Урачыстыя мерапрыемствы ў гонар Дня Перамогі

Прэзідэнт Беларусі Аляксандр Лукашэнка 9 мая па традыцыі прыняў удзел ва ўрачыстых мерапрыемствах у гонар Дня Перамогі. 

Кіраўнік дзяржавы ў Мінску ўсклаў вянок да манумента Перамогі. Для Прэзідэнта гэта штогадовая традыцыя - асабіста прымаць удзел у цырымоніі ўскладання. 

Да помніка таксама ляглі вянкі і кветкі ад кіраўнікоў органаў дзяржаўнага кіравання, Нацыянальнага сходу, судовага корпуса, сілавых структур, грамадскіх аб'яднанняў, дыпламатычнага корпуса, ветэранаў і духавенства.

Выступленне Прэзідэнта Беларусі А.Р.Лукашэнкі на цырымоніі ўскладання вянкоў і кветак да манумента Перамогі ў рамках патрыятычнай акцыі "Беларусь памятае!":

Дарагія суайчыннікі, госці Беларусі! Паважаныя ветэраны і доблесныя воіны!

Амаль восемдзесят гадоў таму крывавы смерч самай страшнай у гісторыі вайны быў спынены ахвярным подзвігам савецкіх людзей. Гэты факт навек замацаваны на руінах Рэйхстага і ў акце аб безагаворачнай капітуляцыі фашысцкай Германіі. 

Германская ваенная машына разбілася аб небывалы гераізм і мужнасць нашых бацькаў, дзядоў і прадзедаў. Доўгія чатыры гады на фронце і ў тыле кавалася Вялікая Перамога. На барацьбу з ворагам стаў і стары і малы.

Заплаціўшы за свабоду мільёнамі жыццяў сваіх сыноў і дачок, наша вялікая Радзіма - Савецкі Саюз - выратавала тады чалавецтва ад заняволення, а асобныя народы - ад поўнага знішчэння.

Сёння мы ганарымся нашымі продкамі, ветэранамі-пераможцамі. Мы славім іх подзвіг і, стоячы ля Вечнага агню, даём клятву, што зробім усё, каб памяць аб іх захаваць у вяках. Запомніце: мы прыходзім сюды, каб не паўтарылася страшнае мінулае. Забудзем гэта мінулае, перастанем прыходзіць да помнікаў - яно прыйдзе да нас. І помніце чалавецтвам зроблены вывад: як ты ставішся да памяці сваіх продкаў, асабліва тых, хто падарыў табе жыццё і свабоду, так і да цябе будучыя пакаленні будуць ставіцца. Мы не вечныя, мы смертныя. Запомніце, калі ласка: прыходзьце да помнікаў, да Вечнага агню, ціха і спакойна, без усялякай арганізаванасці, можна без кветак. Помніце і кланяйцеся тым, хто падарыў нам свабоду, калі мы не хочам ваяваць.

Мы даём наказ дзецям і ўнукам свята берагчы праўду аб той вайне як найвышэйшую каштоўнасць. Для нас яна сімвал непарыўнай сувязі пакаленняў, адна з асноў духоўнага адзінства і з'яднанасці народа.

Вялікая Перамога - галоўны і ключавы момант у гісторыі адраджэння і станаўлення беларускай нацыі. Яе ўрокі даюць магчымасць сёння, помнячы і ведаючы мінулае, зазірнуць у будучае. А жыццялюбства і творчая энергія пакалення пераможцаў, якое аднавіла краіну з руін, з'яўляюцца прыкладам таго, як мы павінны жыць і працаваць.

Беларусі патрэбны мір. Заўтра, праз год, заўсёды. Нам важна выстаяць і не даць сябе ўцягнуць у канфлікты. Час выбраў нас. Выбраў, каб мы захавалі незалежнасць нашай зямлі і ўсё створанае многімі пакаленнямі да нас. Усё, чым мы разам ганарымся і чым захапляемся.

Для гэтага развіваем эканоміку, умацоўваем абарону і выхоўваем моладзь патрыётамі. Захоўваем мір і дабрабыт на роднай зямлі так, як завяшчалі нам продкі. 

