Перагаворы з Прэзідэнтам Кубы Мігелем Дыяс-Канелем Бермудэсам

Сустрэча Прэзідэнта Беларусі Аляксандра Лукашэнкі з Прэзідэнтам Кубы Мігелем Дыяс-Канелем Бермудэсам прайшла 25 чэрвеня ў Палацы Незалежнасці.

Прэзідэнт Кубы прыбыў на перагаворы з вялікай дэлегацыяй. Беларускі бок таксама быў прадстаўлены галіновымі міністрамі, кіраўнікамі шэрага ведамстваў і арганізацый.

Сустрэча кіраўнікоў дзяржаў пачалася з урачыстых цырымоній прывітання і фатаграфавання - гэта абавязковая частка афіцыйных візітаў на вышэйшым узроўні.

На парадку дня перагавораў - абмеркаванне шляхоў умацавання двухбаковага дыялогу з акцэнтам на развіццё гандлёва-эканамічнага і навукова-тэхнічнага супрацоўніцтва.

Аляксандр Лукашэнка адзначыў, што яго папярэдняя сустрэча з кубінскім калегам адбылася ў Маскве 9 мая ў час святочных мерапрыемстваў з нагоды 80-годдзя Вялікай Перамогі. Тады бакі і дамовіліся аб прадаўжэнні кантактаў. Гэта ўжо другі афіцыйны візіт Мігеля Дыяс-Канеля Бермудэса ў Беларусь.

"Мы абмяркуем з вамі важнейшыя тэмы беларуска-кубінскага супрацоўніцтва. І міжнароднага парадку дня. Вядома, не забываем, што адной з мэт вашага візіту з'яўляецца ўдзел у Еўразійскім эканамічным форуме і пасяджэнні Вышэйшага Еўразійскага эканамічнага савета. Сёння свет праходзіць этап вельмі моцнай турбулентнасці. І пакуль старыя міжнародныя структуры буксуюць, у новых яшчэ недастаткова рэсурсу, каб вырашыць крызісы. А тым больш - прадухіліць гэтыя крызісы. Над гэтым нам трэба працаваць сумесна", - падкрэсліў Прэзідэнт.

Кіраўнік дзяржавы адзначыў, што паміж беларускім і кубінскім народамі існуюць трывалыя дружалюбныя сувязі, якія падмацаваны выдатнымі адносінамі на ўзроўні кіраўніцтва дзвюх краін.

"У асобе майго паважанага калегі Мігеля Дыяс-Канеля мы набылі сапраўднага сябра беларускага народа. І я ўпэўнены, што цёплы і саюзніцкі характар міждзяржаўнага дыялогу захаваецца на доўгія гады, а новыя пакаленні беларусаў і кубінцаў будуць падтрымліваць яго і напаўняць актуальным зместам", - заявіў Аляксандр Лукашэнка.

Прэзідэнт назваў добрай традыцыяй канструктыўнае ўзаемадзеянне Беларусі і Кубы на міжнароднай арэне. Паводле яго слоў, бакі падзяляюць падыходы адзін аднаго да важнейшых тэм сучаснага парадку дня і аказваюць безумоўную ўзаемную падтрымку.

"Аднагалосна і паслядоўна выступаем супраць аднабаковых абмежавальных мер у міжнароднай палітыцы і гандлі. Незаконны санкцыйны націск на нашы дзяржавы не толькі не слабее, але і ўзмацняецца. Асабліва гэта датычыцца механізмаў фінансавых разлікаў. Але негатыўныя знешнія фактары толькі стымулююць нас да сумеснага пошуку эфектыўных рашэнняў", - падкрэсліў беларускі лідар.

У час перагавораў было адзначана, што работа беларуска-кубінскай камісіі па гандлёва-эканамічным супрацоўніцтве выйшла на рытмічны штогадовы графік. Гэта сведчыць аб узаемнай цікавасці да ўмацавання адносін.

