Нарада з кіраўніцтвам Савета Міністраў

Прэзідэнт Беларусі Аляксандр Лукашэнка 22 чэрвеня сабраў нараду з кіраўніцтвам Савета Міністраў.

Абмяркоўвалася шырокае кола тэм: першыя вынікі работы эканомікі ў 2023 годзе, стымуляванне інвестыцыйнай актыўнасці, падрыхтоўка да ўборачнай кампаніі і сітуацыя ў жывёлагадоўлі, сітуацыя ў прамысловасці, а таксама выкананне даручэнняў Кіраўніка дзяржавы ў сацыяльнай сферы.

Прэзідэнт растлумачыў, што рэгулярна, з пэўнай перыядычнасцю сустракаецца з урадам для абмеркавання актуальных пытанняў, перш за ўсё ў эканоміцы. "Сёння ж мы правядзём нараду па эканамічнаму блоку з членамі ўрада ў крыху пашыраным фармаце", - удакладніў Аляксандр Лукашэнка.

Акрамя планавых пытанняў - па законапраекце аб інвестыцыйнай дзейнасці і Указе аб арэндным жыллі для медработнікаў - на парадку дня нарады даклад Прэм'ер-міністра аб асноўных выніках работы эканомікі за 5 месяцаў бягучага года, а таксама справаздачы кожнага віцэ-прэм'ера аб выкананні даручэнняў Кіраўніка дзяржавы.

"Статыстыка публікуе вынікі: валавы ўнутраны прадукт склаў 100,9%. Назіраецца выхад на станоўчыя тэмпы росту інвестыцый у асноўны капітал, прыбавілі 2,5% да мінулага года. Аднак пакуль гэта слабы задзел для выканання ўстаноўленых заданняў нават за паўгоддзе", - сказаў Аляксандр Лукашэнка.

Прэзідэнт спытаў Прэм'ер-міністра, ці па ўсіх паказчыках выйшлі на дадатную дынаміку, ці ўдалося ў поўнай меры пераадолець мінулагоднія цяжкасці (лагістычныя і транзакцыйныя выдаткі, пошук новых партнёраў і рынкаў). Ён таксама пацікавіўся, як выконваюцца мэтавыя заданні.

"Ад першага віцэ-прэм'ера чакаю прадметнай раскладкі, дзе Урад бачыць рэзервы па нарошчванні росту інвестыцый па выніках года, а гэта аж 120%? А таксама аб эфектыўнасці рэалізацыі канцэпцыі "адзін раён - адзін праект", - дадаў Аляксандр Лукашэнка.

На разгляд Кіраўніку дзяржавы ўнесены законапраект аб садзейнічанні і стымуляванні рэалізацыі інвестыцыйных праектаў. На думку распрацоўшчыкаў, ён дапаможа выправіць сітуацыю і нарасціць аб'ём інвестыцый.

Як заявіў на нарадзе Прэзідэнт, дакумент трэба ўважліва вывучыць, перш чым адправіць яго ў парламент. "Па сутнасці, прадстаўлены закон прыйдзе на змену Дэкрэту № 10, які амаль 15 гадоў служыў прававой асновай, - заўважыў Кіраўнік дзяржавы. - У свой час гэта быў прарыўны дакумент. За мінулыя гады прадстаўнікі 20 краін інвесціравалі звыш $8 млрд. Паспяхова рэалізаваны больш як тысяча праектаў".

Але апошнія некалькі гадоў аб'ём інвестыцый - як знешніх, так і ўнутраных - зніжаецца, што не лепшым чынам уплывае на работу эканомікі, звярнуў увагу Аляксандр Лукашэнка. "Зразумела, любая краіна сёння стараецца прадаставіць інвестарам прывабныя ўмовы. Мы таксама павінны ствараць канкурэнтныя перавагі, каб грошы ўкладваліся ў перспектыўныя, высокатэхналагічныя, інавацыйныя вытворчасці менавіта сюды, у Беларусі, - сказаў Прэзідэнт. - Я не супраць разумных навацый, заўсёды гатовы іх падтрымаць. Аднак прадметна далажыце аб сутнасці і чаканым эфекце. На каго нацэлены законапраект?

