Сустрэча з актывам Брэсцкай вобласці

Прэзідэнт Беларусі Аляксандр Лукашэнка 22 чэрвеня правёў сустрэчу з актывам Брэсцкай вобласці.

Прэзідэнт адзначыў, што з Брэстам у яго звязаны асаблівыя ўспаміны. "Павінен сказаць, для мяне горад не чужы. Гэта мой горад. Я ведаў кожную вулачку таго савецкага горада, абхадзіў тут кожны квадратны метр, асабліва ў апошнія гады службы, калі давялося займацца грамадска-палітычнай работай. Усё маё ваеннае жыццё было тады звязана з абаронай горада і нашай вялізнай краіны", - заўважыў Кіраўнік дзяржавы.

Паводле яго слоў, Брэст тады для яго быў вельмі душэўным і местачковым, горадам, які не моцна цягнуў на цэнтр рэгіянальнага значэння. "Але паглядзіце, які прыгажун цяпер наш легендарны горад над Бугам, 1000-годдзе якога мы дастойна адзначылі ў мінулым годзе. Тое, што Брэст сёння па-сапраўднаму еўрапейскі - чысты, камфортны і вельмі зручны для жыцця - адзначаюць не толькі жыхары, але і замежныя госці", - сказаў Аляксандр Лукашэнка.

Ён адзначыў, што турызм у заходніх абласцях літаральна рвануў з увядзеннем бязвізавага рэжыму, хоць і не ўсім суседзям Беларусі спадабаўся такі крок. "Але мы краіна адкрытая, нам гэта выгадна, і мы такую ​​практыку будзем прадаўжаць", - заявіў Кіраўнік дзяржавы.

Да юбілею Брэст атрымаў Заходні абход - новы пуцеправод, які даў магчымасць перанакіраваць транспартныя патокі і разгрузіць вуліцы горада. "Гэта падарунак гараджанам ад усёй краіны. Гэта экалагічны праект у чыстым выглядзе, за якім у выніку здароўе людзей. Я ўжо не кажу пра добраўпарадкаванне, будаўніцтва жылля. І не толькі Брэст, але і іншыя гарады вобласці - Баранавічы, Кобрын, Пінск - сур'ёзна падцягнуліся, проста змяніліся за апошнія гады", - звярнуў увагу Прэзідэнт.

На сустрэчы з актывам вобласці Кіраўнік дзяржавы адзначыў, што за гады суверэннага развіцця Беларусь зрабіла велізарны крок наперад у развіцці розных галін.

"Правільна кажуць: вялікае бачыцца на адлегласці. За гады суверэннага развіцця мы зрабілі велізарны крок наперад у прамысловасці, сельскай гаспадарцы, тэхналогіях, сацыяльнай сферы. На прыкладзе Брэстчыны гэта відаць асабліва. Сёння некаторыя з тых, хто ў вас тут спрабуе паставіць гэта пад сумненне, муцяць ваду, гавораць аб страчаных гадах. Аб тым, што з гэтай уладай мы нібыта зайшлі ў тупік, што кругом адны праблемы. Да гэтага трэба ставіцца з разуменнем. Можа, нават спакойна. Гэта натуральна, ідзе палітычная барацьба. Але лічбы ж не падманеш. А яны красамоўна сведчаць пра адваротнае", - заявіў Прэзідэнт.

Гаворачы аб развіцці рэгіёна за мінулыя гады, Аляксандр Лукашэнка адзначыў, што аб'ём прамысловай вытворчасці вырас у 5,5 раза, экспарт тавараў узрос амаль у 7 разоў - да $2 млрд 600 млн. З'явіліся абсалютна новыя вялікія прамысловыя вытворчасці ў рыбнай, малочнай, хімічнай прамысловасці. Дадатковы імпульс атрымала дрэваапрацоўка. "Пры гэтым многія з такіх прадпрыемстваў - прыватнай формы ўласнасці", - заўважыў Кіраўнік дзяржавы.

