Сустрэча з паслом Расіі ў Беларусі Барысам Грызловым

Прэзідэнт Беларусі Аляксандр Лукашэнка 12 мая сустрэўся з паслом Расіі ў Беларусі Барысам Грызловым.

"Увесь час у нашых адносінах, Вы гэта добра ведаеце не горш за мяне, нафта, газ, гандаль, пастаўкі, рынак і гэтай далей. Як я часта адзначаю, не было б шчасця - няшчасце дапамагло, усё ж такі і гэтыя пытанні ў нас вырашаюцца. Але не гэта, напэўна, галоўнае для нас цяпер у адносінах. Я так абдумваю гэтыя праблемы, пры сустрэчы з Прэзідэнтам Расіі мы будзем сур'ёзна яшчэ раз абмяркоўваць, імпартазамяшчэнне - гэта пытанне вельмі важнае. Шмат кампетэнцый і ў Беларусі, і ў Расіі. Ну, яны па пэўных прычынах не развіваліся так, як трэба. Дзякуй богу, што гэтыя кампетэнцыі існуюць", - сказаў Кіраўнік дзяржавы.

Аляксандр Лукашэнка прывёў шэраг канкрэтных прыкладаў па напрамках супрацоўніцтва: "Дапусцім, сёння пытанне пытанняў - гэта наш "Інтэграл" і тое, што ён выпускае. І падобныя прадпрыемствы ў Расіі. Салідныя задзелы мы маем. І, дапусцім, "Гарызонт". Ён для авіябудавання вырабляе вельмі шмат прадукцыі, пра якую нават расіяне не ведалі, як мне нядаўна далажылі. Калі ў Расіі паказалі гэту прадукцыю, усе здзівіліся, што гэта існуе. Яна звязана з кіраваннем і касмічнымі апаратамі, і самалётамі. Для беспілотнікаў вельмі шмат прадукцыі мы робім. Таму імпартазамяшчэнне і яшчэ раз імпартазамяшчэнне".

У першую чаргу могуць быць задзейнічаны навукаёмістыя прадпрыемствы, уключаючы "БелОМА", "Пеленг" і іншыя.

Паводле слоў Аляксандра Лукашэнкі, ёсць добрыя перспектывы і для развіцця ўзаемадзеяння ў ІТ-сферы. "Мы не збіраемся яе згортваць. Як некаторыя тут кажуць: вось, там Лукашэнка зараз усіх айцішнікаў павыганяе. Ды не, нездарма я гэты парк ствараў. Ён працуе і будзе працаваць. Я проста цяпер займаюся цесна гэтым пытаннем, таму што мне трэба сустрэцца з айцішнікамі, і не толькі ў парку", - заявіў ён.

Прэзідэнт адзначыў, што ПВТ у Беларусі даў штуршок развіццю ІТ-сферы на ўсіх прадпрыемствах, у Акадэміі навук. "Трэба пагаварыць з імі, якая дапамога патрэбна", - сказаў Кіраўнік дзяржавы.

"Думаю, мы з Расіяй тут шмат чаго можам зрабіць. Мы ў рэшце рэшт павінны схіліць нашых айцішнікаў да вытворчасці гатовага канечнага прадукту, а не на пабягушках быць у буйных кампаній. Так, грошы, так, мільярды долараў - усё гэта зразумела. Але трэба рабіць з нуля гатовы прадукт і асвойваць яго тут, на постсавецкай прасторы. Перш за ўсё ў Беларусі і Расіі. Таму ёсць дзе разгарнуцца", - сказаў Кіраўнік дзяржавы.

Ён адзначыў, што на гэта, зразумела, неабходны пэўныя сродкі, але гэта не гіганцкія грошы. "Мы разам можам знайсці. І не абавязкова дзесьці паасобку. Мы можам у саюзным бюджэце прадугледзець і пэўную тэматыку развіваць", - заўважыў беларускі лідар.

"Кааперацыя і імпартазамяшчэнне - гэта тыя шляхі, па якіх мы павінны сёння рухацца наперад", - падкрэсліў Аляксандр Лукашэнка.

"Усе астатнія пытанні вам зразумелы. Вы ведаеце нашу пазіцыю, пачынаючы ад спецыяльнай ваеннай аперацыі і заканчваючы стратэгіяй развіцця ў космасе і гэтак далей. Мы свята выконваем гэта. Вы нават можаце не перажываць. Вы заўсёды можаце быць упэўнены ў Беларусі. Тут жывуць надзейныя і стабільныя людзі. Вы гэта ведаеце не горш за мяне", - рэзюмаваў Прэзідэнт.