Наведванне Нацыянальнай акадэміі навук

Прэзідэнт Беларусі Аляксандр Лукашэнка 11 верасня наведаў Нацыянальную акадэмію навук.

Кіраўнік дзяржавы азнаёміўся з выставай навуковых дасягненняў. У ліку прадстаўленых распрацовак былі цвёрдацельныя лазеры з дыёдным узбуджэннем. Як растлумачылі спецыялісты, прыкладная цана такіх двух лазераў - кошт аднаго трактара.

Кіраўнік дзяржавы на віртуальнай экспазіцыі азнаёміўся як з распрацоўкамі беларускіх вучоных, што паспяхова выкарыстоўваюцца, так і навінкамі, якія хутка прыйдуць на вытворчасць. Выстава ўключала сем раздзелаў: аграрны сектар, аддзяленне біялагічных, гуманітарных навук і мастацтваў, медыцынскіх навук, фізікі, матэматыкі і інфарматыкі, фізіка-тэхнічных навук, хіміі і навук аб Зямлі.

Аляксандр Лукашэнка падрабязна цікавіўся работай беларускіх вучоных па ўсіх напрамках. Напрыклад, прадстаўнікі НАН расказалі аб выкарыстанні на практыцы распрацовак у касмічнай галіне, мірнай атамнай энергетыцы, а таксама лазерных, святлодыёдных тэхналогій (у тым ліку ў АПК, у прыватнасці ў цяплічнай гаспадарцы). Не выключана, што ў бліжэйшыя гады дзякуючы беларускім спецыялістам у сферы ЖКГ будуць выкарыстоўвацца электрамабілі, напрыклад, снегаачышчальнікі.

Вялікую ўвагу вучоныя ўдзяляюць і пытанням экалогіі. Цалкам магчыма, што ў хуткім часе ў магазінах з'явіцца біяраскладальная папера з асаблівай прапіткай для захоўвання прадуктаў. Канцэпцыя разумнага горада таксама ў полі зроку беларускіх вучоных.

Прэзідэнт пацікавіўся работай цэнтра клетачных тэхналогій на базе Інстытута біяфізікі і клетачнай інжынерыі НАН. Аляксандр Лукашэнка адзначыў, што было б цікава больш падрабязна азнаёміцца з яго дзейнасцю. Як праінфармавалі Кіраўніка дзяржавы, створана 15 прадуктаў на аснове стваловых клетак для лячэння розных захворванняў. Акрамя таго, распрацавана сістэма генетычнага тэсціравання, якая дае магчымасць ажыццяўляць спартыўную прафілізацыю, выяўляць неспрыяльныя варыянты генаў для карэкціроўкі іх эфектаў.

Цікавыя даследаванні беларускіх вучоных па процістаянні COVID-19, як навуковых падыходы, так і распрацоўкі перспектыўных медыцынскіх прэпаратаў. Прадстаўнікі Інстытута фізіялогіі НАН расказалі пра кардыятрэк, які перадае перамяшчэнне чалавека ў прасторы. Напрыклад, калі пажылому чалавеку стала дрэнна на дачы, яшчэ да прыезду медыкаў можна накіраваць ім даныя пра стан хворага.

У час наведвання Прэзідэнтам пастаянна дзеючай віртуальнай выставы НАН размова ішла ў тым ліку аб сумесных распрацоўках па праграмах Саюзнай дзяржавы.

Пасля азнаямлення з навуковымі распрацоўкамі Аляксандр Лукашэнка сустрэўся з беларускімі вучонымі - прадстаўнікамі НАН, вышэйшых навучальных устаноў, галін народнай гаспадаркі.