Ён прыгадаў аб сваім наведванні Баранавіцкага баваўнянага камбіната ў пачатку свайго прэзідэнцтва. На прадпрыемстве тады звыш 9 тыс. работнікаў наогул засталіся без зарплат. "Гэта было адно з першых прадпрыемстваў, якое я наведаў. Перш за ўсё таму, што гэта было жаночае прадпрыемства. Для мяне было катастрафічна ўдвайне, што жанчына не можа накарміць сваіх дзяцей. Ні сыравіны, ні работы. Мне ў тэрміновым парадку давялося вырашаць гэта пытанне з нашымі ўзбекскімі сябрамі, якія паставілі нам бавоўну. Цяпер на гэтым прадпрыемстве калі не зусім ідэальная, але зусім іншая сітуацыя", - расказаў Прэзідэнт. У прыватнасці, з падтрымкай дзяржавы памянялі абсталяванне, асвоілі тэхналогіі лічбавага друку на баваўнянай тканіне.

"У тых жа Баранавічах авіярамонтны завод - наогул адно з лепшых нашых прадпрыемстваў. Калі б не было праблем з Расіяй, якая ад выпадку да выпадку нахіляе гэты завод па пастаўках камплектуючых для рамонту і мадэрнізацыі лятальных апаратаў, было б зусім нядрэнна. Гэты завод выконвае найскладанейшыя і ваенныя, і цывільныя заказы. І чарга з-за мяжы там ужо выстраілася", - адзначыў Аляксандр Лукашэнка.

Не менш важныя сацыяльныя паказчыкі ў развіцці рэгіёна, прадоўжыў Прэзідэнт. За перыяд суверэнітэту 136 тыс. сем'яў палепшылі жыллёвыя ўмовы, з іх каля 16 тыс. - шматдзетныя. У разы знізіўся ўзровень малазабяспечанасці, рэальныя даходы насельніцтва выраслі амаль у 8 разоў, а заработная плата і пенсіі - у 10 разоў. Акрамя таго, узведзены і адрэстаўраваны знакавыя культурныя аб'екты, да якіх пры савецкай уладзе нікому не было справы. А створанай спартыўнай інфраструктуры вобласці могуць пазайздросціць у іншых дзяржавах, адзначыў Аляксандр Лукашэнка.

Прэзідэнт звярнуў увагу: напярэдадні, у час яго наведвання Светлагорска, мясцовыя жыхары, як ні здзіўна, прасілі пабудаваць не бальніцы, не дзіцячыя сады, а лядовы палац.

Аляксандр Лукашэнка дадаў, штоў цэлым з самага пачатку прэзідэнцтва прыярытэтам стала развіццё Палескага рэгіёна, у тым ліку праведзены маштабныя работы па газіфікацыі населеных пунктаў, меліярацыі зямель.

Прэзідэнт падкрэсліў, што хацеў бы бачыць хаця б па адным знакавым аб'екце ў інвестпраграмах рэгіёнаў на пяцігодку. "Маючы вялізныя магчымасці ў прамысловасці, перапрацоўцы сельгассыравіны, будаўніцтве і лагістыцы, вобласць так і не прапанавала маштабных інвестыцыйных праектаў, якія здольны стаць новымі кропкамі росту рэгіёна, сфарміраваць базу для апераджальнага развіцця ў наступнай пяцігодцы", - адзначыў Кіраўнік дзяржавы.

Ён прывёў у прыклад Гродна, дзе прынята рашэнне аб будаўніцтве новага камбіната па вытворчасці мінеральных угнаенняў. "Хацелася б, каб і Брэсцкая вобласць мела хаця б адзін такі знакавы праект на пяцігодку. Мы дамовіліся, што пры планаванні наступнай пяцігодкі зробім, як у савецкія часы - прапішам праграму будаўніцтва канкрэтных прадпрыемстваў і іх мадэрнізацыі. Хацелася б, каб па такім знакавым аб'екце было ў кожнай вобласці", - падкрэсліў Аляксандр Лукашэнка.

Што датычыцца Брэсцкай вобласці, то Кіраўнік дзяржавы адзначыў, што ў рэгіёна добрыя перспектывы, але ёсць і шэраг праблем, якія ляжаць на паверхні і патрабуюць вырашэння ў самыя кароткія тэрміны. Першае і галоўнае - эканоміка рэальнага сектара, дзе ў студзені-красавіку значна знізіліся аб'ёмы чыстага прыбытку ў арганізацый. "Зразумела, калі свет закрыўся, нам было вельмі цяжка ў гэтай сітуацыі працаваць. Нам вельмі важна першымі ўскочыць туды, дзе мы можам прадаць сваю прадукцыю", - падкрэсліў беларускі лідар.

