Рабочая паездка ў Ашмянскі раён Гродзенскай вобласці

Прэзідэнт Беларусі Аляксандр Лукашэнка 26 сакавіка зрабіў рабочую паездку ў Ашмянскі раён Гродзенскай вобласці.

Наведваючы ўчастак мясцовасці, дзе праводзяцца мерапрыемствы праверкі баявой гатоўнасці злучэнняў і воінскіх часцей, Кіраўнік дзяржавы даручыў жорстка рэагаваць на магчымыя правакацыі на граніцы з боку сумежных дзяржаў.

"Публічна скажу: любая правакацыя павінна спыняцца ўзброеным шляхам. Няма чаго з імі жартаваць. Парушылі дзяржаўную граніцу - да знішчэння. Ніхто не павінен ні з кім цырымоніцца. І мы так і будзем рабіць. Таму што калі мы будзем жаваць соплі, ведаеш, што будзе, - сказаў кіраўнік дзяржавы. - Таму любое парушэнне дзяржаўнай граніцы - на знішчэнне. Яны разумеюць толькі сілу".

Як далажыў камандуючы войскамі Паўночна-заходняга аператыўнага камандавання Аляксандр Навуменка, цяпер на паўночна-заходнім аперацыйным напрамку абстаноўка застаецца складанай і мае тэндэнцыю да нарастання напружанасці. Гэта пацвярджаецца ствараемымі паблізу дзяржграніцы Беларусі на прыгранічнай тэрыторыі інжынернымі збудаваннямі ў выглядзе процітанкавых равоў, агнявых пазіцый, а таксама сканцэнтраваннем на складах матэрыяльна-тэхнічных сродкаў і боепрыпасаў.

На паўночна-заходнім аперацыйным напрамку сумежны бок узмацніў ахову дзяржграніцы. Агульная колькасць сіл, якія прыцягваюцца там да аховы беларускага ўчастка дзяржаўнай граніцы, складае амаль 3,2 тыс. чалавек, у тым ліку ў Літве - да 2,8 тыс. чалавек, у Латвіі - да 500.

Колькасць воінскіх кантынгентаў краін НАТА, якія знаходзяцца на ПЗАН у рамках вырашэння розных задач, складае да 7,7 тыс. чалавек на тэрыторыі Эстоніі, Латвіі і Літвы. Воінскія часці і падраздзяленні аб'яднаных узброеных сіл НАТА, у тым ліку на тэрыторыі краін Балтыі і Польшчы, займаюцца аператыўнай і баявой падрыхтоўкай.

Аляксандр Навуменка адзначыў, што цяпер на тэрыторыі шэрага краін, уключаючы Літву і Польшчу, праводзяцца вучэнні "Квадрыга-2024". У рамках праводзімага вучэння на палігоне Пабрадзе (за 15 км ад дзяржграніцы) сканцэнтраваны тры батальёны (пяхотны і механізаваны батальёны ФРГ і танкавы батальён ЗША).

Пры гэтым батальёны, якія знаходзяцца на палігоне Пабрадзе, могуць быць задзейнічаны для правядзення правакацыйных дзеянняў паблізу ад дзяржаўнай граніцы з задзейнічаннем дыверсійна-разведвальных груп і незаконных узброеных фарміраванняў.

Таксама вядзецца паветраная разведка супраць Беларусі. У сярэднім кожныя суткі фіксуецца 4-5 самалёта-вылетаў разведвальнай авіяцыі. Цяпер на паўночна-заходнім аперацыйным напрамку базіруюцца 132 баявыя самалёты са складу авіяцыйнай групоўкі НАТА.

"Яны што, сур'ёзна думаюць, што мы тут з расіянамі спрабуем або нападзём на іх? Процітанкавыя равы навошта капаюць... Мы ж не збіраемся туды ісці", - заўважыў Кіраўнік дзяржавы.

Аляксандр Навуменка ў сувязі з гэтым канстатаваў, што любая падрыхтоўка да вайны і вайна для кагосьці - гэта эканамічная выгада.

