Дабрачыннае свята ў рамках акцыі "Нашы дзеці"

Кіраўнік дзяржавы Аляксандр Лукашэнка 29 снежня прыняў удзел у дабрачынным свяце ў рамках акцыі "Нашы дзеці". На галоўную ёлку краіны Прэзідэнт прыйшоў з падарункамі для Дзеда Мароза і Снягурачкі.

Традыцыйна перад паказам Кіраўнік дзяржавы выходзіць на сцэну і звяртаецца да маленькіх гледачоў. Затым Дзед Мароз і Снягурачка адкрываюць свята. На гэты раз Прэзідэнт, перад тым як падысці да мікрафона, уручыў падарункі казачным персанажам.

"Тлумачу: усе мы пад Новы год, а больш за ўсё вы, просіце нешта ў Дзеда Мароза. "Падарункаў дай, дай, Дзед Мароз" і іншае. А Дзеду Марозу нічога? Таму я вырашыў, што будзе правільна, калі мы сёння ад майго і ад вашага імя павіншуем нашага Дзеда Мароза і Снягурачку і ўручым ім падарункі", - сказаў Аляксандр Лукашэнка.

Што ж знаходзілася ў падарачных наборах? "Там такія напіткі навагоднія. Для дарослых. Вы ведаеце. Ведаеце, так? І ласункі", - растлумачыў Прэзідэнт.

"Дарагія сябры! Мае юныя сябры! Я хачу перш за ўсё вас павіншаваць з надыходзячым Новым годам. Святам чараўніцтва, весялосці і падарункаў, якое вы пачынаеце сустракаць раней за ўсіх - як толькі запальваюцца ёлкі ў дзіцячых садах і школах", - сказаў Аляксандр Лукашэнка. 

Кіраўнік дзяржавы падкрэсліў, што любая краіна заўсёды моцная сваімі традыцыямі: "Калі мы гаворым - краіна суверэнная, незалежная, значыць, павінны быць свае традыцыі. Спрадвечныя, беларускія. У нас гэтых традыцый шмат". 

Яшчэ адной такой традыцыяй, адзначыў ён, стаў навагодні баль у Палацы Незалежнасці. Аляксандр Лукашэнка нагадаў яго гісторыю: праводзіць гэта свята напярэдадні Новага года вырашылі некалькі гадоў таму па аналагу вядомага Венскага балю. Першапачаткова аўстрыйцы так і прапаноўвалі: баль у Палацы Незалежнасці павінен стаць Венскім. "Але тады я сказаў: "Чаму Венскі баль? Мы самі правядзём беларускі навагодні баль". І гэта стала традыцыяй", - адзначыў Прэзідэнт. 

"Сёння ў нас чарговая традыцыя - навагодняя ёлка з Прэзідэнтам. Будуць і іншыя прэзідэнты, але гэта традыцыя застанецца. Калі, вядома, вы гэтага захочаце, - сказаў Аляксандр Лукашэнка. - Скажу вам шчыра: штогод напярэдадні Новага года ўсе мы - арганізатары, удзельнікі святочных мерапрыемстваў - рыхтуемся да сустрэч з вамі, робім гэта загадзя і вельмі-вельмі адказна. Калі нехта думае, што перад дзецьмі лёгка выступаць, лёгка для іх арганізоўваць мерапрыемствы, - гэта няпраўда. Спытайце ў сваіх выхавальнікаў, настаўнікаў, якія з вамі знаходзяцца, і яны вам раскажуць, што самае складанае, самае цяжкае - гэта падрыхтавацца да сустрэчы з дзецьмі. Асабліва напярэдадні Новага года". 

