Нарада аб процідзеянні санкцыйным мерам

Выкарыстанне санкцый для націску на суверэнную дзяржаву - гэта беззаконнасць і шантаж у міжнародным маштабе. Аб гэтым Прэзідэнт Беларусі Аляксандр Лукашэнка заявіў 6 ліпеня на нарадзе аб процідзеянні санкцыйным мерам.

"Як мы з вамі і дамаўляліся, сёння абмяркуем пытанні рэагавання на абмежавальныя меры калектыўнага Захаду ў адносінах да нашай краіны. Мы павінны выпрацаваць стратэгію, якая дасць магчымасць мінімізаваць іх эфект і прадоўжыць сваё развіццё. Я ўжо гаварыў: ніякіх размоў аб тым, што мы можам недзе недабраць, скараціць тэмпы, той прырост нашай эканомікі, які склаўся за першае паўгоддзе. Аб гэтым размовы быць не можа. Чаго б нам ні каштавала, мы павінны гэта вытрымаць. Ідзе вайна", - падкрэсліў Аляксандр Лукашэнка.

Кіраўнік дзяржавы адзначыў, што тэма санкцый прадаўжае заставацца галоўнай інфападставай і для медыйных праектаў, і для прыняцця розных палітычных дэкларацый і прававых актаў. "Хоць да прававой сістэмы гэтыя рашэнні ніякіх адносін не маюць. Па сутнасці, выкарыстанне абмежавальных мер у якасці інструмента націску на суверэнную дзяржаву - гэта беззаконнасць і шантаж у міжнародным маштабе. Шантаж, які, нагадаю, у дакументах ААН і іншых міжнародных арганізацый асуджаецца як недапушчальная мера", - звярнуў увагу Прэзідэнт.

"Тое, што чарговы пакет санкцый у адносінах да Беларусі быў уведзены ў дзень 80-годдзя пачатку Вялікай Айчыннай вайны, разуменню не можа паддавацца. Але тлумачыцца тым, што "дэмакратычнай" і выступаючай за вяршэнства закону Еўропе напляваць і на народ, які больш за ўсё пацярпеў ад варварскага і бесчалавечнага нашэсця ў свой час еўрапейскага фашызму, і на захаванне хоць нейкіх правіл прыстойнасці. Усё зразумела: яны пачалі новы паход на Усход, - заявіў Аляксандр Лукашэнка. - Не трэба шмат доказаў для гэтага. Санкцыі ўведзены не толькі супраць нас, але і яшчэ больш маштабныя, больш адчувальныя санкцыі - супраць Расійскай Федэрацыі".

Паводле слоў Кіраўніка дзяржавы, гісторыя з пасадкай у Мінску самалёта кампаніі Ryanair толькі фармальная прычына для санкцый. "Толькі лянівы ўжо не робіць такі вывад", - дадаў Прэзідэнт.

Кіраўнік дзяржавы падкрэсліў, што пытанне зусім не ў пасадцы борта Ryanair у Мінску або неадпаведнасці беларускай дзяржаўнай сістэмы заходнім узорам. "Бачыце, тут "дыктатура". Усе гэтыя "перамены" задумваліся з адной мэтай: расчысціць поле для свайго бізнесу. Такое мы ўжо назіралі ў нашых паўднёвых суседзяў - украінцаў. Знішчылі ва Украіне ўсю вытворчасць, нават сельскагаспадарчую. Там жа "залатыя" землі ва Украіне - усё зраўнялі з гэтай зямлёй, знішчылі. Тое ж хочуць і ў нас. Ім не патрэбна канкурэнцыя. Гэта адна з прычын накату на Беларусь. І ўсе ведаюць, што за санкцыямі стаяць канкрэтныя карпарацыі, якія фінансуюць палітычныя інтарэсы шэрага заходніх дзеячаў, многія з гэтых карпарацый маюць крымінальнае мінулае, як і гэтыя палітычныя дзеячы", - заўважыў Аляксандр Лукашэнка.

Паводле яго слоў, сёння заходнія палітыкі з высокіх еўрапейскіх трыбун заклікаюць пакончыць з уладай і народам Беларусі, а з краіны зрабіць сыравінны прыдатак Еўропы. "Але яны не гавораць, што фактычна санкцыі ж не супраць беларускай улады, а супраць народа, у першую чаргу рабочых людзей. Мэта - пазбавіць іх даходаў, выкінуць на вуліцу. Фактычна гэта карная аперацыя на сучасны манер", - заявіў Кіраўнік дзяржавы.

