Правядзенне сумеснай з Расіяй трэніроўкі ядзерных сіл

Прэзідэнт Беларусі Аляксандр Лукашэнка 21 мая наведаў ракетную брыгаду Узброеных Сіл у Асіповіцкім раёне.

Кіраўніку дзяржавы далажылі аб задуме правядзення трэніроўкі з воінскімі часцямі баявога прымянення ядзернай зброі і ядзернага забеспячэння. Адпрацоўка адпаведных мерапрыемстваў праводзіцца ва ўзаемадзеянні з расійскім бокам.

Аляксандр Лукашэнка агледзеў парк тэхнікі ракетнай брыгады, наведаў камандны пункт камандзіра. Прэзідэнту прадэманстравалі пускавую ўстаноўку "Іскандэр-М" і нанясенне ўмоўнага ракетнага ядзернага ўдару (электроннага пуску). Гэта значыць, усе дзеянні былі праведзены так, як гэта было б у рэальнай баявой абстаноўцы. З адзіным важным нюансам - непасрэдна запуску ракеты не было.

Кіраўнік дзяржавы пагутарыў з разлікам пускавой устаноўкі, яшчэ раз падкрэсліўшы важнасць якаснай падрыхтоўкі асабовага складу, камандзіраў і афіцэраў.

"Некалі я аб гэтай машыне марыў. А сёння яна ў нас не адна. І вы лепш за мяне ведаеце, што гэта добрая зброя", - сказаў Прэзідэнт.

У ходзе правядзення сумеснай трэніроўкі з воінскімі часцямі баявога прымянення ядзернай зброі і ядзернага забеспячэння прэзідэнты Беларусі і Расіі Аляксандр Лукашэнка і Уладзімір Пуцін звязаліся па відэа-канферэнц-сувязі.

"Сапраўды, гэта першая такая сумесная трэніроўка. Але па элементах, па складніках, аказваецца, нашы генеральныя штабы, міністры абароны праводзяць яе штоквартальна. Але без нас (прэзідэнтаў. - Заўвага). Мы з вамі яшчэ зімой абмяркоўвалі перспектыву ўдзелу прэзідэнтаў, - сказаў Аляксандр Лукашэнка. - Я вас абсалютна падтрымліваю, мы нікому абсалютна не пагражаем. Але ў нас ёсць такая зброя, і мы гатовы ўсяляк абараняць нашу сумесную Айчыну ад Брэста да Уладзівастока. Калі нешта ёсць у нашых руках, мы павінны ўмець гэтым карыстацца".

"Я, Уладзімір Уладзіміравіч, аб'ехаў усе аб'екты навокал, паглядзеў у Беларусі - на ўсходзе, у цэнтры - усе знаходзяцца ў добрым стане. Тут знаходзяцца генералы расійскія, з якімі я размаўляў. Яны задаволены сумеснай нашай работай", - заявіў беларускі лідар.

"Думаю, што запланаваныя мерапрыемствы пройдуць нармальна. Зразумела, той, хто нешта хоча ўбачыць у гэтым, той убачыць. Але гэта наша справа, мы займаемся законнай справай і будзем гэтым займацца, абараняючы жыццё нашых людзей", - дадаў Аляксандр Лукашэнка.

Прэзідэнт таксама прывітаў усіх ваеннаслужачых, генералаў, хто ўдзельнічае ў трэніроўцы. А Уладзіміра Пуціна павіншаваў з паспяховым візітам у Кітай.

У сваю чаргу Уладзімір Пуцін у сваім уступным слове адзначыў, што гэта такая першая сумесная трэніроўка армій Расіі і Беларусі па кіраванні стратэгічнымі і тактычнымі ядзернымі сіламі. Ён падкрэсліў, што выкарыстанне такой зброі можа быць толькі крайняй выключнай мерай забеспячэння нацыянальнай бяспекі дзвюх дзяржаў. "Разам з тым, улічваючы рост напружанасці ў свеце, з'яўленне новых пагроз і рызык, наша ядзерная трыяда, як і раней, павінна служыць надзейным гарантам суверэнітэту саюзнай дзяржавы Расіі і Беларусі, забяспечыць вырашэнне задач стратэгічнага стрымлівання, падтрымання ядзернага парытэту і балансу сіл на глабальным узроўні", - сказаў Прэзідэнт Расіі.

Паводле яго слоў, у ходзе сумеснай трэніроўкі трэба было адпрацаваць шырокае кола задач, перш за ўсё дзеянні службовых асоб па кіраванні і ўзаемадзеянні пры прымяненні ядзернай зброі, у тым ліку размешчанай на тэрыторыі Беларусі. Таксама трэба было правесці практычныя пускі балістычных і крылатых ракет.

