Сустрэча з маладзёжным актывам

Прэзідэнт Беларусі Аляксандр Лукашэнка 24 кастрычніка правёў сустрэчу з маладзёжным актывам.

У гэтай сустрэчы асаблівы сімвалізм: яна праходзіць напярэдадні 105-гадовага юбілею УЛКСМ і ў дзень 10-годдзя з моманту адкрыцця Палаца Незалежнасці.

Сярод запрошаных на размову з Кіраўніком дзяржавы - актывісты Беларускай рэспубліканскай піянерскай арганізацыі і Беларускага рэспубліканскага саюза моладзі, фіналісткі конкурсу "Міс Беларусь - 2023", ветэраны камсамольскага руху.

Размова Прэзідэнта з маладзёжным актывам доўжылася амаль 2,5 гадзіны. Удзельнікі сустрэчы змаглі задаць пытанні, якія датычыліся грамадскай дзейнасці ў цэлым і ўдзелу ў ёй Аляксандра Лукашэнкі яшчэ да таго, як ён стаў кіраваць дзяржавай, перспектыў развіцця прадпрыемстваў і галін, у прыватнасці аўтамабілебудавання.

"Сустрэча пакаленняў" - так назвалі мерапрыемства яго ўдзельнікі. "Менавіта пакаленняў, таму што тут сабралася каманда не толькі Беларускага рэспубліканскага саюза моладзі. Тут сабраліся і нашы паважаныя ветэраны, і нашы пераемнікі, будучыня саюза моладзі - юныя піянеры", - сказаў першы сакратар ЦК БРСМ Аляксандр Лук'янаў.

Маладзёжны лідар адзначыў яшчэ адзін сімвалізм сустрэчы - яна праходзіць напярэдадні 60-годдзя студатрадаўскага руху ў Беларусі. "Байцы студэнцкіх атрадаў БРСМ у свой час будавалі гэты Палац Незалежнасці", - падкрэсліў ён.

"Вы сказалі, што 10 гадоў Палацу Незалежнасці. Калі шчыра, дзякуючы вам я звярнуў на гэта ўвагу. Я проста выпусціў гэта з-пад увагі. Задума была такая, каб гэта спраектавалі і пабудавалі беларусы", - заявіў Аляксандр Лукашэнка.

У будаўніцтва Палаца Незалежнасці быў уключаны і сам Прэзідэнт. Па яго прапанове тут з'явіўся зімовы сад. "Я люблю прыроду. Трэба беражліва ставіцца да гэтага тварэння. Адсюль і парадак, чысціня ў краіне. Я вельмі строга патрабую, каб гэта было. І я папрасіў, каб спраектавалі тут так званы зімовы сад. Потым, калі я сказаў, што мы будзем рабіць усё самі, паляцелі прапановы. Шмат варыянтаў, але патрабаванне адно - наша з нашага матэрыялу", - сказаў Кіраўнік дзяржавы.

Па даручэнні Аляксандра Лукашэнкі ўжо некалькі гадоў у Палацы Незалежнасці праводзяцца экскурсіі для арганізаваных груп. "Каб яны бачылі, як працуюць не толькі нашы дзяржслужачыя, але і Прэзідэнт", - дадаў ён.

Гаворачы пра камсамольскі рух, Аляксандр Лукашэнка заўважыў, што ў свой час УЛКСМ быў школай для кіруючых кадраў. "Кузня кадраў. І гэта сапраўды было так", - падкрэсліў Кіраўнік дзяржавы.

Адказваючы на пытанне, Прэзідэнт расказаў, як далей плануецца развіваць і добраўпарадкоўваць тэрыторыі вакол Палаца Незалежнасці - так званага квартала беларускай дзяржаўнасці ў раёне плошчы Дзяржаўнага сцяга, Парку Перамогі і Музея Вялікай Айчыннай вайны.

Кіраўнік дзяржавы падкрэсліў, што нічога фундаментальнага на гэтых тэрыторыях больш будаваць не плануецца, таму што побач з Палацам Незалежнасці размешчана важная для жыхароў горада рэкрэацыйная зона. "Нічога мы тут будаваць такога фундаментальнага не будзем. Трэба, каб людзі ў Мінску маглі свабодна дыхаць і адпачываць. Мінск не павінен быць перанаселеным", - сказаў Прэзідэнт.

