Аб аб'яўленні Падзякі Прэзідэнта Рэспублікі Беларусь

Кіраўнік дзяржавы Аляксандр Лукашэнка ўдастоіў высокіх узнагарод і Падзякі Прэзідэнта ўдзельнікаў і арганізатараў касмічнага палёту першага беларускага касманаўта ў суверэннай гісторыі краіны. Указы і распараджэнне былі падпісаны Прэзідэнтам. У адпаведнасці з імі ў тым ліку адзначаны заслугі прадстаўнікоў расійскага боку.

За значныя дасягненні ў сферы касмічнай дзейнасці, вялікі ўклад у навуковыя даследаванні, падрыхтоўку высокакваліфікаваных кадраў, умацаванне міжнароднага супрацоўніцтва ордэна Дружбы народаў удастоены генеральны дырэктар дзяржаўнай карпарацыі па касмічнай дзейнасці "Раскосмас" Юрый Барысаў; Падзяка Прэзідэнта Беларусі аб'яўлена выканаўчаму дырэктару па пілатуемых касмічных праграмах дзяржкарпарацыі "Раскосмас" Сяргею Крыкалёву, касманаўту-выпрабавальніку Навукова-даследчага выпрабавальнага цэнтра падрыхтоўкі касманаўтаў імя Ю.А.Гагарына Алегу Навіцкаму і начальніку гэтага цэнтра Максіму Харламаву.

За мужнасць, праяўленую пры ажыццяўленні касмічнага палёту, значны асабісты ўклад у асваенне космасу званне Героя Беларусі прысвоена касманаўту Марыне Васілеўскай.

Ордэнам Пашаны ўзнагароджаны Старшыня Прэзідыума Нацыянальнай акадэміі навук Беларусі Уладзімір Гусакоў, медалём "За працоўныя заслугі" - генеральны дырэктар авіякампаніі "Белавія" Ігар Чаргінец. Спецыяльныя лісты аб аб'яўленні Падзякі Прэзідэнта кіраўнік дзяржавы ўручыў касманаўту Настассі Лянковай і намесніку начальніка ўпраўлення аэракасмічнай дзейнасці НАН Беларусі Івану Бучу. Аляксандр Лукашэнка таксама ўручыў падзячныя пісьмы Прэзідэнта бацькам Марыны Васілеўскай і Настассі Лянковай.