"Я памятаю гэты маленькі перыяд, калі мне давялося займацца навуковай дзейнасцю, і да гэтага часу схіляюся перад вучонымі, якія пражылі сваё жыццё ў навуцы. Гэта вялікія людзі, таму што больш складанай і цяжкай працы няма, - падкрэсліў Кіраўнік дзяржавы. - Накіроўваючыся да вас, я разумеў, што вучоныя ў нас (як бы банальна гэта ні гучала) - гэта не проста разумнейшыя людзі, якія глядзяць на ўсе падзеі, што адбываюцца, з вышыні сваіх глыбінных ведаў. Гэта людзі, якія валодаюць жыццёвай мудрасцю, шчыра любяць радзіму, таму што жывуць у служэнні навуцы і народу".

Аляксандр Лукашэнка заявіў, што ў краіне ні адно важнае рашэнне не прымаецца без удзелу прадстаўнікоў навуковай сферы. "Менавіта таму я рэгулярна сустракаюся з навуковай супольнасцю і заўсёды раюся з вучонымі. Усе мы ведаем, што развіццё навукі вызначае будучыню. Прычым будучыню не толькі асобнай дзяржавы, але і ўсяго чалавецтва", - звярнуў увагу Прэзідэнт.

Кіраўнік дзяржавы дадаў, што аб гэтым не стамляўся гаварыць і знакаміты беларус - лаўрэат Нобелеўскай прэміі па фізіцы Жарэс Алфёраў, дзякуючы адкрыццям якога планета зрабіла крок у лічбавую эру. "Мы з гэтым чалавекам вельмі шмат размаўлялі, часта спрачаліся. Але мяне заўсёды захапляла, што ён - свяціла навукі - усё жыццё заставаўся найвялікшым патрыётам нашай Беларусі і сваю любоў да яе даказваў і словам, і справай, не дазваляючы нікому нават намёку кепскага ў наш бок. Але былі ж і іншыя прыклады, - заўважыў Аляксандр Лукашэнка. - На заранку нашай незалежнасці сустракаліся людзі, якія спрабавалі перацягнуць вучоных на слізкую дарогу брудных палітычных гульняў. Я вельмі цаню, што вы выстаялі ў той складаны пераломны момант, засталіся вернымі свайму сумленню і прызванню".

Паводле слоў Кіраўніка дзяржавы, і сёння беларускія вучоныя трымаюць удар, не паддаюцца на правакацыі палітыканаў, захоўваюць закладзеныя больш як 90 гадоў таму традыцыі і перадаюць іх моладзі.

"Акадэмія навук БССР з навуковымі інстытутамі, школамі і напрамкамі стваралася пад канкрэтныя задачы і галіны велізарнай імперыі - Савецкага Саюза. Мінск нярэдка станавіўся піянерам для ажыццяўлення многіх прагрэсіўных ідэй. Але старэйшае пакаленне можа расказаць, якім выпрабаваннем пасля доўгіх гадоў росквіту сталі 90-я. Тут нямала тых, хто перажыў гэты складаны час. Распад саюза прывёў да імгненнага разрыву навуковых і народна-гаспадарчых сувязей, што паставіла многія НДІ на мяжу выжывання", - сказаў Прэзідэнт.

У тыя часы, адзначыў Аляксандр Лукашэнка, не было грошай на новае абсталяванне, не было чым плаціць зарплату вучоным. Тады колькасць усіх навукова-тэхнічных работнікаў у краіне скарацілася ў тры разы. Многія вучоныя мянялі прафесію або ад'язджалі за мяжу, некаторыя стаялі на рынках. "Я добра памятаю, як гаварылі аб тым, ці патрэбна невялікай незалежнай краіне свая Акадэмія навук. Або, можа, прасцей усё разбурыць дашчэнту, распрадаць напрацоўкі, будынкі, фонды - прэтэндэнтаў было шмат. А затым, калі разбагацеем, купляць патрэбныя тэхналогіі і тавары за межамі краіны", - успомніў Кіраўнік дзяржавы.

Паводле слоў Прэзідэнта, тыя падзеі, калі многія гаварылі пра непатрэбнасць развіцця беларускай навукі, сталі для яго сур'ёзным выклікам. Аднак у краіне ўсё ж вырашылі адрадзіць навуковую галіну, у далейшым прыйшлі яшчэ да адной высновы - неабходна ствараць сувязь паміж вытворчасцю і навукай.