"З улікам узаемадапаўняльнасці эканомік Беларусі і Кубы нашы спецыялісты вызначылі шэраг перспектыўных кропак росту ў гандлёва-эканамічнай сферы. У іх ліку стратэгічна важныя для Гаваны напрамкі: забеспячэнне харчовай бяспекі, мадэрнізацыя прамысловасці, развіццё будаўнічай галіны, транспартнай інфраструктуры, энергетыкі і здабычы карысных выкапняў, пашырэнне доступу да якасных медыцынскіх прэпаратаў", - расказаў Кіраўнік дзяржавы.

Беларускі бок таксама бачыць добрыя перспектывы для нарошчвання магутнасцей сумесных вытворчасцей сельскагаспадарчай тэхнікі, прычапнога і навяснога абсталявання.

"Мы гатовы забяспечыць пастаўкі новай тэхнікі, у тым ліку з прымяненнем лізінгавых інструментаў. У інтарэсах рамонтных прадпрыемстваў Кубы можам наладзіць экспарт рухавікоў, запасных частак, а таксама станкоў і абсталявання. Акрамя прамысловай кааперацыі мы маглі б пастаўляць беларускую сыравіну, дзяліцца сваім вопытам і тэхналогіямі для сумеснай вытворчасці малочных і мясных прадуктаў", - адзначыў Аляксандр Лукашэнка.

Паводле слоў Прэзідэнта, пацвердзіла сваю запатрабаванасць і значнасць схема пастаўкі беларускай прадукцыі на Кубу ў рамках экспартных крэдытаў Банка развіцця Беларусі. Сёння гэта сухое малако і сельскагаспадарчая тэхніка, але беларускі бок зацікаўлены паслядоўна пашыраць гэты пералік.

"Перакананы, што па выніках сённяшняй сустрэчы мы выпрацуем эфектыўныя рашэнні і будзем іх дакладна рэалізоўваць. У Мінска і Гаваны ёсць усё для далейшага руху наперад: палітычная воля, узаемаразуменне, поўная падтрымка на ўзроўні кіраўнікоў дзяржаў. І, напэўна, самае галоўнае - доўгі шлях супрацоўніцтва, - заявіў беларускі лідар. - Я запэўніваю вас, што я не забыў пра абяцанне наведаць Кубу. Я пастараюся знайсці такую магчымасць у будучым і прыехаць у вашу сонечную ва ўсіх сэнсах, цёплую краіну. І нават вельмі гарачую".

Аляксандр Лукашэнка падкрэсліў, што Беларусь гатова да прадаўжэння адкрытага і сумленнага дыялогу, да сумесных крокаў, якія будуць садзейнічаць забеспячэнню сацыяльна-эканамічнай стабільнасці ў дзвюх дзяржавах і росту дабрабыту грамадзян. "Вы павінны ведаць, што прыехалі да сваіх сяброў. Нават больш, чым сяброў. І калі мы нешта можам зрабіць для кубінскага народа, для Кубы, мы абавязкова гэта зробім", - падагульніў Кіраўнік дзяржавы.

Прэзідэнт Кубы ў сваю чаргу падзякаваў беларускаму лідару за запрашэнне наведаць Мінск і прыняць удзел у Еўразійскім эканамічным форуме і саміце ЕАЭС, а таксама перадаў цёплыя прывітанні і найлепшыя пажаданні ад Рауля Кастра. Карыстаючыся выпадкам, ён павіншаваў Аляксандра Лукашэнку з перамогай на прэзідэнцкіх выбарах. "Гэта паказала высокі аўтарытэт і масавую падтрымку вашай дзейнасці", - сказаў ён, звяртаючыся да Кіраўніка беларускай дзяржавы.

Мігель Дыяс-Канель Бермудэс падкрэсліў асабісты ўклад Прэзідэнта Беларусі ў развіццё двухбаковых адносін і яго асабістую ўключанасць у пошук сумесных рашэнняў на карысць абедзвюх краін.

