Нарада па пытаннях удасканалення ўступнай кампаніі ў ВНУ

  • 15
  • 11:36

Прэзідэнт Беларусі Аляксандр Лукашэнка 2 снежня сабраў нараду па пытаннях удасканалення ўступнай кампаніі ў ВНУ.

"Уступная кампанія ў ВНУ не павінна быць латарэяй або ўдачным збегам акалічнасцей для асобных абітурыентаў", - заявіў Кіраўнік дзяржавы.

Аляксандр Лукашэнка нагадаў, што папярэдні раз размова па пытаннях адукацыі адбылася ў жніўні бягучага года. "Тады ў ходзе абмеркаванняў мной была пастаўлена Адміністрацыі Прэзідэнта і Міністэрству адукацыі адна канкрэтная задача. Дадаткова прапрацаваць выкладзеныя ў абноўленых Кодэксе аб адукацыі і Правілах прыёму падыходы да арганізацыі падагульняючай атэстацыі за курс сярэдняй школы і правядзення ўступнай кампаніі ў ВНУ, - нагадаў Кіраўнік дзяржавы. - Мы ўзялі паўзу, каб сур'ёзна абдумаць, ці правільна робім. Ці адпавядаюць нашы падыходы і ў якой меры майму ключавому патрабаванню - убачыць кожнага абітурыента". 

Прэзідэнт падкрэсліў, што пры гэтым неабходна забяспечыць справядлівыя адносіны і стварыць аднолькавыя магчымасці для атрымання адукацыі ў вышэйшых навучальных установах для ўсіх, хто паступае. 

Міністэрствам адукацыі і паралельна Адміністрацыяй Прэзідэнта праводзіліся грамадскія абмеркаванні, апытанне педагогаў, бацькоў, усіх зацікаўленых. "Вельмі важна, каб гэта апытанне - яго вынікі - не падганяліся пад ваша меркаванне. Словам, як мне дакладваюць, работа была маштабная. Таму хацелася б пачуць аб гатоўнасці сістэмы адукацыі, мясцовых органаў улады, ВНУ да запланаваных новаўвядзенняў", - пацікавіўся Кіраўнік дзяржавы. 

Ён паставіў пытанне, ці ўсё зроблена, каб запусціць новы механізм, як прадугледжваецца, з 2023 года і ці ёсць нейкія праблемы ў сувязі з гэтым. Кіраўніка Адміністрацыі Прэзідэнт папрасіў далажыць, наколькі аптымальныя гэтыя падыходы цяпер, якія даюць перавагі для сістэмы адукацыі і краіны ў будучым, ці не нясуць яны патэнцыяльных праблем. 

"Вы павінны былі прааналізаваць усе рызыкі і перавагі новых правіл з улікам грамадскай думкі. Далажыце. Яшчэ раз звяртаю ўвагу прысутных: узнятыя пытанні датычацца непасрэдна нашых людзей, мы не павінны сваімі рашэннямі нікога страціць і не дай бог кагосьці адштурхнуць", - сказаў беларускі лідар. 

Ён падкрэсліў, што задача дзяржавы - забяспечыць моладзі найбольш шырокія магчымасці для прафесійнага станаўлення і развіцця ў Беларусі. 

"Пра тых, хто шукае сірочага хлеба за мяжой, мы сёння гаварыць не будзем", - дадаў Аляксандр Лукашэнка. 

Кіраўнік дзяржавы прапанаваў усім выказвацца, калі ў іх ёсць нейкія сумненні ў прымаемых рашэннях або яны бачаць патэнцыяльныя праблемы. 

"Часу ў нас наогул няма. Часу не засталося. Тут і цяпер нам трэба сфармуляваць механізм работы сферы адукацыі на перспектыву. Пастаянныя рэфармаванні і ўдасканаленні пасля сённяшняга абмеркавання павінны быць спынены! Акрамя падручнікаў, якія вы будзеце ўдасканальваць, рэфармаваць, новыя пісаць, старыя мадэрнізаваць", - сказаў Аляксандр Лукашэнка. - Наогул, гэта ўжо абурае нашых людзей (частыя змяненні ў сферы адукацыі. - Заўвага). І мяняць правілы гульні пастаянна нельга. Давайце нарэшце паставім кропку ў гэтай зацяжной размове і пачнём карпатлівую працу".

У час нарады Міністр адукацыі Андрэй Іванец далажыў аб асноўных навацыях уступнай кампаніі ў 2023 годзе. Цяпер выпускнікам трэба будзе здаваць два цэнтралізаваныя экзамены (па рускай або беларускай мове і па прадмеце на выбар), а таксама цэнтралізаванае тэсціраванне. Прадугледжваецца, што гэта дасць магчымасць не толькі аб'ектыўна ацаніць веды, атрыманыя вучнямі ў школах, але і дапаможа ім зрабіць больш усвядомлены выбар прафесіі. Да гэтага часу выпускнікі маглі здаваць 4 цэнтралізаваныя тэсціраванні, і многія з іх прыносілі дакументы ў тую ВНУ, куды праходзілі па балах.

Аляксандр Лукашэнка не стаў адхіляць усе выказаныя прапановы. Але як Прэзідэнт быў абавязаны паставіць пад сумненне найбольш важныя з іх. Напрыклад, пытанні ў Кіраўніка дзяржавы выклікала форма здачы цэнтралізаванага экзамену ў школах: абавязковай стане здача экзамену па мове, другі прадмет будуць выбіраць навучэнцы. Выбіраць ім давядзецца з тых прадметаў, па якіх раней прадугледжвалася ЦТ. Прэзідэнт спытаў, ці дапаможа гэта ацаніць агульны ўзровень ведаў школьнікаў, калі кожны з іх будзе здаваць экзамен па тым прадмеце, які засвоіў лепш за ўсё. "Так, нейкі ўзровень будзе. Мы школу падштурхнём. Але ў цэлым мы яго ведаць не будзем", - адзначыў Аляксандр Лукашэнка.