"Мы расслабляцца не павінны. Мы ўпэўнены, што калі мы недзе супакоімся, яны на нас нападуць. Гэта абсалютна дакладна. Але мы туды не збіраемся ісці", - падкрэсліў беларускі лідар.

Аляксандр Лукашэнка таксама наведаў блокпост, дзе азнаёміўся з выкананнем задач мотастралковым падраздзяленнем.

У час рабочай паездкі Прэзідэнт адказаў на пытанні журналістаў.

Паводле слоў Кіраўніка дзяржавы, акцэнт у развіцці арміі трэба рабіць на тым, як ідзе сучасная вайна, асаблівасцях баявых дзеянняў. У Беларусі лясіста-балоцістая мясцовасць, а таму разам з перадавой высокадакладнай зброяй патрэбны і звычайныя ўзбраенні, умелыя дзеянні ваенных непасрэдна на мясцовасці: "Як яны (праціўнік. - Заўвага) тут пройдуць на танках, бронетранспарцёрах і гэтак далей? Дзесьці выедуць на дарогу - дарогі перакрыты. Па лесе не прайсці. Гэта наша зямля. Мы ведаем кожны кавалачак. Засада - знішчылі. Танк можна знішчыць звычайным гранатамётам ці такім жа танкам".

"Не трэба забываць, што ў любой вайне галоўнае пытанне вырашаецца звычайным салдатам са звычайнымі ўзбраеннямі. Плюс узмацненне. Вайна ва Украіне паказвае, што вельмі эфектыўныя, без іх немагчыма, беспілотныя лятальныя апараты - разведвальныя і ўдарныя", - сказаў Прэзідэнт.

Важны таксама сродкі радыёэлектроннай барацьбы (РЭБ) у тым ліку ў справе барацьбы з беспілотнікамі. "Гэта навінка, без якой не абысціся", - падкрэсліў беларускі лідар.

Акрамя таго, важна контрбатарэйная барацьба. Артылерыя заўсёды лічылася богам вайны. Артылерыя і цяпер вельмі важна, вельмі каштоўна", - сказаў Прэзідэнт.

Аляксандр Лукашэнка звярнуў увагу, што ў Беларусі ў свой час не адмовіліся ад базавых рэчаў і звычайных узбраенняў, якія, як паказвае практыка, запатрабаваны і эфектыўны ў сучасных ваенных канфліктах. Прэзідэнт прывёў канкрэтны прыклад: "Мы ў свой час не адмовіліся ад мін і мініравання. Я памятаю, мне, яшчэ маладому прэзідэнту, прапаноўвалі міны знішчыць. Я гавару: пачакайце, не спяшайцеся знішчаць. Паглядзіце вопыт Украіны. Яны ж мініруюць падыходы".

Кіраўнік дзяржавы растлумачыў, што, напрыклад, расіяне пры падыходзе да акопаў мініравалі плошчы, і ўкраінскія байцы ў ходзе няўдалага контрнаступлення не змаглі пераадолець гэтыя мінныя палі.

"Тое ж самае аўтамат, кулямёт, гранатамёт. Без іх сёння вайна немагчыма. Танкі, БМП і да таго падобнае. Звычайнае ўзбраенне паказала сваю моц", - сказаў Кіраўнік дзяржавы.

Тым не менш у распараджэнні Беларусі ёсць сучасныя комплексы ППА, якія здольны паражаць паветраныя цэлі праціўніка. "Якія б там С-400 ні былі, гэта вельмі сучасная проціпаветраная сістэма, без звычайнага ўзбраення і салдата, афіцэра, камандзіра ніякай вайны быць сёння не можа", - упэўнены Прэзідэнт.

Аляксандр Лукашэнка звярнуў увагу і на ваенную падрыхтоўку. "Пачалі больш вучыць. Трэба цяпер нам вырашыць праблему абучэння кадраў з запасу, рэзерву. Гэта і афіцэры ў тым ліку. Іх трэба навучыць, таму што яны потым павінны навучыць салдат. Яны павінны кіраваць", - сказаў ён.

У час размовы з журналістамі Аляксандр Лукашэнка пракаменціраваў заявы аб планах Расіі і Беларусі напасці на Захад.

