Разгляд кадравых пытанняў

Прэзідэнт Беларусі Аляксандр Лукашэнка 25 чэрвеня разгледзеў кадравыя пытанні.

Кіраўнік дзяржавы назначыў:

Ганевіча Аляксандра Дармідонтавіча - Надзвычайным і Паўнамоцным Паслом Рэспублікі Беларусь у Швейцарскай Канфедэрацыі;

Молчана Андрэя Леанідавіча - Надзвычайным і Паўнамоцным Паслом Рэспублікі Беларусь у Баліварыянскай Рэспубліцы Венесуэла.

Прэзідэнт таксама даў згоду на назначэнне:

Седукова Андрэя Мікалаевіча - старшынёй Крычаўскага райвыканкама;

Лапуця Ільі Віктаравіча - генеральным консулам Рэспублікі Беларусь у Даўгаўпілсе (Латвійская Рэспубліка);

Чабатара Юрыя Адамавіча - Першым намеснікам Міністра эканомікі;

Нікіцінай Анжалікі Аляксандраўны - Намеснікам Міністра эканомікі;

Лобарава Міхаіла Ільіча - членам Брэсцкага аблвыканкама;

Івановай Святланы Канстанцінаўны - начальнікам дэпартамента эканомікі і галіновых праграм Пастаяннага камітэта Саюзнай дзяржавы.

"Што датычыцца Крычаўскага райвыканкама, я ўважліва вывучыў вашу біяграфію. Вы як прафесійны будаўнік разумееце, што такое прамысловыя аб'екты Крычаўскага раёна. Асабліва цэментная галіна - адно з асноўных прадпрыемстваў нашай краіны. У свой час у нас быў дэфіцыт цэменту. Мы выпускалі 4 млн т, і ўвесь час узнікалі пытанні. Цяпер выпускаем больш за 9 млн т, можам і 10 млн т. Пашыраеце магчымасці, я разлічваў, што будзеце працаваць на экспарт. Таму вам давядзецца вельмі сур'ёзна займацца гэтым прадпрыемствам, як і іншымі", - сказаў Аляксандр Лукашэнка, узгадняючы назначэнне Андрэя Седукова.

Прэзідэнт адзначыў, што добра ведае Крычаў яшчэ з савецкіх часоў, там яму даводзілася часта бываць па службовых пытаннях. "Горад абнавіўся за апошні час, цікавы горад. Але прамысловасць засталася. Так, мы пабудавалі новыя акуратныя вытворчасці, горадаўтваральныя. Таму вам давядзецца імі займацца, як і іншымі прамысловымі прадпрыемствамі", - дадаў ён.

Кіраўнік дзяржавы таксама звярнуў увагу на сельскую гаспадарку. Паводле яго слоў, Крычаўскі раён - вельмі важны ўсходні рэгіён, і гэтым пытанням трэба ўдзяляць належную ўвагу.

"Мы цяпер здаём экзамен - перадвыбарная кампанія. Таму назначэнне сур'ёзнае. Я ніколі непасрэдна ў перадвыбарную кампанію не назначаў старшынь райвыканкамаў. Вам давядзецца адразу ўвайсці ў курс справы і займацца гэтай перадвыбарнай кампаніяй, здаваць экзамен за сябе і іншых. Улічваючы, што вы сам магілёўскі, мясцовы, думаю, вам не трэба шмат часу, каб увайсці ў курс справы. Трэба проста працаваць", - сказаў Аляксандр Лукашэнка.

Выказваючыся аб бягучай сітуацыі ў краіне, Аляксандр Лукашэнка адзначыў, што цяпер у інтэрнэце актыўна распаўсюджваюцца "жудасныя фэйкі", з дапамогай якіх хочуць дыскрэдытаваць уладу. Некаторыя з такіх укідаў, сказаў Прэзідэнт, яго проста здзіўляюць: "Сёння мне далажылі (хоць гэта было даўно, ніхто не дакладваў), што ў аднаго з маіх сыноў у Швейцарыі $840 млн. Накіруйце туды па дыпламатычных каналах пісьмо: хто хоча забраць гэтыя грошы, няхай неадкладна забярэ".

Аляксандр Лукашэнка звярнуў увагу, што інфармацыя проста фальсіфікуецца, і людзі, якія не разбіраюцца ў банкаўскіх дакументах, вераць гэтым фэйкам. "Людзі ж не разумеюць, што гэта такое. Такія фэйкі будуць пастаянна. І нам трэба гэта мець на ўвазе, з гэтым жыць і змагацца. Дарэчы, гэта падкідваецца структурамі "бабічаўскімі", "незыгарамі" з Расіі, - дадаў ён. - Гэта не наша, гэта з Расіі ідзе інфармацыя. Потым яны папросяць прабачэння, здымуць. Але ж людзям у мазгі ўжо ўкінулі гэта".

"Па ваеннаслужачых нават. Гавораць, пасведчанне Службы бяспекі. Нехта пайшоў і пасведчанне з сабой забраў, цяпер друкуе, што ён супраць улады. Гэта неверагодна, каб, звальняючыся са Службы бяспекі, чалавек хоць на час пакінуў у сябе пасведчанне. Ён спачатку здае зброю, пасведчанне, потым атрымлівае абходны ліст і іншае, - адзначыў Прэзідэнт. - Людзі, асабліва моладзь, якія там сядзяць (у тэлеграм-каналах. - Заўвага), гэтага ж не разумеюць. І яны глядзяць: нават у Службе бяспекі супраць Прэзідэнта. Вось такія фэйкі, і мы з гэтым павінны жыць. Але мы павінны трымаць галаву на плячах і людзям растлумачваць, што адбываецца".

Кіраўнік дзяржавы звярнуў увагу, што апаненты ўлады патрабуюць сумленных і прыстойных выбараў, аднак самі паводзяць сябе несумленна. "Яны што, нас штурхаюць на несумленнасць такую, як яны сябе паводзяць? Зразумела, што там за імі лялечнікі стаяць. Яны і з аднаго, і з другога боку. І ў Польшчы жывуць, і з Расіі падкідваюць. Мы аб гэтым з Прэзідэнтам Пуціным пагаварым у бліжэйшы час пры сустрэчы, але гэта сітуацыя вельмі складаная. Прымяняюцца самыя сучасныя фальшывыя тэхналогіі, ідзе ўмяшанне з-за мяжы ў нашы выбары, унутраныя справы", - заявіў Аляксандр Лукашэнка.

"Але мы не ядзерная дзяржава. Мы не можам узяць ядзерную боегалоўку, размахваць і крычаць, або гаварыць аб гіпергукавой зброі, што мы вам адкажам. Мы звычайная сярэднееўрапейская краіна, міралюбівая, нацэленая на спакойнае жыццё. І некаму пагражаць у сувязі з гэтым мы проста не можам", - дадаў Прэзідэнт.