Як растлумачылі ў час нарады, агульны ўзровень ведаў выпускнікоў можна будзе ацаніць па сярэднім бале атэстата - гэты паказчык таксама будзе важны для іх, паколькі ўлічваецца пры паступленні.

Міністэрства адукацыі прапануе праводзіць цэнтралізаваны экзамен за межамі школ. У буйных гарадах і раёнах ужо вызначаны месцы для гэтага. Прымаць экзамен будуць у аўдыторыях каледжаў і ўніверсітэтаў. Паколькі не ў кожным населеным пункце ёсць гэтыя навучальныя ўстановы, частку школьнікаў давядзецца падвозіць для здачы экзамену ў іншыя раёны або гарады. Кіраўнік дзяржавы пацікавіўся, наколькі дарэчы гэта навацыя.

"Я не гатовы сказаць, што добра, што вучні з Крычава, якія здаюць школьныя экзамены, паедуць у Магілёў. Гэта неяк дзіўна, - лічыць Прэзідэнт. - Няўжо мы ў раённым цэнтры не можам сабраць выпускнікоў і правесці экзамен? Каму мы там не давяраем?"

Паводле слоў Андрэя Іванца, па краіне вызначаны 93 пункты для здачы цэнтралізаванага экзамену. Некаторыя з іх будуць дзейнічаць як міжраённыя. "Улічваючы, што сёння ў нас каля 60 тысяч школьнікаў знаходзяцца на падвозе ў сельскай мясцовасці, выезд на цэнтралізаваны экзамен дадатковага стрэсу не створыць", - упэўнены Міністр.

"Вы маеце рацыю ў сваіх развагах. Але ў цэлым гэта не пераканаўча, - адказаў Аляксандр Лукашэнка. - Гэта павінна быць ідэалагічная кампанія. Чаму мы яе павінны з Дрыбіна забраць у Горкі, напрыклад? Што дрэннага ў тым, што вы нарэшце павылазіце з кабінетаў і пабудзеце на гэтым экзамене? Што за праблема пракантраляваць? Вы ўжо надумана, з такім недаверам да гэтага ставіцеся. Трэба нам сур'ёзна падумаць і не сеяць, груба кажучы, варожасць паміж людзьмі. Трэба адысці ад гэтай надуманасці і быць бліжэй да зямлі. Падумайце. Я лічу, што экзамены мы павінны праводзіць у раённым цэнтры максімум, не вышэй. Але цягнуць іх вышэй, дзе будзе каледж і ўніверсітэт, можа, не варта".

Як расказала першы намеснік начальніка галоўнага ўпраўлення па адукацыі Віцебскага аблвыканкама Алена Багдановіч, восенню на базе Гарадоцкага аграрна-тэхнічнага каледжа быў праведзены пробны экзамен па прадмеце на выбар. Туды прывезлі таксама навучэнцаў з Шумілінскага раёна. Самымі папулярнымі прадметамі сталі біялогія, матэматыка і англійская мова.

"Навучэнцы па пропусках, пашпартах праходзяць на пункт цэнтралізаванага экзамену, глядзяць свой прадмет на стэндзе і нумар аўдыторыі - гэта таксама выпадковы выбар. Аўдыторыю выбірае машына. Выпускнік праходзіць у аўдыторыю, там працуюць тры педагогі. Калі гэта, напрыклад, матэматыка, то там будуць працаваць педагогі-гуманітарыі. Задача педагога ў аўдыторыі - правесці інструктаж з вучнямі, расказаць, як запаўняць бланкі адказаў. Два другія адказныя правяраюць па пашпартах, ці тыя дзеці прыйшлі. Ідзе жараб'ёўка месцаў. Затым аргкамісія разносіць пакеты заданняў, і на працягу адведзенага часу выпускнікі працуюць. Здалі работу - мы ўсё гэта ў канверты ўпакавалі і здалі аргкамісіі", - расказала аб ходзе правядзення экзамену Алена Багдановіч.

Ацэньваюцца работы ў Рэспубліканскім інстытуце кантролю ведаў. Бланкі адказаў, як і пасля цэнтралізаванага тэсціравання, праверыць камп'ютар. Затым атрыманая адзнака з улікам гадавой выстаўляецца ў атэстат выпускніка.

"Я спрабую ў цэлым, як вопытны чалавек, ацаніць усю гэту кухню. Як гэта будзе ўспрынята бацькамі, вучнямі. Ці правільна мы зробім, што не ўзварухнём дзяцей, як нас некалі, па ўсіх прадметах, а не тое што па двух" , - растлумачыў сваё патрабавальнае стаўленне да новаўвядзенняў Прэзідэнт.

Пасля дыскусіі Кіраўнік дзяржавы даручыў яшчэ раз узважыць усе за і супраць, узважана падысці да навацый і аформіць усе прапановы ў нарматыўны прававы акт. Пры гэтым, калі раптам у кагосьці ўзнікнуць новыя прапановы або заўвагі, кіраўнік дзяржавы запатрабаваў абавязкова праінфармаваць яго. "Калі будуць альтэрнатыўныя меркаванні, я павінен іх пачуць", - падкрэсліў ён.