Сустрэча з Міністрам замежных спраў, працаўладкавання за мяжой і турызму Шры-Ланкі Віджытам Хератам

Прэзідэнт Беларусі Аляксандр Лукашэнка 14 мая сустрэўся з Міністрам замежных спраў, працаўладкавання за мяжой і турызму Шры-Ланкі Віджытам Хератам.

"Рады з вамі сустрэцца. Ёсць аб чым пагаварыць. У нас з вамі даўнія адносіны і мы адзін аднаго добра ведаем. Але толькі, напэўна, дзякуючы - калі гаварыць пра эканоміку - адной-дзвюм пазіцыям таварнай групы. Мы хацелі б з вамі пашырыць наша супрацоўніцтва. Я хачу, каб вы, знаходзячыся ў Беларусі, з дапамогай пасла і нашага міністра, паглядзеўшы нашы магчымасці, вызначыліся, чым мы яшчэ зможам быць карысныя для Шры-Ланкі", - сказаў Кіраўнік дзяржавы.

"Мы з вялікім задавальненнем будзем мець з вамі адносіны, паляпшаць іх. І ў сферы эканомікі, фарміруючы "дарожную карту", план нашых узаемаадносін. Эканоміка - гэта база любых адносін. Таму мы хацелі б выбудаваць з вамі цвёрдыя добрыя адносіны", - падкрэсліў Аляксандр Лукашэнка.

Ён дадаў, што краінам у сферы эканомікі трэба вызначыцца, што ім цікава і патрэбна адзін у аднаго: "План нашых адносін, няхай ён будзе з трох-чатырох пунктаў - няважна, але яго трэба мець. Для таго, каб мы мелі пэўныя мэты, да якіх мы разам з вамі будзем імкнуцца".

Аляксандр Лукашэнка адзначыў, што Беларусь - краіна з развітой прамысловасцю і сельскай гаспадаркай, і Шры-Ланцы могуць быць цікавыя адпаведныя сферы. "Усё, чым мы багатыя, у вашым распараджэнні. Можаце, вывучыўшы нашы магчымасці, зрабіць для сябе пэўныя высновы, у якім напрамку рухацца", - сказаў Прэзідэнт.

Кіраўнік знешнепалітычнага ведамства Шры-Ланкі ў сваю чаргу падзякаваў беларускаму лідару за магчымасць сустрэцца і абмеркаваць пытанні двухбаковага супрацоўніцтва. "Як вы правільна адзначылі, нашы краіны ўзаемадзейнічаюць адна з адной даволі працяглы час - з 2000 года. Мы спадзяёмся, што ў ходзе бягучага візіту мы зможам рушыць далей у развіцці нашых двухбаковых адносін, у тым ліку ў эканамічнай сферы", - сказаў Віджыта Херат.