Цырымонія ўшаноўвання выпускнікоў вышэйшых ваенных навучальных устаноў і вышэйшага афіцэрскага складу

Беларусы не хочуць вайны, але на любую правакацыю адказ будзе рашучым і жорсткім. Аб гэтым Прэзідэнт Беларусі Аляксандр Лукашэнка заявіў на цырымоніі ўшаноўвання выпускнікоў вышэйшых ваенных навучальных устаноў і вышэйшага афіцэрскага складу, якая адбылася 16 ліпеня ў Палацы Незалежнасці.

Кіраўнік дзяржавы назваў гэты дзень асаблівым і ўрачыстым у жыцці краіны: "Мы ўшаноўваем выпускнікоў вышэйшых ваенных навучальных устаноў і афіцэраў, якім прысвоены генеральскія званні". Усім гэтым людзям, паводле слоў Прэзідэнта, выпаў высокі гонар дасягнуць такіх вышынь у прафесіі і кар'еры ў год 80-годдзя вызвалення Беларусі ад нямецка-фашысцкіх захопнікаў. "Апраўдаць яго - значыць пранесці сцяг Перамогі нашых бацькаў і дзядоў праз усё жыццё, перадаць яго дзецям і ўнукам, - падкрэсліў Аляксандр Лукашэнка. - Вы афіцэры. І ў вачах мільёнаў сваіх суайчыннікаў менавіта людзі ў пагонах з'яўляюцца асноўным гарантам суверэнітэту і тэрытарыяльнай цэласнасці краіны".

Прэзідэнт адзначыў, што ваенным добра вядома, што адбываецца цяпер на паўднёвым і заходнім прыграніччы краіны. Па сутнасці, беларусы аказаліся ў той жа сітуацыі, як і іх продкі восем дзесяцігоддзяў таму, - гэтак жа трэба выстаяць, не даць магчымасці ворагам уцягнуць Беларусь у ваенны канфлікт. "І мы робім для гэтага ўсё неабходнае. У тым ліку і размясціўшы ў сябе самае страшнае - ядзерную зброю", - звярнуў увагу беларускі лідар.

Аляксандр Лукашэнка заўважыў, што Беларусь часам папракаюць у эскалацыі і нагнятанні абстаноўкі. Хоць на справе яна забяспечвае ваенную бяспеку і ўмацоўвае сваю абараназдольнасць, у тым ліку для таго, каб не дапусціць паўтарэння трагедыі 1941 года.

"Мы і далей будзем развіваць, умацоўваць і ўдасканальваць нашы Узброеныя Сілы, таксама з улікам вопыту баявых дзеянняў, - запэўніў Прэзідэнт. - Беларусы не хочуць вайны, але на любую правакацыю супраць нас адказ павінен быць рашучым і жорсткім. Кожны з вас гэта павінен засвоіць. Гэта наша прынцыповая пазіцыя. Ёсць каму і ёсць чым адказаць любому агрэсару".

Аднак нават суперсучасная тэхніка без чалавека - гэта проста жалеза, звярнуў увагу Аляксандр Лукашэнка. Таму падрыхтоўцы высокапрафесійных афіцэрскіх кадраў, сапраўдных патрыётаў, адданых краіне і народу, была і будзе ўдзяляцца самая пільная ўвага, запэўніў Кіраўнік дзяржавы. Сведчанне таму, паводле яго слоў, - гэты выпуск навучэнцаў ваенных ВНУ.

"У кожнага з вас за плячамі значны багаж ведаў і добрая магчымасць праявіць сябе. Прычым ва ўмовах рэальна складанай абстаноўкі", - адзначыў Прэзідэнт. Больш таго, выпускнікам вышэйшых ваенных навучальных устаноў трэба будзе рэалізаваць тыя новыя падыходы, якія закладзены ў Канцэпцыі нацыянальнай бяспекі і Ваеннай дактрыне, нядаўна прынятых Усебеларускім народным сходам.

"Вы бачыце, як свет метадычна ператвараецца ў глабальнае поле бою. Якія толькі не вядуцца бітвы - ментальныя, ідэалагічныя, кібер- і проксі-войны. Гэта рэальнасць, з якой трэба рабіць высновы і імгненна ўдасканальваць метады і спосабы абароны нашай краіны і вядзення вайны", - сказаў Кіраўнік дзяржавы.

Менавіта афіцэрам ужо ў бліжэйшай будучыні трэба будзе шукаць шляхі для ўзмацнення баявых магчымасцей падраздзяленняў, павышэння вывучкі і зладжанасці органаў кіравання і войскаў у цэлым, падрыхтаваць і абучыць падначаленых сучасным спосабам вядзення ўзброенай барацьбы. Як вынікае з вопыту канфлікту ва Украіне, тры асноўныя складнікі - гэта беспілотныя лятальныя апараты, контрбатарэйная і радыёэлектронная барацьба. На гэтым вопыце неабходна вучыцца, упэўнены Прэзідэнт: "Мы нешта асвоілі, трэба гэта ўдасканальваць. Без гэтага сучаснай вайны не бывае".

