Рабочая паездка ў Гродзенскую вобласць

Прэзідэнт Беларусі Аляксандр Лукашэнка 14 чэрвеня зрабіў рабочую паездку ў Гродзенскую вобласць. У Ваўкавыску Кіраўнік дзяржавы наведаў ААТ "Беллакт".

Пасля прыбыцця на прадпрыемства Аляксандр Лукашэнка ў першую чаргу пацікавіўся сітуацыяй на палях - што пасеяна, як вядзецца рэкультывацыя. Старшыня Гродзенскага аблвыканкама Юрый Караеў далажыў, што пасеялі ўсё, яшчэ месцамі давялося і перасяваць.

"Я табе скажу: думаў, што ў Ваўкавыскім раёне значна лепш..." - заўважыў Кіраўнік дзяржавы, гаворачы пра ўбачанае з борта верталёта.

Кіраўнік вобласці запэўніў, што будзе лепш.

Аляксандру Лукашэнку далажылі аб сацыяльна-эканамічным развіцці Гродзенскай вобласці. Валавы рэгіянальны прадукт у рэгіёне хоць і вышэйшы за леташнія паказчыкі, але ўсё роўна не дацягвае да запланаваных паказчыкаў. Пры гэтым, як растлумачыў Юрый Караеў, калі сельская гаспадарка, будаўніцтва і гандаль плюсуюць, то да прамысловасці ёсць некаторыя пытанні.

У той жа час намінальная налічаная сярэднямесячная зарплата ў вобласці, інвестыцыі ў асноўны капітал растуць апераджальнымі тэмпамі.

Асобна Прэзідэнт пацікавіўся сітуацыяй у паўночных раёнах Гродзенскай вобласці.

Старшыня аблвыканкама таксама праінфармаваў Прэзідэнта аб рэалізацыі праграмы "Адзін раён - адзін праект". Паводле яго слоў, у межах гэтай праграмы ў вобласці займаюцца 25 праектамі.

"Што з сельгастэхнікай, сельгасхіміяй, райснабамі? Вы імі займаецеся? Ці ў кожным раёне яны адноўлены? - спытаў Аляксандр Лукашэнка. - Вы бачылі, што трэба зрабіць, ведаеце, як трэба аднаўляць. Трэба так, каб мы дакладна разумелі, што мы там будзем рабіць".

А вось у гэтым напрамку, як далажылі Кіраўніку дзяржавы, наперадзе яшчэ шмат работы.

Прэзідэнта праінфармавалі і аб сітуацыі ў Ваўкавыскім раёне. У рэгіёне, у прыватнасці, адзначаецца зніжэнне вытворчасці ялавічыны і свініны. Прычыны вядомыя. Напрыклад, што датычыцца ялавічыны, то пагалоўе жывёлы недаўкамплектавана. Між тым падзеж жывёлы тут істотна знізіўся.

"Калі ў цябе ў Магілёве гіне жывёла, дык аддай яму. Добра, не аддай, а прадай, - звярнуўся Аляксандр Лукашэнка да віцэ-прэм'ера Юрыя Шулейкі. - Барані божа, я вам зраблю заўвагу, што ў вас недзе падзеж, а, як у яго, ёсць свабодныя месцы для адкорму. Ужо я вам галовы паздымаю! За жывёлу адкажаце. Забралі - і адвезлі ў добрую гаспадарку, няхай адкормліваюць. Там, напэўна, наогул не будзе падзяжу".

Кіраўніку дзяржавы таксама планавалі далажыць аб рабоце ААТ "Беллакт". Але Прэзідэнт сказаў, што ведае, што прадпрыемства працуе добра, і адразу накіраваўся ў цэхі, прапанаваўшы аб усім расказаць непасрэдна ў ходзе наведвання.

Аляксандр Лукашэнка азнаёміўся з вытворчай базай прадпрыемства, наведаў участак расфасоўкі дзіцячага харчавання і азнаёміўся з асартыментам прадукцыі. У бліжэйшы час на заводзе пачне працаваць новая лінія разліву малочнай прадукцыі ў ПЭТ-бутэлькі, што дасць магчымасць максімальна пашырыць асартымент.

Прэзідэнту таксама далажылі аб планах пабудаваць дадатковую вытворчасць сухога дзіцячага харчавання.