"Тыя, хто выбраў Беларусь у якасці геапалітычнай мішэні, забылі, што маюць справу з народам, які шмат чаго перажыў, але ніколі не стаяў на каленях і не прасіў літасці. І мы стаяць на каленях не будзем, ды і прычын для гэтага і нават зачэпкі няма. Наш народ заўсёды змагаўся за праўду і справядлівасць. Мы не станем разменнай манетай і будзем усімі магчымымі спосабамі адстойваць свой суверэнітэт", - падкрэсліў Аляксандр Лукашэнка.

Прэзідэнт звярнуў увагу, што менавіта такімі прынцыпамі ў рабоце павінны кіравацца ўсе ўдзельнікі нарады.

"Для нас галоўнае - зрабіць так, каб не пацярпеў беларускі народ, - падкрэсліў беларускі лідар. - Задача Урада - прадугледзець дзейсныя меры для кампенсацыі страт і захавання рабочых месцаў". Прэзідэнт запатрабаваў далажыць аб тым, як будуць абаронены айчынныя прадпрыемствы, за кошт чаго забяспечана імпартазамяшчэнне і як будзе прастымуляваны ўнутраны попыт.

Аляксандр Лукашэнка адзначыў, што продажы на еўрапейскі рынак айчыннай прадукцыі ніколі не былі вялікімі, асабліва ў тых прадпрыемстваў, супраць якіх уведзены санкцыі: БелАЗ, МАЗ і гэтак далей. "Мы закуплялі там некаторыя камплектуючыя. Толькі ў Еўрапейскім саюзе вырабляюць гэтыя камплектуючыя? Не. Яны вырабляюцца і на прасторах былога Савецкага Саюза, у Кітайскай Народнай Рэспубліцы, іншых краінах. Трэба проста варушыцца і пераарыентавацца", - лічыць Прэзідэнт.

Што датычыцца асобных еўрапейскіх вытворцаў, якія пастаўляюць сваю прадукцыю на беларускі рынак, то Прэзідэнт нагадаў пра ўжо існуючы вопыт абмежавання продажаў асобных кампаній у нашай краіне.

"Мы ведаем, хто ў ЗША, Германіі і іншых, асабліва еўрапейскіх, краінах выступіў супраць паставак камплектуючых і асноўных вузлоў для нашых прадпрыемстваў. Мы іх ведаем. У нас ёсць вопыт. Помніце, "Шкода", "Нівея" і гэтак далей? Мы ім сказалі: дзякуй, да пабачэння. Першае: на беларускі рынак - ні кроку, другое: праз Беларусь - таксама ні кроку, - сказаў Кіраўнік дзяржавы. - Гэтак жа трэба рабіць і з немцамі. Няхай цераз Фінляндыю ў Кітай і Расію пастаўляюць сваю прадукцыю. Або цераз Украіну (там добрыя дарогі) няхай едуць і пастаўляюць туды".

"Інакш кажучы, трэба прыняць усе меры, каб яны адчулі, што такое Беларусь. І, перш, чым брацца за эканамічную зброю, думалі", - падкрэсліў беларускі лідар.

"Ураду і Нацыянальнаму банку неабходна ўважліва паглядзець на заходнія кампаніі, якія вядуць свой бізнес у нашай краіне. Тыя з іх, хто адказна ставіцца, разумее нас - калі ласка, будзем з вамі супрацоўнічаць. Але калі нехта нас не разумее і разгарнуў барацьбу супраць беларускай дзяржавы, вы ведаеце, як да іх адносіцца", - сказаў Аляксандр Лукашэнка.

Кіраўнік дзяржавы адзначыў, што Беларусь заўсёды адказна ставілася да выканання сваіх абавязацельстваў у галіне ядзернага нераспаўсюджвання, барацьбы з нелегальнай міграцыяй, кантрабандай, міжнароднай арганізаванай злачыннасцю. "Сёння мы гэтым займаемся, але роўна настолькі, наколькі гэта неабходна, выгадна нашай краіне і фінансава магчыма", - падкрэсліў Аляксандр Лукашэнка.

"Вы паглядзіце, нашы суседзі ўзвылі (перш за ўсё Літва і іншыя там): ах, беларусы, ах, ледзь ці не Лукашэнка на плячах носіць мігрантаў на тэрыторыю Літвы. А ўчора або пазаўчора заявілі аб тым, што скароцяць рэгістрацыю тых, хто прыбывае з Беларусі (размова аб скарачэнні тэрмінаў разгляду прашэнняў аб прадастаўленні прыстанішча. - Заўвага). Каму гэта сігнал? Калі вы заяўляеце на ўвесь свет, што вы яшчэ хутчэй будзеце рэгістраваць тых, хто бяжыць цераз Беларусь, яны і будуць бегчы. Вы яшчэ больш адкрываеце акно для гэтых мігрантаў", - звярнуў увагу беларускі лідар.