"Дурасць поўная. Мы сёння прыехалі адкрыта, мы ім паказваем, што не збіраемся на іх нападаць. Мы выбудоўваем тут сістэму абароны, - запэўніў Кіраўнік дзяржавы. - Нам не трэба нападаць. Я аднойчы ўжо дзесьці сказаў: нам дай бог разабрацца з Украінай. Якая яшчэ вайна супраць натаўскіх войскаў? Нам гэта не трэба. Яны чакаюць гэта. Яны правакуюць нас, каб мы хоць неяк ім адказалі. Вазьміце закід дыверсійных груп цераз украінскую граніцу праз Беларусь. Навошта яны гэта робяць? Мы не атакуем, мы нічога не робім. Яны нас правакуюць, каб мы адказалі. Яны зацікаўлены ў развязванні гэтай вайны. Неразумныя людзі".

Аляксандр Лукашэнка адзначыў, што на палігоне Пабрадзе ў Літве цяпер сканцэнтраваны сілы НАТА, у тым ліку ваеннаслужачыя з ЗША і Германіі. "Там чужыя людзі. Вы што, думаеце, што немцы і амерыканцы сюды прыйшлі і ў выпадку сутыкнення з беларусамі і расіянамі будуць Літву абараняць? Ды ніколі такога не было. І не будуць яны абараняць. Пры першай сур'ёзнай сітуацыі яны ўцякуць з поля бою. І правільна зробяць. Іх зямля ў Германіі і ЗША. Ніякія наёмнікі тут пытанне не вырашаць", - сказаў ён.

Аналагічна Кіраўнік дзяржавы выказаўся і аб сітуацыі з боку Украіны і згадаў аб размовах наконт размяшчэння там кадравых ваенных з Францыі: "На ўкраінскім напрамку 120 тыс. украінцаў цяпер. Яны хочуць іх забраць, кінуць на фронт супраць Расіі. А тут, размовы, - выстраіць на нашай паўднёвай граніцы французскія або натаўскія войскі. Гэта добра для нас. Яны не будуць абараняць Украіну так, як абараняюць цяпер украінцы".

"Мы і не збіраемся супраць іх ваяваць. Нам гэта не трэба. Заўсёды гаварыў і гавару: нам чужога не трэба, але сваё не аддадзім. Вось наша логіка. Нам не трэба гэта вайна, - падкрэсліў беларускі лідар. - Навошта нам лоб у лоб стаяць і ваяваць адзін супраць аднаго? Нас проста ў гэта ўцягваюць, правакуюць. А інтарасанты - яны там далёка. Яны хочуць, каб мы тут адзін аднаго калашмацілі. Яны прыйдуць потым на папялішча, долары надрукуюць і будуць аднаўляць гэтыя землі, але ўжо ў інтарэсах не нашых народаў. Ні літоўскага, ні польскага, ні беларускага".

Аляксандр Лукашэнка заклікаў не ваяваць, а працаваць на зямлі, расціць ураджай, займацца пытаннямі жыцця людзей: "Трэба не дурасцю займацца, а асвойваць землі, атрымліваць тут хлеб і карміць дзяцей і ўнукаў. Гэта наша мэта. Мы не збіраемся з імі ваяваць. Нам трэба, каб яны разумелі, што адсюль пагрозы ім не будзе. Але калі сунуцца - мы вельмі сур'ёзна адкажам".

Кіраўніка дзяржавы спыталі, ці трэба ў Беларусі прымаць дадатковыя меры бяспекі пасля трагічных падзей у Падмаскоўі. Аляксандр Лукашэнка адказаў, што цяпер у нашай краіне пры арганізацыі масавых мерапрыемстваў з удзелам вялікай колькасці людзей у цэлым ужо робіцца ўсё неабходнае для забеспячэння бяспекі. "Мы выстаўляем туды міліцыю, АМАП, трэба - ваеннаслужачымі ўзмацняем. Усе ўзброены", - адзначыў Прэзідэнт. І такой сістэмы забеспячэння бяспекі трэба прытрымлівацца. Важным аспектам з'яўляецца таксама абсталяванне аб'ектаў відэакамерамі. Дзякуючы іх наяўнасці ўдалося прасачыць і выявіць аўтамабіль з тэрарыстамі каля "Крокус Сіці Хола".

