Кадравыя назначэнні

Прэзідэнт Беларусі Аляксандр Лукашэнка 27 чэрвеня зрабіў кадравыя назначэнні.

Кіраўнік дзяржавы заўважыў, што ўсе назначэнцы - гэта ў асноўным маладыя, перспектыўныя людзі. У той жа час работа на новых пасадах для іх не новая: так ці інакш яны ўжо сутыкаліся з пытаннямі, якія цяпер будуць у іх непасрэднай кампетэнцыі.

"Новае пакаленне. Тое, аб чым я гаварыў: ідзе змена пакаленняў. Павінны прыйсці да ўлады (не толькі да кіравання асобнымі напрамкамі) маладыя, перспектыўныя і прафесіянальныя людзі. Непрафесіяналаў за сталом няма", - падкрэсліў Аляксандр Лукашэнка.

Паводле яго слоў, новаму пакаленню кіраўнікоў на працягу некалькіх гадоў неабходна будзе рэалізоўваць усё, аб чым ішла размова на праведзеным у красавіку VII Усебеларускім народным сходзе.

"Краіна павінна атрымаць добры Урад, "правадныя рамяні" ад Прэзідэнта да Урада праз Адміністрацыю. Павінен быць рэзультат і эфектыўнасць. Папярэджваю катэгарычна ўсіх: ніякай цяганіны і бюракратыі. Калі трэба вырашыць пытанне і вы бачыце, што яго можна вырашыць за дзень-два, вырашайце. Барані вас бог: з панядзелка мяне будуць, як і раней, інфармаваць па гэтай цяганіне і бюракратызме. Асабліва папярэджваю Адміністрацыю Прэзідэнта: міністры павінны бегаць, варушыцца. Калі недзе апарат Урада не спрацаваў, падказвайце і строга патрабуйце, - паставіў задачу Кіраўнік дзяржавы. - Эфектыўнасць трэба павышаць неймаверна, калі мы хочам выстаяць у гэтай шалёнай барацьбе. Што адбываецца вакол, кожны з вас ведае".

Аляксандр Лукашэнка назначыў Кіраўніком Адміністрацыі Прэзідэнта Дзмітрыя Крутога, а Першым намеснікам Кіраўніка - Наталлю Пяткевіч.

"Учора мною прыняты шэраг кадравых рашэнняў. Я хацеў бы іх агучыць у прысутнасці службовых асоб і адказных, і перш за ўсё тых, хто назначаецца. Мною прынята рашэнне аб назначэнні Кіраўніка Адміністрацыі Прэзідэнта. З заўтрашняга дня гэтыя абавязацельствы і функцыі будзе выконваць Дзмітрый Мікалаевіч Крутой", - заявіў Кіраўнік дзяржавы.

"Вы назначаецеся Кіраўніком Адміністрацыі Прэзідэнта, Вы ж адказны за рэалізацыю нашых усіх дамоўленасцей па Расійскай Федэрацыі. Вы як ніхто іншы ведаеце гэтыя праблемы. Акумулюйце іх у сябе, як гэта робіць Снапкоў (першы віцэ-прэм'ер Мікалай Снапкоў. - Заўвага) па Кітаі. Два нашыя асноўныя партнёры - Расія і Кітайская Народная Рэспубліка. Тут павінен быць адказны і мэтанакіраваны падыход па выкананні нашых абавязацельстваў і развіцці нашых адносін. Гэта пакуль за вамі застаецца. Калі вы адчуеце, што гэты кантроль не павінен быць, вы мне скажаце. Па ўсіх напрамках. Аж да наведвання вамі, як гэта было на пасадзе пасла, расійскіх рэгіёнаў. Забароненых тэм няма", - сказаў Аляксандр Лукашэнка.