"У нас створаны Вышэйшая атэстацыйная камісія, Дзяржаўны камітэт па навуцы і тэхналогіях. Дзякуючы дзяржаўнай падтрымцы ўдалося не толькі захаваць дзеяздольнае ядро даследчых калектываў і важнейшыя навуковыя школы, але і пачаць пісаць навейшую гісторыю беларускай навукі", - адзначыў Аляксандр Лукашэнка.

Ён дадаў, што сёння даследаванні і распрацоўкі ў краіне выконваюць 460 арганізацый, у іх працуюць 28 тыс. чалавек. Толькі Нацыянальная акадэмія навук узаемадзейнічае з вучонымі з 93 дзяржаў, на яе базе дзейнічаюць 42 міжнародныя даследчыя цэнтры. "Гэта была жорсткая лінія з майго боку і маё патрабаванне да кіраўніцтва Акадэміі навук. Вы, напэўна, заўважылі: любая мая паездка за межы краіны - побач са мной вучоны, - дадаў Прэзідэнт. - Такім чынам, навука зарабляла для краіны, для вытворчасці, і зараблялі самі вучоныя. Гэты шлях будзе адным з прыярытэтаў у будучай пяцігодцы".

Кіраўнік дзяржавы звярнуў увагу, што дзякуючы вучоным Беларусь на сусветнай арэне ведаюць як краіну, дзе робяць самыя вялікія самазвалы і здабываюць калійную руду, вырабляюць лазеры і оптаэлектроніку, мікрасхемы і электрычны транспарт, паскоранымі тэмпамі развіваюць сферу інфармацыйных тэхналогій, выконваюць высокатэхналагічныя хірургічныя ўмяшанні, выпускаюць сучасныя лекавыя прэпараты. У Беларусі таксама асвойваецца энергія мірнага атама, вучоныя краіны стварылі ўласную даследчую станцыю ў Антарктыдзе, удзельнічаюць у рабоце на Вялікім адронным калайдары. Рэспубліка нараўне з вялікімі дзяржавамі ўвайшла ў лік касмічных дзяржаў, што два гады таму дало магчымасць правесці ў Мінску Міжнародны кангрэс Асацыяцыі ўдзельнікаў касмічных палётаў.

"Гэтыя прыклады, вядома, падобны да спорту высокіх дасягненняў. Яны патрэбныя і важныя. Але сапраўдная навука павінна перш за ўсё служыць людзям, паляпшаць якасць іх жыцця. Таму вельмі цэніцца работа вучоных, якія развіваюць аграрны напрамак, у выніку чаго ў нас растуць ураджаі, надоі і прыбаўленні ў вазе. А наша харчовая прамысловасць дабілася таго, што беларускія прадукты на многіх рынках проста робяць фурор", - сказаў Аляксандр Лукашэнка.

А беларускія медыкі, дадаў ён, славяцца як унікальныя спецыялісты з залатымі рукамі, якія ратуюць жыццё чалавека практычна ў любой сітуацыі. У складаны для ўсяго свету час пандэміі каранавіруса яны паказалі сябе дастойна, падкрэсліў Прэзідэнт. Дзякуючы ўласным канструктарскім бюро і ўзаемадзеянню з вучонымі з'яўляюцца гучныя навінкі на брэндавых прадпрыемствах Беларусі. "Усе гэтыя дасягненні красамоўна сведчаць аб тым, што выбраная дзяржавай стратэгія комплекснай сістэмнай падтрымкі навукі была правільнай. Так будзе і далей, - заявіў Кіраўнік дзяржавы. - Любую навінку неабходна як мага хутчэй патэнтаваць і ўкараняць. Вытворчасці не змогуць быць паспяховымі, калі ўжо сёння не будуць на крок наперадзе канкурэнтаў. І ў гэтай навукова-прамысловай гонцы менавіта вучоны - галоўны саюзнік вытворцаў. У нашай краіны - не самай багатай на прыродныя рэсурсы - няма іншага выйсця, як рабіць стаўку на інтэлект".