Узвесці новы цэх плануецца за кошт розных крыніц. Амаль палова з іх - крэдыт Банка развіцця Беларусі. Астатняе - гэта сродкі Рэспубліканскага цэнтралізаванага інавацыйнага фонду, сродкі інавацыйнага фонду Гродзенскага аблвыканкама і 13% - уласныя сродкі прадпрыемства. Агульны кошт праекта ацэньваецца ў памеры Br380 млн.

Аляксандр Лукашэнка падкрэсліў, што такая прадукцыя, асабліва дзіцячае харчаванне, будзе запатрабавана заўсёды. Напрыклад, у ёй зацікаўлены многія краіны ў Афрыцы.

Што датычыцца крэдытаў пад стварэнне новай вытворчасці, Прэзідэнт папярэдзіў, што абавязковай умовай з'яўляецца далейшае вяртанне сродкаў. "Дзе б ты ні ўзяў - у Банку развіцця, яшчэ недзе: узяў у доўг - павінен вярнуць. Калі для гэтага прадпрыемства, якое хочаш пабудаваць, ёсць сыравіна, ёсць рынак збыту і ён маржынальны, і ўсё, што пазычыш, ты вернеш на працягу 10-12 гадоў (гэта немалыя грошы - $120-130 млн), - калі ласка. Будзем размову не проста весці, а будзем падтрымліваць гэты праект, - заявіў Прэзідэнт. - Мы гэта ўмеем рабіць. І гэта сёння прадаецца. Любая краіна павінна накарміць сваіх людзей. Дзяцей - тым больш".

Як далажылі Прэзідэнту, на існуючай вытворчасці ўжо задзейнічаны практычна ўсе магутнасці і трэба пашырацца. Дзіцячае харчаванне для "Беллакта" - самая маржынальная прадукцыя. Пры пастаўках за мяжу рэнтабельнасць дасягае 40% пры каласальным попыце. Кіраўнік дзяржавы паставіў пытанне, чаму б не развіваць гэты напрамак не толькі ў рамках аднаго прадпрыемства ў Ваўкавыску, але і ў іншых пунктах краіны. "Гэта наша школа, і гэту школу прасцей развіваць, - падкрэсліў беларускі лідар. - Мы ўмеем гэта рабіць".

Больш таго, такім чынам можна вырашыць праблему з тым, што рынак цяпер перанасычаны сметанковым маслам, яго цяжка прадаць: "Калі б мы гэта малако, якое ты ў масла пускаеш, перапрацавалі, - прадалі б дзіцячае харчаванне. Прадукт, на які попыт ёсць. У нас хапае магутнасцей. Трэба - мы перабудаваліся, вырабілі сметанковае масла. Але на гэта (дзіцячае харчаванне. - Заўвага) ёсць попыт".

Што датычыцца "Беллакта", Аляксандр Лукашэнка адобрыў планы па рэалізацыі інвестпраекта. Ён даручыў не зацягваючы, без цяганіны рыхтаваць эканамічнае абгрунтаванне праекта. "Калі трэба, будзем будаваць, - сказаў Кіраўнік дзяржавы. - Падлічвайце. Калі ёсць сыравіна, ёсць рынкі - гэта тыя праекты, якія трэба рэалізоўваць у краіне".

Рэалізацыя праекта дасць магчымасць дадаткова перапрацаваць 61 тыс.т малака ў год, павялічыўшы да 15 тыс.т (рост у 2 разы) вытворчасць сухіх дзіцячых сумесей, якія адпавядаюць патрабаванням сусветных стандартаў, і пашырыўшы геаграфію экспарту ў краіны Азіі, Афрыкі, Лацінскай Амерыкі.

Прэзідэнту на прадпрыемстве таксама прадставілі прадукцыю малакаперапрацоўчых прадпрыемстваў Гродзенскай вобласці. Сярод іх непасрэдна сам "Беллакт", ААТ "Лідскі малочна-кансервавы камбінат", ААТ "Малочны мір".

Галоўны тэхнолаг "Беллакта" Таццяна Новікава ўжо 40 гадоў працуе над стварэннем дзіцячай малочнай прадукцыі і пашырэннем асартыменту. "Наш гонар - гэта дзіцячае пастападобнае харчаванне. У ім практычна няма цукру. І мы сваіх дзяцей ужо тры гады прывучаем да несалодкіх прадуктаў. Ёсць лінейка дашкольнага і школьнага харчавання, гэта ніша цяпер пустая ў нашай краіне. Мы зрабілі замену "смачным" дэсертам", - прадставіла яна прадукцыю свайго прадпрыемства.