На завяршэнне Прэзідэнт Беларусі адказаў на пытанні журналістаў. Ён заявіў, што задаволены вынікамі сумеснай з Расіяй трэніроўкі ядзерных сіл.

"Арганізацыйная частка прайшла без усялякіх збояў. Разумна, талкова, арганізавана. Узаемадзеянне паміж Генеральным штабам Беларусі і Генштабам Расійскай Федэрацыі наладжана. Усё прайшло арганізацыйна добра, - сказаў Кіраўнік дзяржавы. - Гэта верхняя частка айсберга, якую вы бачылі. А да гэтага прайшлі вельмі сур'ёзныя падрыхтоўчыя мерапрыемствы, якія нашы ваеннаслужачыя ўмеюць рабіць і арганізоўваць".

Прэзідэнт Беларусі адзначыў, што яшчэ мінулай зімой дамовіўся з Прэзідэнтам Расіі Уладзімірам Пуціным, што яны прымуць удзел у трэніроўках ядзерных сіл арыенціровачна ў канцы мая. Размова ішла як аб зброі, размешчанай на тэрыторыі Беларусі, так і аб расійскай ядзернай трыядзе. "Гэта даўно запланаванае мерапрыемства. Мы не адступілі ні на суткі ад гэтых тэрмінаў. І Прэзідэнт Расіі, нягледзячы на тое, што позна ўвечары або ноччу вярнуўся з Кітая, удзельнічаў у гэтых трэніроўках, таму што так было дамоўлена", - падкрэсліў беларускі лідар.

Аляксандр Лукашэнка звярнуў увагу і на маштаб трэніроўкі. Паводле яго слоў, у ёй былі задзейнічаны тысячы чалавек і вялікая колькасць тэхнікі - як у Беларусі, так і ў Расіі.

Што датычыцца вынікаў пускаў на тэрыторыі Расіі з удзелам беларускіх ваеннаслужачых, атрыманыя вынікі сведчаць аб дакладным паражэнні цэлей. Кіраўнік дзяржавы таксама адзначыў, што ўдары наносіліся з ракетных комплексаў "Іскандэр" расійскай вытворчасці. "Папалі ў капейку. Вельмі дакладнае было паражэнне. Гэта сведчыць аб тым, што нашы хлопцы вельмі хутка асвоілі гэтыя перспектыўныя комплексы і ўмеюць з імі працаваць", - заявіў Аляксандр Лукашэнка.

У сувязі з гэтым Прэзідэнт выказаўся аб развіцці такога напрамку, як ракетабудаванне на прыкладзе айчыннай рэактыўнай сістэмы залпавага агню "Паланэз". "Мы ўдасканальваем нашы "Паланэзы". Хоць зусім нядаўна, здавалася б, мы ўзялі іх на ўзбраенне. Вырабілі ў сябе да гэтага часу гэтыя комплексы і ўдасканальваем тую ракету, якую мы калісьці стваралі з нашымі сябрамі з Кітайскай Народнай Рэспублікі. Работы ідуць як з Кітаем, так і з Расіяй", - заявіў ён.

Кіраўнік дзяржавы асобна спыніўся на ўмовах захоўвання самай перадавой зброі: "Былі і расійскія генералы, якія з зайздрасцю глядзелі на тое, як мы захоўваем не толькі боепрыпасы, але і нашы пускавыя ўстаноўкі, якія паступілі да нас з Расійскай Федэрацыі".

Адно з пытанняў Кіраўніку дзяржавы датычылася нервовай рэакцыі Захаду на гэту трэніроўку, якую можна назваць "ядзернай істэрыяй". Прэзідэнта спыталі, які быў сапраўдны пасыл пры арганізацыі і правядзенні трэніроўкі.

"Мы ні з кім не збіраемся ваяваць, калі нас ніхто не будзе чапаць. Нікому не пагражаем. Ні ў якім разе. Але калі не дай бог... Мы цырымоніцца не будзем", - падкрэсліў беларускі лідар.

Паводле яго слоў, у Беларусі бачаць нервовую рэакцыю Захаду на правядзенне сумеснай з Расіяй трэніроўкі ядзерных сіл. У прыватнасці, Міністр абароны дакладваў Кіраўніку беларускай дзяржавы аб лятальных апаратах, самалётах войскаў НАТА, якія баражыруюць уздоўж граніц Беларусі і вельмі ўважліва назіраюць, што там адбываецца. Беларусь у сваю чаргу таксама назірае за сітуацыяй у суседніх краінах на пэўную глыбіню. Для гэтага ёсць адпаведныя сродкі выяўлення і назірання, прычым, як падкрэсліў Аляксандр Лукашэнка, самыя перадавыя, якія выкарыстоўваюцца ў тым ліку ва ўзаемадзеянні з Расіяй. "Таму мы таксама бачым, што там адбывалася", - звярнуў увагу Кіраўнік дзяржавы.