"У бягучых геапалітычных абставінах складана разлічваць на прыход у беларускую эканоміку заходніх інвестараў. Давайце будзем арыентавацца на іншых: усходніх, азіяцкіх, афрыканскіх і гэтак далей, - сказаў Аляксандр Лукашэнка. - Ды і з заходнімі трэба працаваць, не трэба адхіляць з парога".

Пры гэтым Прэзідэнт нагадаў пра важнае правіла: у аснове любога праекта павінна прэваліраваць сацыяльная адказнасць - паўнацэнная занятасць для работнікаў, дастойныя зарплаты, шырокі сацпакет і, зразумела, выплата падаткаў.

"Толькі прыехаць сюды, як раней гаварылі, і высмактаць усе сокі з народа, выціснуць усё, што можна, заплаціўшы нейкую капейку (падаткі пры гэтым не плаціць, а рабочым, скажам, $500), а асноўны прыбытак вывесці ў выглядзе дывідэндаў у недружалюбныя краіны. Я не думаю, што такія праекты нам патрэбны, - падкрэсліў Аляксандр Лукашэнка. - Сюды трэба прыходзіць не як у бананавую рэспубліку, а як у нармальную высокатэхналагічную, высокаразвітую, і працаваць трэба перш за ўсё са сваімі інвестарамі".

Характарызуючы сітуацыю ў сельскай гаспадарцы, Прэзідэнт звярнуў увагу, што з-за недахопу дажджоў глебу падсушыла не па ўсёй краіне, а ў асобных раёнах. "Проста тут, у Турчына (губернатара Мінскай вобласці. - Заўвага), які награшыў перад Госпадам Богам, і вакол мяне (не ведаю, у чым я награшыў), дзе я жыву, на больш высокіх глебах, вядома, падсушыла", - заўважыў Аляксандр Лукашэнка. 

Аднак гэта зусім не прычына, каб усім адказным асобам рыдаць і загадзя гаварыць, што сельскагаспадарчы год будзе правалены, упэўнены Прэзідэнт. "Я разумею, што адбываецца. Так, падсушыла ў пэўных раёнах. Перш за ўсё крыху пацярпелі збожжавыя і травы", - сказаў ён. У сувязі з гэтым Кіраўніком дзяржавы былі дадзены своечасовыя даручэнні Ураду, у тым ліку па перасеве травяністых кармоў, з якімі сітуацыя выклікае найбольшыя апасенні, у адрозненне ад збожжавых. "Калі мы недаатрымаем нейкую колькасць, 200-300 тыс. т збожжа, сёння лішак у нашых суседзяў. Мы заўсёды купім збожжа. Прытым збожжа сёння прапануюць па вельмі нізкіх цэнах, часам нават ніжэйшых за наш сабекошт. Ёсць нават сэнс закупляць", - сказаў Аляксандр Лукашэнка.

"Гэта значыць, катастрофы няма, і гэта прызнае віцэ-прэм'ер, які вядзе сельскую гаспадарку. Проста трэба своечасова сарыентавацца там, дзе падсушыла", - падкрэсліў Кіраўнік дзяржавы, дадаўшы пра важнасць строгага выканання тэхналагічнага працэсу ў сельскай гаспадарцы, што дае магчымасць захоўваць пасевы і атрымліваць ураджай нават у няпростых умовах надвор'я.

Асобна Аляксандр Лукашэнка спытаў, як ідуць справы ў сельскай гаспадарцы, асабліва ў раслінаводстве, што стала з пасевамі збожжавых, якія разлікі на ўраджай.