Вялікая Перамога, якую яны заваявалі, усяляе ў нас веру, што беларусы ў сілах усё пераадолець і выстаяць. 

Гонар і слава воінам-пераможцам! Гонар і слава нашым дарагім ветэранам! Вечная памяць загінулым на полі бою, закатаваным у фашысцкіх засценках і канцлагерах.

(Мінута маўчання пад удары метранома.)

Май пераможнага 1945 года прынёс чалавецтву бясцэнны мір. Аднак яго каштоўнасць не ўсім спадабалася. Нашы былыя саюзнікі ў ролі аднаасобных пераможцаў гітлераўскай Германіі бачылі толькі сябе.

Як і ў пачатку саракавых, Захад гатовы на здзелку з любым злом, каб захаваць панаванне.

Жахлівы вопыт апалагетаў пераможанага Трэцяга рэйха ўжо знайшоў там сваіх паслядоўнікаў. Ён атрымаў новае прачытанне і прыгожую абгортку. Нацысты нашых дзён ужо не ходзяць у ботах і чорных кашулях, а дзейнічаюць танчэй і вераломней.

Без усякага сораму ў Еўропе славяць і вітаюць эсэсаўцаў і нацыяналістаў усіх масцей. Ім апладзіруюць стоячы кіраўнікі дзяржаў, забыўшы вынікі Нюрнбергскага працэсу. Без аглядкі на гісторыю, мараль і права яны зноў пачалі нацкоўваць краіны і народы. Для гэтага рэанімавалі ідэі і метады нацыстаў.

Дыялог і супрацоўніцтва адхіляюцца з парога, а ў аснову ўсяго ставіцца матэрыяльная выгада, багацце. Сёння мы гэта бачым на прыкладзе падзей ва Украіне, Сірыі, сектары Газа і іншых гарачых кропках планеты. Кожны дзень па ўсім свеце гінуць тысячы і тысячы людзей. Яшчэ больш застаюцца без прытулку, жывуць у нечалавечых умовах, пакутуюць ад голаду і смагі. Над палямі былых бітваў зноў грымяць выбухі, пахне порахам і гіне мірнае насельніцтва.

Сёння як ніколі важны голас нас усіх, хто выступае ў абарону міру, імкнецца да супрацоўніцтва, падзяляе ідэалы справядлівасці і глабальнай роўнасці. Але мы не чуем, на жаль, гэтых галасоў. Чым скончылася такое маўчанне ў мінулым стагоддзі, мы ведаем. Сёння нас зноў хочуць спіхнуць у тую ж прорву.

Але мы павінны зрабіць усё, каб не дапусціць Трэцяй сусветнай вайны. Інакш ядзерны апакаліпсіс немінучы. Для гэтага нам усім трэба з'яднацца.

Чалавецтва ў сваёй гісторыі аднойчы ўжо змагло аб'яднацца супраць усеагульнага зла. Гэта прывяло да Перамогі. Тады мы знішчылі фашызм, таму што былі разам: рускія і беларусы, украінцы і казахі, літоўцы і ўзбекі, малдаване і таджыкі. Усе народы вялікай Савецкай краіны. Супраць гітлераўскай арды з намі ваявалі дзясяткі іншых народаў свету. У тым ліку Еўропы і Злучаных Штатаў. І мы гэта не забылі. У нас добрая памяць у адрозненне ад іх.

Нашы памяць і праўда надзейным шчытом стаяць на шляху ўстанаўлення ў свеце хаосу і ідэй пераважання. Даюць імунітэт супраць ілжывых ідэй і скрытых маніпуляцый, становяцца маяком у моры выклікаў і пагроз новага часу.

Мы не сталі на калені перад ворагамі тады і не маем намеру схіляць галаву перад імі і сёння. 

Вайна навучыла беларусаў свята берагчы родную зямлю, абараняць яе цаной уласнага жыцця і захоўваць памяць аб подзвігу продкаў. Мы не дапусцім паўтарэння таго, што бачылі і перажылі яны.