"Гэта іх істэрыя зразумелая. Але дарэмная", - адзначыў Прэзідэнт, выказаўшы ўпэўненасць, што ў хуткім часе "ўсё супакоіцца і вернецца на кругі свая". Паколькі такія мерапрыемствы праводзяцца генеральнымі штабамі бакоў штоквартальна. "Таму шалець не трэба", - заўважыў у адрас краін Захаду беларускі лідар.

Магчыма, такая рэакцыя звязана з удзелам у трэніроўцы прэзідэнтаў Беларусі і Расіі, выказаў меркаванне Аляксандр Лукашэнка. "Напэўна, перажываюць наконт таго, што ў гэтых вучэннях прымаюць удзел прэзідэнты. Калі хочаце, гэта сігнал. Гэта сігнал таго, што мы маем самую сучасную зброю і ўмеем ёю карыстацца", - сказаў ён. Лагічна, што для выпрацоўкі навыкаў выкарыстання ядзернай зброі, авалодвання ёю ў дасканаласці неабходна праводзіць трэніроўкі. Так робяць усе дзяржавы, якія маюць на ўзбраенні ядзерную зброю. "У адваротным выпадку, навошта гэта зброя, калі ёю не ўмець карыстацца? А каб умець, трэба трэніравацца. Усё вельмі проста", - канстатаваў ён.

Прэзідэнт звярнуў увагу, што ў мерапрыемствах, якія праводзяцца, няма нічога асабліва новага. Акрамя таго, Аляксандр Лукашэнка не раз публічна заяўляў: "Мы рыхтуемся да вайны". "Не будзе гэтай вайны - ну і дзякуй богу, што яе не будзе. Мы не хочам гэтай вайны. Але мы помнім урокі 1939-1941 гадоў. Вы помніце, што аж да Масквы фашысты дайшлі. Чаму? Таму што адны верылі, што вайна пачнецца, а другія сумняваліся, думалі, што гэта дэзынфармацыя. Таму на ўсякі выпадак мы рыхтуемся па поўнай праграме. А ўжо будзе вайна ці не - гэта не ад нас залежыць", - сказаў Кіраўнік дзяржавы.

"Ціхая, спакойная, прыгожая, зялёная краіна, як вы бачыце. Мы гатовы і далей так жыць. Але калі будзе ажыццёўлена агрэсія... Тыя, хто служыць, яны павінны першымі стаць на абарону таго, што мы сёння маем, абараніць нашых жанчын, любімых, дзяцей, унукаў і нашу краіну, такую зялёную і прыгожую", - падкрэсліў Аляксандр Лукашэнка.

Каменціруючы заявы і пагрозы з боку Уладзіміра Зяленскага, Кіраўнік дзяржавы заявіў, што Беларусь, калі ў дачыненні да яе не будзе ўчынена агрэсіі, не мае намеру ўцягвацца ў вайну з Украінай.

"Што датычыцца яго заяў, што Беларусь будзе ўцягнута ў вайну, я толькі што сказаў: будзе ўцягнута толькі ў адным выпадку - калі на нашу тэрыторыю будзе ажыццёўлена агрэсія. І тут ужо не ўцягнута (вы чулі з вуснаў Прэзідэнта Расіі) - мы будзем разам абараняць нашу Айчыну ад Брэста да Уладзівастока, дзе размешчаны дзве дзяржавы, - сказаў Аляксандр Лукашэнка. - Таму калі і будзем мы ўцягнуты ў вайну, у тым ліку калі гэта будзе супраць Украіны, толькі ў адным выпадку - калі яны ўчыняць супраць нас агрэсію. Мы ўцягвацца ў вайну ва Украіне не збіраемся. У гэтым няма ніякай неабходнасці. Ні грамадзянскай, ні ваеннай".

"Калі ён (Уладзімір Зяленскі. - Заўвага) хоча аб нечым пагаварыць, параіцца або яшчэ штосьці - калі ласка, мы адкрыты для гэтага. У любой кропцы - Украіны, Беларусі - я гатовы з ім сустрэцца і абмеркаваць праблемы беларуска-ўкраінскіх адносін. І, можа, пагаварыць аб перспектывах. Чамусьці з амерыканцамі, немцамі, палякамі, літоўцамі і латышамі ў нас ёсць аб чым размаўляць, а з Украінай - няма аб чым…" - сказаў Аляксандр Лукашэнка.

