Афіцыйны візіт у Інданезію

Прэзідэнт Беларусі Аляксандр Лукашэнка прыбыў з афіцыйным візітам у Рэспубліку Інданезія.

Кіраўніка беларускай дзяржавы сустрэлі з нацыянальным каларытам. Інданезійская музыка, танцы, рота ганаровай варты, матацыклетны эскорт - усё на вышэйшым узроўні.

З незвычайнага - пралёт ваенных самалётаў у гонар прыбыцця Аляксандра Лукашэнкі. Гэтыя ж знішчальнікі ВПС Інданезіі суправаджалі самалёт Прэзідэнта на падлёце да Джакарты.

Праграмай візіту запланаваны перагаворы з Прэзідэнтам Інданезіі Прабова Субіянта ў вузкім і пашыраным складах. Асаблівы акцэнт будзе зроблены на перспектывах развіцця адносін у гандлёва-эканамічнай і інвестыцыйнай сферах, па лініі гуманітарнага супрацоўніцтва.

Чакаецца, што па выніках перагавораў будзе падпісаны шэраг міжнародных дакументаў. Галоўны з іх - дарожная карта развіцця ключавых напрамкаў супрацоўніцтва паміж Беларуссю і Інданезіяй на 2026-2030 гады.