Нефармальная сустрэча з Прэзідэнтам Манголіі Ухнаагійн Хурэлсухам

Прэзідэнты Беларусі і Манголіі Аляксандр Лукашэнка і Ухнаагійн Хурэлсух 25 кастрычніка правялі сустрэчу ў нефармальнай абстаноўцы.

Кіраўнікі дзяржаў цёпла прывіталі адзін аднаго. Аляксандр Лукашэнка спытаў Ухнаагійн Хурэлсуха, як ён сябе адчувае ў беларускім клімаце і пры цяперашнім надвор'і.

"Я люблю дажджы. У манголаў ёсць прымаўка, што самы добры чалавек прыязджае ў час дажджоў", - адзначыў мангольскі лідар.

Аляксандр Лукашэнка на гэта сказаў: "У нас таксама. Калі дождж, то добры чалавек".

"Я як свайго блізкага сябра вітаю вас у сябе дома. Дзякую, што вы ажыццявілі такі далёкі пералёт, прыехалі ў дружалюбную вам Беларусь", - сказаў Кіраўнік беларускай дзяржавы.

Ён адзначыў, што ў ходзе афіцыйных перагавораў 26 кастрычніка бакам трэба падрабязна абмеркаваць сучаснае і будучае адносін дзвюх краін. "Але калі коратка гаварыць, я прапанаваў бы, каб мы пачалі з двух-трох важных для нас з Манголіяй праектаў і пачалі наша супрацоўніцтва, каб мы далі старт вельмі інтэнсіўнаму нармальнаму супрацоўніцтву", - заявіў Аляксандр Лукашэнка.

Кіраўнік дзяржавы падкрэсліў, што Беларусь і Манголію шмат аб'ядноўвае, у тым ліку агульнае вялікае мінулае: "Мы разам ваявалі супраць захопнікаў. Халхін-Гол, Вялікая Айчынная вайна. Гэта ўсё наша".

"Нас не зразумеюць нашы дзеці, калі нашы з вамі пакаленні не зробяць нешта вялікае, як папярэдняе пакаленне. Так, мы гандлюем. Але, згадзіцеся, аб'ёмы таго гандлю, які сёння ў нас ёсць, проста смешныя, - сказаў Прэзідэнт. - Таму, напэўна, сутнасцю нашых перагавораў стане тое, што мы павінны закласці трывалы фундамент беларуска-мангольскай дружбы і адносін. Мы пастараемся быць для вас надзейнымі сябрамі".

Ухнаагійн Хурэлсух адзначыў, што гэта яго першы візіт у Беларусь. "Я паспеў пазнаёміцца ўжо з горадам Мінскам - сталіцай цудоўнай краіны Рэспублікі Беларусь", - адзначыў ён.

Прэзідэнт Манголіі падзяліўся, што ў нядзелю, 25 кастрычніка, ён наведаў Музей гісторыі Вялікай Айчыннай вайны, а таксама азнаёміўся з работай адукацыйнага цэнтра бяспекі жыццядзейнасці МНС Беларусі.

"Самае першае, што зарадзілася ў маёй душы, - гонар за тое, што пад вашым мудрым і дальнабачным кіраўніцтвам Рэспубліка Беларусь вельмі моцна развілася. Сталіца Мінск з яе прасторнымі краямі, прыродай і кліматам пакінула ў мяне прыемнае пачуццё, - сказаў Ухнаагійн Хурэлсух. - Мы ажыццяўляем розныя дзяржаўныя візіты ў іншыя краіны, але наведаць Беларусь і азнаёміцца з Мінскам - зусім іншы свет. Таму што, у адрозненне ад іншых сталіц, гэта для мяне здаецца раем на зямлі. Тут клімат, прырода вельмі цудоўныя. Вельмі спадабалася ваша краіна, у тым ліку сталіца Мінск і інфраструктура".

Што датычыцца развіцця супрацоўніцтва з Беларуссю, Прэзідэнт Манголіі падтрымаў прапанову Аляксандра Лукашэнкі аб неабходнасці рэалізаваць два-тры канкрэтныя праекты: "Я з гэтай прапановай цалкам згодны, поўнасцю падтрымліваю".

Ухнаагійн Хурэлсух нагадаў, што ў 2024 годзе Аляксандр Лукашэнка наведаў з візітам Манголію. Цяпер жа праходзіць візіт у адказ мангольскага лідара ў Беларусь. "Гэта яскравае сведчанне таго, што ў нас у душы, у нашых думках ёсць імкненне да плённага супрацоўніцтва ў будучым", - падкрэсліў Прэзідэнт Манголіі.