Разам з гэтым Кіраўнік дзяржавы падкрэсліў, што гэтыя даручэнні не азначаюць, што Дзмітрыю Крутому неабходна падмяняць новага пасла. "Вы чалавек карэктны, я гэта ведаю. Не ў свае пытанні вы не палезеце. Але будзьце акуратным і карэктным у адносінах з новым паслом. Ён павінен займацца пытаннямі, вы падказваеце, а недзе і падштурхоўваеце, кантралюючы тыя ці іншыя працэсы. І, зразумела, за вамі пакуль (пакуль вы мне не скажаце) застаецца адпаведная камісія", - адзначыў Прэзідэнт.

"Але першарадная ўвага - Адміністрацыя Прэзідэнта", - падкрэсліў беларускі лідар.

Прэзідэнт растлумачыў выбар кандыдатуры Дзмітрыя Крутога тым, што ён не зусім даўно працаваў у Адміністрацыі Прэзідэнта, мае вопыт работы ва ўрадзе і вельмі добра валодае пытаннямі Адміністрацыі Прэзідэнта і ўзаемадзеяння з Урадам.

Аляксандр Лукашэнка падкрэсліў, што гэта важна ў плане кантролю за выкананнем даручэнняў Прэзідэнта. "Гэта мы асобна, прыйдзеце з Прэм'ер-міністрам, абмяркуем", - сказаў Кіраўнік дзяржавы.

Каменціруючы назначэнне Наталлі Пяткевіч, Аляксандр Лукашэнка сказаў: "Апладысментаў не будзе (з боку падначаленых. - Заўвага), ведаючы Вашу патрабавальнасць, Ваш прынцыповы падыход. Вашы веды. Вы ведаеце ўсё".

Прэзідэнт назначыў паслом у Расійскай Федэрацыі Аляксандра Рагожніка, які да гэтага часу займаў пасаду Міністра прамысловасці.

Такі кадравы выбар Кіраўнік дзяржавы растлумачыў тым, што ў асноўным перспектыва работы Беларусі з Расіяй - гэта тыя праекты, якія ляжаць у сферы прамысловасці. "У нас там пытанняў шмат яшчэ. Няхай займаецца", - сказаў беларускі лідар.

Звяртаючыся да Дзмітрыя Крутога, які да гэтага часу быў паслом у Расіі, а цяпер назначаны Кіраўніком Адміністрацыі Прэзідэнта, Аляксандр Лукашэнка адзначыў: "Ваш кантроль. Дзе трэба - падключайце Урад, дзе трэба - варушыце пасла. Рагожнік папярэджаны аб актыўнасці на расійскай прасторы. Таму што галоўная характарыстыка, якой я валодаю, цяперашняга пасла - Дзмітрыя Крутога - ён сабе супакою не дае, кідаецца па ўсёй Расіі як вялікі працаўнік. І другое - сваім падначаленым - таксама ім неспакойна: калі своечасова не выканаў тое ці іншае абавязацельства, тады працуй і ў суботу, і ў нядзелю".

"Гэта тое, што патрэбна сёння для Адміністрацыі Прэзідэнта, і перш за ўсё ў плане майго кантролю над урадам і іншымі структурамі. Працаваць павінны сёння ў тры разы больш, чым гэта было ўчора", - дадаў беларускі лідар.

Сяргей Алейнік, які да гэтага часу працаваў на пасадзе Міністра замежных спраў, назначаны членам Савета Рэспублікі.

"Ён будзе ўзначальваць адпаведную камісію. Ён з гэтым пагадзіўся", - сказаў Аляксандр Лукашэнка.

Кіраўнік дзяржавы нагадаў, што былы дыпламат Сяргей Рачкоў узначальвае ў Палаце прадстаўнікоў Пастаянную камісію па міжнародных справах. Аналагічная пасада ў Савеце Рэспублікі будзе і ў Сяргея Алейніка.

"Парламенцкі кантроль над работай Міністэрства замежных спраў, па асобных пытаннях - Урада будзе ўзмоцнены, - заявіў Прэзідэнт. - Усе вы прасілі перадачы большых паўнамоцтваў - вы іх атрымаеце, у тым ліку і парламент".

