Сустрэча са старшынёй Мілі Меджліса Азербайджана Сагібай Гафаравай

Прэзідэнт Беларусі Аляксандр Лукашэнка пацвердзіў гатоўнасць нарошчваць супрацоўніцтва з Азербайджанам. Аб гэтым Кіраўнік дзяржавы заявіў 11 чэрвеня на сустрэчы са старшынёй Мілі Меджліса Азербайджана Сагібай Гафаравай.

Аляксандр Лукашэнка цёпла вітаў Сагібу Гафараву ў дружалюбнай Беларусі: "Я ўпэўнены, што вы ўжо не толькі з падачы нашых кіраўнікоў парламента добра знаёмы з Беларуссю і любіце яе".

Кіраўнік дзяржавы звярнуў увагу, што ў Беларусі, асабліва ў год 80-годдзя вызвалення краіны ад нямецка-фашысцкіх захопнікаў, цэняць той уклад, які ўнеслі азербайджанцы ў Перамогу і вызваленне беларускіх зямель, памятаюць іх подзвігі. Прэзідэнт адзначыў, што Сагіба Гафарава ў час візіту таксама аддала даніну павагі подзвігам воінаў часоў Вялікай Айчыннай вайны, усклаўшы вянок на плошчы Перамогі ў Мінску. "Гэта вельмі важна і сімвалічна цяпер, - падкрэсліў беларускі лідар. - Мне прыемна, што ў нас каштоўнасці супадаюць - у Азербайджана і Беларусі".

Характарызуючы адносіны паміж парламентамі дзвюх краін, Кіраўнік дзяржавы падкрэсліў: "Яны складваюцца вельмі добра. Гэта той выпадак, калі міжпарламенцкія сувязі не адстаюць ад узроўню адносін паміж кіраўнікамі нашых дзяржаў".

Аляксандр Лукашэнка адзначыў, што з Прэзідэнтам Азербайджана Ільхамам Аліевым яго звязваюць даўнія адносіны, яшчэ з таго часу, калі кіраўніком краіны быў яго бацька Гейдар Аліеў. "Вельмі празорлівы быў чалавек, - сказаў Кіраўнік дзяржавы. - Ільхам - дастойны прадаўжальнік спраў бацькі. Напэўна, у гісторыі ён зрабіў столькі, што наўрад ці гэта паўторыць які-небудзь прэзідэнт пасля Ільхама Гейдаравіча".

Паводле слоў Аляксандра Лукашэнкі, ён з цеплынёй успамінае свой нядаўні візіт у Азербайджан. У ходзе паездкі Кіраўнік беларускай дзяржавы разам з Ільхамам Аліевым наведаў у тым ліку і адраджаемыя тэрыторыі Азербайджана. Асабліва Прэзідэнт Беларусі адзначыў клімат і прыроднае хараство Шушы: "Пабываўшы ў многіх месцах нашай планеты, такой мясціны я нідзе не бачыў - чыстае паветра, цудоўная прырода".

"Упэўнены, што вы здзейсніце чарговы подзвіг, аднавіўшы жыццё на гэтых тэрыторыях. Мы будзем з задавальненнем удзельнічаць у гэтых работах, вызначылі некаторыя напрамкі. Перашкод ніякіх няма", - падкрэсліў беларускі лідар.

Характарызуючы развіццё гандлёва-эканамічнага супрацоўніцтва паміж дзвюма краінамі, Прэзідэнт падкрэсліў: "Гандлёвы абарот у нас нядрэнны. Але ён разбалансаваны. Нам трэба больш купляць тавараў у Азербайджане". Гэта пытанне, паводле слоў Аляксандра Лукашэнкі, будзе адрэгулявана. У час візіту Прэзідэнта Беларусі ў Азербайджан абмяркоўваліся напрамкі, па якіх варта больш інтэнсіўна супрацоўнічаць, уключаючы абмен тэхналогіямі ў сферах АПК і ВПК.

"Словам, закрытых тэм няма. Мы гатовы ў гэтым напрамку працаваць. Я ўпэўнены, што нашы парламентарыі гэты працэс забяспечаць заканадаўча", - сказаў беларускі лідар.

Старшыня Мілі Меджліса Азербайджана Сагіба Гафарава ў час сустрэчы адзначыла, што адносіны народаў дзвюх краін звязваюць вельмі глыбокія карані. "Мы некалі былі ўсе разам у адной вялікай краіне. Адносіны паміж народамі складваліся стагоддзямі. Сёння вельмі прыемна, што гэтыя адносіны развіваюцца на той трывалай аснове, якая ўжо ёсць", - сказала яна.

"Мы не толькі сябры, але нашы народы падтрымліваюць той узровень адносін, які дазваляе нам сказаць: мы - брацкія народы. Самае галоўнае - у гэты вельмі цяжкі час, час двайных стандартаў, калі вельмі многія каштоўнасці знікаюць на вачах, нашы народы звязваюць гэтыя каштоўнасці", - падкрэсліла Сагіба Гафарава.