На прыкладзе герояў вайны мы сёння выхоўваюць моладзь. Больш таго, менавіта ёй адводзіцца галоўная роля ў захаванні памяці аб подзвігу бацькаў, дзядоў і прадзедаў. Зберагчы якую мы павінны перш за ўсё ў сем'ях. І тады ніякая палітычная кан'юнктура не перакрэсліць і не аслабіць духоўнае адзінства пакаленняў. 

Інакш размовы аб дружбе і міры, аб тым, што мы за ўсё добрае, але супраць усяго дрэннага, зробяць іх, а значыць, і нашу будучыню безабароннымі перад тварам пагроз новага часу.

Маніпуляцыі бескарысныя, калі людзі жывуць сваім розумам. Знешнія выклікі і спробы націску на нашу краіну прывялі толькі да аднаго - Беларусь стала мацнейшай. Мы зробім усё, каб ні ў кога нават думкі не ўзнікла праверыць гэта на справе.

Паважаныя сябры!

Мы з глыбокай удзячнасцю схіляем галаву перад мужнасцю і стойкасцю ўсіх тых, хто аддаў жыццё за свабоду будучых пакаленняў, за нашу з вамі свабоду. І адначасова з гэтым гаворым рашучае "не" тым, хто спрабуе перакрэсліць напісаныя крывёю старонкі гісторыі.

Дарагія ветэраны!

Вы далі незабыўны ўрок усім наступным пакаленням. Урок мужнасці, патрыятызму, свабодалюбства і сілы духу. Нізкі паклон вам, хто жыве, і тым, хто пайшоў ад нас, за бяспрыкладны подзвіг, доблесць, адвагу і вернае служэнне Айчыне.

Жадаю нашым паважаным ветэранам моцнага здароўя, даўгалецця і дабрабыту, а кожнай беларускай сям'і - шчасця, міру і дабра.

Віншую ўсіх вас са святам! З Днём Вялікай Перамогі!

Цырымонія прадоўжылася выкананнем дзяржаўнага гімна Беларусі і ўрачыстым маршам зводнай роты і аркестра ганаровай варты Мінскай ваеннай камендатуры. А на заканчэнне быў выкананы тэатралізаваны музычны нумар "Памятаем! Ганарымся! Не здрадзім!"

Пасля ўдзелу ва ўрачыстых мерапрыемствах Аляксандр Лукашэнка паразмаўляў з прадстаўнікамі СМІ.

Журналісты папрасілі Кіраўніка дзяржавы падзяліцца ўражаннямі ад парада на Краснай плошчы ў Маскве.

Прэзідэнт адзначыў, што не першы раз адказвае на пытанне аб парадзе на Краснай плошчы. Першым гэта пытанне яму задаў расійскі калега Уладзімір Пуцін, а пазней - Міністр абароны Расіі Сяргей Шайгу.

"Шчыра і абсалютна сумленна скажу, што так, як яны, па духу, па змесце ніхто не ўмее арганізоўваць такія мерапрыемствы, - падкрэсліў Аляксандр Лукашэнка. - Гэта быў парад, не зусім падобны на тыя парады, якія былі. Але і час зусім іншы. Вы заўважылі, наколькі тонка яны ўлавілі момант і зрабілі тое, што трэба было сёння зрабіць?"

Прэзідэнт расказаў, што азнаёміўся з некаторымі каментарыямі. Маўляў, на парадзе не была прадстаўлена цяжкая тэхніка. Гэтыя выказванні Кіраўнік дзяржавы назваў опусамі. "Што, з лініі сутыкнення, з фронту танкі трэба было зняць і на Красную плошчу прыцягнуць? А яшчэ наўздагон, можа, у Беларусь перакінуць і паказаць? Гэта нікому не трэба. Заўсёды, пачынаючы з 1941 года, танкі і байцы з Краснай плошчы ішлі на фронт", - заўважыў Аляксандр Лукашэнка.

"Таму ўсё было тонка, разумна, прадумана, у самы раз. Вось менавіта так, як трэба сёння. Яны паказалі сваю моц. Калі нехта ўмее думаць і чытаць, заўважылі, што ў канцы яны прыцягнулі "Ярсы" (стратэгічны ракетны комплекс з міжкантынентальнай балістычнай ракетай. - Заўвага) - стратэгічная баявая зброя. Хто ўмее думаць і чытаць, зразумелі, што, давайце жыць дружна, а калі ў каго мазгі затуманіла, з намі лепш не звязвацца. Усё было так, як павінна быць сёння", - падкрэсліў Прэзідэнт.