"Я не прыхільнік перагружаць тэрыторыю, - дадаў Кіраўнік дзяржавы. - Вы бачыце: Мінск, нягледзячы на тое, што гэта цэнтр Еўропы, не захламлены рознымі будынкамі". Адбываецца гэта дзякуючы таму, што ўсе больш-менш значныя будынкі ў сталіцы ўзводзяцца па папярэднім узгадненні з Прэзідэнтам. Мэр Мінска, спецыялісты выпрацоўваюць нейкую канцэпцыю і прапануюць Кіраўніку дзяржавы, пасля чаго, як растлумачыў Прэзідэнт, ідзе доўгі працэс абмеркавання, дыскусій, спрэчак.

Аляксандр Лукашэнка расказаў, што Мінгарвыканкаму дадаткова даручана падрыхтаваць праект добраўпарадкавання - стварэння ўтульнасці на тэрыторыях, якія прылягаюць да Палаца Незалежнасці. Адзін з магчымых варыянтаў, аб якім расказаў Прэзідэнт, - размяшчэнне макетаў вядомых архітэктурных аб'ектаў краіны, напрыклад замкаў і музейных комплексаў.

"Не думаю, што мы тут нешта будзем будаваць", - яшчэ раз абазначыў свой ключавы пасыл Аляксандр Лукашэнка. Хоць, паводле яго слоў, у свой час былі жадаючыя прыватызаваць зямлю на беразе Свіслачы, каб пабудаваць жыллё і на гэтым зарабіць. Але Кіраўнік дзяржавы выказаўся катэгарычна супраць такіх праектаў, каб захаваць для гараджан рэкрэацыйную зону, месца для адпачынку.

Адсутнасць планаў па будаўніцтве датычыцца ў тым ліку і будынка для размяшчэння апарату Усебеларускага народнага сходу. Як растлумачыў Прэзідэнт, раней абмяркоўвалася прапанова аб яго ўзвядзенні побач з Вярхоўным Судом. Але Аляксандр Лукашэнка гэты варыянт не падтрымаў.

"Шмат гавораць аб Усебеларускім народным сходзе: "Пабудуе там сабе чарговую рэзідэнцыю..." Мы нічога не будавалі, - сказаў Прэзідэнт. - Калі УНС пачне працаваць, апарат будзе ў цэлым менш за 30 чалавек. Такога адміністрацыйнага апарату няма нават ні ў адной арганізацыі, у міністэрстве. Цяпер будзе дзевяць чалавек. Потым, магчыма, да 30 (чалавек павялічыцца колькасць апарату УНС. - Заўвага). Трэба нейкае месца і памяшканне".

"Побач з Вярхоўным Судом (маленькі зусім будынак) варыянты мне прапаноўвалі. Цяпер нам гэта не трэба, - растлумачыў Аляксандр Лукашэнка. - Я думаю, дзевяць чалавек могуць у Палацы Незалежнасці, Адміністрацыі Прэзідэнта размясціцца. У нас месца для гэтага хапае. Усё. Больш мы тут (у квартале беларускай дзяржаўнасці. - Заўвага) нічога будаваць не будзем".

На мерапрыемстве прагучала пытанне, ці задаволены Аляксандр Лукашэнка тым, якім атрымаўся будынак Палаца Незалежнасці, і ці ўдалося рэалізаваць усё задуманае.

"Калі абсалютна шчыра, калі б мне пасля гэтай будоўлі давялося будаваць нешта фундаментальнае, знакавае, я зрабіў бы ўсё па-іншаму", - сказаў Кіраўнік дзяржавы.

Паводле яго слоў, ён выкарыстаў бы больш архітэктурных элементаў з мінулага, магчыма, нават старажытнай гісторыі Беларусі. Аднак Аляксандр Лукашэнка ў гэтым выпадку даверыўся меркаванню архітэктараў і праекціроўшчыкаў. "Мяне пераканалі, што гэта павінен быць "хайтэкаўскі" будынак, - адзначыў Прэзідэнт. - Мяне пераканалі зрабіць яго такім, што Палац Незалежнасці ўсё ж такі павінен быць пабудаваны ў такім стылі сучасным. Я пабудаваў бы па-іншаму".

Аляксандр Лукашэнка ў цэлым адзначыў, што ў Мінску няшмат так званых шкляных вышынных будынкаў. Тым не менш яны ёсць, і такія аб'екты будаваліся свядома, паколькі такая архітэктура выклікала захапленне людзей, якія пабывалі ў заходніх краінах. "Небаскробы ў Нью-Ёрку. Мяне яны не прывабліваюць, але, вядома, уражваюць", - прывёў прыклад беларускі лідар.

