Сустрэча са старшынямі аблвыканкамаў і Мінскага гарвыканкама, памочнікамі па абласцях і Мінску

Прэзідэнт Беларусі Аляксандр Лукашэнка пацікавіўся ў кіраўнікоў мясцовай вертыкалі ўлады гатоўнасцю да фінальнага этапу выбараў. Аб гэтым ішла размова 4 жніўня на сустрэчы Кіраўніка дзяржавы са старшынямі аблвыканкамаў і Мінскага гарвыканкама, памочнікамі Прэзідэнта па абласцях і горадзе Мінску.

"Прашу не забываць, што па добрай беларускай традыцыі, можа, і савецкай традыцыі, мы заўсёды выбары праводзілі як сапраўднае свята для людзей. І буфеты былі арганізаваны, і канцэртныя пляцоўкі. Прагаласаваўшы, людзі гатовы былі паслухаць добрую песню, каб настрой быў добры. Трэба і на гэты раз не забываць пра такое свята", - сказаў Аляксандр Лукашэнка.

Кіраўнік дзяржавы адзначыў, што ў краіне пачалася завяршальная стадыя выбарчай кампаніі, стартавала датэрміновае галасаванне. "Мне дакладваюць, што ў штатным рэжыме ідзе работа. З 5,8 тыс. участкаў усе працуюць як унутры краіны, так і за мяжой", - сказаў Прэзідэнт.

Разам з тым Аляксандр Лукашэнка пацікавіўся, ці ўсё зроблена з пункту гледжання матэрыяльнага, арганізацыйнага забеспячэння кампаніі.

Кіраўнік дзяржавы таксама акцэнтаваў увагу на забеспячэнні бяспекі правядзення выбараў. "Я ўжо сёння закранаў гэта пытанне (у Пасланні беларускаму народу і Нацыянальнаму сходу - Заўвага). Нам ні ў якім разе нельга дапусціць, каб кіраўнікі камісій, і не толькі кіраўнікі, наогул тыя, хто прыйшоў на выбарчы ўчастак, прад'яўлялі да нас потым якія-небудзь прэтэнзіі, што мы не змаглі на дастойным узроўні забяспечыць бяспеку ў месцах правядзення галасавання. Прашу, звярніце на гэта самую сур'ёзную ўвагу", - заявіў Прэзідэнт.

Ён падкрэсліў, што праваахоўныя органы павінны жорстка рэагаваць на адпаведныя факты, каб абараніць людзей. "Нашых людзей трэба абараніць. Пагрозы, знявагі, насілле павінны спыняцца адразу ж", - сказаў Аляксандр Лукашэнка.

"У кожнага чалавека, хто мае права голасу, павінна быць магчымасць прыняць удзел у выбарах. Асабліва паглядзіце за старымі людзьмі, інвалідамі. Ёсць яшчэ і людзі, якія хварэюць на каранавірус, трэба дапамагчы ім прагаласаваць, каб яны маглі зрабіць свой выбар", - адзначыў Кіраўнік дзяржавы.

Прэзідэнт падкрэсліў, што на гэту электаральную кампанію акрэдытавана рэкордная колькасць наглядальнікаў - больш за 45 тыс. "Ёсць і замежныя. Трэба акружыць іх у добрым сэнсе слова клопатам, таму што гэта людзі гераічныя: яны не пабаяліся ў пандэмію прыехаць у Беларусь з-за мяжы, нават няхай з Расіі, Украіны. Не пабаяліся, прыехалі, каб паглядзець, як ідуць нашы выбары. Таму да іх трэба адпаведнае стаўленне", - звярнуў увагу Кіраўнік дзяржавы.

Разам з тым Аляксандр Лукашэнка адзначыў, што выбары пройдуць у строгай адпаведнасці з беларускім заканадаўствам і выключна ў інтарэсах беларускага народа. "Калі ў кагосьці іншыя чаканні, то дарэмна. Беларускія законы, беларускі народ - гэта галоўнае", - дадаў ён.

Кіраўнік дзяржавы даручыў мясцовым органам улады звярнуць асаблівую ўвагу на ўборачную кампанію. "Як я часта гавару, выбары выбарамі, 9-га вечарам яны завершацца, і 10-га нам давядзецца займацца той цяжкай, камусьці нецікавай руцінай. Але без яе жыцця не бывае. Яшчэ раз: увага - сялянам. Паглядзіце, каб мы не расслабіліся, асабліва ў гэты тыдзень. Надвор'е стаіць гарачае, трэба скарыстацца і ўбраць асноўную масу збожжавых каласавых. Найпершая задача - сабраць збожжа. Яно добрае, яго страціць нельга", - сказаў Аляксандр Лукашэнка.

Прэзідэнт падкрэсліў, што ўся інфраструктура ў рэгіёнах - ад сувязі да транспарту - павінна функцыянаваць без перабояў, асабліва ў перыяд правядзення выбарнай кампаніі. "Трэба зрабіць так, каб усе інфраструктурныя арганізацыі працавалі як гадзіннік. Гэта добрая праверка, гэта як у ваенных на вучэннях", - адзначыў ён.

"Нашы людзі заўсёды актыўна ўдзельнічаюць у выбарах. Трэба іх папрасіць, каб яны, нягледзячы на летні перыяд (у кожнага ёсць свае клопаты), знайшлі на працягу тыдня магчымасць прыйсці і прагаласаваць. У нас людзі свядомыя і адгукнуцца на нашу просьбу паўдзельчаць у гэтых выбарах", - дадаў Кіраўнік дзяржавы.