Кіраўнік дзяржавы таксама расказаў, аб чым паразмаўляў з Уладзімірам Пуціным пасля парада. "У мяне такі лёс не вельмі добры: там заўсёды прадаўжаюцца і святы, і прыёмы, а я заўсёды ад'язджаю. Я сабраўся, картэж стаіць мой, я падыходжу, а ён гаворыць: "Ты куды?" - "Слухай, у мяне ж яшчэ, акрамя гэтага, у Беларусі". - "Ой, я, - гаворыць, - забыў. Я вельмі прашу: перадай беларусам ад расіян, ад мяне самыя цёплыя віншаванні з нашым агульным святам".

Каменціруючы адпрацоўку пытанняў прымянення нестратэгічнай ядзернай зброі, Кіраўнік дзяржавы прывёў простую аналогію: для таго каб аўтамат страляў, яго трэба ўтрымліваць у нармальным стане. А каб умець ім карыстацца і дакладна страляць, трэба трэніравацца.

"Ядзерная зброя - страшная зброя. Мы, кіраўніцтва Расіі часта падкрэсліваем: не стратэгічнага характару. Барані бог узяцца яшчэ за гэту кнопку. Хоць і тактычная зброя сёння ў шмат разоў мацнейшая, чым гэта было ў Хірасіме і Нагасакі. Ад аднаго ўзрыву загінуць тысячы і тысячы людзей. Гэта страшная зброя. Але гэта зброя. І для таго, каб прымяніць такую зброю, трэба трэніравацца, трэба ўмець гэта рабіць, - падкрэсліў Аляксандр Лукашэнка. - Гэта была мая ініцыятыва (Пуцін аб гэтым сказаў). Я яму патэлефанаваў, гавару: "Слухай, мы павінны сінхранізавацца ў гэтым плане". А мэта была адна - мы хацелі паглядзець, як вядучыя ядзерныя дзяржавы ўсё гэта робяць. Мы ж вучымся".

Публічна агучыць планы пра маючую адбыцца трэніроўку ў Беларусі вырашылі не проста так. Прэзідэнт адзначыў, што ў свеце ідзе эскалацыя напружанасці, перш за ўсё яна зыходзіць з Украіны. Але горача ў розных кропках планеты. Так, палае ўжо і Блізкі Усход, няпростая абстаноўка і ў Ціхім акіяне.

"Як ніколі, мы блізка падышлі да ядзернай катастрофы. Што ў гэтай сітуацыі рабіць? Трэба вучыцца страляць з аўтамата і трымаць порах сухім, у тым ліку і гэту смяротную зброю", - сказаў Кіраўнік дзяржавы.

Ён падкрэсліў, што для Беларусі і Расіі ядзерная зброя - гэта выключна зброя стрымлівання. "Нам чужога не трэба, Расіі - тым больш. У нас ёсць усё, толькі б мы працавалі нармальна і змаглі выкарыстаць тыя багацці, якія ёсць у Расіі і ў нас, для нашай карысці. Калі так будзе, будзе нармальна. Ім жа нечага не хапае, - адзначыў Аляксандр Лукашэнка. - Вось-вось абваліцца долар. Калі долар абваліцца, што адбудзецца? У іх жа на паперках уся эканоміка: трэба - надрукавалі долары. Гавораць, калі шмат грошай - інфляцыя. Пляваць- інфляцыя на нас кладзецца. І вось яны гэта больш за ўсё баяцца".

Па гэтай жа прычыне ЗША націскаюць і на Еўрапейскі саюз, які ў свой час адмовіўся ад долара і ўвёў сваю валюту. Але галоўны сапернік для Злучаных Штатаў - Кітай. У гэтым процістаянні ён цяпер аб'яднаўся з магутнай ядзернай дзяржавай - Расіяй.