Пасля трагедыі ўжо некаторыя СМІ не выключалі версію таго, што тэрарысты збіраліся праз Бранскую вобласць схавацца ў Беларусі. На гэтыя меркаванні катэгарычна адказаў Аляксандр Лукашэнка: "Яны не маглі пайсці ў Беларусь. Іх куратары (у нас ёсць падазрэнні на некаторых, гэта я Пуціну пазваню, скажу свае падазрэнні) - яны разумелі, што ў Беларусь заходзіць нельга. Таму што ў першыя хвіліны, як у Расіі частка вобласці перайшла на ўзмоцнены рэжым бяспекі, так і ў нас. У першыя ж хвіліны мне далажыў Старшыня КДБ (ён займаецца антытэрарыстычнымі мерапрыемства). Мы па самай баявой сітуацыі прывялі ў дзеянне свае падраздзяленні". У прыватнасці, былі задзейнічаны сілы МУС, выстаўлены пасты на дарогах, у тым ліку з Расіяй, прыцягваліся сілы КДБ, Дзяржпагранкамітэта, некаторыя часці ваеннаслужачых. "Таму яны ў Беларусь ніяк не маглі зайсці. Яны гэта бачылі. Таму адвярнуліся і пайшлі на ўчастак украінска-расійскай граніцы", - сказаў Кіраўнік дзяржавы. Аперацыя па затрыманні, паводле слоў Прэзідэнта, прайшла вельмі сур'ёзна.

Кіраўнік дзяржавы падкрэсліў, што на працягу ўсяго часу пасля тэракта беларускі і расійскі бакі эфектыўна і зладжана супрацоўнічалі. "Узаемадзеянне беларусаў і расіян дарагога каштуе", - даў сваю ацэнку Аляксандр Лукашэнка.

Прэзідэнт растлумачыў, што адразу пасля здарэння спецслужбы дзвюх краін дзейнічалі па раней зададзеным алгарытме, як гэта было вызначана прэзідэнтамі Беларусі і Расіі. "Бортнікаў з Тэртэлем звязаліся, імгненна пачалі дзейнічаць, нам далажылі. І з гэтага моманту тое, што датычылася высокага ўзроўню, нас, Прэзідэнта Расіі і Прэзідэнта Беларусі, абмяркоўвалася не адзін раз у нашых кантактах", - адзначыў Аляксандр Лукашэнка. Як толькі кіраўнікам дзяржаў паступіла інфармацыя ад спецслужбаў аб тым, што аўтамабіль з тэрарыстамі рухаецца ў напрамку Бранска, была дасягнута дамоўленасць, што Беларусь блакіруе свой участак напрамку верагоднага руху злачынцаў, а расійскі бок - свой. "Мы сазвоньваліся. Я ў яго пытаюся: "Яшчэ нешта трэба?" - "Не. Усё нармальна". - Ён у мяне пытаецца: "Дапаможаш закрыць?" - "Дапамагу. Усё зробім". Ідзе такі дыялог", - расказаў Кіраўнік беларускай дзяржавы.

"Я чаму гэта сказаў? Таму што пачалі Пуціна гэтыя збеглыя (іх і нашы) папракаць: "Вось ён, нешта адбылося, а ён маўчыць, не гаворыць, не звяртаецца і іншае". Ды мы суткі не спалі разам з Пуціным! Што яны ведаюць аб гэтым? Пастаяннае было ўзаемадзеянне. Калі трэба было сказаць, ён выйшаў і сказаў (выступіў са зваротам у сувязі з тэрактам. - Заўвага)", - звярнуў увагу Аляксандр Лукашэнка.

У размове з журналістамі Прэзідэнт назваў пытанні абароны і бяспекі важнейшымі на маючым адбыцца пасяджэнні Усебеларускага народнага сходу.

Кіраўнік дзяржавы падкрэсліў, што гэта стратэгія. "Важнейшага нічога няма", - сказаў ён.

Акрамя таго, будуць вызначацца задачы на чарговую пяцігодку, вырашацца кадравыя пытанні.