У Ваўкавыску Кіраўнік дзяржавы пацікавіўся, як у рэгіёне справы з бульбай. Па даручэнні Прэзідэнта кантралюючыя органы аператыўна вывучылі сітуацыю на месцах - якіх-небудзь праблем выяўлена не было.

"У Гродзенскай вобласці свае абавязацельствы па стабілізацыйных фондах у мінулым годзе выканалі", - расказаў Старшыня Камітэта дзяржкантролю, упаўнаважаны прадстаўнік Прэзідэнта па Гродзенскай вобласці Васіль Герасімаў.

А калі стабілізацыйныя фонды былі запоўнены, значыць, з надыходам вясны насельніцтва не засталося без прадукцыі. Больш таго, з гэтых стабфондаў бульба пастаўлялася і гандлёвым сеткам, калі ў іх узніклі праблемы.

"Глядзіце, каб не было (праблем. - Заўвага) у будучым годзе. Цяпер паклікаў (сельгасвытворцаў. - Заўвага): ты нарыхтуй столькі, столькі, столькі. Колькі трэба - у рэзерв, у сябе трымайце, але каб хапала. Я разумею, вядома, у Расіі ў 2-3 разы даражэйшая была бульба. Хтосьці ж хоча зарабіць - сяляне вывозілі, фермеры вывозілі. З аднаго боку. Ну а з другога боку, нейкі там недзе выявілі сабатаж", - сказаў Кіраўнік дзяржавы.

"Я вялікіх праблем не бачу, з'яўляецца першая ўжо гэта бульба ў нас", - заявіў Прэзідэнт.

Аляксандр Лукашэнка даў параду не ўжываць занадта часта бульбу ў ежу, таму што гэта можа дрэнна паўплываць на фігуру: "Калі мы будзем есці бульбу, як пішам у "ціктоках", то худзенькімі не будзем. Адзін раз на тыдзень, два максімум, і тое запечаную, пюрэ".

У  час рабочай паездкі Аляксандр Лукашэнка згадаў аб нядаўнім факце збівання ў абласным цэнтры сабакі і заявіў аб недапушчальнасці здзекаў з жывёл.

"Да жывёл у мяне дбайныя адносіны. Недзе нядаўна ў СМІ паведамлялася, што ў Гродзенскай вобласці сабаку збілі", - адзначыў Кіраўнік дзяржавы.

"Так, знайшлі яго міліцыянеры", - паведаміў старшыня аблвыканкама Юрый Караеў.

"І вы ўстанавілі нягодніка гэтага. Сабаку забярыце. Аддайце, каму трэба", - даў параду Кіраўнік дзяржавы.

Ён нагадаў, што некалькі гадоў таму пасля аналагічнага выпадку ў Віцебску асабіста ўмяшаўся ў сітуацыю. Тады збітае шчаня прывезлі ў Мінск, яго ў фінале хакейнай трэніроўкі Прэзідэнт падарыў трэнеру каманды - Дзмітрыю Баскаву.

"Забралі, аддалі. Цяпер пытаюся ў Баскава: "Як сабака?" - "Дзіця", - расказаў беларускі лідар.

"Не дазваляйце здзекавацца. Самыя безабаронныя - гэта жывёлы, таму што яны ад нас абараніцца не могуць. Мы можам. Яны не могуць. Таму іх трэба берагчы", - падкрэсліў Кіраўнік дзяржавы.

Прэзідэнт таксама расказаў пра сваё асаблівае стаўленне да коней: "Нават у вёсцы я так гэта не ўспрымаў. Калі стаў Прэзідэнтам, мне падарылі некалькі коней. Я ўважліва за імі назіраў. Якое разумнае стварэнне і якую карысць конь прынёс для чалавецтва!"

Кіраўнік дзяржавы ў гэтым плане адзначыў, што ў Вялікую Айчынную вайну менавіта коні прынеслі вялікую карысць - ва ўмовах недахопу аўтамабіляў менавіта з іх дапамогай цягалі артылерыйскія ўстаноўкі, перавозілі грузы.