"У асобных месцах, не перагружаючы нічога, па маім даручэнні яны (шкляныя вышынныя будынкі. - Заўвага) былі пабудаваны", - растлумачыў Прэзідэнт. На цэнтральных праспектах сталіцы гэтыя сучасныя будынкі суседнічаюць з архітэктурай, якую прынята называць сталінскім ампірам. Гэтыя аб'екты падтрымліваюцца ў добрым стане, іх знешні выгляд робіць уражанне нават пасля таго, як мінае шмат гадоў. "Мінуў час - і захапляюцца. Ну, мы ўмеем, як мінуць гады, захапляцца тым, што недаацэньвалі ўчора", - заўважыў наконт гэтага Аляксандр Лукашэнка.

На ўдакладняльнае пытанне, якая ў яго любімая зала ў Палацы Незалежнасці, Прэзідэнт адказаў, што яму падабаецца Зала ўрачыстых цырымоній: "Гэта велічная зала".

Аляксандр Лукашэнка таксама адзначыў пазітыўную атмасферу, якой вылучаецца Зала ўручэння дзяржаўных узнагарод. Там збіраюцца самыя дастойныя, заслужаныя людзі краіны. "Мне цікава з такімі ўнікальнымі людзьмі сустракацца", - сказаў беларускі лідар.

Гаворачы аб тым, які чарговы знакавы аб'ект плануецца пабудаваць у Беларусі, Прэзідэнт назваў маштабны выставачны комплекс каля мінскай кальцавой дарогі. Па форме ён будзе выкананы ў выглядзе бусла, які ляціць. Гэты цэнтр патрэбны, каб людзі прыходзілі і ганарыліся дасягненнямі краіны.

Сярод удзельнікаў сустрэчы былі маладыя супрацоўнікі розных прадпрыемстваў.

Інжынер-сістэматэхнік філіяла "Берасцейскі пекар" Кобрынскага хлебазавода пацікавіўся меркаваннем Кіраўніка дзяржавы аб тым, наколькі высокія тэхналогіі могуць змяніць працу на зямлі, ці здольны яны ў будучым наогул замяніць чалавека.

"Я, можа, вельмі кансерватыўны ў гэтым плане. Чалавека наогул ніколі нішто не зможа замяніць", - адзначыў Прэзідэнт.

Разам з тым ён канстатаваў, што з'яўляецца штучны інтэлект, і па многіх напрамках чалавека ўжо замянілі, і без ІТ цяпер абысціся нельга.

Аляксандр Лукашэнка, у прыватнасці, прывёў у прыклад ваенную сферу, калі на полі бою ўжо ваююць робаты і беспілотнікі без удзелу чалавека. "І яны вельмі небяспечныя. Гэта дарагая рэч. Мы цяпер спрабуем нашу армію чарговы раз мадэрнізаваць, перабудаваць. І ў тым ліку выкарыстоўваем вопыт СВА, - сказаў ён. - Без ІТ-сферы абысціся нельга".

Сфера ІТ развіваецца ў Беларусі па розных напрамках, і сам Кіраўнік дзяржавы ў свой час быў ініцыятарам стварэння Парка высокіх тэхналогій і расказаў аб гісторыі яго ўтварэння і ацэнках замежнымі партнёрамі стварэння гэтага аб'екта. "Гэта цяпер нас спрабуюць прыціснуць, апусціць нашы канкурэнты, праціўнікі", - заўважыў ён.

Акрамя Парка высокіх тэхналогій, ІТ-сфера актыўна развівалася і на прадпрыемствах. "А вазьміце ВПК, космас, Акадэмію навук - там сапраўды касмічныя распрацоўкі", - падкрэсліў Кіраўнік дзяржавы.

"У нас сёння ёсць беспілотныя БЕЛАЗы. Яны працуюць па ўсім свеце", - прадоўжыў Аляксандр Лукашэнка. Ён звярнуў увагу на тое, што распрацоўкамі займаюцца такія ж айцішнікі, як удзельнік сустрэчы, які задаў пытанне.

"У нас ІТ-сектар развіты моцна і ў кампаніях, якія вырабляюць той ці іншы тавар, - адзначыў Прэзідэнт. - Здавалася б, вось ваша кампанія, якая выпякае хлеб, - тут душа, рукі патрэбны, а ІТ-сфера працуе".