"Чакаю справаздачы аб тым, што адбываецца ў жывёлагадоўлі. Як ідзе нарыхтоўка кармоў? Завяршаецца першы ўкос шматгадовых траў. Іх прадукцыйнасць амаль горшая, чым у мінулым годзе. Відавочна недабіраем з першага ўкосу (травяных кармоў. - Заўвага). Што цяпер трэба зрабіць, каб накарміць жывёлу і не давялося скарачаць пагалоўе?" - адрасаваў адказным асобам шэраг пытанняў Кіраўнік дзяржавы.

Ён адзначыў, што па выніках пяці месяцаў ва ўсіх абласцях адзначаецца рост вытворчасці жывёлы і птушкі - па рэспубліцы амаль на 5%, малака - на 6%. "Неабходна захаваць гэтыя тэмпы і атрымаць добры ўраджай", - арыентаваў Прэзідэнт. Разам з тым ён звярнуў увагу на праблему складскіх запасаў, нават па харчовых таварах, чаго, вядома ж, быць не павінна, асабліва ва ўмовах дэфіцыту многіх пазіцый на сусветным харчовым рынку. "Наколькі я інфармаваны, сухое малако, масла сметанковае і іншае дзяваць няма куды. Свет галадае, а ў нас - няма куды дзяваць", - крытычна заўважыў Кіраўнік дзяржавы.

"Яшчэ адно важнае пытанне: нашых грамадзян вельмі непакоіць якасць дарог. Што тут гаварыць, усе на аўтамабілях, у некаторых па два-тры на сям'ю, - сказаў Аляксандр Лукашэнка. - Так, быў час, калі Беларусь дасягнула высокага ўзроўню па стане дарожнага пакрыцця і стала прыкладам для многіх на постсавецкай прасторы. Але варта было толькі крыху аслабіць кантроль, як сітуацыя стала пагаршацца".

У час рабочай паездкі ў Гродзенскую вобласць у красавіку гэтага года Аляксандр Лукашэнка ўжо звяртаў увагу на колькасць скаргаў насельніцтва на гэту тэму. "Профільнаму віцэ-прэм'еру пастаўлена задача на працягу 2023 года ўсе дарогі прывесці ў парадак, адрамантаваць. Гэта пытанне пытанняў. Як ідуць справы?" - спытаў на нарадзе Прэзідэнт.

Кіраўнік дзяржавы нагадаў, што яшчэ ў студзені бягучага года перад Урадам ставілася задача спрасціць працэс будаўніцтва так, як гэта раней было зроблена для індывідуальных дамоў.

"Па прыватным сектары мне дакладвалі, што большасць праблем - з доступам да камунікацый, дакументацыяй і гэтак далей - вырашыліся і людзі задаволены. Добра, калі так. Але я сумняваюся. Гэта мы ў бліжэйшы час праверым. Не хацелася б, каб потым размова была аналагічная з аховай здароўя", - заўважыў Прэзідэнт.

"Для таго каб пачаць будаваць шматпавярховы дом, завод, прамысловы аб'ект, трэба сабраць дзясятак-другі тэхнічных умоў ад энергетыкаў, МНС, санстанцый, мясцовай улады і іншых. І столькі ж даведак потым неабходна атрымаць у канцы будаўніцтва, - прадоўжыў Кіраўнік дзяржавы. - Трэба паглядзець, можа, нам па нейкіх напрамках можна адмовіцца ад нейкіх даведак". Аляксандр Лукашэнка даручыў прапрацаваць гэта пытанне профільнаму віцэ-прэм'еру і Міністру архітэктуры і будаўніцтва: "Сядзьце ўдвух і адсячыце".

У працяг тэмы будаўніцтва шматкватэрных дамоў Прэзідэнт спытаў, чаму ніяк не ўдаецца раз і назаўсёды вырашыць праблему з даўгабудамі. "У гэтым ганебным статусе цяпер 20 жылых дамоў, з іх, Наталля Іванаўна (Качанава, Старшыня Савета Рэспублікі і ўпаўнаважаны прадстаўнік Кіраўніка дзяржавы ў Мінску. - Заўвага), у вас у Мінску з Кахаравым (мэр Мінска. - Заўвага) - 17! Ці ёсць ва Урада прапрацаваныя рашэнні?" - задаў пытанне Прэзідэнт.

