Наведванне 56-га зенітнага ракетнага палка ў Лунінецкім раёне

Прэзідэнт Беларусі Аляксандр Лукашэнка 13 ліпеня ў Лунінецкім раёне Брэсцкай вобласці наведаў месца дыслакацыі 56-га зенітнага ракетнага палка.

У першую чаргу Кіраўнік дзяржавы прыехаў на камандны пункт палка, дзе яму далажылі аб абстаноўцы пры выкананні задач баявога дзяжурства па проціпаветранай абароне.

Потым - пераезд у штаб палка. Аляксандр Лукашэнка агледзеў тэрыторыю, азнаёміўся з інфраструктурай. Заехалі таксама ў аўтамабільны парк палка. Тлумачэнні даваў Міністр абароны.

У штабе была арганізавана нарада па пытаннях забеспячэння ваеннай бяспекі краіны на паўднёвым аперацыйным напрамку. Удзельнікі нарады - Дзяржсакратар Савета Бяспекі Беларусі Аляксандр Вальфовіч, Старшыня КДБ Іван Тэртэль, Міністр унутраных спраў Іван Кубракоў, Міністр абароны Віктар Хрэнін, начальнік Генеральнага штаба Узброеных Сіл Павел Муравейка, Старшыня Дзяржпагранкамітэта Канстанцін Моластаў, камандуючы сіламі спецыяльных аперацый Узброеных Сіл Вадзім Дзенісенка, камандуючы ВПС і войскамі ППА Андрэй Лук'яновіч.

У ходзе нарады Аляксандр Лукашэнка заявіў аб ліквідацыі напружанасці на граніцы з Украінай пасля значнай эскалацыі абстаноўкі некаторы час таму, на што беларускі бок вымушаны быў рэагаваць.

"Мне Камітэт дзяржбяспекі дакладваў і ваенная разведка аб тым, што пасля нашай пэўнай работы ўкраінцы свае ўзброеныя сілы і дадатковыя войскі, якія яны перакінулі да нашай граніцы (гэта было нямала тысяч чалавек), ад граніцы адвялі і наогул вывелі з зоны беларуска-ўкраінскай граніцы. Гэта значыць, тыя войскі, якія ўзмацнялі іх дзеянні, з граніцы выйшлі, - заявіў Кіраўнік дзяржавы. - Калі гэта так… А гэта дакладна так. Таму што ў хлопцаў пытаўся і гэтага палка (Прэзідэнт у Лунінецкім раёне наведаў месца дыслакацыі 56-га зенітнага ракетнага палка). Не толькі Міністр абароны, але і яны кажуць аб тым, што цяпер у нас ускладненняў ніякіх няма з украінцамі. І я спадзяюся, што і не будзе", - дадаў Аляксандр Лукашэнка.

Кіраўнік дзяржавы падкрэсліў, што беларускі бок не хацеў гэтага абвастрэння, і яно яму абсалютна не патрэбна. "Тым больш гэта не патрэбна Украіне. У іх хапае гэтых праблем", - заўважыў ён.

Прэзідэнт нагадаў, што сур'ёзнае абвастрэнне і ўскладненне на паўднёвых рубяжах было заўважана некалькі тыдняў таму. І гэта выклікала сур'ёзную трывогу ў насельніцтва, на што быў вымушаны адрэагаваць і Кіраўнік дзяржавы. На ўрачыстым сходзе ў гонар Дня Незалежнасці пасля пратакольнага выступлення Аляксандр Лукашэнка выказаўся і на гэту тэму.