"Нашы двухбаковыя адносіны маюць глыбокія гістарычныя карані дружбы і супрацоўніцтва, заснаваны на ўзаемнай павазе, узаемнай карысці. Гэта адносіны паміж брацкімі народамі і ўрадамі, - сказаў Прэзідэнт Кубы. - Куба мае палітычную волю надаць ім імпульс ва ўсіх напрамках, асабліва ў гандлёва-эканамічнай плоскасці".

Паводле яго слоў, цяперашняя сустрэча з'яўляецца лагічным прадаўжэннем плённых абменаў візітамі прэм'ер-міністраў дзвюх краін, што адбыліся раней. Актыўна развіваецца таксама супрацоўніцтва паміж парламентамі, на Кубе чакаюць з візітам старшыню Савета Рэспублікі Нацыянальнага сходу Беларусі Наталлю Качанаву.

"Я лічу, што абмен візітамі даў магчымасць вызначыць патэнцыяльныя напрамкі для паглыблення гандлёва-эканамічных сувязей, а таксама выявіць новыя сумесныя праекты", - заявіў Мігель Дыяс-Канель Бермудэс. У прыватнасці, на Кубе стартаваў праект па зборцы трактароў МТЗ, а ў бліжэйшы час плануецца запуск сумеснага прадпрыемства ў галіне біятэхналогій і фармацэўтыкі.

Прэзідэнт Кубы адзначыў і эфектыўную работу сумеснай міжурадавай камісіі па гандлёва-эканамічным і навукова-тэхнічным супрацоўніцтве.

"Можна сказаць, што ёсць сціплыя зрухі ў гандлёва-эканамічных адносінах, і мы павінны прадаўжаць надаваць ім імпульс", - падкрэсліў ён. Паводле яго слоў, асаблівы патэнцыял мае супрацоўніцтва ў сферы біятэхналогій, фармацэўтыкі. На Кубе зарэгістраваны 46 беларускіх фармпрэпаратаў, разглядаецца магчымасць арганізацыі ў Віцебскай вобласці сумеснай вытворчасці анкалагічных, імуналагічных прэпаратаў.

"Мы зацікаўлены стымуляваць і заахвочваць гандаль таварамі, - запэўніў Мігель Дыяс-Канель Бермудэс. - Мы імкнёмся, каб беларускія кампаніі больш удзельнічалі ў рэалізацыі нацыянальнага плана сацыяльна-эканамічнага развіцця Кубы да 2030 года".

У час сустрэчы з прадстаўнікамі СМІ па выніках перагавораў Аляксандр Лукашэнка перш за ўсё выказаў удзячнасць Прэзідэнту Кубы за тое, што ён знайшоў магчымасць наведаць Беларусь і прыняць асабісты ўдзел у пасяджэнні Вышэйшага Еўразійскага эканамічнага савета, якое адбудзецца ў бліжэйшыя дні.

"Мы абмеркавалі з Мігелем шырокі спектр пытанняў двухбаковага парадку дня і намецілі далейшыя крокі па рэалізацыі найбольш перспектыўных напрамкаў супрацоўніцтва. Надалі ўвагу няпростай геапалітычнай абстаноўцы. Пацвердзілі прыхільнасць Беларусі і Кубы да палітыкі ўмацавання міру і бяспекі на нашай планеце, далейшай пабудовы справядлівага і шматпалярнага свету", - сказаў беларускі лідар.

Толькі так, перакананы абодва бакі, можна забяспечыць свабоднае, самастойнае развіццё ўсіх краін і народаў, іх сапраўднае раўнапраўе і абарону нацыянальных інтарэсаў.