Гэта ж датычыцца развіцця сельскай гаспадаркі, жывёлагадоўлі: "У нас ужо створаны малочнатаварныя комплексы, дзе выключна робаты замест даярак працуюць. Пранікненне гэтага тэхналагічнага развіцця на базе IT-сферы ўжо ва ўсіх галінах. Ужо трактар у нас з'явіўся беспілотны. І пілотныя трактары - яны добра працуюць па GPS-навігацыі".

"Усюды ідзе пранікненне. Але замяніць чалавека, асабліва ў блізкім кантакце з прыродай, немагчыма. IT быць. Але не думаю, што ў гэтай сферы можна замяніць чалавека. Машына, якой бы яна ні была, не можа паўтарыць чалавечых пачуццяў, якасцей", - дадаў беларускі лідар.

Пры гэтым Прэзідэнт падкрэсліў, што ўсе новаўвядзенні, звязаныя са штучным інтэлектам, нейрасеткамі, моцна мяняюць грамадства. "Нас чакаюць у сувязі з гэтым цяжкія часы", - сказаў Кіраўнік дзяржавы, звярнуўшы ўвагу на мноства фэйкаў і неабходнасць навучыць моладзь правільна арыентавацца ў інфармацыйным полі.

"Там у вусны могуць укласці любую заразу, гэта значыць, такая штука моцна ўплывае на свет, на ўзаемаадносіны людзей. Тут нам трэба быць вельмі асцярожнымі. Пазбегнуць гэтага мы не можам", - выказаў меркаванне Прэзідэнт.

Кіраўнік дзяржавы лічыць, што гэта вельмі важная, практычна ваенная сфера: "І нам давядзецца тут працаваць".

"Паціху будзем рухацца ў гэтым плане. Але не будзем забываць, што нават ваша пакаленне пражыве той перыяд, калі чалавека немагчыма будзе замяніць, асабліва ў сельскай гаспадарцы. Але там, дзе трэба, выкарыстоўваем ІТ-сферу", - рэзюмаваў Кіраўнік дзяржавы.

Работнік "БЕЛДЖЫ", у прыватнасці, пацікавіўся ў Прэзідэнта, якім ён бачыць далейшае развіццё аўтамабілебудавання.

У снежні "БЕЛДЖЫ" будзе ўжо 12 гадоў. Гісторыя завода пачыналася з невялікай вытворчасці, дзе працавала крыху больш за 50 чалавек. Цяпер - гэта вядомае на ўсю краіну прадпрыемства, тут працуюць амаль паўтары тысячы чалавек. Аўтамабілі Geely карыстаюцца велізарнай папулярнасцю не толькі сярод беларусаў, але і за мяжой. Попыт на іх пастаянна расце.

"Мы краіна аўтамабілістаў. Мы ствараем такія машыны, што любая краіна можа пазайздросціць: і малатанажныя, і сярэднетанажныя, і буйнатанажныя - БЕЛАЗ. МАЗ - сярэдняга класа аўтамабіль па грузападымальнасці", - адзначыў Аляксандр Лукашэнка.

У час урачыстага адкрыцця завода "БЕЛДЖЫ" ў лістападзе 2017 года Прэзідэнт заявіў, што яго мара - вырабляць у Беларусі ўласны легкавы аўтамабіль - ажыццявілася. Партнёрам выступіў кітайскі бок. Сёння беларускія аўтамабілі Geely карыстаюцца вялікай папулярнасцю не толькі на ўнутраным рынку, але і за мяжой. Попыт на іх пастаянна расце.

У Беларусі таксама маюць намер стварыць вытворчасць у супрацоўніцтве з кітайскай "ФАВ Груп". Найбольш вядомы брэнд карпарацыі - легкавы аўтамабіль Hongqi ("Хунцы", перакладаецца як "чырвоны сцяг").

"Прыйшлі. Пачынаем разгортваць новую вытворчасць легкавых аўтамабіляў. Але галоўнае цяпер - лакалізацыя", - сказаў Аляксандр Лукашэнка.

Кіраўнік дзяржавы заявіў, што лакалізацыі цяпер будзе ўдзяляцца асаблівая ўвага. "Трэба атрымліваць свае дэталі для гэтага аўтамабіля. У нас для гэтага ўсё ёсць. У нас некаторыя прадпрыемствы недазагружаны, - адзначыў Аляксандр Лукашэнка. - Так, няпростая задача - вырабіць свой рухавік для легкавога аўтамабіля і каробку перадач. Але мы паставілі перад сабой задачу. У нас ёсць маторны завод - няхай вырабляе, няхай варушыцца. Мы ж робім каробкі, рухавікі для іншых аўтамабіляў. Так, гэта больш тонкая работа, але мы яе зробім".