Аляксандр Лукашэнка адзначыў, што калі чуе з Кіева і ад Уладзіміра Зяленскага пэўныя заявы, думае над пытаннем, навошта гэта робіцца: "Ён што, хоча ваяваць з Беларуссю? З Расіяй і Беларуссю? Упэўнены, што не. Я ведаю меркаванне ваенных украінскіх. Ім дадатковы фронт не патрэбны. Тады паўстае пытанне: навошта нас шантажыраваць і ажыццяўляць эскалацыю ў беларускім напрамку? Па-першае, падштурхоўваюць еўрапейцы. Яны бачаць, што мы з амерыканцамі вядзём пэўны дыялог. Ім гэта не ўсім падабаецца. Таму вось так вось спрабуюць падштурхнуць Зяленскага. Валодзю Зяленскаму давялося нешта гаварыць. Далей яму, відаць, спадабалася гэта гаварыць. Мы таксама не рэагуем. А яму хочацца, каб мы рэагавалі".

"Я не перажываю за тое, што яны нашых збеглых туды цягаюць ва Украіну і з імі спрабуюць неяк устанавіць адносіны. Гэта такі элемент шантажу і запалохвання. Вы ж разумееце, гэта не для мяне. Я на шантаж і запалохванне навучыўся рэагаваць", - дадаў Кіраўнік дзяржавы.

Аляксандр Лукашэнка падкрэсліў, што ў Беларусі ведаюць галоўнае: "Украінскі народ вайны з беларускім народам не хоча. І мы будзем усё рабіць для таго, каб гэтай вайны не было. З нашага боку вы можаце быць жалезабетонна ўпэўнены, што ўцягвацца ў вайну з Украінай мы не збіраемся, мы не маем намеру. Але мы бачым сітуацыю, нашы Узброеныя Сілы выведзены з месцаў пастаяннай дыслакацыі. Трэба гэта нам? Ну, трэніруюцца ваенныя. Але лепш бы яны былі ў казармах. Спакойна, ціха, па распарадку. Але даводзіцца дзяжурыць. Такі лёс наш".

Прэзідэнт таксама адзначыў, што цяпер вайна "на перадавой" ідзе ў СМІ. "Я вас запэўніваю, што ніякага ў нас жадання і такой неабходнасці сёння няма - ваяваць з нашымі суседзямі перш за ўсё", - сказаў Кіраўнік дзяржавы журналістам.

Аляксандр Лукашэнка расказаў, што аналагічныя запэўненні зрабіў і шэрагу замежных гасцей. "Мы не ўсё паказваем. Нядаўна тут пабывалі вельмі высокапастаўленыя людзі з далёкіх краін. Яны нас разумеюць і ў прынцыпе падтрымліваюць нашу пазіцыю. Я ім таксама сказаў: хлопцы, вы не хвалюйцеся. Мы не збіраемся ні на немцаў, ні на англічан, ні на французаў нападаць. Мы будзем адказнымі людзьмі. Абсалютна ўпэўнены, такую пазіцыю займае і Прэзідэнт Расіі. Я ж добра гэта ведаю", - адзначыў Кіраўнік дзяржавы.

Адказваючы на пытанні прадстаўнікоў СМІ, Аляксандр Лукашэнка заявіў, што тэма арміі і забеспячэння бяспекі кожны дзень на стале ў Прэзідэнта Беларусі.

"Калі мы менш гаворым аб арміі цяпер, чым аб пасяўной кампаніі, гэта не значыць, што мы гэтым не займаемся. Кожны дзень, прынамсі ў мяне, гэта тэма на стале. І я разумею, што эканоміка і бяспека - сёння пытанні першараднай важнасці. Так будзе і далей. Таму жывіце спакойна, не перажывайце", - заявіў Прэзідэнт.

"Не дай бог нешта - вы бачылі ўжо ядзерную трэніроўку. Ніхто тут нічога думаць не будзе. Як толькі напалі на нас, як толькі ажыццявілі агрэсію, адразу атрымаюць адказ усімі відамі гарматы. У адваротным выпадку, навошта мы яе трымаем у сябе? Гэта адназначна. І гэта для нас вельмі важна. І ў гэтым напрамку будзем дзейнічаць, нікому не пагражаючы. Не чапайце нас - мы вас тым больш чапаць не збіраемся", - дадаў Аляксандр Лукашэнка.

Прэзідэнт таксама адзначыў, што яго насцярожвае факт, што за мяжой "пачалі вельмі інтэнсіўна крычаць аб тым, што заўтра Расія на іх нападзе". "Яны як быццам інфармацыйна рыхтуюць атаку на нас. Гэта мяне насцярожвае. Таму мы ўсяляк будзем да гэтага рыхтавацца. Міністр абароны мне сёння тры гадзіны дакладваў аб сітуацыі ў нашай арміі, пачынаючы ад сховішчаў боепрыпасаў, заканчваючы кадравымі пытаннямі", - сказаў ён.