Яшчэ адна праблема ў тым, што рост прадукцыйнасці працы пакуль адстае ад росту заработнай платы. "Мы павінны забяспечыць эфектыўную работу прадпрыемстваў, ствараць умовы для жыцця і працы людзей тут, каб працоўная міграцыя насельніцтва за межы вобласці, асабліва ў сумежныя краіны, калі і была, то нязначнай", - сказаў Кіраўнік дзяржавы.

"Бізнес, які сумленна працуе на карысць нашай краіны і народа, мы заўсёды будзем падтрымліваць. Тут на нас могуць разлічваць. Гэта мая цвёрдая пазіцыя. Я яе не мяняў і мяняць не буду. А калі нейкае жуллё (прытым нахабна) парушае закон, спрабуе жыць за кошт чужога, прыватнага або дзяржаўнага, і ёсць таго неабвержныя доказы, у нас да яго адносяцца, як і ва ўсіх цывілізаваных краінах, - у адпаведнасці з законам", - падкрэсліў беларускі лідар.

Аляксандр Лукашэнка адзначыў, што не будзе паслабленняў і ў барацьбе з карупцыяй. "Гэта ржа, якая раз'ядае ўсё. Гэта прамы шлях ужо не да рэвалюцыі, а да майдана. Наш народ не пацерпіць карупцыйных праяў і з'яўлення алігархату ў нашай краіне", - сказаў ён.

Прэзідэнт падкрэсліў, што ў плане барацьбы з карупцыяй Беларусь у тым ліку з'яўляецца прыкладам для многіх людзей за мяжой. "Яны, гледзячы на нас, зайздросцяць нам", - сказаў ён.

Аляксандр Лукашэнка таксама закрануў тэму развіцця АПК, падкрэсліўшы, што сельская гаспадарка была і застаецца прыярытэтам. "Попыт на прадукты харчавання ў свеце будзе толькі расці", - упэўнены беларускі лідар.

Ён адзначыў: як ні развівалі б, напрыклад, высокія тэхналогіі, сялянская праца будзе запатрабавана. Разам з тым за мінулыя гады ў краіне сельская гаспадарка была цалкам мадэрнізавана і перабудавана, перш за ўсё ў сацыяльнай сферы. "Мы змянілі сялянскую працу - аграгарадкі, стварэнне новай высокапрадукцыйнай тэхнікі, што запатрабавала ўзбуйнення сельгаспрадпрыемстваў, мы стварылі сыравінныя зоны. Можа, не да канца іх дапрацавалі. Думаю, што ў бліжэйшыя год-два мы гэта зробім", - адзначыў Прэзідэнт.

"Нашу сельгаспрадукцыю, нашы прадукты харчавання паважаюць ва ўсім свеце", - падкрэсліў беларускі лідар. Ён, у прыватнасці, адзначыў, што Кітай гатовы больш спажываць беларускай сельгаспрадукцыі, аб чым нядаўна вялася гутарка ў час тэлефоннай размовы са Старшынёй КНР Сі Цзіньпінам.

Пасля завяршэння сустрэчы з актывам каля аблвыканкама Аляксандр Лукашэнка паразмаўляў з жыхарамі горада і прадстаўнікамі брэсцкай апазіцыі.

Прэзідэнт адзначыў, што паважліва ставіцца да меркавання людзей, нават калі не падзяляе іх погляды. "Я добра вучыўся ў савецкія часы і цяперашнюю дэмакратыю вывучаў не па кніжках. Ёсць большасць, яна ў асноўным заўсёды вырашае. Але ёсць меншасць, да якой трэба прыслухоўвацца. Таму не лічу, што вамі (меркаваннем меншасці. - Заўвага) трэба пагарджаць. Я лічу, што любы чалавек мае права выказваць сваю пазіцыю", - сказаў Аляксандр Лукашэнка.