Прэзідэнт расказаў, што некалькі гадоў таму абмяркоўваў гэтыя пытанні з былым дырэктарам ЦРУ і экс-дзяржсакратаром ЗША Майклам Пампеа. "Так яму і сказаў: "Вы вар'яты". - "Чаму, спадар Прэзідэнт?" - "Таму што вы аб'ядналі сваіх ворагаў у адно цэлае". - "Мы разбяромся". Я кажу: "Вы не разберацеся. Як мінімум, Майк, вы спазніліся". Таму яны не разбяруцца. Яны нарабілі шмат памылак. Што рабіць - патрэбна заварушка, замуціць і ў гэтай мутнай вадзе нешта вылавіць. Вось іх палітыка сёння", - адзначыў Аляксандр Лукашэнка.

Кіраўнік дзяржавы таксама звярнуў увагу, што ЗША не хочуць міру ў еўрапейскім рэгіёне, таму прадаўжаюць падтрымліваць канфлікт ва Украіне. "Мы хочам міру. Мы не хочам ваяваць. І мы не хочам, каб Украіна была плацдармам для нападзення. Што вы думаеце, толькі на Расію? Ад нас нічога не застанецца. Вось чаму мы разам з Расіяй. Не толькі таму, што мы саюзнікі", - заявіў беларускі лідар.

Прэзідэнт заўважыў, што Злучаныя Штаты таксама адпрацоўваюць у Еўропе прымяненне ядзернай зброі. Аднак робіцца гэта непублічна.

"Што мы ў гэтай сітуацыі павінны зрабіць? Мы публічна аб гэтым заявілі. У нас ёсць самалёты для таго, каб несці ядзерны боепрыпас у выглядзе бомбы. У нас ёсць падрыхтаваныя людзі. А што датычыцца ракеты "Іскандэр", якую перахапіць немагчыма, яны наогул непаражальныя. Таму мы ім гаворым: супакойцеся, у нас усё ёсць", - сказаў беларускі лідар.

Праверка сродкаў - носьбітаў нестратэгічнай ядзернай зброі праходзіць у тры этапы. Спачатку ваенныя трэніраваліся падрыхтоўваць боегалоўкі. Цяпер генеральныя штабы сінхранізуюць сваё ўзаемадзеянне. На трэцім этапе плануецца падвесці вынікі праверкі. 

"Мы ні на кога не збіраемся нападаць. Але ўсе павінны разумець, што за намі не заржавее. І ўсе іх размовы: "У яго ліній няма!" - абсалютна правільна гавораць. Я далёка не дурань, але ліній няма", - заявіў беларускі лідар.

У час размовы з журналістамі Кіраўнік дзяржавы пракаменціраваў уцёкі польскага суддзі Томаша Шміта са сваёй краіны.

"Гэта тэндэнцыя (уцёкі чыноўнікаў з Польшчы. - Заўвага), але толькі не тое, як яны асобныя гавораць, што мы з расіянамі вярбуем такіх людзей, што гэта нашы агенты, нашы супрацоўнікі. Глупства поўнае! Гэтага чалавека я ўбачыў, толькі калі ён праводзіў прэс-канферэнцыю. Гэта абсалютна нармальны чалавек", - падкрэсліў Аляксандр Лукашэнка. 

Кіраўнік дзяржавы расказаў, што КДБ напярэдадні прэс-канферэнцыі дакладваў яму аб гэтай сітуацыі. Прэзідэнт даручыў найперш праверыць гісторыю гэтага польскага грамадзяніна. "Паглядзелі - гэта абсалютна нармальны, патрыятычны паляк. Нідзе калегі пра яго дрэнна не сказалі. Але гэта ўдар пад дых каму - уладам Польшчы. Вось яны і пачынаюць: здраднік, такі-сякі. Ніякі ён не здраднік. Але ён рэальна глядзіць на рэчы, параўноўвае Польшчу і Беларусь і робіць высновы, - адзначыў Аляксандр Лукашэнка. - Мы яго папярэдзілі: ты можаш даць прэс-канферэнцыю і іншае (яны ж забілі Чэчку), глядзі, ты ставіш сябе пад удар - "Я не баюся. Я павінен сказаць праўду, што адбываецца ў Польшчы". І гэта выклікала вельмі шырокі рэзананс". 

