Удзел у дабрачынным свяце ў рамках акцыі "Нашы дзеці"

Прэзідэнт Беларусі Аляксандр Лукашэнка 29 снежня прыняў удзел у дабрачынным свяце ў рамках акцыі "Нашы дзеці".

"Краіна заўсёды моцная традыцыямі. Калі ёсць традыцыі, значыць, ёсць краіна. Значыць, ёсць нейкая асаблівасць гэтай краіны", - падкрэсліў Прэзідэнт. Менавіта наяўнасць такіх традыцый адрознівае Беларусь ад іншых краін свету, звярнуў увагу Аляксандр Лукашэнка.

"У нас даўным-даўно нарадзілася вельмі добрая традыцыя - у гэтыя пераднавагоднія святы вітаць вас, малых, дарослых людзей, вашых настаўнікаў, выхавальнікаў, бацькоў, - усіх, у каго ёсць маленькія дзеткі і хто мае дачыненне да выхавання дзяцей. Добрая традыцыя - віншаваць нашых дзяцей, бываць у дзяцей. Асабліва ў тых, хто ў гэтым мае вялікую патрэбу. Хоць няма ў краіне тых дзяцей, у свеце няма тых дзяцей, якія не мелі б патрэбы ва ўвазе і падарунках", - прадоўжыў Кіраўнік дзяржавы.

У сувязі з гэтым Прэзідэнт выказаў словы асаблівай удзячнасці ўсім, хто ўносіць свой уклад у тое, каб кожны год гэта дабрачыннае свята для дзяцей магло адбыцца. "Хачу падзякаваць нашым дарослым, - сказаў Аляксандр Лукашэнка. - Дзякуй вам за тую ўвагу, якую вы ўдзяляеце ў гэтыя пераднавагоднія святы нашым дзецям".

Кіраўнік дзяржавы асабліва адзначыў радасную атмасферу ў зале: "Ужо за кіламетр ад Палаца Рэспублікі чуваць, што вы тут вяселіцеся". Добры настрой, паводле яго слоў, тлумачыцца таксама і тым, што для дзяцей у краіне цяпер "двайное" свята: з аднаго боку, усе праводзяць адыходзячы год і чакаюць надыходу новага, 2026-га, а з другога, - навучэнцы нарэшце дачакаліся прыемнага часу, свабоднага ад вучобы - канікулаў. "Таму - двайное свята. Новы год і канікулы", - сказаў Прэзідэнт.

"Ну і Дзед Мароз са Снягурачкай нас парадавалі ўжо - снег, марозік. Абяцаюць, што яшчэ большы будзе марозік, і мы па-сапраўднаму ў гэтым годзе, як ніколі, напэўна, зможам сустрэць Новы год. Снег і мароз у гэты час - гэта добры настрой. Бачу, што ў вас гэта прысутнічае", - заўважыў Кіраўнік дзяржавы.

"Я разумею, што ў гэтай зале абсалютна розныя дзеці. Распаўсюджанае паняцце - розныя дзеці. Вядома ж, розныя - і па сваім становішчы ў тым ліку. Але, дарагія мае, паверце майму жыццёваму вопыту: мы ўсе ў дзяцінстве, магчыма, усе розныя, але сёння як ніколі ва ўсіх нас роўныя магчымасці. Трэба толькі адно - трэба працаваць", - сказаў Аляксандр Лукашэнка.

Кіраўнік дзяржавы адзначыў, што для школьнікаў важна перш за ўсё вучоба. "Будзеце вучыцца - значыць, перспектыва ў вас добрая. Значыць, вы станеце тымі, на каго раўняецеся. Таму без усялякіх натацый - вучыцеся. Прапусціце гэты час - вы ніколі яго не нагоніце, не дагоніце. Ён проста ад вас убяжыць", - падкрэсліў ён.

У сувязі з гэтым Прэзідэнт звярнуў увагу, што ў зале Палаца Рэспублікі разам з дзецьмі прысутнічаюць выхавальнікі і настаўнікі. "Дзякуй вам за тую вялікую працу, якую вы ўкладваеце ў нашых дзяцей. Я ведаю, як гэта нялёгка. Можа, мы не ўдзяляем такую ўвагу вам з боку дзяржавы, якую павінны ўдзяляць. Вы падказвайце, мы абавязкова будзем выпраўляць гэты недахоп", - запэўніў Кіраўнік дзяржавы.

Аляксандр Лукашэнка яшчэ раз падзякаваў педагогам за тое, што яны выхоўваюць сапраўдных патрыётаў Беларусі. "А калі вы выхоўваеце патрыётаў - значыць, вы і самі патрыёты. І абавязкова павінны быць гэтымі патрыётамі", - дадаў ён.

"Я ўжо вельмі шмат нагаварыў і пра працу, і пра вучобу. Ведаю, што вы не толькі дзеля гэтага прыехалі сюды. Можа, вы паглядзелі ўжо на Дзеда Мароза і Снягурачку. І вы, і я, і мільёны людзей, якія вас убачаць, чакаюць гэтага чараўніцтва ад нашых Дзеда Мароза і Снягурачкі", - заўважыў Аляксандр Лукашэнка і прапанаваў дзецям падзякаваць гэтым казачным персанажам за свята.

Галоўная ёлка краіны - дабрачыннае навагодняе свята з удзелам Прэзідэнта і паказам навагодняга шоу ў Палацы Рэспублікі. У бягучым годзе для дзяцей падрыхтавалі яркі паказ "Чараўніцтва Новага года" з казачнымі персанажамі і галоўнымі атрыбутамі зімовых свят.

На галоўную ёлку краіны ў Палацы Рэспублікі былі запрошаны амаль 2,4 тыс. хлопчыкаў і дзяўчынак з усіх рэгіёнаў Беларусі. Магчымасць убачыць яркі навагодні паказ атрымалі навучэнцы кадэцкіх вучылішчаў і спецыялізаваных ліцэяў, пераможцы розных алімпіяд, творчых конкурсаў і спаборніцтваў, навучэнцы, якія маюць поспехі ў грамадскай рабоце, дзеці-сіроты, дзеці са шматдзетных сем'яў і сем'яў бежанцаў і дзеці, якія пацярпелі ад наступстваў катастрофы на Чарнобыльскай АЭС.