Задача любога ваеннаслужачага, зразумела, абараняць Радзіму, але трэба і разумець, што за спінамі ваенных стаяць сем'і, дзеці, старыя і жанчыны - увесь народ, звярнуў увагу Аляксандр Лукашэнка. "Яны вераць у нас. Іх вера - наша сіла", - падкрэсліў Кіраўнік дзяржавы.

Ён прывёў зусім нядаўні прыклад, калі ўскладнілася сітуацыя на беларуска-ўкраінскай граніцы. "Я не сказаў бы, што абвастрылася, але яна выйшла за рамкі той, якая была. Мы заўважылі, што ўкраінцы пачалі канцэнтраваць пэўныя войскі, у тым ліку здымаючы з фронту, самыя падрыхтаваныя баявыя войскі, на прыгранічча, - нагадаў Кіраўнік дзяржавы. - Мы не ўтойвалі ад людзей. Мы падавалі ў спакойным рытме і рэчышчы гэту інфармацыю. Але людзей гэта насцярожыла. Запомніце, людзі заўсёды больш адчувальныя, і яны бачаць крыху больш, чым мы".

"Нам давялося абяцаць людзям і рэагаваць. Усе, хто прымаў удзел у гэтым рэагаванні, заслугоўваюць самай высокай ацэнкі. Я вам за гэта вельмі ўдзячны. Але вопыт у тым, што страляць - гэта крайні метад. Гэта наш метад, мы ім павінны валодаць, але гэта крайняя мера. Трэба заўсёды вучыцца дамаўляцца. У тым ліку і ваенным. У гэтым канфлікце ўсю ролю выканалі ваенныя. Мы дыпламатаў не прыцягвалі. Але працавалі мы дыпламатычнай мовай. Дабіліся поспехаў", - падкрэсліў беларускі лідар.

Кіраўнік дзяржавы адзначыў, што вайна на гэтым напрамку не патрэбна і ўкраінскаму боку. "Нам яна тым больш не патрэбна. Яны адвялі ўзброеныя сілы, мы адвялі свае войскі", - сказаў Аляксандр Лукашэнка.

Прэзідэнт яшчэ раз падкрэсліў, што Беларусі вайна не патрэбна, але краіна гатова ў выпадку неабходнасці абараніць свае рубяжы: "Памятайце і ведайце, што мы не хочам ваяваць. Мы будзем ваяваць толькі тады, калі чужы бот ступіць на нашу зямлю. Мы будзем рабіць усё дыпламатычным шляхам, каб урэгуляваць нашы адносіны, перш за ўсё з суседзямі".

"Гэтак мы прапануем урэгуляваць нашы адносіны і з Польшчай, і з Літвой. Але пакуль узаемнасці не бачым. Таму нам даводзіцца вуха трымаць востра і порах трымаць сухім на паўночна-заходнім і заходнім напрамках", - дадаў беларускі лідар.

Аляксандр Лукашэнка павіншаваў выпускнікоў ваенных ВНУ з вельмі важным этапам у жыцці - заканчэннем вучобы. А тых, хто атрымаў генеральскія пагоны, - з прысваеннем высокага звання, якое да многага абавязвае. Ён выказаў упэўненасць у тым, што для кожнага з прысутных на цырымоніі абавязак, гонар і Радзіма - не проста словы, а сэнс усяго жыцця. Прэзідэнт пажадаў усім моцнага здароўя, дабра і дабрабыту, а таксама вялікіх поспехаў у святой справе служэння Айчыне. "І самае галоўнае - моцнага вам тылу. З боку дзяржавы ў бліжэйшыя два гады будзе зроблена ўсё для таго, каб у вас тыл быў моцным", - дадаў Прэзідэнт.

Кіраўнік дзяржавы ўручыў спецыяльныя лісты аб аб'яўленні Падзякі Прэзідэнта Рэспублікі Беларусь выпускнікам, якія скончылі ваенныя навучальныя ўстановы з выдатнымі паказчыкамі ў вучобе.

Прэзідэнт таксама ўручыў генеральскія пагоны прадстаўнікам вышэйшага афіцэрскага складу: пагоны генерал-маёра - палкоўнікам Аляксандру Быкаву, Ігару Казлову, Вадзіму Сураву і Руслану Чэхаву, пагоны генерал-маёра ўнутранай службы - палкоўніку ўнутранай службы Сяргею Салановічу, пагоны генерал-маёра юстыцыі - палкоўніку юстыцыі Аляксею Аляшкевічу. Начальніку Гомельскай мытні Андрэю Місючэнку прысвоена персанальнае званне дзяржаўнага саветніка мытнай службы ІІІ рангу.

На заканчэнне ўрачыстай цырымоніі Кіраўнік дзяржавы яшчэ раз павіншаваў прысутных з гэтым асаблівым днём у іх жыцці і падкрэсліў: "Мы жывём у год 80-годдзя вызвалення нашай краіны ад фашызму. Гэта накладае на нас сур'ёзны адбітак, і мы павінны быць дастойнымі тых людзей, якія падарылі нам тое жыццё, якое мы з вамі жывём".