Кіраўніком знешнепалітычнага ведамства назначаны Першы намеснік Кіраўніка Адміністрацыі Прэзідэнта Максім Рыжанкоў.

"Ведаю, што ўвесь гэты час Вы не маглі адарвацца (і добра) ад сваёй "альма-матар" і ранейшай працы (размова пра вялікі вопыт папярэдняй работы Максіма Рыжанкова ў сістэме МЗС. - Заўвага). Але мяне не гэта вабіць у Вас. Вы - чалавек жорсткі, патрабавальны. МЗС трэба прыводзіць да розуму. Гавару адкрыта: узварухнуць МЗС трэба, каб яно пачало працаваць", - сказаў Кіраўнік дзяржавы, звяртаючыся да Максіма Рыжанкова.

Аляксандр Лукашэнка запатрабаваў у гэтым плане дзейнічаць сумесна з Прэм'ер-міністрам Раманам Галоўчанкам. "Так, каб МЗС займалася сваімі пытаннямі і рэалізоўвала тое, што яно павінна рэалізаваць для краіны. Усе пытанні, - сказаў беларускі лідар. - І Снапкова (першага віцэ-прэм'ера Мікалая Снапкова, які курыруе адносіны з Кітаем. - Заўвага) па Кітаі, і Крутога (новы Кіраўнік Адміністрацыі Прэзідэнта, а раней - пасол у Расіі Дзмітрый Крутой. - Заўвага) па Расіі. І на далёкай дузе адказны ў нас будзе Міністр (Індыя таксама ў цябе будзе), і Прэм'ер-міністр. Гэта далёкая дуга. Усё павінна сыходзіцца ў МЗС".

Кіраўнік дзяржавы асабліва папярэдзіў, што "ніхто не павінен за Міністэрства замежных спраў выконваць работу і ніхто не павінен падмінаць, нахіляць міністра і міністэрства". У гэтым плане ён адзначыў якасці характару Максіма Рыжанкова, з якім такія спробы ў прынцыпе не будуць мець поспеху. "Гэта таксама вельмі важна. Астатняе абмяркуем. Трэба актывізавацца і прымусіць міністэрства працаваць", - падкрэсліў Аляксандр Лукашэнка.

"Адзінае, хачу папярэдзіць: Рыжанкова асабліва туды-сюды хістаць дарэмна. І не толькі таму, што чалавек фактычна падначалены Прэзідэнту, але яшчэ і таму, што ў яго ў характары гэтага няма, каб ім панукалі. Але кантроль павінен быць: акуратны, сумленны. Давайце параімся перад назначэннем паслоў (абмяркуюць на камісіі) і іншае, іншае, іншае. Гэтак жа будзем рабіць яшчэ і наконт міністраў, і іншых службовых асоб", - адзначыў Аляксандр Лукашэнка.

Асобна Прэзідэнт выказаўся пра кадры ў міністэрстве: "Шанц дайце ўсім. Ведаю, што там няпростая абстаноўка. Усім дайце (шанц. - Заўвага), але той, хто не хоча працаваць, і той, хто мяне сёння не пачуе, яны працаваць не павінны".

Міністрам прамысловасці Беларусі назначаны Аляксандр Яфімаў, які да гэтага часу ў гэтым ведамстве займаў пасаду намесніка Міністра.

Кіраўнік дзяржавы адразу акрэсліў кола задач перад новым міністрам, які цяпер знаходзіцца за мяжой. Ён нагадаў, што яшчэ раней, калі Аляксандр Яфімаў працаваў у ААТ "АМКАДОР", абмяркоўваў з ім шэраг пытанняў.

