Удзел у рэспубліканскім суботніку

Прэзідэнт Беларусі Аляксандр Лукашэнка ў дзень рэспубліканскага суботніка на сваёй малой радзіме заклаў яблыневы сад, які цяпер перададуць пад апеку мясцовых школьнікаў.

Усяго пладовы сад складаецца з 411 яблыневых дрэў. Да суботніка было высаджана 186 дрэў (93 - сорт яблыні "Беларускае салодкае" і 93 - сорт яблыні "Сябрына").

З удзелам Кіраўніка дзяржавы высадзілі астатнія 225 дрэў пяці сартоў. Большая частка - ужо згаданыя сарты, а таксама па 25 яблынь сартоў "Каваленкаўскае", "Цукерачнае" і "Рэд Фры".

Аляксандр Лукашэнка запрасіў да работы ўсіх удзельнікаў мерапрыемства, у тым ліку журналістаў. Гэта прынцып Прэзідэнта: тыя, хто штодзённа працуе побач, на суботніку мяняюць мікрафоны і камеры на граблі і рыдлёўкі. А потым Кіраўнік дзяржавы палічыў, што журналісты недапрацавалі, і запрасіў усіх пасячы дровы. Майстар-клас адбыўся - данагрузіліся.

У час размовы з журналістамі Прэзідэнт расказаў, што закладзены яблыневы сад перададуць пад апеку мясцовых школьнікаў.

"Мы гэта робім, каб потым школьнікам перадаць. Каб яны тут даглядалі і вынікі сваёй працы забіралі сабе. Як я гаварыў, у кожнай школы павінен быць свой прысядзібны ўчастак, дзе можна пакалупацца і па зямлі пахадзіць, рукамі дакрануцца. Каб дуру было менш у галаве. Гэтыя школьнікі ў якасці свайго прысядзібнага ўчастка будуць працаваць тут", - сказаў Кіраўнік дзяржавы.

Аляксандр Лукашэнка растлумачыў, што раней на землях пад закладзеным садам былі сялянскія надзелы. Але цяпер ужо вясковыя сядзібы выкарыстоўваюцца ў асноўным як дачы, а цяперашнія ўладальнікі і нашчадкі задзейнічаюць пад агароды толькі невялікую частку зямлі.

"Гэта была пустка. Мы яе распрацавалі. Каб не прападала, вырашылі асобнымі сартамі высадзіць яблыні", - расказаў Прэзідэнт.

Адным з удзельнікаў прэзідэнцкага суботніка стаў Ігар Абрамчык, кіраўнік сялянскай фермерскай гаспадаркі "Спартан-Агра" Маладзечанскага раёна.

"Фермер, рабацяга. Дарэчы, не аграрый", - адрэкамендаваў яго перад журналістамі Кіраўнік дзяржавы.

"Не, не аграрый. Інжынер-эканаміст. БДУІР. Але ўсё роўна на зямлі", - пацвердзіў фермер.

"Айцішнік", - адзначыў Аляксандр Лукашэнка і ўдакладніў, ці ёсць у маладога аграрыя вясковыя карані.

Аказалася, што сапраўды ёсць, і ў вёсцы ж Ігар правёў некалькі першых школьных гадоў.

"Калі нарадзіўся на зямлі, яно і цягне туды - да гэтай зямлі. Каб дакрануцца", - зрабіў выснову Прэзідэнт і адразу перавёў размову ў практычную плоскасць. Спытаў, колькі ў фермера гектараў.

"100 на сёння. Крыху расцём", - адказаў Ігар Абрамчык, які і сам працуе ў сферы садоўніцтва.

"Мы можам табе калгас даць, - прапанаваў Аляксандр Лукашэнка. - Я табе раю, пакуль не разабралі, добрую гаспадарку ўзяць. Тут землі нядрэнныя".

"Шчыра прызнаюся, я ніколі не займаўся раней садоўніцтвам. Гэта ўжо, стаўшы Прэзідэнтам, я пачаў крыху ў гэта ўнікаць. Таму што завозім яблыкі па імпарце, асабліва польскія. А ў яго (фермера. - Заўвага) яблыкі лепшыя за любыя польскія. Але галоўнае, што яны чысцейшыя. Таму што ён ведае, што калі ён гадасць на рынак паставіць, - мы з яго запатрабуем. А запатрабуй ідзі з палякаў... Гэтак жа ў ахове здароўя і адукацыі, каб вы ведалі. Калі ўрач бярэ скальпель у рукі, ён ведае, што трэба ад душы працаваць. Таму што запатрабуюць".