Аляксандр Лукашэнка таксама адзначыў, што Беларусь сёння адносіцца да ліку краін з высокім узроўнем навуковага патэнцыялу. А ў рэйтынгу добрых краін (Good Country Index) рэспубліка займае 54-е месца сярод 153 дзяржаў. "Больш за трэць нашага экспарту складае навукаёмістая і высокатэхналагічная прадукцыя. У мінулым годзе сваім інтэлектам мы зарабілі амаль $15 млрд. Калі б мы да гэтых яркіх інавацыйных распрацовак дадалі крыху якасці ў вытворчасці (не толькі ў прамысловасці, гэта і сельскай гаспадаркі датычыцца), мы не проста павысілі б сваю канкурэнтаздольнасць на рынках - мы былі б лідарамі", - перакананы Прэзідэнт.

Кіраўнік дзяржавы ў час сустрэчы з вучонымі заявіў, што за апошнія некалькі тыдняў усе выразна ўбачылі, што ў асяроддзі моладзі ёсць тыя, у каго адсутнічае разуменне падзей нядаўняга мінулага.

"Так, яны не могуць ведаць усіх нягод ліхіх 90-х. Хаця аб гэтым маглі б ім расказаць бацькі, ды і мы таксама. Шкада, што нашых дзяцей цягнуць на вуліцы. Яны наіўна вераць, што дзеля светлай будучыні дапушчальна і нават неабходна разбурыць цяперашняе. Што можна падзяліць людзей на правільных і няправільных, загубіць эканоміку, каб дагадзіць чужым інтарэсам адмовіцца ад усяго добрага, што было зроблена за гады незалежнасці", - сказаў Прэзідэнт.

"Але ж вы разумееце, што жыццё не ролік з інтэрнэту. Назад не адматаеш", - падкрэсліў Кіраўнік дзяржавы.

Ён адзначыў, што дастаткова паглядзець на краіны, якія прайшлі праз горан каляровых рэвалюцый і засталіся ў стане тлеючых канфліктаў або, што яшчэ страшней, грамадзянскай вайны. "Працверажэнне наступае заўсёды. Галоўнае, каб не было позна", - заўважыў Аляксандр Лукашэнка.

Прэзідэнт папрасіў зрабіць навуку больш прывабнай для моладзі і прапанаваў магчымыя рашэнні. "Нам трэба разважна і прагматычна ацэньваць уласныя перспектывы. Задача нумар адзін - забяспечыць пераемнасць. Не будзе пераемнасці, будзем па-бандыцку ламаць, а потым нанава будаваць - гэта проста глупства, гэта немагчыма. У нас няма на гэта фінансавых рэсурсаў, каб зламаць дашчэнту, а потым зноў пачынаць будаваць. Таму давайце разам падумаем, як зрабіць навуковы шлях для нашых маладых людзей больш прывабным", - прапанаваў Аляксандр Лукашэнка.

Разам з тым ён адзначыў, што і сёння ўжо створана нямала. У Беларусі паспяхова працуе праграма "Універсітэт 3.0", для развіцця інавацыйнага прадпрымальніцтва функцыянуюць тэхнапаркі, ствараюцца галіновыя лабараторыі ў прамысловых холдынгах і на прадпрыемствах. Назначаюцца гранты Кіраўніка дзяржавы і Беларускага рэспубліканскага фонду фундаментальных даследаванняў. Таксама штогод выдзяляецца па 100 прэзідэнцкіх стыпендый аспірантам і таленавітым маладым вучоным. "Трэба будзе - будзе больш для вучоных. Але толькі за вынік", - заявіў Прэзідэнт.

