыў, што за апошнія месяцы беларускі бок забараніў уезд у краіну некалькім тысячам нелегальных мігрантаў, і гэта лёгка праверыць. "Калі немцы або амерыканцы хочуць пераканацца ў гэтым, калі ласка, у аэрапорце кожны чалавек на ліку", - дадаў Кіраўнік дзяржавы.

"Арганізоўваць міграцыйны паток праз Беларусь - гэта сабе даражэй. Мы ніколі гэтым не займаліся і займацца не маем намеру, - падкрэсліў Прэзідэнт. - Санкцыямі палохаюць. Добра, паглядзім. Яны думаюць, што я буду жартаваць, што я ляпнуў языком і ўсё. Нічога падобнага. Мы будзем абараняцца. Усё, далей нам адступаць няма куды".

"Гэта так, каб вы ведалі, што адбываецца і ў якім напрамку нам даводзіцца працаваць і дзейнічаць, каб грамадства сваё ўтрымаць", - растлумачыў Кіраўнік дзяржавы. Паводле яго слоў, кожны дзень праз Беларусь праходзіць вялікі паток турыстаў, іншых замежных грамадзян. "Гэта кацёл, дзе ўсё бушуе і гарыць. Тут ні ў якім разе нельга ствараць ніякага напружання, - сказаў беларускі лідар. - Тым не менш Канстытуцыя - гэта і ёсць адзін з момантаў, які нашы збеглыя, якія сядзяць там, за граніцай, спрабуюць выкарыстоўваць для таго, каб чарговы раз дэстабілізаваць нашу краіну. Павінен сказаць, што абсалютна не атрымаецца. На гэты раз у іх ужо наогул нічога не атрымаецца".

"А на санкцыі мы адкажам. Гэта наогул не абмяркоўваецца", - запэўніў Аляксандр Лукашэнка.

"Правільна робяць высновы нашы журналісты і іншыя, што Польшчы гэты канфлікт сёння патрэбны. Унутраныя праблемы, праблем з Еўрапейскім саюзам больш чым дастаткова - і пачынаецца гэта таўкатня і ўжо стральба на дзяржаўнай граніцы, - звярнуў увагу Прэзідэнт. - Яшчэ раз хачу падкрэсліць: мы не хочам ніякага канфлікту на нашай дзяржаўнай граніцы. Гэта для нас абсалютна стратна".

"Нам не трэба, каб гэтыя бедныя людзі хадзілі па Мінску, па Гродне, напружвалі нашых людзей. Асабліва на дзяржграніцы, дзе пагранічнікі ва ўзмоцненым рэжыме сёння нясуць службу", - падкрэсліў беларускі лідар.

Кіраўнік дзяржавы акцэнтаваў увагу, што ў Беларусі арганізавана ахова лагера каля граніцы, дзе размяшчаюцца тысячы мігрантаў. "Мы ж яго вымушаны ахоўваць, каб туды зброю не падкінулі. Я ўжо колькі разоў аб гэтым гаварыў, але прадаўжаюцца гэтыя папрокі", - заўважыў Прэзідэнт.

Аляксандр Лукашэнка ўпэўнены, што абстаноўка вакол лагера мігрантаў на граніцы наўмысна абвастраецца, таксама з разліку ўцягнуць у гэты канфлікт Расію. "Зразумела, што абвастраецца абстаноўка на дзяржграніцы, і зразумела, з якім прыцэлам. Мы гэта добра разумеем. Нездарма ж яны праз коску: "Лукашэнка вінаваты", следам - Пуцін, "Беларусь вінавата", следам - Расія вінавата. Зразумела, што гэта нацэлена на эскалацыю напружанасці", - канстатаваў Прэзідэнт. 

У сувязі з гэтым ён звярнуў увагу на падзеі апошняга часу ў Чорным моры, адзначыўшы, што гэта пытанне было ў ліку тэм, якія Прэзідэнт Беларусі абмяркоўваў у нядаўняй тэлефоннай размове з Прэзідэнтам Расіі Уладзімірам Пуціным. "Паглядзіце, што ў Чорным моры робіцца. Вось мы з Прэзідэнтам Расіі ўчора доўга размаўлялі па гэтым пытанні. Агідна паводзяць сябе амерыканцы і натаўцы ў Чорным моры. Абстаноўку спецыяльна нам абвастраюць. Але мы ж не хлапчукі, каб паддавацца на гэтыя незразумелыя іх рухі", - сказаў беларускі лідар.

Усялякія абвінавачанні ў тым, што міграцыйны крызіс выгадны Беларусі, Прэзідэнт лічыць недарэчнымі і беспадстаўнымі, як і развагі наконт наўмыснага абвастрэння сітуацыі беларускім бокам і сцвярджэння, што Аляксандр Лукашэнка прымушае Захад гуляць па сваіх правілах. "Дык не гуляйце па гэтых правілах! Зрабіце наадварот. А наадварот у іх так: трэба забраць гэтых мігрантаў і мы выб'ем козыр з рук Лукашэнкі. Ну дык выбіце. Забярыце мігрантаў, і ў Лукашэнкі козыраў ніякіх не будзе. Што за бязглуздзіца такая, што за глупства? Ляпаюць там што папала", - адрэагаваў Прэзідэнт.

Кіраўнік дзяржавы падкрэсліў, што Беларусь арганізавала аказанне гуманітарнай дапамогі мігрантам на граніцы, і асобна падзякаваў сенатарам за праведзеную работу. "Сенатары малайцы, працуюць там на месцы: і гуманітарную дапамогу арганізавалі, і палаткі паставілі, медыцынская дапамога", - сказаў Прэзідэнт. Паводле яго слоў, дапамогу атрымалі ўжо больш за 200 чалавек.

"Сказаць, што мы перашкаджаем пастаўкам гуманітарнай дапамогі - гэта ўжо вар'яцтва поўнае. Калі б не гуманітарная дапамога, там палавіна гэтых людзей памерлі б ужо", - сказаў Аляксандр Лукашэнка.

"Не хачу быць празорліўцам, але тое, што робяць еўрапейцы цяпер, - гэта з вясны ім адгукнецца", - дадаў беларускі лідар. 

Кіраўнік дзяржавы растлумачыў, што закрануў сітуацыю з мігрантамі на граніцы, паколькі "гэта адна з напружаных кропак у нашай краіне". Што датычыцца іншых важных тэм, якія апошнім часам былі на кантролі ў Прэзідэнта (заканчэнне ўборачнай кампаніі і забеспячэнне насельніцтва прадуктамі харчавання), то тут сітуацыя стабільная. "Тут у нас усё нармальна, тэмпы добрыя", - ахарактарызаваў абстаноўку Аляксандр Лукашэнка.