"Я вымушаны быў, наколькі гэта магчыма, супакоіць насельніцтва, што ніякай вайны не будзе, мы не дапусцім эскалацыі на нашай граніцы. У рэшце рэшт, гэта наша справа - людзей у пагонах - зрабіць так, каб было спакойна і нашы людзі маглі працаваць і займацца ўборкай ураджаю сёння (ураджай нядрэнны), - звярнуў увагу ён. - Гэта значыць, была сур'ёзная трывога нашага насельніцтва. У сувязі з гэтым было прынята рашэнне аб вывадзе асобных падраздзяленняў нашых на граніцу. І сіл спецыяльных аперацый. Былі дадаткова мабілізаваны і пераведзены на ўзмоцненую ахову граніцы нашы пагранічнікі. Хоць яны і так цяпер сур'ёзна перагружаны. Тым не менш краіну трэба абараняць - па апошнім метры зямлі толькі пагранічнік ходзіць, таму была ўзмоцнена ахова дзяржаўнай граніцы з боку пагранічных войскаў".

"Што датычыцца дадатковай мабілізацыі сіл спецыяльных аперацый, Аляксандр Лукашэнка таксама адзначыў, што ўмовы і так былі даволі напружаныя: "Дастаецца тут на гэтай паўднёвай граніцы".

"Гэта значыць, мы актывізаваліся, і нашы войскі таксама былі актывізаваны", - канстатаваў Кіраўнік дзяржавы.

Дээскалацыя напружанасці, якая адбылася ў выніку, сведчыць, што абяцанні Кіраўніка дзяржавы аб тым, што ваенныя людзі забяспечаць мір і бяспеку, былі выкананы. "Як я гаварыў, я паабяцаў людзям, што з сітуацыяй мы справімся", - рэзюмаваў беларускі лідар.

Як паведамлялася, сітуацыя на паўднёвых рубяжах - адна з гарачых тэм апошняга часу. Па адпаведных пытаннях Аляксандр Лукашэнка падрабязна выказваўся 2 ліпеня на ўрачыстым сходзе да Дня Незалежнасці. "Мы ні ў якім разе не павінны дапусціць ніякай эскалацыі і ніякага абвастрэння. Я хачу, каб украінскае кіраўніцтва гэта пачула. Канцэнтрацыя ўзброеных сіл, якая нават нічога не значыць, вельмі небяспечная ў час баявых дзеянняў. Мы прааналізавалі сітуацыю. Добра разумеем, што ніякага абвастрэння нам не патрэбна. Мы заўсёды аб гэтым гаварылі. Украінцы разумеюць, што мы адкажам", - сказаў Кіраўнік дзяржавы.

Аляксандр Лукашэнка папрасіў украінцаў не сваволіць і не жартаваць з агнём. "Гэта вельмі небяспечна", - адзначыў ён.

Прэзідэнт заяўляў, што беларускія пагранічнікі былі пераведзены на ўзмоцненую ахову дзяржаўнай граніцы. Былі таксама разгорнуты сілы спецыяльных аперацый. У высокай баявой гатоўнасці знаходзіліся войскі ваенна-паветраных сіл і проціпаветранай абароны як Беларусі, так і Расіі. На пазіцыі былі выведзены ракетныя сістэмы "Паланэз" і "Іскандэр". "Ніякіх чырвоных ліній. Удар усімі відамі ўзбраенняў па загадзя вызначаных цэлях", - недвухсэнсава папярэдзіў беларускі лідар.

Разам з гэтым Аляксандр Лукашэнка заклікаў народ залішне не турбавацца і зноў, як і неаднаразова раней, папрасіў кожнага спакойна займацца сваёй справай. "Усё, аб чым я гавару, - гэта мой клопат і людзей у пагонах. Мы справімся. Я вам гарантую, што ніякіх сутыкненняў на граніцы з Украінай мы не дапусцім. Іх не будзе", - заявіў Кіраўнік дзяржавы на ўрачыстым сходзе ў пачатку ліпеня.

У час нарады ў штабе 56-га зенітнага ракетнага палка Аляксандр Лукашэнка  даручыў адвесці войскі на паўднёвых рубяжах у месцы пастаяннай дыслакацыі.

"Хачу, каб людзі ведалі (я абсалютна упэўнены і давяраю нашай разведцы): сітуацыя стабілізавана на беларуска-ўкраінскай граніцы. Войскі іх адведзены. Таму, хлопцы, паглядзіце, і нашы войскі трэба адводзіць з граніцы. Каб яны разумелі (як мы дамаўляліся), што мы не збіраемся ваяваць і не збіраемся тут канцэнтраваць свае Узброеныя Сілы, акрамя сіл спецыяльных аперацый", - заявіў беларускі лідар.