Не менш, чым фінансавае стымуляванне, важны інстытут настаўніцтва, лічыць Кіраўнік дзяржавы. "Я заўсёды гаварыў вучоным: вы толькі тады станеце вялікімі, калі пасля сябе пакінеце дзясятак такіх, як вы, якія прадоўжаць тое, што вы пачалі", - падкрэсліў ён.

Аляксандр Лукашэнка звярнуў увагу, што многія краіны, арыентаваныя на тэхналагічнае лідарства, маюць навучаных спецыялістаў, якія нагледжваюць на міжнародных алімпіядах і спаборніцтвах таленавітых юных матэматыкаў, хімікаў, праграмістаў і пераманьваюць іх да сябе. Паводле яго слоў, калі малады чалавек з'ездзіў, павучыўся і вярнуўся ў родную Беларусь кваліфікаваным спецыялістам, які мае найноўшыя веды і тэхналогіі, - гэта будзе вітацца.

Сярод іншых задач - развіццё навуковай і інавацыйнай дзейнасці ў рэгіёнах. "У абласных і раённых гарадах трэба ствараць больш умоў для работы вучоных", - лічыць Прэзідэнт.

Беларускі лідар заявіў, што чакае ад навуковай сферы стварэння і развіцця новых кропак росту для ўсёй эканомікі.

Паводле слоў Прэзідэнта, дзяржаўныя рэсурсы будуць сканцэнтраваны на развіцці найбольш важных і значных напрамкаў навукі, эканомікі і сацыяльнай сферы. "Чакаем ад вас прарыўных распрацовак і новых рашэнняў у розных галінах: медыцыне, сельскай гаспадарцы, энергетыцы, будаўніцтве, жыллёва-камунальнай гаспадарцы, машына- і прыборабудаванні, вытворчасці сучасных матэрыялаў, развіцці нана- і біятэхналогій, асваенні космасу. У гэтай аўдыторыі ўсе добра разумеюць, што навука павінна задаваць трэнды будучага. Ствараць і развіваць новыя кропкі росту для ўсёй эканомікі", - сказаў Аляксандр Лукашэнка.

Кіраўнік дзяржавы адзначыў, што за апошнія некалькі гадоў удасканалены ўмовы аплаты працы работнікаў бюджэтных навуковых арганізацый, павышаны стыпендыі аспірантаў і дактарантаў, устаноўлены даплаты да пенсій для тых, хто мае вучоную ступень. "Мы будзем рухацца ў гэтым напрамку, наколькі дазволіць нам эканоміка", - запэўніў беларускі лідар.

Акрамя таго, аптымізаваны парадак камерцыялізацыі вынікаў навукова-тэхнічнай дзейнасці, развіваецца заканадаўства ў сферы інтэлектуальнай уласнасці.

"Ужо зроблены асноўны крок у будучае навуковай пяцігодкі. У маі па вашых прапановах зацверджаны адзіныя прыярытэты навуковай, навукова-тэхнічнай і інавацыйнай дзейнасці", - дадаў Кіраўнік дзяржавы.

Аляксандр Лукашэнка разлічвае, што прапановы вучоных стануць фундаментам чарговай пяцігадовай праграмы развіцця краіны. "Мая сустрэча менавіта ў гэты перыяд з вамі перш за ўсё тлумачыцца тым, што мы напярэдадні вельмі важнага мерапрыемства (Усебеларускага народнага сходу. - Заўвага), якое вызначыць лёс краіны на бліжэйшую пяцігодку. Я вельмі хачу, каб вы не проста падключыліся да распрацоўкі новай пяцігадовай праграмы і прагнозу развіцця нашай дзяржавы. Я хацеў бы, каб прапановы нашых вучоных сталі фундаментам гэтай праграмы. Каб яна была рэальнай і выканальнай. Гэта галоўнае, чаму ў гэты перыяд я ў сценах нашай Акадэміі навук", - сказаў Кіраўнік дзяржавы.