Прэзідэнт заявіў, што Беларусь займалася і прадоўжыць займацца асноўнымі выклікамі на граніцы. "Але калі нехта думае, што мы цяпер закрыем граніцу з Польшчай, Літвой, Латвіяй і Украінай і ператворымся ў адстойнік збеглых з Афганістана, Ірана, Ірака, Лівіі, Сірыі, Туніса, то ён проста памыляецца як мінімум. Мы ніколі не будзем  нікога трымаць: яны ж не да нас ідуць. Яны ідуць у прагрэсіўную, цёплую, утульную Еўропу, - заўважыў Кіраўнік дзяржавы. - Еўропа (там не хапае рабочых рук) паклікала гэтых людзей, з аднаго боку. А па-другое, яны ж разбурылі гэтыя краіны. Яны фактычна знішчылі Афганістан і вывелі адтуль войскі. Вы ж бачыце, што там адбываецца: цяпер ужо нашы цэнтральна-азіяцкія рэспублікі былога Савецкага Саюза ледзь стрымліваюць гэты паток. Гэта значыць з'явіліся бежанцы".

"МЗС і наш Урад папракаюць у тым, што мы адмаўляемся выконваць палажэнні нашага дагавора аб рэадмісіі. Яны хочуць ператварыць Беларусь у адстойнік: туды забеглі людзі, ратуючыся ад гора, няшчасця і вайны, і яны хочуць, каб мы іх забіралі і тут размяшчалі ў "канцлагеры". Гэтага не будзе пасля той палітыкі, якую вы праводзіце ў адносінах да Беларусі і Расіі. Людзі бягуць ад вайны і бягуць туды, куды іх запрасілі. Еўрапейскі саюз жа і льготы ўвёў адпаведныя для тых, хто туды прыбывае", - дадаў Прэзідэнт.

"Разлічваю пачуць прапановы Міністэрства замежных спраў аб тым, як будзем выбудоўваць адносіны з краінамі, якія сёння з усіх сіл носяцца з заклікамі "даціскаць" Беларусь. МЗС трэба больш актыўна рэагаваць на любыя недружалюбныя праяўленні ў адносінах да Беларусі. Якія меры ў адказ плануюцца ў выпадку далейшага закручвання санкцыйнай спіралі? Давайце падумаем", - сказаў беларускі лідар.

Прэзідэнт таксама пацікавіўся работай дыпламатаў у міжнародных арганізацыях па процідзеянні санкцыйнаму націску, а таксама ў міжнародных судовых інстанцыях. "Шчыра кажучы, складваецца ўражанне, што нашы дыпламаты сядзяць там у норах і баяцца высунуць свой нос, - заўважыў Аляксандр Лукашэнка. - Я ўжо гаварыў, мноства міжнародных судоў. Чаму мы не звяртаемся ў гэтыя суды, а калі звяртаемся, чаму наша грамадства гэтага не ведае?"

"Мы не былі зацікаўлены ў такім развіцці дыпламатычных адносін з дзяржавамі заходняга рэгіёна. І не нам паварочваць гэту гісторыю назад. Але жыццё на гэтым не заканчваецца. На шчасце, сучасны свет значна шырэйшы, чым межы Еўрапейскага саюза, - звярнуў увагу Кіраўнік дзяржавы. - У нас не такая вялікая эканоміка, каб перажываць наконт гэтых санкцый. Мы можам прадаць лішкі, якія ў нас ёсць, у астатняй частцы свету".

Ён звярнуў увагу на наяўнасць значных рэзерваў у гандлі з Расіяй, вялікі патэнцыял у Азіі, перш за ўсё ў Кітаі, В'етнаме, Індыі і Пакістане, а таксама ў Афрыцы, Лацінскай Амерыцы, краінах Персідскага заліва і на Блізкім Усходзе.

"Гэта эканомікі, якія дынамічна растуць, плацежаздольныя рынкі, якія складаюць рэальную канкурэнцыю сённяшнім звышдзяржавам і не прад'яўляюць нам прэтэнзій, не вучаць жыць. Трэба актыўней ісці туды, дзе нас чакаюць і гатовы весці паважлівы дыялог", - перакананы беларускі лідар.