Закранаючы сітуацыю ў прамысловасці, Аляксандр Лукашэнка адзначыў нядрэнныя вынікі, аднак складскія запасы вышэй за 76%. "Няма якасных зрухаў у дрэваапрацоўцы. Вяла ідзе работа па асваенні расійскага крэдыту на інтэграцыйныя праекты. Далажыце пра меры, якія прыняты, каб выправіць сітуацыю", - сказаў Кіраўнік дзяржавы.

Паводле слоў Прэзідэнта, пытанні сацыяльнага блока апошнія некалькі тыдняў займалі верхнія радкі ва ўсіх навінах.

"З вынікамі цэнтралізаваных экзаменаў нібыта разабраліся. Ідзе ўступная кампанія. Восенню, як дамаўляліся, мы прааналізуем яе вынікі і канчаткова расставім кропкі над "і", - адзначыў Аляксандр Лукашэнка.

"Больш вяртацца да пытанняў адукацыі нельга, - лічыць Кіраўнік дзяржавы. - Нельга ўвесь час калашмаціць прафесарска-выкладчыцкі склад і настаўнікаў на месцах, а таксама бацькоў па пытаннях адукацыі".

Прэзідэнт падкрэсліў, што восенню павінны быць унесены канчатковыя прапановы: пачынаючы ад падручнікаў, новых, эфектыўных, талковых, з напісаннем і стварэннем, і заканчваючы адукацыяй у ВНУ, а таксама выпускныя экзамены, базавыя школы, сярэднія школы і паступленне ў ВНУ. "Усе пытанні павінны быць прыведзены да ладу", - сказаў Аляксандр Лукашэнка.

Надзённым з'яўляецца пытанне, як бацькі выкарыстоўваюць дзіцячыя дапамогі. "Мы выдзяляем немалыя грошы для таго, каб падтрымаць дзетак, і не толькі шматдзетных, - адзначыў Кіраўнік дзяржавы. - Цяпер амаль у 10 тысячах сем'яў дзеці прызнаны ў сацыяльна небяспечным становішчы. 10 тысяч сем'яў не могуць даглядзець як мае быць сваіх дзяцей. Нядбайныя бацькі проста прапіваюць дзіцячыя дапамогі, а пакутуюць дзеці".

Аляксандр Лукашэнка запатрабаваў, каб дзіцячыя дапамогі даходзілі да дзяцей, а не ішлі на бутэльку бацькам, і для гэтага павінны быць прыняты ўсе належныя меры. 

У сувязі з гэтым Кіраўнік дзяржавы запатрабаваў: "Сістэму трэба наладзіць дакладна - дзеці ні ў якім разе не павінны быць абдзелены, а безадказных бацькоў трэба прывесці да розуму".

На нарадзе з кіраўніцтвам Саўміна Аляксандр Лукашэнка падкрэсліў, што маючыя адбыцца ІІ Гульні краін СНД неабходна правесці на самым высокім узроўні.

"У існуючых умовах гэты фестываль спорту набывае асаблівае значэнне для беларускіх спартсменаў і шырокага кола нашых сяброў, якія пацвердзілі ўдзел", - адзначыў Кіраўнік дзяржавы.

"Але галоўнае - які мы вынік пакажам, - упэўнены Аляксандр Лукашэнка. - У нас няма ніякага маральнага права выступіць на гэтых Гульнях дрэнна".

Ён таксама запатрабаваў: "Трэба не проста правесці Гульні на самым высокім узроўні, мы павінны чарговы раз паказаць, што Беларусь - адкрытая і міралюбівая краіна, дзе створаны камфортныя і бяспечныя ўмовы для людзей".

