Хакейная каманда Прэзідэнта перамагла на старце 20-га сезона РХЛ

Хакейная каманда Прэзідэнта Беларусі 31 кастрычніка пераможна пачала выступленне ў юбілейным, 20-м па ліку сезоне Рэспубліканскай хакейнай лігі (РХЛ).

На лёдзе сталічнай "Алімпік-Арэны" ў стартавым паядынку новага сезона дружына Кіраўніка дзяржавы перамагла каманду Гродзенскай вобласці з лікам 12:8 (2:0, 6:1, 4:7).

Першую шайбу новага сезона закінуў нападаючы гаспадароў Мікалай Лукашэнка, які вызначыўся на 12-й мінуце стартавага перыяду. Незадоўга да перапынку Дзмітрый Буйніцкі другі раз паразіў вароты гасцей. У самым пачатку другога перыяду зноў вызначыўся Мікалай Лукашэнка, а потым шайбы закінулі яго партнёры па камандзе Павел Волчак, Аляксей Каркоцкі, Андрэй Міхалёў, Аляксей Баранаў і Андрэй Башко. Сапернікі адказалі дакладным кідком Андрэя Гідрэвіча. У заключнай трэці матчу ў складзе пераможцаў яшчэ дзве шайбы закінуў Мікалай Лукашэнка, па разу вароты сапернікаў паразілі Павел Волчак і Аляксандр Лукашэнка, у актыве якога яшчэ і дзве рэзультатыўныя перадачы. У каманды Гродзенскай вобласці галявы дубль аформіў Сяргей Маляўка, па адной шайбе закінулі Яўген Карытца, Віктар Кажараў, Андрэй Арлюк, Мікіта Крыскін і Дзмітрый Алешчык.

Лепшымі ігракамі сустрэчы прызнаны Мікалай Лукашэнка і Андрэй Гідрэвіч. Прызы ім уручыў Міністр спорту Беларусі Сяргей Кавальчук.

Балельшчыкі, якія запоўнілі трыбуны "Алімпік-Арэны" ўбачылі яркае лазернае шоу, выступленні беларускіх выканаўцаў, а пасля завяршэння гульні сталі ўладальнікамі мяккіх цацак ад прэзідэнцкай каманды.

У фінальнай серыі мінулага аматарскага турніру лядовая дружына Прэзідэнта двойчы перамагла каманду Мінскай вобласці - 6:3 і 4:2, стаўшы 17-ы раз пераможцам гэтых спаборніцтваў. Па аднаму тытулу ў каманд Гомельскай і Мінскай абласцей.