"Мы будзем будаваць дадатковы цэх па штампоўцы кузава. Дамовіліся з кітайцамі ў гэтым плане. Калі будзе трэба абсталяванне, яны нам дапамогуць. І будзем паціху выходзіць на свой аўтамабіль. Мы купілі ліцэнзію ў іх, гэта значыць, мы ўжо будзем вырабляць BelGee. Ён будзе нават лепшы, чым той, які мы вырабляем. Але на гэта трэба крыху часу. А так, праграма ў нас сур'ёзная: мы павінны забяспечыць сваіх людзей сваім аўтамабілем. Які б ні быў імпартны аўтамабіль - гэта імпартны. Што здарылася - запчасткі і іншае, а гэта - сваё. Трэба, каб было сваё. І мы ідзём да таго, каб мець сваё", - заявіў Прэзідэнт.

Чакаецца, што ў 2023 годзе "БЕЛДЖЫ" вырабіць больш за 60 тыс. аўтамабіляў - гэта ў два разы вышэй за мінулагоднія паказчыкі. А праз некалькі гадоў аб'ёмы вытворчасці павялічацца да 120 тыс. аўтамабіляў у год.

Яшчэ адзін прыярытэт - стварэнне электрамабіля. У Беларусі ёсць пэўныя напрацоўкі ў гэтай галіне, і іх трэба развіваць, сказаў Аляксандр Лукашэнка. "Усё ёсць, акрамя батарэі," - дадаў ён.

"Аўтамабіль у нас будзе. Будзе асноўны добры аўтамабіль, і дадаткова мы яшчэ прыцягваем сюды інвестараў, каб яны выраблялі аўтамабілі", - сказаў Кіраўнік дзяржавы.

У час сустрэчы было адзначана, што Беларусь з'яўляецца экспартна арыентаванай дзяржавай. У сувязі з гэтым у Кіраўніка дзяржавы пацікавіліся, якія ў краіны прыярытэты на міжнародных рынках.

Асаблівую ўвагу Беларусь удзяляе краінам далёкай дугі, у прыватнасці афрыканскаму рынку. "Нас там чакаюць. Яны, вызваліўшыся ад каланіяльнага прыгнёту, вельмі цяпер баяцца, каб іх зноў нехта не паглынуў. І яны - да нас", - адзначыў Аляксандр Лукашэнка.

У прыклад Прэзідэнт прывёў супрацоўніцтва з Экватарыяльнай Гвінеяй. Тут жыве ўсяго пара мільёнаў чалавек, але гэта вельмі багатая дзяржава. А побач Нігерыя з двухсотмільённым насельніцтвам, і Беларусь у перспектыве можа выйсці на гэты рынак.

Прычым беларусы гатовы не проста прадаваць тавары і тэхналогіі ў афрыканскія краіны, але і дзяліцца кампетэнцыямі ў самых розных сферах. "Я гавару: мы навучым вашых людзей гэта рабіць. Мы не як каланіялісты да вас прыйдзем. І вось яны цяпер партыямі прыязджаюць да нас. Яны за ўсё гатовы плаціць, - падкрэсліў Кіраўнік дзяржавы. - Адзінае, мы не можам, як амерыканцы, надрукаваць грошы і даць ім крэдыт пад свае тэхналогіі. Гэта багатыя краіны, але галоўнае для іх - незалежнасць, суверэнітэт. І яны ў нас небяспекі ніякай не бачаць".

Аляксандр Лукашэнка адзначыў, што Беларусь цяпер вельмі запатрабавана на расійскім рынку. Часам нават не хапае спрытнасці, каб задаволіць усе запыты партнёраў. "Адсюль маё такое жорсткае патрабаванне да чыноўніцкага апарату па тых ці іншых напрамках. Трэба варушыцца цяпер, трэба захопліваць рынак. Галоўнае цяпер - час. Пакуль ён працуе на нас, але так не заўсёды будзе", - звярнуў увагу Прэзідэнт.

Беларусь змагла захаваць і развіць савецкія прадпрыемствы, і іх прадукцыя карыстаецца попытам ва ўсходняга суседа. "Расія зразумела, што ў беларусаў усё ёсць. Ліфты - трэба. Мы ўжо не паспяваем пастаўляць і абслугоўваць. Трактары, сельгасмашыны, плугі - трэба. Перапрацоўка прадуктаў харчавання - асноўны наш рынак Расія і Кітай. Мы вырабляем у два разы больш, чым нам трэба", - расказаў Кіраўнік дзяржавы.

