Рабочы візіт у Азербайджан. Нефармальная сустрэча Аляксандра Лукашэнкі і Ільхама Аліева

Прэзідэнт Беларусі Аляксандр Лукашэнка ўвечары 13 красавіка прыбыў з візітам у Азербайджан. Самалёт беларускага лідара прызямліўся ў міжнародным аэрапорце Гейдар Аліеў.

Аляксандра Лукашэнку ў аэрапорце сустракала ўрадавая дэлегацыя Азербайджана і беларускія чыноўнікі, якія прыляцелі ў Баку напярэдадні. Пасля невялікага цырыманіялу Кіраўнік дзяржавы накіраваўся на сустрэчу з Прэзідэнтам Азербайджана Ільхамам Аліевым. У нефармальнай абстаноўцы кіраўнікі дзяржаў абмеркавалі асноўныя напрамкі беларуска-азербайджанскіх адносін і стратэгічныя пытанні двухбаковага супрацоўніцтва.

Афіцыйная частка перагавораў запланавана на сераду. Сустрэча прэзідэнтаў пройдзе ў палацы "Загульба", які з'яўляецца часткай рэзідэнцыі азербайджанскага лідара. Перагаворы кіраўнікоў дзяржаў пройдуць у вузкім і пашыраным складах з удзелам членаў дэлегацый. Асноўная ўвага будзе ўдзелена пашырэнню гандлёва-эканамічнага ўзаемадзеяння і напаўненню супрацоўніцтва новым зместам. Бакі разгледзяць пытанні прамысловай кааперацыі, рэалізацыю бягучых і перспектыўныя праекты ў галіне вытворчасці і паставак прадуктаў харчавання, перапрацоўкі сельскагаспадарчай прадукцыі. Закрануць і не менш актуальныя тэмы: супрацоўніцтва ў ахове здароўя, навукова-тэхнічнай, адукацыйнай і турыстычнай сферах.

Кіраўнікі дзяржаў таксама абмяняюцца меркаваннямі па актуальных пытаннях міжнароднага парадку дня.

Па выніках перагавораў чакаецца падпісанне двухбаковых дакументаў.