"Беларусь на сабе адчула, што такое незаконныя абмежавальныя меры з боку асобных недружалюбных дзяржаў. І рашуча заяўляе аб непрымальнасці эканамічнай, гандлёвай, фінансавай блакады, якая ўведзена Злучанымі Штатамі супраць Вострава свабоды і наносіць непапраўны ўрон кубінскаму народу", - падкрэсліў Аляксандр Лукашэнка.

Кіраўнік дзяржавы звярнуў увагу, што на працягу многіх дзесяцігоддзяў Куба застаецца надзейным саюзнікам Беларусі ў Заходнім паўшар'і.

"Нашы адносіны заснаваны на ўзаемнай павазе і раўнапраўі, усебаковай падтрымцы ў ключавых для абедзвюх краін пытаннях, у тым ліку ў рамках міжнародных арганізацый", - адзначыў Прэзідэнт.

"Каб максімальна рэалізаваць патэнцыял двухбаковага супрацоўніцтва, нам неабходна падцягваць нашы гандлёва-эканамічныя сувязі да найвышэйшага ўзроўню палітычных кантактаў. І мы гэта зробім, - сказаў беларускі лідар. - Простую, зразумелую формулу толькі што прапанаваў Прэзідэнт Кубы. Ён гаворыць аб тым, што хопіць імпартаваць тое, што мы можам вырабіць, і ў тым ліку вырабіць разам. Давайце, кажа, будзем ствараць сумесныя прадпрыемствы ў Беларусі і на Кубе. Можна прыняць! Трэба ў хуткім часе ажыццявіць гэту нармальную мадэль".

Беларусь прапануе Кубе не толькі экспарт тавараў і паслуг, але і актыўны ўдзел у рабоце па развіцці ўсіх узаемавыгадных сфер і напрамкаў на аснове комплекснага і стратэгічнага партнёрства.

"Мы гатовы ўкараняць у кубінскую эканоміку сучасныя навуковыя дасягненні і тэхналогіі для паспяховай рэалізацыі сумесных праектаў, разлічаных на доўгатэрміновы эканамічны і перш за ўсё (гэта важна для Кубы і для нас) сацыяльны эфект. Ужо сёння мы рэалізуем на Кубе такія праекты ў сферах прамысловасці, фармацэўтыкі, сельскай гаспадаркі і харчавання. Створана зборачная вытворчасць трактароў, навяснога, прычапнога абсталявання", - прывёў некалькі прыкладаў Аляксандр Лукашэнка.

Паводле слоў Кіраўніка дзяржавы, у бліжэйшы час чакаецца адкрыццё вытворчай лініі сумеснага прадпрыемства па выпуску беларускіх медыкаментаў, прызначаных для продажу на кубінскім унутраным рынку і ў краінах Карыбскага басейна.

У прапрацоўцы таксама знаходзіцца шэраг праектаў па вытворчасці малочных прадуктаў з прымяненнем беларускіх тэхналогій і сыравіны. "Мы хацелі б, каб гэтыя якасныя, карысныя прадукты сталі даступнымі і для кубінцаў, і для жыхароў суседніх рэгіёнаў", - сказаў Прэзідэнт Беларусі.

Аляксандр Лукашэнка ўпэўнены, што развіццё супрацоўніцтва па заяўленых напрамках будзе садзейнічаць павышэнню ўзроўню харчовай бяспекі і росту дабрабыту грамадзян Беларусі і Кубы.

"Усе намечаныя планы і дамоўленасці, што мы дасягнулі, мы абавязкова выканаем", - запэўніў беларускі лідар.

Мігель Дыяс-Канель Бермудэс у сваю чаргу сказаў журналістам: "Беларусь і яе народ - гэта народ і краіна, якімі Куба і кубінскі народ захапляюцца".

Ён звярнуў увагу на чуласць, паразуменне, волю дапамагаць з боку Беларусі і асабіста кіраўніцтва краіны, працаваць разам з Кубай у кантэксце складанай сітуацыі, якую перажывае гэта краіна.