Адно з пытанняў ад прадстаўнікоў моладзі датычылася СМІ і журналістаў прэзідэнцкага пула. Аляксандр Лукашэнка расказаў, што назірае работу журналістаў, ацэньвае і часам крытыкуе. "Яны на вачах. Я іх вельмі паважаю", - сказаў Кіраўнік дзяржавы.

Ён адзначыў, што пасля 2020 года з'явіўся нават не прэзідэнцкі, а проста цэлы пул журналістаў, якія зірнулі інакш на падзеі, што адбываліся вакол.

Кіраўнік дзяржавы адзначае таксама тыя ці іншыя недахопы ў рабоце журналістаў, паколькі раней на ідэалагічнай рабоце сам прафесійна займаўся прапагандай і контрпрапагандай. "Я сваіх журналістаў пераконваю, каб не адпіхвацца ад гэтага. Так, мы займаемся прапагандай і агітацыяй. Гэта зразумела. Мы прапагандуем сваё лепшае. Мы агітуем людзей на тое, каб гэта лепшае стварыць, вырабіць. У нас ёсць і павінна быць свая ідэалогія. Ідэалагічны напрамак, ідэалагічная работа", - падкрэсліў беларускі лідар.

Аляксандр Лукашэнка заўважыў, што і ў рабоце Адміністрацыі Прэзідэнта кадры і ідэалогія - гэта два фундаментальныя напрамкі работы.

"І не трэба тут нешта выдумліваць. Так, прапаганда і агітацыя. Лепшага не прыдумалі. Нас ад гэтага адварочвалі для таго, каб кашу зрабіць. А ў нас добрая была сістэма", - заўважыў Кіраўнік дзяржавы.

Адначасова, гаворачы аб ідэалогіі, рабоце грамадскіх аб'яднанняў, у прыватнасці БРСМ, Прэзідэнт падкрэсліў недапушчальнасць фармалізму, які часта быў у савецкія часы. Арганізацыя павінна мець рэальны аўтарытэт.

Вяртаючыся да пытання аб журналістах, Аляксандр Лукашэнка адзначыў, што цяпер, у часы інфармацыйнага процістаяння, менавіта работнікі СМІ аказаліся на пярэднім краі. "Без іх цяпер нікуды. І яны вельмі мне дапамагаюць данесці да вас, да тых, хто цікавіцца жыццём, тую палітыку, якую я спрабую праводзіць", - сказаў ён.

Ветэраны камсамола ў час сустрэчы заўважылі, што ў наступным годзе спаўняецца знакавая дата - 30 гадоў інстытуту прэзідэнцтва ў Беларусі. Яны пацікавіліся ў Аляксандра Лукашэнкі, што было самым складаным для яго як маладога Прэзідэнта ў першыя гады станаўлення суверэннай краіны.

"Гэта былі вельмі цяжкія гады. Вы ж паглядзіце хроніку, калі прыязджалі сюды УНА-УНСА з Украіны, з Польшчы адмарозкі, з Расіі. Пераварочвалі на вуліцах аўтамабілі. Мы ўвесь час з імі змагаліся. І ўсё на грошы Захаду. Таму нам давялося пастаянна змагацца, - падкрэсліў Аляксандр Лукашэнка. - Заўсёды было складана. Заўсёды мы ваявалі на гэтых вуліцах. Мы ўжо ведалі: выбары - гэта абавязкова бойня, асабліва ў Мінску".

Але 2020 год для дзяржавы і для народа стаў самым складаным. Гэта была кульмінацыя ўсіх гэтых баёў і боек, адзначыў Кіраўнік дзяржавы. "Калі б тады пахіснуліся, усё - нас не было б, тут ішла б вайна. Таму што войскі НАТА былі гатовы ўжо ў Беларусь уступіць. Ім (апанентам улады. - Заўвага) трэба было толькі на суткі ўзяць уладу і запрасіць сюды войскі НАТА - гэта прамое сутыкненне з Расіяй. Гэта ядзерная вайна. Таму міне час, вы яшчэ ацэніце тое, што мы зрабілі ў 2020 годзе, - сказаў Прэзідэнт. - Гэта не Украіна, тут адразу адбылося б сутыкненне НАТА і расійскіх Узброеных сіл. Нас перамалолі б. Таму міне час, мы гэта ацэнім".

Прычым Захад разумеў, што Беларусь трэба браць імгненна, зацягваць сітуацыю нельга. Таму гэтыя спробы Кіраўнік дзяржавы і называе бліцкрыгам. "А імгненна не атрымалася", - канстатаваў ён.