"Калісьці да назначэння яго ў Міністэрства прамысловасці, гэта мая была калісьці ініцыятыва, мы сустракаліся, глядзелі на некаторыя рэчы, якія вырабляў і вырабляе "АМКАДОР". Я яму тады сказаў: "Ну што ж, трэба гэта тыражаваць на ўсю краіну". А што тыражаваць? Мы - машынабудаўнічая краіна. Так? Так. Рухавікі робім да ўсіх машын сваіх? Не. Каробкі перадач наогул не робім, акрамя трактара і гэтак далей. Вось наша перспектыва. Гэта адзін з напрамкаў, - сказаў беларускі лідар. - Далей - аўтамабілі народу спадабаліся "БЕЛДЖЫ". Добры аўтамабіль. Я ўжо гаварыў, што мара Прэзідэнта была зрабіць гэта. Мы зрабілі. Далей трэба паглыбляцца і развівацца. Трэба вырабляць кузавы як мінімум, каб не вазіць іх аднекуль. Пакуль у асноўным гэта зборачная вытворчасць. Нам трэба выходзіць на вытворчасць сваіх аўтамабіляў праз масіраваную паглыбленую лакалізацыю".

"Аб гэтым мы яшчэ пагаворым з Яфімавым. Трэба запланаваць яго даклад Прэзідэнту пасля вяртання з Кітая. Разам з Пархомчыкам (віцэ-прэм'ер Пётр Пархомчык, які курыруе прамысловасць. - Заўвага) няхай прыходзяць і дакладваюць аб перспектывах", - дадаў Кіраўнік дзяржавы.

Юрый Шулейка з пасады старшыні Брэсцкага аблвыканкама пераходзіць на пасаду Намесніка Прэм'ер-міністра. Ва Урадзе ён будзе курыраваць сферу АПК.

Гэта пасада ва ўрадзе была вакантнай з таго часу, як кіраўнік дзяржавы назначыў Леаніда Зайца членам Савета Рэспублікі Нацыянальнага сходу восьмага склікання.

"Юрый, паглядзіце, якія функцыі Вы возьмеце на сябе, акрамя вёскі. Чаму? Мне патрэбны талковы, дасведчаны перапрацоўшчык. Мы ўсё "сельская гаспадарка, сельская гаспадарка", як быццам гэта раслінаводства і жывёлагадоўля. Ды не, гэта яшчэ перапрацоўка і продаж прадукцыі. Гэта жалезная работа, Юрый Вітольдавіч, - Ваша. Кантроль за выкананнем тых праграм, якія вызначаны Прэзідэнтам. Вы іх добра ведаеце", - сказаў Аляксандр Лукашэнка.

Прэзідэнт адзначыў паспяховую работу Юрыя Шулейкі на пасадзе старшыні аблвыканкама: "У яго атрымалася, гэта вельмі важна. Значыць, ведае, што і там адбываецца".

"Я ўдзячны, што ты згадзіўся на гэту пасаду. Я разумею, што губернатар ёсць губернатар: далей ад Галоўчанкі, Рыжанкова, Крутога, там цішэй. Тут трэба выбудоўваць добрую сістэмную работу ў сельскай гаспадарцы перш за ўсё. Ты як дасведчаны чалавек згадзіўся пайсці на гэту работу - дзякуй. Захочаш на нейкую іншую работу, я табе абяцаў: прыйдзеш, скажаш - разгледзім. Я думаю, што ў цябе атрымаецца. Мы гатовы падтрымліваць і дапамагаць табе ў гэтым плане", - заявіў Кіраўнік дзяржавы.

Разам з тым Аляксандр Лукашэнка звярнуў увагу, што, пакуль у Брэсцкую вобласць не будзе назначаны новы кіраўнік, Юрый Шулейка будзе курыраваць гэты рэгіён. Гэтыя пытанні і пасля застануцца ў яго кампетэнцыі як упаўнаважанага Прэзідэнта.

Падключыць да гэтай работы Кіраўнік дзяржавы таксама папрасіў сенатара Міхаіла Русага.

"Я баюся, каб мы там не страцілі ўборачную кампанію. Гэта вельмі важна", - падкрэсліў Прэзідэнт.

Міністэрства сельскай гаспадаркі і харчавання Беларусі ўзначаліў Анатоль Ліневіч. Ён пераходзіць на міністэрскую пасаду з пасады першага намесніка старшыні Віцебскага абласнога выканаўчага камітэта.