"Першае наша пасяджэнне - гэта перш за ўсё кадравыя пытанні. Будзе выбірацца Старшыня, прэзідыум УНС будзе вызначаны. Можа, мы паспеем і ўдасца правесці назначэнні ў Вярхоўным, Канстытуцыйным Судзе, Цэнтральнай выбарчай камісіі. Гэта ўсё ўжо ад Прэзідэнта выведзена на ўзровень Усебеларускага народнага сходу. Судовая ўлада з-пад Прэзідэнта выводзіцца наверх, гэта значыць, мы рухаемся ў дэмакратычным напрамку. Але гэта нявыгадна гаварыць ні нашым збеглым, ні нашым праціўнікам і ворагам. Няхай бы расказалі аб гэтым", - сказаў Кіраўнік дзяржавы.

Аляксандр Лукашэнка выказаў меркаванне, што УНС павінна пачацца з кампактнага даклада Прэзідэнта аб сітуацыі ў свеце, эканоміцы краіны, існуючых выкліках і пагрозах. "І потым ужо, адштурхваючыся ад гэтага, - і кадры, і наша абаронная дактрына, і іншае", - адзначыў ён.

Канчатковы парадак дня і рэгламент мерапрыемства цяпер фарміруюцца.

Аляксандр Лукашэнка таксама выказаўся і пра палёт беларускага касманаўта на МКС: "Гэта не толькі імідж. Гэта цэлая галіна". Пры гэтым, паводле яго слоў, імідж у якасці краіны, здольнай выхаваць і запусціць у космас жанчыну-касманаўта, таксама важны. Кіраўнік дзяржавы падзякаваў расійскаму боку і асабіста Уладзіміру Пуціну за аказанне садзейнічання ў падрыхтоўцы, арганізацыі палёту беларускі і вырашэнне пытанняў фінансавання.

"Яны малайцы, уключылі (беларуску. - Заўвага) у склад сваіх (касманаўтаў. - Заўвага), падрыхтавалі нашых дзяўчат. Бачыце па ўчарашнім дні, нават насцярожвае мяне такі спакой нашага касманаўта", - заўважыў Кіраўнік дзяржавы.

Аляксандр Лукашэнка таксама расказаў аб асабістых перажываннях за палёт Марыны Васілеўскай, размове з гендырэктарам "Раскосмасу". Прэзідэнт прызнаўся, што былі пэўныя хваляванні, калі адбылася няштатная сітуацыя і з першай спробы палёт не адбыўся. Тым больш што Аляксандр Лукашэнка ў свой час быў сведкам няўдалага запуску беларускага спадарожніка "БелКА". Аднак кіраўнік "Раскосмасу" Юрый Барысаў у размове з Кіраўніком беларускай дзяржавы дэталёва расказаў, што адбылося і па якіх прычынах. Паводле яго слоў, справа была ў акумулятарах, адзін з якіх не спрацаваў, і старт быў аўтаматычна адменены. Юрый Барысаў запэўніў Прэзідэнта Беларусі, што пасля здарэння былі праведзены дадатковыя праверкі.

"Стартавалі. Самае любімае маё відовішча. Прыгажуня ракета, - адзначыў ён. - Я радуюся разам з вамі, што мы дасягнулі вяршыні ў космасе. Мы сапраўды сталі касмічнай дзяржавай".

У той жа час Прэзідэнт растлумачыў, што ў краіне няма планаў па будаўніцтве ўласнага касмадрома або стварэнні ракет, паколькі ў цяперашняй сітуацыі гэта немэтазгодна - ёсць магчымасць рэалізацыі сваіх праектаў у супрацоўніцтве з расійскім бокам. Значна важней мець нацыянальныя касмічныя праграмы і ўмець ствараць касмічныя спадарожнікі. І Беларусь гэтымі тэхналогіямі якраз ужо валодае і развівае свае кампетэнцыі.