У той жа час Кіраўнік дзяржавы падкрэсліў, што катэгарычна не згодны, калі хто-небудзь - меншасць гэта або большасць - паводзіць сябе агрэсіўна. "Я чалавек мірны, не хачу, каб мы нейкім чынам разбуралі той мір і стабільнасць, якія сёння існуюць. Нехта ацэньвае гэту стабільнасць як ненармальную, маўляў, нам такая стабільнасць не патрэбна. Ну, як мог, як умеў, не адзін я, многія з нас стваралі гэту краіну, і яна такая ёсць. Можа, іншыя зробяць лепш, 9 жніўня ўсё вырашыцца", - адзначыў беларускі лідар, запэўніўшы, што ніякіх фальсіфікацый у час маючых адбыцца выбараў не будзе.

Аляксандр Лукашэнка таксама адказаў на крытыку асобных людзей наконт значнай уключанасці Прэзідэнта ў сельскую гаспадарку. Ён адзначыў, што шмат у чым менавіта дзякуючы ўвазе з боку Кіраўніка дзяржавы да гэтага сектара экспарт прадукцыі аграпрамысловага комплексу нарастае і прыносіць мільярды долараў у краіну.

"Я хачу, каб было ціха і спакойна, - падкрэсліў Прэзідэнт, звяртаючыся да прадстаўнікоў брэсцкай апазіцыі. - І запомніце: Брэст не толькі ваш горад, але і мой". Многае ў горадзе было зроблена пры падтрымцы кіраўніцтва краіны, у тым ліку да тысячагоддзя Брэста. Напрыклад, пабудаваны Заходні абход. "На гэта каласальныя грошы мы выдзелілі. Я яшчэ прыязджаў, глядзеў, як там ішло будаўніцтва, каб паспелі да тысячагоддзя. Гэта значыць, я ўжо ўклаўся ў гэты горад. Цяпер вы крыху паварушыцеся", - сказаў Прэзідэнт, падкрэсліўшы, што жыхары горада многія мясцовыя праблемы могуць вырашаць на сваім узроўні. А на ўзроўні Кіраўніка дзяржавы і па яго ініцыятыве рэалізуюцца больш глабальныя праекты, як, напрыклад, утварэнне Парка высокіх тэхналогій або будаўніцтва атамнай станцыі.

Кіраўнік дзяржавы заявіў, што ў курсе ўсяго, што адбываецца на палітычным полі краіны, і таго, што пішуць пра яго, як часам называюць. У сувязі з гэтым ён заклікаў не пераходзіць на абразы. "Не трэба нас зневажаць, - папярэдзіў ён. - Я пакуль яшчэ дзеючы Прэзідэнт. Ні ў адной краіне не дазволена зневажаць людзей. Я ж нікога з вас не зняважыў асабіста. А калі хочаце рознае жуллё абараніць, вы абараняйце, але толькі не са мной. Карупцыянерам у краіне рабіць няма чаго", - падкрэсліў ён. У прыватнасці, беларускі лідар згадаў аб расследаванні, якое праводзіцца наконт вывядзення з краіны значных грашовых сум, адмывання грошай. "Мецэнат, карціны прывёз дзяржаве. А на паверку што аказалася? Гэта іх карціны. А чаму мы іх (групу людзей. - Заўвага) цяпер вымушаны былі прыхапіць? А таму, што яны пачалі канцы ў ваду хаваць, пачалі вывозіць грошы, карціны. Калі мы пайшлі ў банк, ведаеце, што знайшлі ў ячэйках? Грошы - гэта не галоўнае. Мы знайшлі флэшкі, дыскі і шмат інфармацыі. І гэтага баяцца іх гаспадары", - расказаў Аляксандр Лукашэнка.

"А вы пачынаеце некаму падыгрываць, - дадаў ён. - Навошта? У іх уласнасці за мяжой - куры не дзяўбуць. Яны туды паедуць, рана ці позна ўцякуць, а вы ж тут застаняцеся. Падумайце над тым, што я сказаў".