Аляксандр Лукашэнка адзначыў, што нядаўна была праведзена нарада па праблемных пытаннях у медыцыне. "Задачы - выразныя і канкрэтныя - пастаўлены. Фактаў безгаспадарчасці і непрафесіяналізму ў сферы, адказнай за здароўе нацыі, быць не павінна", - запатрабаваў Прэзідэнт.

"Пры гэтым, я ж папярэдзіў, Міністр і Урад гэта ведаюць, - камісія працуе. Праўда, яе завалілі скаргамі, нібыта гэта новы цэнтр міністэрства, новае міністэрства. Я хачу да людзей звярнуцца і папрасіць іх, каб яны не загружалі камісію, членаў камісіі (а іх 12-13 чалавек) пытаннямі, якія павінны вырашаць іншыя органы ўлады - мясцовыя органы ўлады, Урад, міністэрства. Яны, вядома, на гэта рэагуюць, але замяніць усіх не могуць", - адзначыў Аляксандр Лукашэнка.

Прэзідэнт расказаў, што, напрыклад, нядаўна быў зварот жыхароў Жлобінскага раёна. "Паехалі туды, разгледзелі, разабраліся, сабралі спецыялістаў, навучылі, параілі. Навучыць трэба людзей. Ну, а Міністэрства аховы здароўя дзе?" - задаў пытанне Аляксандр Лукашэнка.

Ён таксама закрануў тэму медыцыны на месцах: "Усе губернатары кінуліся пыл у вочы пусціць. Адрамантавалі ФАПы, раённыя бальніцы, грошы выдзелілі, пачаўся бурны рамонт".

У сувязі з гэтым Прэзідэнт заўважыў: "Гэта трэба зрабіць, я не супраць, але трэба разумець, што ФАПы, участковыя бальніцы павінны функцыянаваць. І каб людзі былі задаволены".

Аляксандр Лукашэнка лічыць важным пытанне прафесіяналізму і ўмення ўрачоў і фельчараў працаваць з людзьмі. "Ён павінен прыйсці першым да хворага чалавека, асабліва ў вёсцы. Але не забывайце аб прафесіяналізме гэтых людзей. Прафесіяналізм людзей на месцах - у раённых бальніцах гэта ўрачы, ва ўчастковых таксама гэта яшчэ і медсёстры, а ў ФАПах - фельчары".

Кіраўнік дзяржавы прадоўжыў: "Сёння вяртаемся да даручэння прадаставіць медыкам права набываць ва ўласнасць арэнднае жыллё". Ён нагадаў, што ў свой час арэнднае жыллё стваралася для вырашэння праблем у некаторых выпадках, цяпер прапануюць частку гэтага жылля зрабіць звычайным, і падрыхтаваны адпаведны праект Указа.

Аляксандр Лукашэнка ў сувязі з гэтым задаўся пытаннем: "Навошта стваралі гэта арэнднае жыллё? Будавалі людзі, куплялі, няхай бы будавалі і куплялі. Але калі мы ствараем арэнднае жыллё, навошта яго прадаваць? Я проста стаўлю пытанне, давайце абмяркуем".

Пры гэтым Кіраўнік дзяржавы выказаў словы ўдзячнасці ў адрас медыкаў: "Яны, вядома, малайцы ў пераважнай большасці, лечаць нас, яны заслугоўваюць увагі".

Нараўне з гэтым Прэзідэнт лічыць, што разгляд пытання трэба пакуль адкласці, і растлумачыў прычыны гэтага.

"Гэта прапанова паступіла пасля таго, калі была выяўлена велізарная колькасць недахопаў у сферы аховы здароўя. Таму не зусім час падыходзячы. Думаю, што да гэтага пытання трэба вярнуцца", - лічыць Кіраўнік дзяржавы. Пры гэтым ён звярнуў увагу, што ёсць і іншыя катэгорыі работнікаў, якія жывуць у арэндным жыллі і таксама могуць ставіць такія пытанні.