Прэзідэнт таксама адзначыў, што ў вучоным асяроддзі заўсёды было шмат іншадумцаў, і ён сам гэта вітаў. "Але, тым не менш, абсалютна ўпэўнены, маю адпаведныя факты, што большасць нашых вучоных - гэта разумныя, таленавітыя, здольныя людзі. Здольныя ацаніць сітуацыю і зрабіць правільныя высновы. Але гэтага мала. Здольныя паўплываць на іншых. Я ўпэўнены, што такіх у нас большасць", - падкрэсліў беларускі лідар.

Удзельнікі сустрэчы пацікавіліся, якія важныя задачы стаяць перад дзяржаўнай эканомікай у будучым. "Эканамічная бяспека - гэта галоўная задача эканомікі", - адзначыў Кіраўнік дзяржавы.

"Я думаю, усім зразумелы асноўныя напрамкі развіцця нашай эканомікі, не хачу ўдавацца ў гэту дыскусію, яна будзе мець хутчэй практычны характар, чым тэарэтычны. Хоць дарэчы сёння гаварыць аб эканамічнай тэорыі. Але гэта пытанне я хацеў бы перавесці ў плоскасць рэформ, - прадоўжыў Прэзідэнт. - Чаму рэформ? Таму што ўсе альтэрнатыўшчыкі зусім нядаўна крычалі - рэформы, рэформы... Праўда, адзін палітолаг напісаў: усе крычаць пра рэформы, а якія рэформы? Ніхто не можа напісаць, якія. Скажу вам, што пры цяперашняй уладзе, вядома ж, мы будзем ісці сваім шляхам, як ішлі чвэрць стагоддзя, і рэфармаваць нашу эканоміку".

"Успомніце, што было чвэрць стагоддзя таму, і што мы маем цяпер, - заўважыў Кіраўнік дзяржавы. - Я тады яшчэ прапаноўваў - давайце, не будзем нічога ламаць, мы ж стаім на плячах гігантаў. І трэба развіваць тое, што ёсць. У нас ёсць МАЗ, БЕЛАЗ, сельская гаспадарка, якая развіваецца".

Прэзідэнт яшчэ раз нагадаў аб той складанай сітуацыі, якую перажывала краіна адразу пасля распаду Савецкага Саюза, а таксама ў іншыя перыяды развіцця краіны. "Таму я па-філасофску гляджу на сённяшнія падзеі, бачачы знутры тое, што адбываецца. Няма ніякай катастрофы", - упэўнены ён.

"Нічога не трэба ламаць, а трэба развіваць існуючае, - перакананы Аляксандр Лукашэнка. - Мы правільны выбралі курс, і ў нас ёсць школы развіцця - у сельскай гаспадарцы, у машынабудаванні. Давайце тут будзем развівацца". Пры гэтым ён заўважыў, што крытычна ставіцца да тых крыкуноў, якія паўтараюць аб прыватызацыі буйных беларускіх машынабудаўнічых прадпрыемстваў.

У ходзе размовы з вучонымі Кіраўнік дзяржавы пазітыўна ацаніў намаганні беларускіх распрацоўшчыкаў у плане развіцця электратэхнікі, за якой будучае на планеце.

"Давайце абапірацца, адштурхоўвацца ад таго, што ў нас ёсць, і ісці наперад", - сказаў Аляксандр Лукашэнка.

Прэзідэнт адзначыў, што чакае ад беларускіх вучоных сучасных, інавацыйных прапаноў па дадатковым выкарыстанні электрычнасці, якая ў хуткім часе будзе вырабляцца ад Беларускай атамнай электрастанцыі.

"Атамная электрастанцыя - гэта прарыў, частка нашай незалежнасці", - падкрэсліў Кіраўнік дзяржавы. Ён звярнуў увагу: у краіне паслядоўна нарошчваецца спажыванне электраэнергіі як для бытавых патрэб, так і для галін народнай гаспадаркі. Для гэтага прымаюцца і стымулюючыя меры. "Усюды будзем рабіць упор на электрычнасць", - адзначыў Аляксандр Лукашэнка.