Аляксандр Лукашэнка заклікаў усіх аб'яднацца на карысць інтарэсаў краіны і пабудовы паспяховай будучыні. "У вас ёсць дзеці. І ў мяне. Я хачу, каб яны жылі ў свабоднай, незалежнай краіне. Хопіць ужо на нас ездзіць, быць у лапцях і пад бізуном. Давайце як-небудзь мы станем разам і абаронім (краіну. - Заўвага)", - сказаў Кіраўнік дзяржавы.

У час размовы была ўзнята тэма акумулятарнага завода ў Брэсце. "Мы прынялі рашэнне. Няхай вырашаць жыхары. Па акумулятарным як вырашыце, так і будзе. Я вам гэта гарантую і абяцаю. Я займу нейтральную пазіцыю, арганізую рэферэндум. А вы, толькі без гвалту, шуму. Вызначым месца, будзеце зваць людзей, дэбатаваць. Як на выбарах", - сказаў Кіраўнік дзяржавы.

"Самы вялікі экалагічны прыхільнік у вас - гэта Прэзідэнт Беларусі. Для мяне гэта святое. Нават я, з'яўляючыся Прэзідэнтам, дрыжу за кожнае дрэўца", - дадаў беларускі лідар.

У ліку ўдзельнікаў сустрэчы быў мясцовы экаактывіст Дзмітрый Бекалюк. Ён згадзіўся з прапановай Кіраўніка дзяржавы аб правядзенні рэферэндуму. "Калі, як вы сказалі, гэты рэферэндум адбудзецца, брастаўчане толькі будуць удзячныя", - заявіў ён.

"У гэтым можаш не сумнявацца. Гэта непасрэдныя паўнамоцтвы Прэзідэнта - арганізаваць рэферэндум у любой кропцы краіны", - адказаў беларускі лідар.

Аляксандр Лукашэнка паабяцаў асабіста пабываць на акумулятарным заводзе. "Абавязкова пабуду на гэтым заводзе", - запэўніў ён.

Кіраўнік дзяржавы падкрэсліў, што яму вельмі важна паглядзець, як брастаўчане прымуць рашэнне. Пры гэтым ён запэўніў, што ў яго абсалютна нейтральная пазіцыя. З аднаго боку, завод патрэбны, ёсць рынкі збыту. Больш таго, гэта імпартазамяшчэнне - адзін з асноўных напрамкаў работы ў будучай пяцігодцы. "Можа, яны створаць новыя акумулятары для электрамабіляў, якімі я балею. І хачу, каб вы перамяшчаліся. Увесь свет ужо на гэта сарыентаваны", - выказаў меркаванне Кіраўнік дзяржавы.

З другога боку, калі людзі вырашаць, што завод не патрэбны або яго трэба некуды перанесці, то, паводле слоў Аляксандра Лукашэнкі, гэта не катастрофа. "Хутчэй за ўсё, мы знойдзем недзе месца, дзе можна пабудаваць, яшчэ экалагічна праштудзіраваць гэты завод, падчысціць, паглядзім, што за абсталяванне", - сказаў ён.

Што датычыцца рэферэндуму, Прэзідэнт паабяцаў, што ўсё будзе праведзена абсалютна адкрыта і празрыста.

Па тэрмінах Аляксандр Лукашэнка прапанаваў правесці мясцовы рэферэндум пасля прэзідэнцкіх выбараў ужо. "Пасля выбараў. Збяром хлеб, ураджай - і правядзём. Я з задавальненнем запішу сабе некалькі ачкоў, што ўнёс гэту прапанову на рэферэндум у Брэсце. І як народ вырашыць, так і будзе. Хутчэй за ўсё, калі гаспадары не растлумачаць, што адбываецца там, будуць (жыхары горада. - Заўвага) за тое, каб яго некуды перанесці. Вельмі складана будзе ў кампактнай Беларусі некуды перанесці гэты завод. Хутчэй за ўсё, яго трэба будзе закрываць, але, можа, недзе знойдзем", - рэзюмаваў беларускі лідар.

Астатнія ўдзельнікі сустрэчы, дзе прысутнічалі і прадстаўнікі брэсцкай апазіцыі, таксама падтрымалі гэта рашэнне.

У цэлым размова атрымалася вельмі канструктыўная, на памяць Кіраўніка дзяржавы папрасілі зрабіць некалькі памятных сэлфі і фатаграфій.