Першы намеснік Кіраўніка Адміністрацыі Прэзідэнта Уладзімір Пярцоў прыняў удзел у адкрыцці спартакіяды "Здароўе"

Больш за 500 прадстаўнікоў беларускіх сродкаў масавай інфармацыі 29 жніўня сабраліся ў Рэспубліканскім цэнтры алімпійскай падрыхтоўкі "Стайкі", каб высветліць, хто мацнейшы, спрытнейшы і хутчэйшы, а галоўнае - праверыць на моц камандны дух. Тут стартавала рэспубліканская спартакіяда "Здароўе" работнікаў галіны Міністэрства інфармацыі.

У гэтым годзе ўдзел у спаборніцтвах прымаюць 20 каманд. У "Стайкі" прыехалі прадстаўнікі рэспубліканскіх і рэгіянальных СМІ з усіх куткоў краіны, а таксама арганізацый сістэмы Міністэрства інфармацыі і прэс-службаў дзяржаўных органаў. Традыцыйна ўдзел прыняла і каманда Беларускага тэлеграфнага агенцтва.

Урачыстае адкрыццё пачалося з парада ўдзельнікаў. Пад апладысменты гледачоў на пляцоўку выйшлі каманды Брэсцкай, Віцебскай, Гомельскай, Гродзенскай, Мінскай і Магілёўскай абласцей, горада Мінска, вядучых рэспубліканскіх медыя і арганізацый галіны.

Вітаючы ўдзельнікаў, Першы намеснік Кіраўніка Адміністрацыі Прэзідэнта Беларусі Уладзімір Пярцоў падкрэсліў, што спартакіяда даўно выйшла за рамкі звычайнага спартыўнага спаборніцтва. "У нас не проста свята спорту, не проста свята здаровага ладу жыцця - у нас свята яднання галіны ў імя адзінай мэты", - адзначыў ён.

Паводле слоў Уладзіміра Пярцова, прадстаўнікі медыя сёння павінны быць адзіныя не толькі ў спартыўнай барацьбе. "Трымаць абарону ў гэтай інфармацыйнай вайне не толькі словам, але і справай", - даў наказ Першы намеснік Кіраўніка Адміністрацыі Прэзідэнта. Ён пажадаў камандам удалых спаборніцтваў, яркіх перамог і сумленнага судзейства, асобна падкрэсліўшы важнасць з'яднання галіны.