"Таму трэба разглядаць у комплексе. І пакуль мы разгорнемся, гэта не заўтра будзе, вядома. Паглядзім, як ахова здароўя прывядзе сябе да ладу і арганізуе тыя рашэнні, якія мною вызначаны, - падкрэсліў Аляксандр Лукашэнка. - Дэталі прадастаўлення арэнднага жылля ва ўласнасць будуць разглядацца тады, калі міністры, Урад даложаць, што ўсе недахопы ліквідаваны, тады і разгледзім гэта пытанне".

Прэзідэнт запатрабаваў, каб усе прапановы і рашэнні, якія будуць прымацца, былі добра прадуманымі, дакладнымі, зразумелымі і абавязкова справядлівымі для людзей.

У час нарады Аляксандр Лукашэнка пацікавіўся наяўнасцю складскіх запасаў на прадпрыемствах. Паводле слоў Прэзідэнта, яго насцярожвае бягучая сітуацыя і ён хоча разабрацца, наколькі сур'ёзнае гэта пытанне.

Прэм'ер-міністр Раман Галоўчанка адзначыў, што існуе праблема збыту пэўных відаў малочнай прадукцыі. На складах ляжыць прадукцыя амаль на $400 млн. Паводле яго слоў, гэта сітуацыя абумоўлена перш за ўсё цэнавым фактарам на знешніх рынках, а таксама ростам прадукцыйнасці на галоўным рынку - у Расіі.

"Але спецыялісты кажуць, што гэта не трагічна, з'ява часовая: цана на кітайскім і наогул на азіяцкім рынку пачала расці. А ў цэлым мы працуем над змяненнем нашай стратэгіі развіцця малочнай і малакаперапрацоўчай прамысловасці", - сказаў Раман Галоўчанка.

Кіраўнік дзяржавы падкрэсліў, што не трэба зацыклівацца на адным-двух рынках, неабходна ісці і ў іншыя краіны. "Вы не забывайце, што свет галадае. І апошнія грошы любой дзяржавай будуць патрачаны на тое, каб накарміць людзей. Нядаўна Леанід Канстанцінавіч Заяц (Намеснік Прэм'ер-міністра. - Заўвага) прыехаў з Зімбабвэ, з якім мы маем добрыя адносіны. Колькі яны ў год на чалавека спажываюць малачка?" - пацікавіўся Прэзідэнт.

"Восем кілаграм", - адзначыў Леанід Заяц.

"Восем кілаграм на чалавека! А мы?" - спытаў Кіраўнік дзяржавы.

"Трыста пяцьдзясят", - прывёў статыстыку віцэ-прэм'ер.

"Ім дзетак няма чым карміць. І я паабяцаў, што мы (гэта не дабрачыннасць) ім дапаможам. Я да чаго: не толькі будзем чакаць, пакуль цэны ў суседзяў узнімуцца, гэта зразумела, але трэба ісці на іншыя рынкі. Трэба займаць гэтыя рынкі, і яны будуць з намі з задавальненнем супрацоўнічаць, - упэўнены Аляксандр Лукашэнка. - Мы пайшлі ў Зімбабвэ - ім ужо сёння іншыя краіны нешта прапануюць. Яны кажуць: "Не, мы будзем працаваць перш за ўсё з беларусамі, таму што яны зрабілі за адзін год так, што мы хлебам накармілі народ". У іх хлеба не было. Наша тэхніка, тэхналогіі, людзі паехалі, паказалі. За год як-ніяк яны забяспечылі сябе хлебам. Цяпер ім малако патрэбна. Дык высушылі гэта малако - грузіце, вязіце туды". 

Пры гэтым, лічыць Прэзідэнт, неабходна не проста пастаўляць сухое малако на экспарт, а будаваць у іншых краінах невялікія заводы па яго перапрацоўцы і вырабляць іншыя віды малочнай прадукцыі. "Трэба ісці на іншыя рынкі, нельга сядзець сёння на адным-двух рынках", - падкрэсліў ён.

