Аб узнагароджанні

Дзяржаўных узнагарод удастоены 78 прадстаўнікоў арганізацый, прадпрыемстваў і профільных адукацыйных устаноў аграпрамысловага комплексу. Ордэны, медалі і ганаровыя званні ім прысуджаны за шматгадовую плённую працу, значны асабісты ўклад у развіццё АПК, дасягненне высокіх вытворчых паказчыкаў. Адпаведны Указ № 404 падпісаў 14 лістапада Прэзідэнт Беларусі Аляксандр Лукашэнка.

Ордэнам Айчыны II ступені ўзнагароджаны дырэктар ААТ "Агра-Моталь" Вячаслаў Каштальян, ордэнам Працоўнай Славы – аператар машыннага даення ААТ "Астрамечава" Валянціна Раманюк, аператар штучнага асемянення жывёл СВК "Ляхавіцкі" Іван Патаповіч і старшыня праўлення СВК "50 гадоў Кастрычніка" Рыгор Шпакаў.

У ліку ўзнагароджаных ордэнам Пашаны – дырэктар ААТ "Агра-сад Рассвет" Васіль Жалянгоўскі, прафесар кафедры раслінаводства Гродзенскага дзяржаўнага аграрнага ўніверсітэта Канстанцін Каляда, галоўны аграном Талачынскага кансервавага завода Таццяна Капранава, брыгадзір вытворчай брыгады па жывёлагадоўлі сельгаспрадпрыемства "Новы Двор - Агра" Алена Мацейка.

Вялікая група прадстаўнікоў сферы АПК удастоена медаля "За працоўныя заслугі". Сярод іх - дырэктар ААТ "Максімавічы-Агра" Васіль Белы, генеральны дырэктар Беларускага дзяржаўнага аб'яднання па племянной жывёлагадоўлі "Белплемжыўаб'яднанне" Руслан Бярозавік, загадчык кафедры свінагадоўлі і дробнай жывёлагадоўлі Беларускай дзяржаўнай ордэна Кастрычніцкай рэвалюцыі і Працоўнага Чырвонага Сцяга сельскагаспадарчай акадэміі Аляксандр Салянік, дырэктар Беларускага дзяржаўнага ветэрынарнага цэнтра Юрый Піваварчык.

Ганаровае званне "Заслужаны работнік сельскай гаспадаркі Рэспублікі Беларусь" прысвоена шасцярым супрацоўнікам прадпрыемстваў АПК, у ліку якіх трактарыст-машыніст ААТ "Рассвет імя К.П. Арлоўскага" Мікалай Белакурскі і начальнік цэха ААТ "Белавежскі" Ларыса Хіміч.

Аляксандр Лукашэнка таксама падпісаў распараджэнне, якім аб'явіў Падзяку Прэзідэнта Рэспублікі Беларусь прадстаўнікам арганізацый, прадпрыемстваў і профільных адукацыйных устаноў аграпрамысловага комплексу.