Паводле слоў Аляксандра Лукашэнкі, гэтай гісторыяй пацікавіўся нават яго расійскі калега Уладзімір Пуцін. 

"Значыць, гэта заўважылі ўсе. Гэта пад дых. Таму ім і трэба нешта гаварыць. Вось яны і гавораць, што мы яго завербавалі. Слухайце, глупства поўнае. Калі завербавалі - факты на стол. Усё проста: пакладзі на стол факты, прад'яві сусветнай грамадскасці і перш за ўсё сваім людзям", - дадаў Прэзідэнт. 

Ён звярнуў увагу, што Польшча, Літва і Латвія перакрываюць граніцы з Беларуссю, не пускаюць сюды людзей, запалохваюць сваіх грамадзян тым, што, маўляў, у Беларусі іх схопяць і завярбуюць. 

"Гэта такое глупства. Хто ў гэта з вас паверыць? Хто на граніцы хапае людзей і вярбуе? Калі нам трэба завербаваць, сёння ніякіх праблем няма. І нават грошы не трэба плаціць: ідэйных людзей дастаткова, якія нас там праінфармуюць. І потым: калі гэта агенты, яны нам патрэбны там, а не тут. Таму хлусня, няпраўда, але рэагуюць так, у спешцы, не разабраўшыся і нават не падумаўшы аб тым, як на гэта рэагаваць", - дадаў Кіраўнік дзяржавы.

Прэзідэнт паабяцаў разгледзець заяву польскага суддзі Томаша Шміта аб прадастаўленні яму палітычнага прыстанішча. "Гэта патрыятычны, нармальны чалавек. Таму яго заяву, з якой ён звярнуўся да мяне, я абавязкова разгледжу. Давывучым усе пытанні, і абавязкова разгледжу яго заяву", - падкрэсліў Аляксандр Лукашэнка.

Кіраўнік дзяржавы таксама расказаў, што даручыў праваахоўным органам забяспечыць ахову Томаша Шміта: "Каб нягоднікі гэтыя не загубілі чалавека. Але ён гаворыць: "Я ведаю, на што іду". Мужны мужчына. З нармальнай галавой, нармальны чалавек, наколькі я цяпер валодаю інфармацыяй".

Аляксандр Лукашэнка ў час размовы з журналістамі таксама расказаў гісторыю ветэрана, з якой сядзеў на парадзе ў Маскве.

Прэзідэнт раніцай на Краснай плошчы глядзеў парад у гонар 79-й гадавіны Перамогі ў Вялікай Айчыннай вайне разам з ветэранам Кацярынай Еўдакімавай. У кадр трапіў кранальны момант, як Аляксандр Лукашэнка папраўляў каўнер яе курткі: у Маскве ў гэты час ішоў снег і было вельмі ветрана.

"Гэта ж чалавек, які ваяваў тут, пад Баранавічамі. Яна падстрэліла немца і ўзяла яго ў палон, прыцягнула - выратавалі шмат людзей, вёскі і гэтак далей", - адзначыў Кіраўнік дзяржавы.

"Калі я падышоў, пазнала мяне і пачала: хутчэй, хутчэй расказаць шмат. Я яе выслухаў. Гляджу - 101 год! Я ўвесь час сядзеў і ёй зайздросціў: на нагах, моцненькая. Вельмі холадна было ў Маскве (не тое слова холадна). І нават не ў тым справа, што тэмпература нізкая: Красная плошча - гэта труба, там наскрозь усё прадзімае. Мне пашанцавала, што Мірзіёеў (Прэзідэнт Узбекістана. - Заўвага) прывёз мне куртуку - напэўна, акалеў бы. Вельмі холадна было. І я гляджу: гэта жанчына, герой, патрыётка, наша фактычна жанчына, куртачка яе там ляжала асобна - я надзеў ёй куртку, зашпіліў. Я яе стараўся ўцяпліць, каб не змерзла", - расказаў Прэзідэнт.

"101 год... Дай бог кожнаму! І быць у такой памяці і перамяшчацца на нагах", - дадаў Аляксандр Лукашэнка.