"Мы пакрыху "лапці" скідаем і надзяваем нармальны абутак. Каб ніколі пра вас не гаварылі пасля мяне, што вы лапцюжнікі. Не, мы касмічная дзяржава і гэта мы зрабілі дзякуючы таму, што праводзілі правільную палітыку, выбачайце за нясціпласць. Мы не біліся з расіянамі, а многаму вучыліся ў іх", - падкрэсліў Аляксандр Лукашэнка.

"Самая міралюбная краіна ў свеце - Беларусь. Мы хочам толькі міру. І не трэба нас папракаць, што мы збіраемся супраць Захаду ваяваць. Гэтак жа ніхто ў Расіі не збіраецца ваяваць з НАТА. Але калі сунуцца ў гэтым напрамку, адказ будзе імгненным. Мы ўсе ўстанем, як Брэсцкая крэпасць", - заявіў Кіраўнік дзяржавы.

"Я тысячу разоў сказаў: мы не будзем з вамі ваяваць, калі вы нас не чапаеце, мы не збіраемся наступаць на гэтым участку. Ніякі Пуцін, ніякія ваенныя ў Расіі перад сабой мэты гэтыя не ставяць", - падкрэсліў беларускі лідар.

Кіраўнік дзяржавы яшчэ раз заклікаў спакойна і ціха займацца эканомікай. "Так, гэта цяжка. Гэта няпроста. Але гэта значна лягчэй, чым ваяваць. Таму што акрамя таго, што там цяжка, застрэліць жа могуць. Таму я катэгарычна супраць вайны. Барані бог ваяваць", - сказаў ён.

Разам з тым ён нагадаў тэзіс аб тым, што трэба быць гатовымі да вайны, каб не дапусціць яе. "Бачу, што за апошнія год-два наша армія змянілася, і яна прадаўжае мяняцца", - заявіў Аляксандр Лукашэнка.

Ён нагадаў, што ў свой час даручаў весці работы на напрамку беспілотнікаў, і сёння ён як ніколі запатрабаваны. "Мы рушылі наперад у гэтым напрамку. Захаваны прадпрыемствы па профілі радыеэлектроннай барацьбы, якія ствараюць добрыя ўзоры", - прывёў прыклады Прэзідэнт.

Нягледзячы на тое, што рабочая паездка Кіраўніка дзяржавы была прысвечана ваенным пытанням, ён настойліва падкрэсліваў важнасць займацца руціннымі рэчамі. У прыватнасці, у сельскай гаспадарцы. "Лепш усё ж такі жыць спакойна. Давайце жыць дружна і займацца сельскай гаспадаркай. З зімоўкі выйшлі выдатна, нічога не загінула. Калі такое было, што ў сакавіку палі зялёныя стаяць! Ідэальныя ўмовы. Ніколі такога не было на маёй памяці", - сказаў Аляксандр Лукашэнка.

Ён згадаў аб пратэстах фермераў у шэрагу краін Еўрасаюза: "Няхай радуюцца, што іх (улады гэтых краін. - Заўвага) гэтыя фермеры на гэтых трактарах у палацах не змялі. А то знясуць, калі яны не адрэагуюць на патрабаванні фермераў. А што трэба? Трэба купіць таннае дызельнае паліва і бензін у Расіі. У нас купіць. Яны ўсё рыхтуюцца да вайны, капаюць акопы..."

У ходзе рабочай паездкі Кіраўнік дзяржавы звяртаў увагу і на пытанні якасці меліярацыі, выкананых пасяўных работ. Прэзідэнт раскрытыкаваў кіраўніцтва рэгіёна за тое, што месцамі на палях з азімымі не былі своечасова прыбраны камяні. Гэта асаблівасць глебы ў шэрагу мясцін Гродзенскай вобласці - перад сяўбой прынята прыбіраць вялікія камяні, якія трапляюць наверх пры ўзворванні, каб потым у час уборкі ўраджаю не пашкодзіць тэхніку.

"Па камянях я вас праверу па поўнай. Гэта непарадак. Мы збіралі камяні перад сяўбой. А вы па камянях пасеялі. Агідная праца. Пасеялі азімыя па камянях. А як будзеш убіраць? Я не чакаў, што ў вас у Гродзенскай вобласці такі непарадак", - выказаў крытычныя заўвагі Кіраўнік дзяржавы.