Таму Новы год - гэта свята, якое падахвочвае кожнага дарослага стаць чараўніком, заявіў Кіраўнік дзяржавы. "А што робяць чараўнікі? Здзяйсняюць жаданні. Яшчэ адна традыцыя, якая зарадзілася ў нашай суверэннай, незалежнай Беларусі, называецца "Нашы дзеці". І асабліва ў Новы год, у гэтыя святочныя дні, усе дарослыя, прадпрымальнікі, кіраўнікі прадпрыемстваў, дэпутаты, дзяржслужачыя, ідуць да дзяцей - у дзіцячыя дамы, інтэрнаты, школы, проста ў дамы сямейнага тыпу - і радуюць нашых дзетак і ўсіх, хто там жыве, навагоднімі падарункамі", - расказаў Прэзідэнт. 

Кіраўнік дзяржавы адзначыў, што гэта акцыя таксама стала добрай традыцыяй, укаранілася ў свядомасці народа і яе нельга загубіць. "Яе трэба прадоўжыць да старога Новага года, але ўжо мы павінны пайсці разам з вамі да нашых старых людзей, якія сёння адзінокія. Ёсць яшчэ і такія, пра якіх забылі дзеці. І часам дзеці нябедныя. Але гэта старыя людзі. Мы ўсе будзем старымі. І нават вы. Таму старых людзей не трэба забываць. І хацелася б, каб гэты старт "Нашы дзеці", калі ідзём з падарункамі да вас, прадоўжыўся і скончыўся ў Новы год (а лепш, хай не заканчваецца), каб мы прыйшлі да нашых старых і ўручылі ім падарункі, павіншаваўшы з Новым годам і Нараджэннем Хрыстовым", - падкрэсліў беларускі лідар.

"Мы вельмі хочам, каб усе падрыхтаваныя сюрпрызы і падарункі вам спадабаліся. Для нас гэта вельмі важна. А самі жадаем толькі аднаго - убачыць вашы ўсмешкі і ведаць, што вы жывяце ў міры і бяспецы. Калі дзіця ўсміхаецца, значыць, дзяржава існуе і грамадства здаровае. І, вядома, у нас баліць сэрца за мільёны іншых дзяцей. Я вельмі хачу, каб вы гэта асабліва засвоілі. Дзяцей, якія загадваюць пад Новы год не новую цацку і нейкі гаджэт, як гэта прынята цяпер, як мы робім гэта. А памятаць аб тых дзецях, якія просяць міру, просяць ежы, паесці, просяць, каб было цёпла ў доме. А гэта ж элементарныя рэчы, якія абавязаны быць у жыцці кожнага чалавека, асабліва дзіцяці. Падкрэсліваю: у свеце вельмі шмат дзяцей, якія не маюць дамашняга цяпла. Шмат дзяцей, якія хочуць паесці і проста спакойна жыць, каб на іх зямлі быў мір. Вось аб гэтых людзях, аб гэтых дзецях мы павінны памятаць заўсёды. Калі будзем памятаць, то гэта бяда ніколі не прыйдзе на нашу зямлю", - сказаў Аляксандр Лукашэнка.

"На шчасце, у вас, маленькіх беларусаў, іншыя мары - дзіцячыя. Няхай яны заўсёды будуць такімі, і няхай гэтыя мары абавязкова здзяйсняюцца. Гэта і ёсць чараўніцтва, якога ўсе так чакаюць пад Новы год", - дадаў Кіраўнік дзяржавы.

Паводле слоў Прэзідэнта, аб гэтым і расказвае прыгожая легенда пра сімвал Беларусі - зубра. Яна і была пакладзена ў аснову сённяшняга паказу.

"Ад усяго сэрца яшчэ раз віншую ўсіх вас, маленькіх і ўжо дарослых - будучае нашай Беларусі, вашых педагогаў, выхавальнікаў, настаўнікаў, вашых бацькоў з Новым годам! Я жадаю вам выдатнага настрою, моцнага здароўя і, самае галоўнае, поспехаў у вучобе. Вучоба для вас - самая галоўная задача на гэтым этапе вашага жыцця. А цяпер з вялікім задавальненнем уступаю гэту сцэну нашым гаспадарам - Дзеду Марозу і Снягурачцы", - сказаў беларускі лідар.