Няпроста ў 1990-я было і з пункту гледжання эканомікі. У краіны было мала грошай. Беларусы выраблялі добрую прадукцыю, але ўзнікалі праблемы з яе рэалізацыяй.

"Асабліва было складана захаваць незалежнасць. Нікому наша незалежнасць не была патрэбна. У эканоміцы мы канкурэнты, усе хацелі паглынуць. У палітыцы мы таксама канкурэнты, усе глядзелі і зубамі ляскалі. Але трэба ўмець сябе абараніць. Цяпер мы ўжо крыху навучаны гэтаму, і ўжо ёсць чым абараніць сваю краіну. Тады было складаней", - заўважыў беларускі лідар.

Аляксандр Лукашэнка ў час сустрэчы з маладзёжным актывам быў праінфармаваны аб тым, што БРСМ мае ​​намер накіраваць сродкі на будаўніцтва Рэспубліканскага цэнтра патрыятычнага выхавання моладзі ў Кобрынскім умацаванні Брэсцкай крэпасці.

Кіраўнік БРСМ Аляксандр Лук'янаў расказаў: "Ваша даручэнне аб тым, каб мы папрацавалі над зборам сродкаў на будаўніцтва рэспубліканскага патрыятычнага цэнтра ў Брэсцкай крэпасці, ідзе поўным ходам".

"Малайцы, падключыліся, я назіраю за гэтым", - заўважыў Аляксандр Лукашэнка.

"Падключылі грамадскасць, грамадскія арганізацыі, палітычныя партыі. Гэта справа моладзі перш за ўсё, але і ўсяго нашага грамадства. Можа, нам не трэба такіх шыкоўных комплексаў, як, напрыклад, у Падмаскоўі", - прадоўжыў лідар БРСМ.

Наконт стварэння патрыятычнага цэнтра ён растлумачыў: "У нас там ужо гістарычны фундамент такі, што дзеці  будуць адчуваць: каля 80 гадоў таму дзяды і прадзеды ад фашыстаў абаранялі нашу краіну".

"На сённяшні дзень моладдзю сабрана больш за 160 тысяч, каля мільёна сабрана грамадскасцю. Усяго каля васьмі мільёнаў. Мы ў пастаяннай камунікацыі з Міністэрствам абароны, яны прапанавалі гэту ідэю, з Брэсцкім аблвыканкамам - ужо на фінальным этапе ўзгадненне праектна-каштарыснай дакументацыі. На працягу лістапада мы разлічваем пачаць першыя работы", - расказаў Аляксандр Лук'янаў.

Ён таксама адзначыў: "У гэтым годзе мы актыўна працавалі - байцы студэнцкіх атрадаў, валанцёры, актывісты - і сакумулявалі вялікую для нас суму - каля паўмільёна беларускіх рублёў. У адпаведнасці з вашай падтрымкай, указам гэтыя сродкі, як правіла, мы накіроўваем на падтрымку студатрадаўскага руху, правядзенне форумаў, фестываляў. Але нам цяпер трэба канцэнтравацца вакол значных праектаў. У мяне ёсць такое камсамольскае даручэнне - папрасіць вашага дазволу і накіраваць гэтыя паўмільёна рублёў на будаўніцтва Рэспубліканскага цэнтра патрыятычнага выхавання моладзі на тэрыторыі паўночнага вострава Кобрынскага ўмацавання Брэсцкай крэпасці. І гэта будзе нашым істотным укладам для таго, каб гэты цэнтр адбыўся і да юбілею Вялікай Перамогі ў 2025 годзе першая чарга будаўніцтва была завершана".

У сувязі з гэтым Аляксандр Лукашэнка падкрэсліў: "Вашы грошы - будзем удзячныя, калі туды накіруеце. Значыць, з бюджэту спатрэбіцца менш дапамогі".

У Кіраўніка дзяржавы пацікавіліся, якія святы і традыцыі існавалі ў яго студэнцкія і студатрадаўскія гады.

Прэзідэнт падзяліўся, што працаваў у студатрадзе на меліярацыі: "Гэта такая не вельмі распаўсюджаная работа. Па-мойму, у Клімавіцкім раёне працавалі... Гэта вялікі вопыт. Меліярацыю я добра ведаю".

