Грамадскае аб’яднанне "Беларускі саюз жанчын"

Грамадскае аб’яднанне "Беларускі саюз жанчын" (БСЖ) створана 14 снежня 1991 года. Яно аб’ядноўвае жаночыя арганізацыі па тэрытарыяльнай і прафесійнай прыкметах.

Дзейнасць БСЖ накіравана на садзейнічанне ў абароне правоў і законных інтарэсаў жанчын, сям’і і дзяцей, забеспячэнне дастойнага становішча жанчыны ў грамадстве, павышэнне яе ролі ў грамадска-палітычным, сацыяльна-эканамічным і культурным жыцці краіны.

БСЖ – самая масавая жаночая арганізацыя краіны, якая аб’ядноўвае больш як 162 тыс. жанчын. Яна прадстаўлена ва ўсіх абласных, гарадскіх і раённых цэнтрах.

У радах арганізацыі – члены Савета Рэспублікі і дэпутаты Палаты прадстаўнікоў Нацыянальнага сходу, кіраўнікі рэспубліканскіх органаў дзяржаўнага кіравання, арганізацый і прадпрыемстваў, дзелавых колаў і бізнес-супольнасцей. Пры БСЖ створаны аб’яднаныя арганізацыі ААТ “ААБ Беларусбанк”, ААТ “Белаграпрамбанк”, ААТ "Белінвестбанк", Генеральнай пракуратуры, Міністэрства па надзвычайных сітуацыях, Міністэрства ўнутраных спраў, канцэрна "Беллегпрам", Міністэрства прамысловасці.

БСЖ прадстаўлены ў Нацыянальным савеце па гендарнай палітыцы пры Савеце Міністраў, Нацыянальнай камісіі па правах дзіцяці, Грамадскім савеце пры Міністэрстве ўнутраных спраў. Гэта дае магчымасць арганізацыі актыўна ўдзельнічаць у заканатворчай дзейнасці, павышаць жаночы ўплыў у грамадстве, уносіць істотны ўклад у развіццё краіны.

БСЖ вядзе актыўную дабрачынную і гуманітарную дзейнасць па аказанні дапамогі, у тым ліку жанчынам, сем’ям, дзецям, якія маюць у ёй патрэбу. Акрамя ўдзелу ў агульнарэспубліканскіх акцыях і мерапрыемствах рэалізуе шэраг традыцыйных акцый і праектаў:

  • "Здаровая жанчына – здаровая нацыя" (сумесна з Міністэрствам аховы здароўя). Штогод у гадавіну катастрофы на Чарнобыльскай АЭС у пацярпелыя рэгіёны выязджаюць прадстаўнікі БСЖ і медыцынскія работнікі (анколагі, эндакрынолагі, гінеколагі, кардыёлагі і інш.), якія праводзяць кансультацыі для жанчын.
  • "Моцная сям’я – моцная дзяржава" (сумесна з Міністэрствам інфармацыі). Рэспубліканскі творчы конкурс, у якім штогод удзельнічаюць больш як сотня журналісцкіх творчых работ, прысвечаных праблемам сям’і, дзяцінства і мацярынства.
  • "Жанчына года". Штогадовы рэспубліканскі конкурс, галоўная мэта якога – падтрымка жанчын, якія дабіліся значных поспехаў у розных сферах дзейнасці і прымаюць актыўны ўдзел у жаночым руху.
  • "Сямейныя чытанні". Акцэнтаванне ўвагі грамадства на ўмацаванні сямейных каштоўнасцей і традыцый, павышэнні ролі кнігі і чытання ў выхаванні падрастаючага пакалення і фарміраванні багатага духоўнага свету дзяцей, умацаванні камунікацыі бацькоў з дзецьмі і сувязей паміж пакаленнямі, фарміраванні сямейных традыцый культурнага адпачынку шляхам сумеснага чытання добрых кніг і іншых карысных сямейных заняткаў.
  • "Збяром партфель разам". Аказанне дапамогі малазабяспечаным сем'ям пры падрыхтоўцы да новага навучальнага года.
  • "Музей маці". У Беларусі па ініцыятыве БСЖ створаны музеі маці або куткі мацярынскай славы, якія сталі цэнтрамі культурна-асветнай работы.
  • "Тыдзень бацькоўскай любові". Па ініцыятыве БСЖ у 1998 годзе заснаваны Дзень Маці - 14 кастрычніка. У 2021 годзе заснаваны Дзень бацькі. З 2022 года штогод з 14 кастрычніка па 21 кастрычніка па ўсёй краіне праходзяць мерапрыемствы, прысвечаныя маці і бацьку.
  • Акцыя "Павага. Клопат. Адказнасць", прысвечаная Дню пажылых людзей.
  • Акцыя "Беларусь адзіная" ва ўсіх рэгіёнах краіны, мэта якой - кансалідацыя патрыятычных сіл, прапаганда ключавых дасягненняў суверэннай Беларусі, адкрытая размова па самых актуальных пытаннях інфармацыйнага парадку дня, у тым ліку вострых, якія выклікаюць палеміку.
  • Конкурс "Сям’я года". Праводзіцца сумесна з Міністэрствам працы і сацыяльнай абароны.
  • Акцыя "Дорым радасць" у рамках Дня абароны дзяцей з чэрвеня 2021 года.
  • БСЖ ініцыяваў акцыю "Беларусь памятае. Жаночы твар Перамогі", у час якой праводзяцца мерапрыемствы да гадавіны вызвалення Беларусі ад нямецка-фашысцкіх захопнікаў і да Дня Перамогі. У цэнтры ўвагі жанчыны, іх гераічны і працоўны подзвіг.

  • Штогод паміж Міністэрствам эканомікі, ААТ "Белінвестбанк" і ГА "БСЖ" падпісваецца план мерапрыемстваў па рэалізацыі Пагаднення аб супрацоўніцтве і ўзаемадзеянні па стымуляванні прадпрымальніцкай ініцыятывы жанчын.

З 2022 года штогод БСЖ праводзіць Форум працаўніц сяла.

На базе інстытута дзяржаўнай службы Акадэміі кіравання пры Прэзідэнце Рэспублікі Беларусь штогод члены ГА "БСЖ" вучацца па адукацыйнай праграме павышэння кваліфікацыі "Жаночае лідарства ў інавацыйным развіцці сучаснага беларускага грамадства".

З сакавіка 2023 года пад эгідай БСЖ арганізаваны на пастаяннай аснове збор сродкаў для лячэння дзяцей з рэдкімі захворваннямі, што нясуць пагрозу жыццю, і хранічнымі захворваннямі.

ДАДОМУ.by. Адзіны інтэрнэт-партал стаў яркім прыкладам дзяржаўна-прыватнага партнёрства на карысць сямейнага ўладкавання дзяцей, якія засталіся без апекі бацькоў. У яго стварэнні прынялі ўдзел БСЖ, Міністэрства адукацыі, Міністэрства аховы здароўя, Міністэрства працы і сацыяльнай абароны.

За плённую работу па ўмацаванні інстытута сям’і, ахове мацярынства і дзяцінства, актыўную дабрачынную дзейнасць у 2018 годзе БСЖ прысуджана прэмія Прэзідэнта Рэспублікі Беларусь "За духоўнае адраджэнне".