Сустрэча з паслом Індыі ў Беларусі Алокам Ранджанам Джа

Беларусь хацела б знайсці сваё месца ў растучай індыйскай эканоміцы. Аб гэтым Прэзідэнт Беларусі Аляксандр Лукашэнка заявіў 16 чэрвеня на сустрэчы з паслом Індыі ў Беларусі Алокам Ранджанам Джа.

"Як гісторык, я абсалютна ўпэўнены ў тым (і гэта мы ўжо з вамі ўбачым у бліжэйшы час), што ўся планета будзе развівацца, арыентуючыся на тую частку Азіі, у якой размешчана Індыя. Вялікі Кітай, велізарная Індыя. Вельмі перспектыўныя, дынамічна развіваюцца, яны будуць дыктаваць моду ў бліжэйшай будучыні для ўсяго свету. Мы вітаем такую будучыню планеты і, зразумела, хацелі б знайсці сваё месца ў растучай індыйскай эканоміцы. Хацелі б карыстацца і мець падтрымку індыйскай дзяржавы на ўсіх узроўнях. У даўгу не застанёмся", - сказаў Аляксандр Лукашэнка.

Кіраўнік дзяржавы падзякаваў дыпламату за акуратную і ўзважаную пазіцыю адносна Беларусі. "Я не скажу, што ўсё абсалютна ўрэгулявана, што ў нас няма ніякіх праблем, але я спадзяюся, што праблемы, якія існуюць у нашых узаемаадносінах, вырашальныя", - адзначыў Аляксандр Лукашэнка.

Прэзідэнт падкрэсліў, што Індыя для Беларусі - адзін з важнейшых партнёраў у Азіі, а фундамент гэтага супрацоўніцтва закладваўся яшчэ ў часы Савецкага Саюза: "Ён глыбока ў нашай гісторыі, асабліва савецкага перыяду. Мы заўсёды аддавалі прыярытэт у Савецкім Саюзе супрацоўніцтву з Індыяй. Гэты фундамент дае нам магчымасць і сёння будаваць добрыя адносіны з вашай дзяржавай і ў галіне палітыкі, і асабліва ў галіне эканомікі".

Аляксандр Лукашэнка адзначыў, што ў гэтым годзе спаўняецца 75 гадоў з дня набыцця Індыяй незалежнасці. З іх 30 гадоў бакі супрацоўнічаюць як суверэнныя і незалежныя дзяржавы. Кіраўнік дзяржавы павіншаваў пасла з гадавінай, пажадаўшы працвітання вялікаму, працавітаму і таленавітаму індыйскаму народу.

Алок Ранджан Джа ў сваю чаргу падзякаваў за магчымасць сустрэчы і цёплыя словы ў адрас Індыі, якія выказаў Кіраўнік беларускай дзяржавы: "Вялікая пашана зноў сустрэцца з Вамі".

"Вы гаворыце, што Індыя з'яўляецца важнейшым партнёрам Беларусі, - адрэагаваў пасол на заяву Аляксандра Лукашэнкі. - Дазвольце Вас запэўніць, што і для Індыі Беларусь - адзін з важнейшых партнёраў у гэтым рэгіёне. І, як я ўжо гаварыў не раз пры сустрэчы з прадстаўнікамі беларускай улады, адносіны паміж Беларуссю і Індыяй не залежаць ад адносін паміж Індыяй і іншымі партнёрамі, дзяржавамі. Як і Беларусь, Індыя таксама праходзіць важную фазу развіцця і для яе будзе гонарам разам з Беларуссю рухацца ў гэтым напрамку і прайсці гэты шлях эканамічнага развіцця".