"Па гэтай жа схеме цяпер на завяршальнай стадыі знаходзіцца праект па стварэнні такой вытворчасці ў Кітаі. Гэта абсалютна правільная стратэгія. Адзінае, не ўсюды дазваляе эканоміка ствараць такія вытворчасці. Але ў цэлым гэта абсалютна правільная стратэгічная задача. Мы ўсё роўна павінны заставацца на ключавым для нас расійскім рынку, павышаць маржынальнасць продажаў і ісці туды, дзе мы прахадныя па цане з пункту гледжання вытворчасці там малочных прадуктаў", - сказаў Раман Галоўчанка.

Паводле слоў Прэм'ер-міністра, на некаторых прамысловых прадпрыемствах існуюць вялікія складскія запасы. Перш за ўсё гэта пытанне датычыцца Мінскага трактарнага завода, заводаў "Атлант" і "Белшына". Як растлумачыў Раман Галоўчанка, для МТЗ існуючыя запасы не крытычныя, тым больш што значная частка трактароў ужо закантрактавана.

Сур'ёзнай праблемай для "Атланта" стала зніжэнне попыту ў Расіі на беларускія халадзільнікі і маразільнікі. Гэта абумоўлена як у цэлым нізкім узроўнем продажаў тавараў працяглага карыстання ў гэтай краіне, так і масавым прыходам новых вытворцаў на расійскі рынак, у першую чаргу з Кітая. "Атлант" пакуль вырашыў зрабіць манеўр: скараціць выпуск халадзільнікаў і сканцэнтравацца на вытворчасці пральных машын, попыт на якія цяпер высокі.

Раман Галоўчанка лічыць, што з улікам сітуацыі ў развіцці беларускай прамысловасці неабходна рухацца па двух вектарах: не толькі нарошчваць магутнасці ўнутры краіны, але і арганізоўваць новыя вытворчасці ў суседніх дзяржавах.

"Мы, напэўна, крыху момант прапусцілі, таму што тыя магутнасці, з якіх сышлі недружалюбныя краіны, паволі замяшчаюцца расійскімі і кітайскімі вытворцамі. Разам з паслом у Расіі мы правялі аналіз тых магутнасцей, якія яшчэ засталіся ў Расіі, пакуль кінутыя, калі можна так сказаць. Нам трэба цяпер выбраць і актыўна заходзіць на гэтыя плошчы для таго, каб арганізаваць вытворчасці, фарміруючы цэнтр прыбытку там і ажыццяўляючы туды пастаўкі камплектаў, абсталявання з Беларусі", - сказаў Прэм'ер-міністр.

"Гэта стратэгія. Мы абмяркоўвалі, нічога новага ў гэтым няма. Не толькі ў Расіі - дзе толькі можна трэба ствараць свае магутнасці, вытворчасці, калі гэта нам выгадна, і дзейнічаць", - падкрэсліў Аляксандр Лукашэнка.

Падводзячы вынікі нарады, Прэзідэнт канстатаваў, што Урад і эканоміка сёння працуюць, але ёсць праблемы, якія могуць сур'ёзна паўплываць на сітуацыю ў будучым. Кіраўнік дзяржавы адзначыў, што іх неабходна своечасова ўбачыць і вырашыць. Пры гэтым Аляксандр Лукашэнка яшчэ раз нагадаў аб сваім патрабаванні: ніякіх размоў пра санкцыі, яны не могуць служыць апраўданнем. Таксама, лічыць Прэзідэнт, трэба шукаць больш патэнцыялу ў губернатарах.

"Я далёкі ад таго, каб сказаць, што ўсё правалілі. Але ёсць пытанні і ёсць праблемы, якія павінны вырашацца", - рэзюмаваў Аляксандр Лукашэнка.