Сустрэча са Старшынёй Калегіі Еўразійскай эканамічнай камісіі Міхаілам Мясніковічам

Вакол Еўразійскага эканамічнага саюза складваецца вельмі сур'ёзная абстаноўка, ідзе эканамічная вайна. Аб гэтым Прэзідэнт Беларусі Аляксандр Лукашэнка заявіў 30 лістапада на сустрэчы са Старшынёй Калегіі Еўразійскай эканамічнай камісіі Міхаілам Мясніковічам.

Кіраўнік дзяржавы адзначыў, што на 11 снежня намечана пасяджэнне Вышэйшага Еўразійскага эканамічнага савета. "Парадак дня вызначаны. Вы ведаеце маю пазіцыю, ды і Беларусі наогул. Нам пара сустрэцца б сам-насам (не па тэлевізары, а пагаварыць адкрыта), таму што мноства праблем: ад ваенных, ваенна-палітычных да эканамічных, - сказаў Аляксандр Лукашэнка. - Тым больш вельмі цяжкі год. Такога, напэўна, і вы не помніце. Але ці тое яшчэ будзе".

Прэзідэнт заявіў, што сусветная эканоміка ў гэтым годзе абвалілася, крызіс закрануў і прасторы ЕАЭС. "Выхад з гэтай сітуацыі будзе вельмі цяжкі. Тым больш пачалося проціборства, фактычна ідзе непрыкрытая эканамічная вайна з пераходам на не проста дыпламатычную або ў сродках масавай інфармацыі, але ўжо і гарачым запахла. Я прыводзіў зусім нядаўна гэтыя факты: замашкі асобных нашых суседзяў пад прыкрыццём асобных неслабых дзяржаў і іх мэты. Таму вельмі сур'ёзная абстаноўка вакол, і нам абмеркаваць бы гэтыя праблемы сам-насам (з лідарамі краін ЕАЭС. - Заўвага)", - падкрэсліў Кіраўнік дзяржавы.

Аляксандр Лукашэнка выказаў меркаванне, што, магчыма, у канцы года кіраўнікі дзяржаў змогуць сустрэцца ў вочным фармаце. Раней такія перагаворы праходзілі ў Маскве або Санкт-Пецярбургу. Мінск таксама гатовы прадаставіць сваю пляцоўку. "Няважна дзе, але пара вельмі сур'ёзна абмеркаваць тыя праблемы, якія паўстаюць перад намі", - звярнуў ён увагу.

Усяго парадак дня маючага адбыцца саміту будзе ўключаць 28 пытанняў, прычым 4 з іх лідары ЕАЭС разгледзяць у вузкім складзе. "Мы традыцыйна настойваем на тым, каб няўхільна, без зацягванняў і ўсякай бюракрытыі мы вырашалі тыя пытанні, якія запланавалі. Тым больш сітуацыя такая, што, як Пуцін заўсёды падкрэслівае, трэба быць разам. Разам прасцей пераадолець усякія цяжкасці. Трэба гэтым шляхам і ісці", - перакананы Прэзідэнт.

Адно з асноўных пытанняў - стратэгія напрамкаў развіцця еўразійскай інтэграцыі да 2025 года. "Мы дамаўляліся аб тым, што нарэшце вырашым праблему адзіных рынкаў, перш за ўсё прыроднага газу. Адзінае пытанне, якое не ўзгоднена, - гэта справядлівая цана на тарыфы па транспарціроўцы газу. Гэта важна для нас і для іншых. Ёсць пытанне аб увозе на тэрыторыю саюза грамадзянскіх самалётаў. Казахстан прапануе. І той жа Казахстан прапануе пытанне кадравае. Хацелася б пачуць ваша меркаванне ў сувязі з гэтым, якую пазіцыю магла б заняць Беларусь у гэтым плане", - дадаў Кіраўнік дзяржавы.