"Вы нам падкажаце тое, што мы, магчыма, не бачым - дзе можна гэту энергію скарыстаць, - звярнуўся Кіраўнік дзяржавы да ўдзельнікаў сустрэчы. - Трэба смялей ісці. Прапаноўвайце рашэнні. Рашэнні на будучае, якія забяспечаць наш суверэнітэт і незалежнасць. У нас сапраўды бліскучыя вучоныя, якія могуць цуды ствараць".

Аляксандр Лукашэнка таксама падкрэсліў правільнасць прынятага ў свой час рашэння аб узвядзенні АЭС у Беларусі. "Няпроста тады мне было прымаць гэта рашэнне па будаўніцтве атамнай станцыі, адзін ішоў. Сёння многія ўжо згодныя: правільна, што мы пабудавалі гэту сучасную станцыю. Будзем выкарыстоўваць яе па ўсіх напрамках", - сказаў ён.

"Займацца сваімі адкрыццямі і вынаходствамі нам трэба. Дзякуючы гэтаму мы асвойваем і энергію мірнага атама на нашай першай атамнай электрастанцыі.Гэта адна з прычын націску на нас. У Польшчы можна планаваць (новую станцыю ім амерыканцы пабудуюць), а нам нельга. Фінляндыі можна будаваць атамныя рэактары, а нам нельга", - звярнуў увагу Аляксандр Лукашэнка.

Ён таксама заўважыў, што атамныя станцыі працуюць і вакол Беларусі (па некалькі аб'ектаў у Расіі і Украіне), аднак, нягледзячы на гэта, на краіну ўсё роўна ажыццяўляецца націск у пытанні будаўніцтва сваёй АЭС. "Без мяне ці са мной вы зразумееце, што такое атамная станцыя. Гэта не толькі вялікае дасягненне і танная энергія. Гэта найвялікшая бяспека для нашай краіны", - падкрэсліў Кіраўнік дзяржавы.

Прэзідэнт таксама звярнуў увагу на важнасць забеспячэння гуманітарнай бяспекі дзяржавы. "Не ўсё ў нашым жыцці вымяраецца грашамі. Хачу звярнуць вашу ўвагу на тое, што сярод навуковых прыярытэтаў вылучана забеспячэнне бяспекі дзяржавы, у тым ліку гуманітарнай", - сказаў беларускі лідар.

Ён падкрэсліў: прадстаўнікі навуковай сферы - розум нацыі. "Памятайце, што вучоныя-гуманітарыі сваімі даследаваннямі і напрацоўкамі павінны кансалідаваць беларускае грамадства. Кожны з нас павінен усведамляць, якой працай беларускі народ атрымаў сваю дзяржаўнасць і права самому вырашаць лёс. Нельга гэта страціць, - заявіў Аляксандр Лукашэнка. - Хто мы? Адкуль? Куды ідзём? Адказы на гэтыя пытанні нашы дзеці павінны атрымліваць не толькі ад дзядоў - ад нас павінны атрымліваць, ад старэйшых, нашых вучоных, выкладчыкаў, настаўнікаў. Праблем там хапае".

Прэзідэнт звярнуў увагу: грамадазнаўчыя дысцыпліны павінны выключыць нават гіпатэтычную магчымасць двайных стандартаў пры ацэнцы гістарычных падзей, паставіць трывалую заслону падтасоўцы або скажэнню тых фактаў, на якіх грунтуюцца традыцыйныя каштоўнасці.

"Ніхто, акрамя нас, не зацікаўлены ў тым, каб мы былі моцнай суверэннай і незалежнай краінай. Краінай, дзе шануюць мінулае, цэняць сучаснае і ўпэўнены ў будучым, таму што абапіраюцца на патрыятызм і айчынныя навуковыя школы", - рэзюмаваў ён.