Аляксандр Лукашэнка таксама звярнуў увагу, што тэма меліярацыі актуальная і ў наш час. "У гэтым годзе выдзелілі сур'ёзныя сродкі, за пяць гадоў поўнасцю адновім тое, што ўпушчана было. І дадаткова ўвядзём плошчы для пашырэння сельгасугоддзяў. Сельская гаспадарка развіваецца", - падкрэсліў Прэзідэнт.

Ён звярнуў увагу на важнасць развіцця жывёлагадоўлі і забеспячэння кармавой базы для яе. Пры гэтым кіраўнік дзяржавы падкрэсліў, што неабходна вельмі разумна падыходзіць да тэмы меліярацыі, а не так, як раней, калі часам асушалі землі бяздумна.

"Вельмі важныя былі перыяды маёй работы ў рэальным сектары эканомікі", - заўважыў Аляксандр Лукашэнка. Пры гэтым ён звярнуў увагу, што яго заўсёды цягнула на прыроду.

"Мяне туды ніхто не пасылаў, я сам папрасіўся, - расказаў ён аб сваім шляху ў сельскую гаспадарку. - Я ў вёсцы вырас".

Прэзідэнт таксама расказаў, як ён, гісторык па першай адукацыі, трапіў у сельскую гаспадарку: "Мяне туды не гналі. Я сам хацеў там працаваць. Я да гэтага часу люблю працаваць на зямлі".

"Гэта самыя былі цікавыя часы ў маім жыцці", - падзяліўся Кіраўнік дзяржавы.

"Прыязджаю ў вёску, я там адпачываю. Гэта прырода, гэта маё, - заўважыў Прэзідэнт. - Агітую вас усіх, хто хоча працаваць па-сапраўднаму, - гэта сельская гаспадарка. Гэта вёска".

Пры гэтым Аляксандр Лукашэнка падкрэсліў, што не павінны вёскі ў Беларусі паміраць.

Удзельнікі сустрэчы звярнулі ўвагу на добрую традыцыю ў нашай краіне высаджваць дрэвы: з'яўляюцца алеі сямейных дрэў, "Сады надзеі", праводзяцца тыдні лесу. Адзначыўшы асаблівае стаўленне Прэзідэнта да прыроды і да працы, яны спыталі, якім было першае дрэва, пасаджанае Аляксандрам Лукашэнкам. Як расказаў Кіраўнік дзяржавы, ён высадзіў такую ​​вялікую колькасць дрэў, што цяпер цяжка і ўспомніць, якім менавіта быў першы саджанец. Тым больш што ў сельскай мясцовасці, дзе ён нарадзіўся і вырас, гэты самы штодзённы занятак, якому не надаюць вялікага значэння. Ды і ў якасці Кіраўніка дзяржавы Аляксандр Лукашэнка рэгулярна прымае ўдзел у пасадцы дрэў, у тым ліку са сваімі сынамі.

Па ініцыятыве Прэзідэнта тэрыторыя вакол Палаца Незалежнасці таксама напоўнена зялёнымі насаджэннямі, закладзены яблыневы сад. Многія дрэвы, узрост якіх налічвае не адзін дзясятак гадоў, былі захаваны ў час будаўніцтва палаца, і гэта было адно са строгіх патрабаванняў Кіраўніка дзяржавы.

На сустрэчу з Аляксандрам Лукашэнкам прадстаўнікі маладзёжнага актыву прыйшлі з сімвалічнымі падарункамі. Адзін з іх - памятная "Лічбавая зорка", прымеркаваная да 10-годдзя Палаца Незалежнасці. Дзякуючы ёй палац будзе алічбаваны і ўключаны ў пералік культурна-гістарычных аб'ектаў нашай краіны, растлумачылі прадстаўнікі БРСМ. Лідар арганізацыі Аляксандр Лук'янаў, гаворачы аб праекце, удакладніў: "Наша маладое пакаленне не дастаць з гаджэтаў, і мы прапануем нават у гэты час, калі яны там "знаходзяцца", займацца грамадска-карыснай справай - віртуальна выходзіць на помнікі часоў Вялікай Айчыннай вайны, культурныя аб'екты, ажыццяўляць пошукавую дзейнасць і рэгістравацца на нашым партале "Лічбавая зорка".

Прэзідэнту таксама падарылі калекцыю сучасных значкоў, знакаў узнагароды і ўзнагарод Беларускай рэспубліканскай піянерскай арганізацыі і Беларускага рэспубліканскага саюза моладзі.

На тэрыторыі Палаца Незалежнасці прадстаўнікі маладзёжнага актыву Беларусі сумесна з Кіраўніком дзяржавы заклалі Алею пакаленняў.