Аляксандр Лукашэнка ў сувязі з гэтым звярнуўся з даручэннем да камандуючага сіламі спецыяльных аперацый Узброеных сіл Вадзіма Дзенісенкі: "Ты паглядзі сваіх ваенных. Там, дзе трэба, дзе мы абазначылі пункты, дзе павінны знаходзіцца твае хлопцы (сіл спецыяльных аперацый), на ратацыйнай аснове. Асабліва ў спёку глядзі, каб ваенным было неяк зручней. На ратацыйнай аснове нам трэба там некалькі чалавек, каб яны знаходзіліся ў гэтых пунктах. Астатніх - у месцы пастаяннай дыслакацыі адводзь".

Прэзідэнт таксама даручыў паглядзець па Міністэрстве абароны ў цэлым. "Калі трэба будзе адвесці недзе войскі - адводзьце. Не павінна быць ніякіх лішніх мерапрыемстваў", - сказаў ён.

Разам з тым Аляксандр Лукашэнка ўсіх папярэдзіў, што трэба не прапусціць магчымыя пагрозы на заходнім напрамку. "І час, які прайшоў пасля таго, як я аб гэтым гаварыў, пацвярджае тое, што нам трэба не прапусціць з захаду. Вось там ідзе актывізацыя. Таму паўночна-заходні напрамак - там хлопцы павінны быць гатовы да ўсяго. Яны нас правакуюць, каб уцягнуць у гэтыя разборкі, у гэту вайну. Нельга гэтага дапусціць", - падкрэсліў беларускі лідар.

У ходзе нарады Кіраўнік дзяржавы заявіў аб планах абмеркаваць з Прэзідэнтам Расіі Уладзімірам Пуціным далейшыя крокі па Украіне.

"Як бы яны (ва Украіне. - Заўвага) на нас скоса ні глядзелі. Ну ледзь не ворагамі называюць. Мы ніякія не ворагі для ўкраінцаў. Я ўжо шмат разоў гаварыў. Гэта нашы людзі. Такія ж людзі, як мы, як рускія, расіяне. Нам трэба хутчэй дамаўляцца. Аказваецца, можна дамовіцца. Але галоўнае, трэба размаўляць. Калі няма дыялогу, размовы - гэта будзе эскалацыя і будуць гінуць людзі", - падкрэсліў беларускі лідар.

Аляксандр Лукашэнка на прыкладзе цяперашняга гарачага надвор'я ў Беларусі прывёў просты прыклад, чаму лепш не ваяваць: "Як ваяваць пры саракаградуснай гарачыні… На вуліцу страшна выйсці, а ім жа трэба поўную экіпіроўку, яшчэ і бронекамізэльку надзець. Гэта пакуты для хлопцаў страшэнныя. А яшчэ гінуць жа. А гэта нечыя дзеці".

"Таму вось прыклад (дзеянні па дээскалацыі абстаноўкі ў раёне беларуска-ўкраінскай граніцы. - Заўвага) таго, што, размаўляючы, можна дамовіцца. Гэта сведчыць аб тым, што ва Украіне нармальных людзей дастаткова. Асабліва сярод ваенных. Дамовіліся. Думаю, добры прыклад для ўкраінцаў. Расіяне гатовы садзіцца за стол перагавораў і дамаўляцца. Абмяркоўваць і дамаўляцца. Пакуль, падштурхоўваемыя натаўцамі (мы гэта бачым па апошняй нарадзе блока НАТА), украінцы ваююць. Ваююць да апошняга ўкраінца. Вельмі шкада. Але трэба размаўляць. Я думаю, мы ў бліжэйшы час на сустрэчы з Уладзімірам Уладзіміравічам Пуціным абмяркуем гэтыя праблемы і падумаем, як мы будзем дзейнічаць далей", - заявіў Аляксандр Лукашэнка.