Аб прысуджэнні спецыяльнай прэміі Прэзідэнта Рэспублікі Беларусь

Кіраўнік дзяржавы Аляксандр Лукашэнка 19 снежня падпісаў Указ № 399 аб прысуджэнні спецыяльнай прэміі Прэзідэнта Беларусі "Беларускі спартыўны Алімп" 2023 года.

За значны ўклад у развіццё фізічнай культуры і спорту і актыўную дзейнасць па іх папулярызацыі, за развіццё фізкультурна-спартыўных традыцый, якія садзейнічаюць фарміраванню гарманічнай асобы, спецыяльная прэмія прысуджана Міхаілу Дваракову, Ванэсе Каладзінскай і Ганне Эйсмант. 

Загадчык кафедры веласіпеднага, канькабежнага і коннага спорту Беларускага дзяржаўнага ўніверсітэта фізічнай культуры Міхаіл Дваракоў працуе тут з 1974 года, а ўзначальвае кафедру - з 1992-га. Заслужаны трэнер БССР, ён падрыхтаваў траіх майстроў спорту міжнароднага класа і 15 майстроў спорту. З 1998 года Міхаіл Дваракоў працуе ў кіраўніцтве Беларускай федэрацыі веласіпеднага спорту. За гэты перыяд спартсмены нацыянальнай каманды па веласпорце неаднаразова станавіліся прызёрамі Алімпійскіх гульняў, пераможцамі і прызёрамі чэмпіянатаў свету і Еўропы. 

Інструктар па спорце вышэйшай кваліфікацыі спартыўнай каманды Міністэрства ўнутраных спраў, спартсмен-інструктар нацыянальнай каманды Беларусі па вольнай барацьбе Ванэса Каладзінская з'яўляецца заслужаным майстрам спорту, бронзавым прызёрам Алімпійскіх гульняў 2020 года, пераможцам і прызёрам чэмпіянатаў свету і Еўропы. Рашэннем Міжнароднай федэрацыі барацьбы яна прызнана лепшай спартсменкай свету 2017 года ў жаночай барацьбе. На чэмпіянаце свету 2023 года заваявала сярэбраны медаль і ліцэнзію на ўдзел у Алімпійскіх гульнях 2024 года. 

Спецыяльны карэспандэнт аддзела спартыўных навін галоўнай рэдакцыі Агенцтва тэлевізійных навін Нацыянальнай дзяржаўнай тэлерадыёкампаніі Беларусі Ганна Эйсмант працуе ў НДТРК з 2003 года. З'яўляецца вядучай папулярных спартыўных праграм "Дзень спорту", "Арэна", пастаянным аўтарам сюжэтаў і інтэрв'ю для праграм "Галоўны эфір", "Панарама", выпускаў навін. Яна таксама выступае як аўтар сцэнарыяў многіх фільмаў, спецыяльных рэпартажаў, праектаў аб спартыўных спаборніцтвах і спартсменах, як аўтар і вядучая дакументальнага серыяла "Жанчыны і спорт", праграмы "Між іншым" на тэлеканале "Беларусь 5". У якасці карэспандэнта асвятляла Алімпійскія, Еўрапейскія гульні, турніры Вялікага шлема і многія іншыя спаборніцтвы.