"За Вамі застаецца Віцебская вобласць. Даўжок ёсць невялікі, можа. Яшчэ я не ведаю. Паедзем туды разам з вамі і будзем разбірацца з Субоціным (старшыня Віцебскага аблвыканкама Аляксандр Субоцін. - Заўвага), ёсць даўгі ці не, што зрабілі, што не зрабілі", - сказаў Аляксандр Лукашэнка.

Прэзідэнт звярнуў асаблівую ўвагу на работу інтэграцыйных аграпрамысловых структур у рэгіёне і арганізацыю ў вобласці ўборачнай кампаніі.

"Размова аб тым, што інтэграцыйныя структуры нешта там загубілі, - дарэмная, беспрадметная размова. Яны выбудаваны такім чынам, што нічога загубіць не могуць. Не атрымаецца - мы іх распусцім, і кожная застанецца пры сваіх інтарэсах. Трэба - вернем туды Шарснёва (былы старшыня Віцебскага аблвыканкама Мікалай Шарснёў. - Заўвага), каб адказваў за гэта. У сэнсе не губернатарам вернем, а на нараду. Я ўсіх знайду, хто выступаў за гэтыя інтэграцыйныя структуры, - папярэдзіў Кіраўнік дзяржавы. - Гэта значыць, пакуль Віцебская вобласць - да назначэння на Вашу пасаду чалавека і потым - застаецца за Вамі. Таму, сыходзячы, вы застаяцеся".

"Вельмі хачу, каб у Вас атрымалася. Буду дапамагаць Вам усяляк. Задачы, якія стаяць перад краінай у галіне сельскай гаспадаркі, Вы ведаеце", - дадаў Аляксандр Лукашэнка.

Ён даручыў прыцягнуць да гэтай работы былога віцэ-прэм'ера, а на гэты час сенатара Леаніда Зайца. Цяпер ён будзе кантраляваць не толькі пытанні меліярацыі, якія дасталіся яму, але і дапамагаць новаму Міністру па іншых напрамках, пакуль у гэтым ёсць такая неабходнасць. Яго веды і вопыт будуць вельмі дарэчы.

"Майце на ўвазе, што вы не ўбіраеце і не сееце. Ваша задача - перш за ўсё новыя тэхналогіі. Новыя, новыя, новыя - у краіну. А губернатары няхай сеюць і ўбіраюць. Таму новыя тэхналогіі і кантроль за выкананнем гэтых тэхналогій. Вузкія месцы вы ведаеце, - падкрэсліў Прэзідэнт. - Чаму з вялікай колькасці прапаноў па Міністру я выбраў Вас: галоўнае было ў тым, што Вы працавалі кіраўніком у сельскай гаспадарцы, і былі нядрэнным кіраўніком, і ў вялікіх гаспадарках. Гэта Ваша вялікая перавага".

Гаворачы пра Сяргея Барташа, які ўзначальваў Міністэрства сельскай гаспадаркі і харчавання, Кіраўнік дзяржавы даручыў унесці прапановы па яго далейшым працаўладкаванні. Экс-міністр будзе пераведзены на новую работу.

Аляксандр Лукашэнка назначыў Юрыя Фралова памочнікам Прэзідэнта Беларусі па Мінску.

Да гэтага часу Юрый Фралоў працаваў у Камітэце дзяржаўнага кантролю. Ён кіраваў галоўным упраўленнем кантролю будаўніцтва, жыллёва-камунальнай гаспадаркі і па Мінску.

Аляксандр Лукашэнка ахарактарызаваў свайго новага памочніка як вопытнага чалавека. "Выбраў я Вас сярод іншых, таму што вы ажыццяўлялі кантроль за дзейнасцю кадраў і прадпрыемстваў у тым ліку. Вас станоўча характарызуе ўся ваша сістэма. Малады перспектыўны чалавек. Кантроль у Мінску - гэта вельмі важна", - заявіў Прэзідэнт.